Eski se Bondie ki’nn kree liniver ek bann kitsoz ki viv ladan? Ouswa zot inn aparet par azar? Seki sa de siantis dan koumansman lartik la dir, li bien diferan ar seki Labib dir. Ena dimounn ki krwar dan seki sa bann siantis-la dir ek ena lezot ki krwar dan seki Labib dir. Ena mem bann liv ek bann dimounn ki’nn koz lor la. Me, ena boukou ki pa tro kone ki pou krwar.

Kitfwa ou bann profeser lekol inn montre ou ki liniver ek bann kitsoz ki viv ladan inn aparet enn kout koumsa ek ki pena okenn Kreater. Me eski ou bann profeser inn donn ou bann prev ki pena enn Kreater? Parkont, kitfwa ou’nn tann bann sef relizie dir ki ena enn Kreater. Me eski zot inn montre ou bann prev ki Li existe? Ouswa eski zot inn dir ou ki ou zis bizin aksepte ki Bondie existe parski sa montre ki ou enn dimounn ki ena lafwa?

Sirman ou’nn deza reflesi lor la ek kitfwa ou panse ki personn pa kapav sir si vremem ena enn Kreater. Ek kitfwa ou pe demann oumem si li vremem vo lapenn konn repons-la.

Sa nimero Leve! la pou koz premierman lor bann prev ki’nn pous bann dimounn pou krwar ki ena enn Kreater. Lerla nou pou al gete kifer li inportan pou kone kouma lavi inn koumanse lor later.