María Isabel c’est enn jeune proclamatrice bien zelé ki vive dan la ville San Bernardo, en Chili, dan l’Amérique du Sud. So famille ek li, zot forme parti dan peuple Mapuche. Avek enthousiasme, tou so famille ti soutenir bann grand zeffort ki ti faire pou forme enn nouveau congregation dan langue Mapuche, ki appel aussi Mapudungun.

Kan ti annoncé ki Mémorial la mort Jésus pou faire aussi en Mapudungun, ek ki finn imprime 2,000 invitation dan sa langue-la, sa ti faire María Isabel reflechi. Li ti demann-li-mem ki li ti kapav faire pou apporte so l’aide? Li ti rappel l’experience bann lezot jeune Temoin ki ti gagne bann bon resultat kan zot ti preche avek zot bann camarade lekol ek zot professeur. Li ti koz sa ar so bann parent, ek ensam zot ti decidé ki María Isabel reflechi lor enn plan pou distribué bann l’invitation dan lekol. Ki plan María Isabel inn trouvé?

Premierement, María Isabel ti demann permission bann responsable so lekol pou li mette enn l’invitation zis devant l’entrée lekol. Zot ti accepté ek zot ti mem felicite li pou so l’idée. Enn gramatin, pendant l’assemblée dan la cour lekol, principal ti mem faire enn l’annonce dan haut-parleur concernant sa l’invitation-la!

Apré sa, María Isabel ti demann permission pou visite tou bann classe. Apré ki li ti gagne permission ar bann professeur, dan chaque classe, li ti demandé si parmi zot ena bann Mapuche. Li dire: “Mo ti pensé ki ti pou ena zis 10 ou-soit 15 Mapuche dan lekol, mais ti ena beaucoup plus​—finalement, mo ti laisse 150 invitation!”

Enn madame ki ti trouve sa l’invitation Mémorial-la devant l’entrée lekol, ti demandé kisannla ki li bizin contacté pou sa l’evenement-la. Maziné ki quantité li ti etonné kan zot ti amenn li ar enn tifi dix an! Avek enn ti sourire, María Isabel dire: “Madame-la ti pé attann enn kikenn ki pli agé.” Apré ki María Isabel ti donne li enn l’invitation ek enn ti explication, li ti demann madame-la so l’adresse pou ki li ek so parent kapav visite li pou koz plus lor Royaume Bondié. Nou kapav maziné ki quantité sa 20 proclamateur ki servi dan territoire Mapudungun-la ti content kan zot ti trouve sa madame-la avek 26 lezot dimoune interessé parmi bann Mapuche, vinn assisté Mémorial! Asterla, c’est enn congregation ki pé bien progressé!

N’importe ki l’age ou ena, eski ou kapav prend mem l’initiative pou invite ou bann camarade lekol ou-soit travail pou assisté Mémorial, enn discours publik, ou-soit enn l’assemblée district? Kifer ou pa faire recherche dan nou bann publication pou trouve bann l’experience ki kapav donne ou bann l’idée pou reussi enn projet coumsa? Ek aussi, prié Jéhovah pou Li donne ou so l’esprit saint pou ou gagne courage pou koz lor Li. (Luc 11:13) Si ou faire sa, kitfois ou aussi ou pou bien etonné par bann bon resultat ki ou pou gagné ek sa pou encourage ou beaucoup parski ou finn bien prepare-ou.