1, 2. Couma bann serviteur Bondié finn toujours senti-zot dan sa le monde-la, ek dan ki sens zot ena enn lakaz?

  ESKI ou senti-ou a l’aise ek en securité dan sa le monde-la? Si ou reponse li non, alors ou pa tousel! Depuis touletan, bann dimoune ki vrai-mem content Jéhovah finn toujours senti-zot couma bann etranger dan sa le monde-la. Par exemple, bann fidele serviteur Bondié ki souvent ti bizin change camp a travers pays Canaan, zot aussi zot ti ena mem sentiment ek “zot ti dire en publik ki zot ti bann etranger ek bann habitant temporaire.”​—Héb. 11:13.

² Bann chretien oint aussi pareil. ‘Place kot zot ena droit pou resté li trouve dan le ciel,’ alors zot considere-zot-mem couma “bann etranger ek bann habitant temporaire” dan sa systeme-la. (Phil. 3:20; 1 Pierre 2:11) Bann “lezot brebis,” zot aussi zot “pa faire partie dan le monde, pareil couma [Jésus pa ti] faire partie dan le monde.” (Jean 10:16; 17:16) Malgré sa, bann serviteur Bondié pa coumadir bann ki pena “lakaz.” En realité, nou senti-nou protegé dan enn lakaz kot ena plus l’amour ek plus securité ki kapav ena, enn lakaz ki nou trouvé avek lizié nou la foi. Moïse ti ecrire: “O Jéhovah, to finn vinn enn vrai refuge pou nou, generation apré generation.” a (Ps. 90:1) Couma Jéhovah finn montré ki Li “enn vrai refuge,” ou-soit enn lakaz, pou so bann serviteur fidele dan le passé? Couma Li “enn vrai refuge” pou so peuple azordi? Ek couma Li pou montré dan l’avenir ki Li tousel Li enn refuge ki sur?

3. Dan Psaume 90:1 ki sujet, zimage, ek point commun nou trouvé?

³ Dan la Bible, souvent nou trouve bann l’expression ki crée bann zimage dan nou l’esprit. Dan Psaume 90:1 nou trouve enn sujet, enn zimage, ek enn point commun ki ena entre sa deux-la. Sujet-la  c’est Jéhovah. Zimage-la c’est enn refuge, ou-soit enn lakaz. Kan nou pense enn lakaz nou pense enn place kot ena l’amour, la paix, ek protection. Pou Jéhovah aussi pareil. Par exemple, Jéhovah donne so peuple so protection. Sa li en accord avek seki la Bible dire, setadir ki Li l’amour. (1 Jean 4:8) Li aussi enn Bondié la paix, ki faire so bann serviteur fidele “reste en securité.” (Ps. 4:8) Anou guetté couma Jéhovah finn vinn enn refuge pou bann serviteur fidele dan le passé. Anou commence avek Abraham.

4, 5. Couma Bondié inn montré ki Li “enn vrai refuge” pou Abraham?

⁴ Maziné ki Abraham ti ressenti kan Jéhovah ti dire li: “Quitte to pays, to famille . . . ek al dan pays ki mo pou montré toi.” Kitfois Abraham ti tracassé, mais nou sur ki letan li ti tann seki Jéhovah ti dire li apré, tou so bann doute ti envolé. “Mo pou faire toi vinn enn grand nation ek mo pou beni toi ek mo pou faire to nom vinn grand . . . Ek mo pou beni bann ki beni toi, ek sa kikenn ki maudit toi-la, mo pou maudit li.”​—Gen. 12:1-3.

⁵ Par sa bann parole-la, Jéhovah ti faire promesse pou vinn enn refuge ki sur pou Abraham ek pou so bann descendant. (Gen. 26:1-6) Jéhovah ti tini so promesse. Par exemple, Li ti empeche Pharaon, le Roi l’Égypte ek Abimélek, le Roi Guérar pou touye Abraham ek prend Sara, so femme. Li ti protege Isaac ek Rébecca dan enn mem situation. (Gen. 12:14-20; 20:1-14; 26:6-11) La Bible dire: “[Jéhovah] pa ti laisse okenn dimoune kokin tou seki zot ena, mais a cause zot Li ti corrige bann le roi, kan Li ti dire: ‘Pa touche mo bann oint ek pa faire mo bann prophete okenn di-tort.’”​—Ps. 105:14, 15.

6. Ki Isaac ti dire Jacob faire, ek ki Jacob surement ti ressenti?

⁶ Parmi sa bann prophete-la ti ena Jacob, ti-zenfant Abraham. Kan ti arrive ler pou Jacob marié, Isaac, so papa ti dire li: “Fodé pa to marié avek enn parmi bann tifi dan Canaan. Levé, al dan Paddân-Aram, dan lakaz Bethouël, papa to mama ek la-bas, marié avek enn parmi bann tifi Labân.” (Gen. 28:1, 2) Desuite Jacob ti obeir Isaac. Jacob ti quitte lakaz kot li ti pé resté en securité avek so famille en Canaan, ek kitfois li ti tousel kan li ti faire enn voyage plusieurs kilometre pou al Harân. (Gen. 28:10) Plusieurs question surement finn vinn dan so l’esprit: ‘Pou comié temps mo pou allé? Eski mo tonton pou content pou trouve moi? Eski li pou donne moi enn madame ki ena la crainte pou Jéhovah?’ Pena doute ki tou sa bann tracas ki Jacob ti ena-la ti disparette kan li ti arrive Louz ki ti environ 100 kilometre ar Béer-Shéba. Mais ki’nn arrivé dan Louz?

7. A travers enn rêve, couma Bondié ti rassure Jacob?

 ⁷ Dan Louz, Jéhovah ti apparette ar Jacob dan enn rêve, ek Li ti dire li: “Guetté, mo avek toi ek mo pou veille lor toi toute longue chemin kot to pé allé ek mo pou faire toi retourne dan sa pays-la, parski mo pa pou laisse toi tant ki vrai-mem mo pa faire seki mo’nn dire toi.” (Gen. 28:15) Pena doute ki sa bann parole-la ti bien rassure ek reconforte Jacob! Surement apré ki li’nn tann sa, Jacob ti bien envie trouvé couma Jéhovah ti pou realise So promesse. Si ou finn quitte ou lakaz, kitfois pou al servi dan enn lot pays, surement ou bien comprend seki Jacob ti ressenti. Mais pena doute ki ou finn trouvé couma Jéhovah finn prend ou soin.

8, 9. Dan ki fason Jéhovah finn montré ki Li “enn vrai refuge” pou Jacob, ek ki sa aprann nou?

⁸ Kan Jacob ti arrive Harân, Labân​—so tonton​—ti accueillir li lé-bras ouvert ek plitar li ti donne li Léa ek Rachel pou marié. Mais avek le temps, Labân ti essaye trik Jacob kan li ti change so la paye dix fois! (Gen. 31:41, 42) Pourtant, Jacob finn supporte sa bann l’injustice-la parski li ti koné ki Jéhovah ti pou contigne prend li soin​—ek vrai-mem Jéhovah finn faire sa! En realité, kan Bondié ti dire Jacob retourne Canaan, Jacob ti ena “bann grand troupeau zanimo ek bann serviteur ek bann servante ek bann chameau ek bann bourrik.” (Gen. 30:43) Avek enn leker bien reconnaissant, Jacob ti prié: “Mo pa digne pou gagne tou sa l’amour fidele-la et tou sa fidelité ki to’nn montré envers to serviteur-la, parski, kan mo’nn traverse sa la riviere Jourdain-la, mo ti ena zis mo baton mais asterla mo finn vinn deux camp.”​—Gen. 32:10.

⁹ Sa bann l’exemple-la montré ki sa bann parole ki Moïse ti dire dan enn la priere-la, zot bien vrai: “O Jéhovah, to finn vinn enn vrai refuge pou nou, generation apré generation.” (Ps. 90:1) Sa bann parole-la toujours appliké zordi parski avek Jéhovah “pena okenn changement couma dan mouvement l’ombrage.” (Jacq. 1:17) Jéhovah toujours content so bann serviteur fidele ek Li enn refuge pou zot. Anou guetté couma.

10. Kifer nou kapav sur ki Jéhovah Li toujours “enn vrai refuge” pou so bann serviteur?

¹⁰ Faire coumadir ou pé temoigné devant la cour kont enn l’organisation criminel international. Chef sa l’organisation-la li enn grand malin, li ena pouvoir, li enn gros menteur, ek enn assassin. Couma ou pou senti-ou kan ou’nn fini temoigné ek ou pé quitte la cour? En securité? Non ditou! Pena okenn doute ki ou pou ena raison pou demann enn protection. Sa l’exemple-la montré situation ki bann serviteur Jéhovah pé koné zordi. Zot pé temoigne avek zele pou Jéhovah ek sans okenn la crainte zot pé temoigne aussi kont so pli grand l’ennemi, Satan. (Lire Révélation 12:17.) Mais eski Satan finn reussi faire bann serviteur Jéhovah arrete kozé? Non! En realité, nou pé contigne prosperé lor plan spirituel, ek ena enn sel explication pou sa: Jéhovah Li toujours “enn vrai refuge” pou nou, surtout dan sa bann dernier jour ki nou pé vive-la. (Lire Isaïe 54:14, 17.) Mais selman, Jéhovah pa pou contigne reste enn vrai refuge pou nou si nou laisse Satan embete nou ek amenn nou loin ar nou refuge.

11. Ki leson nou kapav aprann ar Abraham, Isaac, ek Jacob?

¹¹ Encore enn fois anou guetté ki leson nou kapav aprann avek Abraham, Isaac, ek Jacob. Mem si zot ti vive dan pays Canaan, zot ti reste separé ar bann dimoune sa pays-la, ek ti detesté la vie immoral ek bann mauvais action ki bann Cananéen ti faire. (Gen. 27:46) Abraham, Isaac, ek Jacob ti comprend bann principe. Zot pa ti bizin enn longue la liste kot inn ecrire seki bon ek seki pa bon pou zot koné ki pou faire. Seki zot ti koné lor Jéhovah ek so personnalité ti assez pou zot. Parski  Jéhovah ti zot refuge, zot pa ti envie vinn proche ar sa le monde-la. Au contraire, autant ki possible zot ti faire tou pou reste pli loin ar sa le monde-la. Vrai-mem, zot finn laisse enn joli l’exemple pou nou! Eski ou faire tou seki ou kapav pou imite zot kan ou choisir ou bann camarade ek bann divertissement? Malheureusement, ena certain dan congregation ki, dan enn certain fason, senti-zot a l’aise dan le monde Satan. Si ou senti-ou concerné, mem enn tigit, prié Jéhovah pou sa. Rappel bien ki sa le monde-la li pou Satan, ek Satan li egoïste ek li pa gagne enn sou tracas pou nou.​—2 Cor. 4:4; Éph. 2:1, 2.

12. (a) Ki bann disposition Jéhovah prend pou so bann serviteur? (b) Ki ou sentiment concernant sa bann disposition-la?

¹² Pou nou kapav resisté kont bann manigance Satan, nou bizin profite bien tou bann disposition spirituel ki Jéhovah inn prend pou bann ki ena la foi en Li, setadir bann ki faire Li vinn zot refuge. Sa bann disposition-la implik bann reunion, l’adoration en famille, ek “bann zom [ki] couma bann don,” setadir bann berger ki Bondié inn etabli pou reconforte ek soutenir nou, pou ki nou kapav endure bann probleme ki nou gagné. (Éph. 4:8-12) Frere George Gangas, ki ti enn membre College Central pendant beaucoup l’année, ti ecrire: “Kan mo parmi [peuple Bondié] mo senti-moi coumadir dan mo lakaz avek mo famille, dan enn paradis spirituel.” Eski ou ena mem sentiment?

13. Ki leson important nou aprann dan Hébreux 11:13?

¹³ Enn lot leson important ki nou aprann avek Abraham, Isaac, ek Jacob, c’est ki fodé pa nou gagne peur pou montré-nou different ar bann dimoune ki entoure nou. Couma nou finn trouvé dan  premier paragraphe, zot ti “dire en publik ki zot ti bann etranger ek bann habitant temporaire dan sa pays-la.” (Héb. 11:13) Eski ou determiné pou montré-ou different ar bann dimoune dan sa le monde-la? C’est vrai, li pa toujours facile pou faire sa. Mais avek l’aide Bondié ek soutien ki ou gagné avek ou bann frere ek soeur, ou kapav reussi. Pa blié, ou pa tousel. Tou dimoune ki envie servi Jéhovah bizin laguerre kont Satan ek sa le monde-la! (Éph. 6:12) Mais, c’est enn la guerre ki nou kapav gagné si nou ena confiance en Jéhovah ek nou faire Li vinn nou refuge.

14. Ki “la ville” bann serviteur Jéhovah ti pé attann?

¹⁴ Ena aussi enn lot kitsoz important ki nou bizin faire: Imite Abraham kan nou fixé nou lizié lor prix ki devant nou. (2 Cor. 4:18) L’apotre Paul ti ecrire ki Abraham “ti pé attann enn la ville ki ena bann vrai fondation, enn la ville ki finn monté ek ki finn faire par Bondié.” (Héb. 11:10) Sa ‘la ville-la’ represente Royaume Messianik Bondié. Bien sur, Abraham ti bizin attann sa ‘la ville-la.’ Mais, dan enn certain fason, nou, nou pa bizin attann  li. Sa Royaume-la pé dirigé asterla dan le ciel. En plus, bann prophetie dan la Bible montré ki bientot li pou dirige la terre entier. Eski sa Royaume-la li réel pou ou? Eski sa influence fason ki ou amenn ou la vie, fason ki ou considere sa le monde-la, ek ou bann priorité?​—Lire 2 Pierre 3:11, 12.

15. Ki l’avenir pé attann bann ki mette zot confiance dan sa le monde-la?

¹⁵ A mesure ki le monde Satan pé al fini, bann probleme pou vinn de plus en plus pire. (Mat. 24:7, 8) Pena barré, bann situation pou vinn pli difficile pendant la grande tribulation. Pou ena enn destruction ek enn confusion partout dan le monde, ek bann dimoune pou extra peur. (Hab. 3:16, 17) Zot pou nepli koné ki pou faire ek zot pou rod refuge “dan bann caverne ek bann grand roche dan bann montagne.” (Rév. 6:15-17) Mais ni bann caverne ni bann l’organisation politik ou-soit commercial ki couma bann montagne, pa pou kapav donne zot enn protection.

16. Couma nou bizin considere la congregation ek kifer?

¹⁶ Mais peuple Jéhovah pou contigne profite securité zot “vrai refuge,” Jéhovah. Pareil couma prophete Habaqouq, zot “pou ena enn grand la joie en Jéhovah Li-mem.” Zot “pou joyeux en [zot] Bondié ki pou delivré [zot].” (Hab. 3:18) Dan ki fason Jéhovah pou vinn “enn vrai refuge” pendant sa bann moment bien difficile-la? Nou pou bizin attann pou trouvé. Mais ena enn kitsoz nou kapav sur: Pareil couma kan bann Israélite ti quitte l’Égypte, “la grande foule” pou reste organisé, toujours pré pou suive bann instruction ki Jéhovah pou donne zot. (Rév. 7:9; lire Exode 13:18.) Couma Jéhovah pou donne nou sa bann instruction-la? Surement Li pou servi la congregation pou dire nou ki nou bizin faire. Isaïe 26:20 koz lor bann “la chambre endan” ki pou protege peuple Bondié. Kitfois zot faire reference ar bann millier congregation ki trouve dan le monde. (Lire Isaïe 26:20.) Eski bann reunion ena valeur pou ou? Eski ou agir desuite kan Jéhovah donne ou direction a travers la congregation?​—Héb. 13:17.

17. Dan ki fason Jéhovah Li “enn vrai refuge” mem pou so bann fidele serviteur ki’nn mort?

¹⁷ Mem pou bann chretien fidele ki kitfois pou mort avant la grande tribulation, Jéhovah contigne reste “enn vrai refuge” pou zot. Kifer nou dire sa? Bien apré ki Abraham, Isaac, ek Jacob ti’nn mort, Jéhovah ti dire Moïse ki Li ti toujours zot Bondié. (Ex. 3:6) Jésus ti repete sa bann parole-la, ek li ti ajouté: “Li pa enn Bondié bann ki’nn mort, mais plutot bann ki vivant, parski pou Li, zot tou vivant.” (Luc 20:38) Resurrection bann fidele serviteur Jéhovah li tellement enn kitsoz ki sur pou arrivé, ki pou Jéhovah, zot coumadir encore toujours vivant.​—Eccl. 7:1.

18. Dan le monde nouveau, couma Jéhovah pou vinn “enn vrai refuge” pou so peuple?

¹⁸ Dan le monde nouveau ki pé vini, Jéhovah pou vinn “enn vrai refuge” pou so peuple dan enn lot sens encore. Révélation 21:3 dire: “Guetté! La tente Bondié avek bann dimoune, ek Li pou reste avek zot.” Couma? D’abord, Jéhovah pou servi Christ Jésus pou regne lor la terre pendant mille an. A la fin sa mille an-la, apré ki li pou fini realise projet ki so Papa ena pou la terre, Jésus pou remette sa Royaume-la Jéhovah. (1 Cor. 15:28) Apré sa, kan bann dimoune pou vinn parfait, Jésus pou nepli bizin plaide pou zot avek Jéhovah, parski Jéhovah pou avek zot. Sa c’est enn joli l’avenir ki pé attann nou devant! Alors, anou faire zeffort pou imite bann fidele serviteur dan le passé, kan nou aussi nou faire Jéhovah vinn nou “vrai refuge.”