1-3. Ki bann bienfait ou gagné kan ou lire la Bible ek mette en pratik so bann l’enseignement?

 “TOULÉ gramatin mo remercié Jéhovah parski Li aide moi pou comprend la Bible.” Sa soeur agé ki ti dire sa-la, inn lire la Bible en entier plus ki 40 fois, ek li encore pé lire la Bible. Enn jeune soeur ti ecrire ki so lecture la Bible finn aide li pou trouve Jéhovah couma enn Kikenn ki réel. Grace a sa, li finn vinn pli proche ar Jéhovah. Li ti dire: “Jamais mo’nn senti-moi heureux coumsa dan mo la vie!”

² L’apotre Pierre ti encourage nou tou pou “ena enn grand desir pou bann l’enseignement ki ena dan parole Bondié ki couma di-lait pur.” (1 Pierre 2:2) Bann dimoune ki etudié la Bible ek mette en pratik so bann l’enseignement, ena enn conscience pur ek enn but dan la vie. Zot developpe bann l’amitié durable avek lezot ki content ek ki servi vrai Bondié zot aussi. Tousala c’est bann bon raison pou “content la loi Bondié.” (Rom. 7:22) Mais ena encore lezot bienfait ki nou kapav gagné. Ki sa bann bienfait-la?

³ Plus ou aprann lor Jéhovah ek lor so Garson, plus ou l’amour pou zot ek pou ou prochain pou grandi. Enn connaissance exact lor la Bible aide ou pou trouvé couma bientot Bondié pou sauve bann dimoune obeissant kan Li pou detruire bann mauvais dimoune. Dan ou ministere, ou ena enn bon nouvelle pou partage avek bann dimoune. Jéhovah pou beni ou a mesure ki ou enseigne lezot bann kitsoz ki ou finn aprann dan ou lecture la Bible.

4. Ki sa vedir lire la Bible “doucement”?

⁴ Jéhovah pa envie ki so bann serviteur lire so Parole vite-vite. Dan le passé, Li ti dire Josué: “Fodé pa ki sa livre la loi-la reste loin ar to la bouche ek to bizin lire li  doucement la nuit li-jour.” (Jos. 1:8; Ps. 1:2) Eski dapré sa l’ordre-la sa vedir ki ou bizin vrai-mem prononce chaque mot ki ou lire depuis Genèse ziska Révélation? Non. Sa vedir ki ou bizin lire enn vitesse ki pou permette ou medité. Kan ou lire la Bible “doucement,” sa pou aide ou pou fixé ou l’attention lor bann portion ki pou surtout aide ou ek encourage ou dan sa moment-la. Kan ou trouve bann phrase, bann verset, ou-soit bann recit coumsa, lire zot doucement, kitfois-mem ou kapav prononce bann mot-la avek ou la bouche. Lerla, seki ou pou lire, pou vrai-mem touche ou leker. Kifer sa important? Parski kan ou comprend bien bann conseil ki Bondié donné, sa pou motive ou pou mette zot en pratik.

5-7. Donne enn l’exemple ki montré couma kan ou lire la Bible doucement, sa kapav aide ou pou (a) reste pur lor plan moral; (b) ena patience ek bonté avek lezot; (c) ena plus confiance en Jéhovah mem pendant bann periode difficile.

⁵ Lire la Bible doucement aide ou kan ou examine bann livre la Bible ki kitfois ou trouve difficile pou comprend. Anou prend trois l’exemple. Premier l’exemple c’est enn jeune frere ki, dan so lecture personnel, inn arrive avek prophetie Hoshéa. Kan li pé lire chapitre 4, li faire enn pause apré ki li’nn lire verset 11 ziska 13 doucement. (Lire Hoshéa 4:11-13.) Kifer? Sa bann verset-la faire li reflechi parski dan lekol, li finn bizin lutté kont bann pression pou commette bann kitsoz immoral. Kan li medite lor sa bann verset-la, li dire ar li-mem: ‘Jéhovah trouve bann mauvais kitsoz ki dimoune faire mem kan zot tousel. Mo pa envie offense Li.’ Sa frere-la bien decidé pou reste pur lor plan moral devant Bondié.

⁶ Enn deuxieme l’exemple, c’est enn soeur ki pé lire prophetie Yoël ek li’nn arrive chapitre 2, verset 13. (Lire Yoël 2:13.) Kan li pé lire sa verset-la doucement, li reflechi couma li kapav imite Jéhovah, ki ena ‘compassion ek misericorde, ki pa en colere vite ek ki ena l’amour fidele en abondance.’ Soeur-la decidé pou faire bann changement, parski parfois li reconette ki li koz dan enn fason sarcastik ek avek colere ar so mari ek lezot dimoune.

⁷ Enn troisieme l’exemple, c’est enn papa ki’nn perdi so travail ek ki tracassé couma li pou prend soin so madame ek so bann zenfant. Li lire doucement Nahoum 1:7, ki dire ki Jéhovah “konn bann ki rod so protection,” ek Li protege zot pareil couma “enn forteresse dan jour detresse.” Sa pensée-la reconforte li. Li ressenti l’amour Jéhovah ek li arrete tracassé plus ki bizin. Apré sa, li lire verset 15 doucement. (Lire Nahoum 1:15.) Sa frere-la realisé ki, kan li preche la bonne nouvelle dan sa periode difficile-la, li montré ki vrai-mem li considere Jéhovah couma so forteresse. Pendant ki li contigne rod enn travail, li trouve aussi l’importance pou sorti predication dan la semaine.

8. Partage enn tresor spirituel ki ou finn decouvert dan ou lecture la Bible.

⁸ Sa bann l’exemple ki nou fek mentionné-la concerne bann livre la Bible ki certain trouve difficile pou comprend. Kan ou lire livre Hoshéa, Yoël, ek Nahoum avek enn desir pou aprann kitsoz, ou pou envie lire bann lezot verset ki ena dan sa bann livre-la doucement. Reflechi ki quantité sagesse ek reconfort ki ou kapav gagné kan ou lire seki sa bann prophete-la inn ecrire! Ki nou kapav dire lor le reste livre ki ena dan la Bible? Parole Bondié pareil couma enn mine diamant. Fouille dan sa la mine-la bien! Oui, lire la Bible en entier avek l’objectif pou trouve bann tresor, setadir direction Bondié ek l’encouragement.

9. Couma nou kapav comprend pli bien volonté Bondié?

⁹ Li bien important ki ou lire enn portion la Bible toulé-jour, mais ou bizin aussi faire sur ki ou comprend seki ou lire. Alors, servi bien bann publication ki l’organisation Jéhovah donne nou pou faire bann recherche  lor culture bann dimoune, bann l’endroit, ek bann l’evenement ki ou lire dan la Bible. Ou-soit, si ou pa sur couma pou applik enn l’enseignement la Bible dan ou la vie, ou kapav demann enn ancien dan ou congregation ou-soit enn lot Chretien mur pou aide ou. Pou montré l’importance pou comprend pli bien seki nou lire, anou prend l’exemple enn Chretien ki ti vive dan premier siecle ek ki ti faire beaucoup zeffort pou faire sa. Li ti appel Apollos.

10, 11. (a) Ki l’aide Apollos ti gagné pou ameliore so ministere? (b) Ki nou kapav aprann ar recit lor Apollos? (Guette l’encadré “Eski Ou l’Enseignement A-jour?”)

¹⁰ Apollos ti enn Chretien Juif ki ti “ena enn grand connaissance lor bann l’Ecriture” ek li ti “bien zelé grace a l’esprit saint.” Livre Actes dire lor li: “Li ti koz ek li ti enseigne dan enn fason exact bann kitsoz ki ti concerne Jésus, mais li ti konn zis bapteme Jean.” Sans ki Apollos ti realisé, li ti pé enseigne enn kitsoz ki pa ti a-jour en rapport avek bapteme. Apré ki Priscille ek Aquila, enn couple Chretien, ti ecoute li preché dan la ville Éphèse, zot ti explik li “volonté Bondié dan enn fason pli exact.” (Actes 18:24-26) Ki bienfait sa ti faire Apollos gagné?

¹¹ Apré ki li ti preché dan Éphèse, Apollos ti al Achaïe. “Kan li ti arrive la-bas, li ti bien aide bann ki ti vinn croyant grace a faveur Bondié, ki personne pa merité, parski avek bann preuve bien solide, li ti prouvé en publik ki bann Juif ti ena tort, ek li ti montré bien a travers bann l’Ecriture ki Jésus ti le Christ.” (Actes 18:27, 28) Asterla, Apollos ti kapav donne enn explication exact lor bapteme Chretien. Connaissance Apollos ti’nn augmenté, alors li “ti bien aide” bann nouveau pou progressé dan la verité. Ki nou kapav aprann ar sa recit-la? Pareil couma Apollos, nou faire zeffort pou comprend seki nou lire dan la Bible. Selman, kan enn Chretien ki ena l’experience donne nou enn suggestion pou nou enseigne dan enn fason pli efficace, li bon ki nou accepté so  l’aide avek humilité ek reconnaissance. Si nou faire sa, nou pou ameliore nou service sacré.

12, 13. Donne enn l’exemple pou montré couma si nou servi la Bible avek tact, sa kapav aide bann etudiant la Bible pou faire progré.

¹² Pareil couma Priscille, Aquila, ek Apollos, nou aussi nou kapav aide lezot. Ki ou ressenti kan ou l’encouragement aide enn dimoune interessé pou surmonte enn obstacle ki ti empeche li progressé? Ou-soit, si ou enn ancien, ki ou ressenti si enn lot Chretien vinn remercié ou pou enn conseil biblik ki finn aide li dan enn moment difficile? Pena doute, kan nou servi Parole Bondié pou aide lezot ameliore zot la vie, nou gagne enn grand satisfaction ek la joie. a Remarké couma ou kapav realise sa l’objectif-la.

¹³ En rapport avek vrai ek fausse l’adoration, beaucoup Israélite dan lepok Éliya pa ti kapav prend enn decision. Conseil ki Éliya ti donne le peuple kapav aide enn etudiant la Bible ki encore pé hesité pou faire bann progré spirituel. (Lire 1 Rois 18:21.) Anou prend enn lot situation: Si enn dimoune ki pé etudié, peur reaction so bann camarade ou-soit so famille, ou kapav aide li pou prend decision pou servi Jéhovah kan ou raisonne avek li lor Isaïe 51:12, 13.​—Lire.

14. Ki pou aide ou pou rappel bann passage ki ena dan la Bible pou aide lezot?

¹⁴ Li clair ki dan la Bible, ena beaucoup parole ki kapav encourage, corrige, ou-soit fortifié so bann lecteur. Mais kitfois ou demann-ou-mem: ‘Couma mo pou kapav rappel bann verset kan mo bizin zot?’ Lire la Bible ek medite lor bann pensée Bondié toulé-jour. Dan sa fason-la, tigit par tigit, ou pou konn beaucoup passage ki ena dan la Bible ek par so l’esprit saint Jéhovah pou aide ou rappel sa bann passage-la kan ou bizin zot.​—Marc 13:11; lire Jean 14:26. b

15. Ki pou aide ou pou comprend Parole Bondié pli bien?

¹⁵ Pareil couma le Roi Salomon, prié Jéhovah pou donne ou la sagesse pou rempli ou bann responsabilité spirituel. (2 Chron. 1:7-10) Pareil couma bann prophete dan le passé, faire enn “l’enquete bien serieux ek bann recherche profond” lor Parole Bondié pou gagne enn connaissance exact lor Jéhovah ek lor so volonté. (1 Pierre 1:10-12) L’apotre Paul ti encourage Timothée pou nourri-li “ar bann parole la foi ek enn bon l’enseignement.” (1 Tim. 4:6) Si ou faire sa, ou pou dan enn bon position pou aide lezot lor plan spirituel. En mem temps, ou pou fortifié ou prop la foi.

16. (a) Ki bienfait bann Béréen ti gagné kan zot “ti examine bann l’Ecriture en profondeur toulé-jour”? (b) Kifer zordi li bien important ki nou lire la Bible toulé-jour?

¹⁶ Bann Juif ki ti reste dan la ville Bérée, dan Macédoine, “ti examine bann l’Ecriture en profondeur toulé-jour.” Kan Paul ti preche la bonne nouvelle ar sa bann Juif-la, zot ti compare seki Paul ti dire avek connaissance ki zot ti ena lor bann l’Ecriture. Ki ti arrivé apré? Beaucoup parmi zot ti sur ki Paul ti pé enseigne la verité, ek zot “ti vinn croyant.” (Actes 17:10-12) Sa montré ki si nou lire la Bible toulé-jour, sa pou faire nou ena enn la foi solide en Jéhovah. Si nou envie rente dan le monde nouveau ki Bondié pou faire, li bien important ki nou ena  sa qualité la foi-la, setadir ki “nou sur ki seki nou pé attann pou arrivé.”​—Héb. 11:1.

17, 18. (a) Couma enn la foi solide ek enn grand l’amour protege leker symbolik enn Chretien? (b) Couma l’esperance protege nou ar bann danger?

¹⁷ Paul ti ena bann bon raison pou li ecrire: “Nou ki dan la lumiere li-jour, anou garde nou bon sens ek mette la foi ek l’amour couma enn cuirasse lor nou, ek l’esperance pou gagne delivrance, couma enn casque.” (1 Thess. 5:8) Enn soldat bizin protege so leker kont so l’ennemi. Li pareil aussi pou enn Chretien, li bizin protege so leker symbolik kont pouvoir ki peché ena. Ki arrivé kan enn serviteur Jéhovah ena enn grand la foi dan bann promesse Bondié ek enn grand l’amour pou Jéhovah ek pou so prochain? Coumadir lerla li pé mette enn cuirasse spirituel ki pou bien protege li. Pena doute ki li pa pou faire nanyé pou perdi faveur Bondié.

¹⁸ Paul ti mentionne aussi “l’esperance pou gagne delivrance” couma enn casque. Dan lepok biblik, si enn soldat pa ti protege so la tête, li ti kapav bien vite perdi so la vie dan la guerre. Mais avek enn bon casque, li ti pou kapav supporte bann coup lor so la tête, mais li pa ti pou gagne bann blessure grave. Nou l’esperance dan capacité ki Jéhovah ena pou sauve nou, vinn pli solide kan nou etudié so Parole. Enn l’esperance solide pou aide nou resisté kont bann apostat ek zot “bann discours ki pena sens.” (2 Tim. 2:16-19) Nou l’esperance pou aussi fortifié nou pou refuse suive bann dimoune ki pousse nou pou ena enn conduite ki Jéhovah condamné.

19, 20. Kifer Parole Bondié ena enn grand valeur pou nou, ek couma nou kapav montré nou reconnaissance pou sa livre-la? (Guette l’encadré “Jéhovah Donne Moi Exactement Seki Mo Bizin.”)

¹⁹ Plus la fin pé kosté, plus nou bizin ena enn pli grand confiance dan Parole Jéhovah. Bann conseil ki nou gagné dan la Bible aide nou pou corrige nou bann mauvais l’habitude ek pou controle nou tendance pou faire peché. La Bible encourage ek reconforte nou, ek grace a sa, nou pou kapav surmonte bann l’epreuve ki Satan ek so le monde faire nou gagné. Grace a direction ki Jéhovah donne nou dan so Parole, nou pou reste lor chemin ki amenn vers la vie.

²⁰ Rappel ki Bondié envie ki “tou sorte qualité dimoune sauvé.” Parmi sa bann dimoune-la ena bann serviteur Jéhovah ek aussi bann dimoune ki nou pé aidé a travers nou predication ek nou l’enseignement. Mais tou bann dimoune ki envie gagne la vie sauve bizin gagne “enn connaissance exact lor la verité.” (1 Tim. 2:4) Alors, pou nou kapav survive dan bann dernier jour, li bien important ki nou lire la Bible ek applik so bann instruction. Oui, si nou lire la Bible toulé-jour, sa pou montré ki Parole Jéhovah ena enn grand valeur pou nou.​—Jean 17:17.