1, 2. (a) Ki nou bizin faire pou ena bann bon relation avek Jéhovah? (b) Ki bann bienfait nou pou gagné kan nou examine fason ki certain inn reagir ar discipline Bondié?

 POU exprime so confiance en Jéhovah, enn psalmiste ti dire: “Pou moi, vinn pré ar Bondié, sa li bon pou moi. Mo finn mette mo refuge dan Souverain Seigneur Jéhovah.” (Ps. 73:28) Ki situation ti faire li dire sa? Kan li ti trouve la paix ki bann mauvais dimoune ti ena, au commencement sa ti faire li vinn amer. Li ti dire: “C’est pou nanyé ki mo finn purifié mo leker, ek ki mo lave mo la main dan l’innocence.” (Ps. 73:2, 3, 13, 21) Mais kan li ti vinn dan “temple Bondié ki ti extra joli ek impressionnant,” sa l’environnement-la ti aide li pou change so fason pensé ek pou garde bann relation bien proche avek Bondié. (Ps. 73:16-18) Sa l’experience-la ti enseigne sa psalmiste ki ti ena la crainte pou Bondié-la, enn leson bien important: Pou nou kapav ena bann bon relation avek Jéhovah, nou bizin forme partie parmi so bann serviteur, accepté ek applik so bann conseil.​—Ps. 73:24.

² Nou aussi nou envie ena bann relation bien proche avek vrai Bondié, enn Bondié ki vivant. Pou realise sa l’objectif-la, li bien important ki nou laisse so bann conseil ou-soit so discipline forme nou, pou ki nou kapav vinn bann dimoune ki faire Li plaisir! Dan le passé, avek misericorde, Bondié ti donne bann dimoune ek bann nation l’occasion pou accepté so discipline. Zot l’exemple finn ecrire dan la Bible “pou nou l’instruction” ek “pou averti nou, nou ki’nn arrive pré ar lafin sa bann systeme ki existé-la.” (Rom. 15:4; 1 Cor. 10:11) Kan nou examine bien sa bann l’exemple-la, sa pou aide nou pou comprend pli bien personnalité Jéhovah. Sa pou montré nou aussi couma nou kapav gagne bann bienfait si nou laisse Li forme nou.

3. Dan Isaïe 64:8 ek Jérémie 18:1-6, couma la Bible decrire l’autorité ki Jéhovah ena lor bann dimoune? (Guette zimage dan commencement lartik.)

³ Isaïe ti servi enn comparaison pou decrire l’autorité ki Jéhovah ena lor bann dimoune ek bann nation. Isaïe 64:8 dire: “Ah Jéhovah, to-mem nou Papa. Nou, nou l’argile, ek toi, to nou Potier; ek to la main mem ki’nn faire nou tou.” Enn potier ena tou l’autorité pou travail avek l’argile pou faire li vinn enn recipient ki li envie. Sa l’argile-la pa kapav dire potier-la seki li bizin faire. Li pareil aussi entre bann dimoune ek Bondié. Bann dimoune pa gagne droit dire Bondié couma pou forme zot, pareil couma l’argile pa kapav dire potier-la ki qualité pot ou-soit recipient li bizin faire.​—Lire Jérémie 18:1-6.

4. Eski Jéhovah force bann dimoune ou-soit bann nation pou accepté ki Li forme zot? Expliké.

⁴ Fason ki Jéhovah ti agir avek nation Israël, montré so capacité pou faire seki enn potier faire avek l’argile. Mais couma Jéhovah Li diferan avek enn potier? Jéhovah inn donne bann dimoune ek bann nation liberté pou choisir, setadir Li laisse zot faire zot prop choix. Li pa faire certain dimoune bon ek certain mauvais. Li pa servi so l’autorité pou force bann dimoune obeir Li. Au contraire, bann dimoune bizin choisir si zot pou laisse Jéhovah, zot Createur, forme zot.​—Lire Jérémie 18:7-10.

5. Ki Jéhovah faire kan bann dimoune pa laisse Li forme zot?

⁵ Ki pou arrivé si bann dimoune persisté ek refuse pou laisse nou Grand Potier forme zot? Couma lerla Jéhovah servi so l’autorité? Reflechi seki arrivé kan enn morceau l’argile pa pré prend forme sa recipient ki enn potier ti ena l’intention pou faire-la. Lerla, potier-la pou faire enn lot recipient ar sa ou-soit li pou jette li! Selman, en general, kan l’argile-la nepli bon, souvent c’est potier-la ki en tort. Mais Jéhovah Li, jamais Li en tort. (Deut. 32:4) Kan enn dimoune pa laisse Jéhovah forme li, c’est toujours dimoune-la ki en tort. Jéhovah servi l’autorité ki Li ena couma enn potier kan Li change so fason agir avek bann dimoune, dependant zot reaction kan Li pé forme zot. Si bann dimoune bien reagir, Jéhovah kapav forme zot pou zot vinn utile. Par exemple, bann Chretien oint zot “bann recipient ki merite . . . misericorde” Jéhovah ek zot finn formé pou vinn ‘bann recipient pou enn service honorable.’ De lot coté, bann ki refuse pou obeir bann conseil Bondié pou vinn “bann recipient ki merite so colere ek ki’nn reservé pou destruction.”​—Rom. 9:19-23.

6, 7. Couma David ek Saül ti diferan dan fason ki zot ti reagir ar conseil Jéhovah?

 ⁶ Enn fason ki Jéhovah forme bann dimoune c’est kan Li conseil zot ou-soit discipline zot. Nou kapav trouvé couma Jéhovah servi so l’autorité lor bann ki Li formé kan nou examine l’exemple deux le roi Israël​—Saül ek David. Kan le Roi David ti commette l’adultere avek Bath-Shéba, seki li ti faire ti ena bann mauvais consequence lor li ek lor lezot dimoune. Mem si David ti enn le roi, sa pa ti empeche Jéhovah pou discipline li. Bondié ti envoye prophete Nathân vers David pou annonce li enn message bien severe. (2 Sam. 12:1-12) Couma David ti reagir? Li ti bien regrette seki li ti faire ek li ti repenti, lerla Bondié ti manifesté so misericorde envers li.​—Lire 2 Samuel 12:13.

 ⁷ Le Roi Saül ti diferan. Li pa ti accepté conseil. A travers prophete Samuel, Jéhovah ti donne li enn conseil precis: Li ti bizin detruire tou bann Amaléqite ek zot zanimo. Saül pa ti obeir sa l’ordre Bondié-la. Li ti garde le Roi Agag vivant, ek  li pa ti touye bann pli bon zanimo. Kifer? Enn raison, c’est parski li ti envie gagne l’honneur. (1 Sam. 15:1-3, 7-9, 12) Kan li ti gagne conseil, Saül ti bizin laisse sa touche so leker ek accepté ki Jéhovah, nou Grand Potier, forme li. Au contraire, Saül ti refuse changé. Li ti rod bann pretexte pou excuse so conduite. Li ti pretann ki li ti pou offert sa bann zanimo-la en sacrifice pou Jéhovah, ek li pa ti prend compte conseil Samuel. Jéhovah ti rejette Saül couma le roi, ek jamais Saül pa ti ré-gagne bann bon relation ki li ti ena avek vrai Bondié.​—Lire 1 Samuel 15:13-15, 20-23.

8. Ki nou kapav aprann ar fason ki nation Israël ti reagir kan Jéhovah ti forme li?

⁸ Jéhovah pa donne zis bann dimoune possibilité pou laisse-zot formé par Li, mais bann nation aussi ti ena sa possibilité-la. En 1513 avant nou lepok, Jéhovah ti faire enn l’alliance avek bann Israélite ki Li ti delivré dan l’Égypte. Bondié ti choisir nation Israël ek zot ti ena privilege pou laisse Jéhovah forme zot, pareil couma enn Potier ki travail lor so tour. Selman, bann Israélite ti contigne faire seki mauvais devant lizié Jéhovah, zot ti mem adore bondié bann nation ki ti tout autour. Plusieurs fois, Jéhovah ti envoye bann prophete pou aide zot change zot conduite, mais zot pa ti ecouté. (Jér. 35:12-15) Zot ti contigne persisté pou faire le mal, a cause sa, Jéhovah ti bizin discipline zot. Pareil couma enn recipient ki’nn reservé pou destruction, royaume dix tribu Israël ki ti dan le nord, ti detruire par bann Assyrien, ek plitar, bann Babylonien ti faire pareil avek royaume deux tribu Israël ki ti dan le sud. Sa bizin enseigne nou enn  leson bien important! Sel fason pou nou gagne bann bienfait ar formation ki Jéhovah donne nou, c’est kan nou bien reagir.

9, 10. Couma bann Ninivite ti reagir ar l’avertissement Jéhovah?

⁹ Jéhovah ti donne aussi Ninive, capital l’Assyrie, possibilité pou ecoute so l’avertissement. Jéhovah ti dire Yona: “Levé, al Ninive, sa grand la ville-la, ek faire li koné ki so mechanceté finn vinn beaucoup devant moi.” Jéhovah ti’nn decidé ki Ninive merite destruction.​—Yona 1:1, 2; 3:1-4.

¹⁰ Selman, kan Yona ti annonce sa malheur-la kont Ninive, “bann zom dan Ninive ti commence ena la foi dan Bondié, zot ti demann tou dimoune pou garde careme ek zot ti mette bann la toile sac lor zot, depuis pli grand ziska pli tipti parmi zot.” Zot le roi “ti leve lor so trone, li ti tire so linge officiel, li ti mette enn la toile sac lor li ek li ti assize dan lasann.” Bann Ninivite ti bien reagir, zot ti laisse Jéhovah forme zot ek zot ti repenti. A cause sa, Jéhovah pa ti detruire zot.​—Yona 3:5-10.

11. Ki nou aprann ar fason ki Jéhovah ti agir ar bann Israélite ek ar bann Ninivite?

¹¹ Mem si nation Israël ti nation ki Jéhovah ti choisir, Jéhovah ti discipline li. Par kont, bann Ninivite zot, Bondié pa ti faire okenn l’alliance avek zot. Mais kan-mem, Jéhovah ti faire annonce enn message jugement kont zot, ek Li ti manifesté so misericorde kan zot ti bien reagir ar so formation. Sa deux l’exemple-la montré bien ki Jéhovah, nou Bondié, “pa faire preference pou personne”!​—Deut. 10:17.

12, 13. (a) Kifer Bondié change so decision dependant couma bann dimoune reagir ar so formation? (b) Kan la Bible dire ki Jéhovah “regretté,” ki sa ti vedir pou Saül? pou bann Ninivite?

¹² Fason ki Jéhovah disposé pou forme nou montré ki Li raisonnable ek ki Li adapté-Li. Nou trouve sa bien kan Jéhovah decidé pou prend bann action kont bann dimoune. Sa bann action-la basé lor so bann jugement ki juste. Mais apré, Jéhovah kapav change so decision dependant zot reaction. Concernant premier le roi Israël, la Bible dire ki Jéhovah ‘ti regretté ki Li ti faire Saül vinn le roi.’ (1 Sam. 15:11) Kan bann Ninivite ti repenti ek ti detourne-zot ar zot mauvais conduite, la Bible dire: “Vrai Bondié ti regrette malheur ki Li ti dire Li pou amenn lor zot; ek Li pa ti faire sa arrivé.”​—Yona 3:10.

¹³ Mot Hébreu ki’nn traduire par “regretté” vedir enn changement l’attitude ou-soit l’intention. Jéhovah ti change so l’attitude envers Saül. Mem si Li ti choisir Saül pou vinn le roi, apré Li ti rejette li. Sa changement-la ti arrivé pa parski Jéhovah ti faire enn erreur kan Li ti choisir Saül, mais parski Saül pa ti ena assez la foi ek ti desobeir Li. Vrai Bondié ti regretté aussi dan cas bann Ninivite; setadir ki Li ti change seki Li ti ena l’intention pou faire kont zot. Sa bien encourage nou pou koné ki Jéhovah nou Potier, Li raisonnable ek Li adapté-Li, Li ena compassion ek misericorde, Li disposé pou change so decision kan bann dimoune ki faire peché change zot fason agir!

14. (a) Couma Jéhovah forme nou zordi? (b) Couma nou bizin reagir kan Bondié forme nou?

¹⁴ Zordi, Jéhovah forme nou surtout par so Parole la Bible, ek so l’organisation. (2 Tim. 3:16, 17) Nou bizin accepté n’importe ki conseil ou-soit discipline ki nou gagné par sa bann moyen-la. N’importe ki quantité le temps nou finn prend bapteme, ou-soit ki quantité privilege nou finn gagné, nou bizin contigne obeir bann conseil Jéhovah. Nou bizin laisse sa forme nou pou nou vinn bann recipient pou enn service honorable.

15, 16. (a) Ki sentiment negatif enn dimoune kapav ena kan li perdi so bann privilege dan congregation? Donne enn l’exemple. (b) Ki kapav aide nou pou faire face ar bann sentiment negatif kan nou gagne enn discipline?

 ¹⁵ Parfois Jéhovah discipline nou kan Li conseil nou ou-soit kan Li corrige nou. Mais lezot fois, li possible ki nou bizin enn discipline pli severe parski nou finn mal agir. Kitfois lerla, nou kapav perdi nou bann privilege. Anou prend l’exemple Dennis a ki ti enn ancien. Li ti prend bann mauvais decision kan li ti pé faire business, lerla li ti gagne enn discipline. Ki Dennis ti ressenti kan ti annoncé dan congregation ki li ti nepli ancien? Li dire: “Mo ti ena enn sentiment terrible ki mo pa’nn reussi. Pendant 30 an ki’nn passé, mo ti’nn gagne beaucoup privilege. Mo ti enn pionnier permanent, mo ti servi dan Béthel, mo ti enn assistant ministeriel ek apré mo ti vinn enn ancien. Mo ti aussi fek faire mo premier discours dan enn l’assemblée district. Enn sel coute, mo ti perdi tou. Mo pa ti zis honté ek embarrassé, mo ti aussi pensé ki pa ti ena okenn place pou moi dan l’organisation.”

¹⁶ Dennis ti bizin change so conduite. Mais ki ti aide li pou faire face avek bann sentiment negatif? Li dire: “Mo ti bien decidé pou garde bann bon l’habitude spirituel. Enn kitsoz ki ti important aussi, c’est l’encouragement ki mo ti gagné avek bann frere ek soeur ek dan nou bann publication. Lartik ‘ Pouvez-vous de nouveau exercer des responsabilités ? ’ dan La Tour de Garde 15 Août 2009, en Français, ti couma enn lettre personnel ki’nn reponn mo bann la priere. Conseil ki mo ti pli content c’est: ‘Asterla ki ou pena responsabilité dan congregation, profité pou fortifié ou spiritualité.’” Ki bienfait Dennis inn gagné ar sa discipline-la? Apré deux-trois l’année li dire: “Jéhovah inn beni moi ankor parski zordi mo enn assistant ministeriel.”

17. Kan enn dimoune exclu, couma sa discipline-la kapav aide li? Donne enn l’exemple.

¹⁷ Enn lot fason ki Jéhovah discipliné c’est kan enn dimoune exclu dan congregation. Sa protege congregation ar enn mauvais l’influence ek sa kapav aide sa dimoune ki’nn faire peché-la pou repenti. (1 Cor. 5:6, 7, 11) Robert ti exclu pendant apepré 16 an. Pendant sa le temps-la, so bann parent ek so bann prop frere pa ti frequente li. Zot ti reste ferme ek avek fidelité zot ti applik principe ki trouve dan Parole Bondié pou arrete frequente bann dimoune ki faire peché ek pou pa mem dire zot bonjour. Sa faire deux-trois l’année depuis ki Robert inn reintegré ek zordi li pé bien progressé lor plan spirituel. Ki ti pousse Robert pou retourne vers Jéhovah ek So l’organisation apré sa quantité le temps-la? Li dire ki fason ki so famille ti reagir ti ena enn l’effet lor li? “Si mo famille ti frequente moi mem enn tigit, zis pou demann moi mo nouvelle, sa ti pou assez pou moi, zot pa ti pou mank moi ek mo pa ti pou ena desir pou retourne vers Bondié.”

18. Ki qualité l’argile nou bizin été dan la main nou Grand Potier?

¹⁸ Kitfois nou pa pou bizin enn discipline coumsa, mais ki qualité l’argile nou pou été dan la main nou Grand Potier? Couma nou pou reagir kan nou gagne enn discipline? Eski nou pou pareil couma David ou-soit couma Saül? Jéhovah, nou Grand Potier, Li nou Papa. Fodé jamais nou blié ki “Jéhovah reprend enn kikenn ki Li content, pareil couma enn papa reprend so garson ki li content.” Alors, “pa rejette discipline Jéhovah, ek pa gagne degout pou so reprimande.”​—Prov. 3:11, 12.