1, 2. Ki ti aide 230 Témoins de Jéhovah pou survive la marche vers lamor, vers lafin Deuxieme Guerre Mondial?

 VERS lafin Deuxieme Guerre Mondial, parti Nazi​—ki ti pré pou disparette​—ti donne l’ordre pou touye plusieurs millier prisonnier ki ti ankor dan bann camp concentration. Bann prisonnier ki ti dan camp Sachsenhausen ti bizin al ziska bann port ek monte dan bann bateau ki bann Nazi ti pou coulé dan lamer. Plitar ti appel sa complot demoniak-la, la marche vers lamor.

² Bann Nazi ti force 33,000 prisonnier ki ti dan camp concentration Sachsenhausen pou marche 250 kilometre pou al Lübeck, enn port en Allemagne. Parmi zot ti ena 230 Témoins de Jéhovah ki ti sorti dan six pays, ek ki ti gagne l’ordre pou marche ensam. Zot tou ti faible parski pa ti ena mangé ek a cause maladie. Couma nou bann frere ti reussi survive sa la marche-la? Enn parmi zot ti dire: “Nou ti contigne encourage sakenn nou camarade pou contigne marché.” Lamour ki sakenn ti ena pou so camarade ek ‘puissance plis ki normal’ ki Bondié ti donne zot, ti aide zot pou survive.​—2 Cor. 4:7.

3. Kifer nou bizin encourage sakenn nou camarade?

³ Zordi, nou pa dan enn la marche vers lamor, mais kan-mem nou gagne beaucoup probleme. Apré ki Royaume Bondié ti etabli en 1914, Jésus ti tire Satan dan le ciel ek ti jette li lor later. Satan dan “enn grand colere parski li koné ki li ena zis enn tigit le temps-mem.” (Rév. 12:7-9, 12) A mesure ki Har-Maguédôn pé kosté, Satan pé servi bann l’epreuve ek bann pression pou essaye affaibli nou lor plan spirituel. En plis, nou bizin faire face ar stress ki ena dan lavi toulé-jour. (Job 14:1; Eccl. 2:23) Parfois, tou sa bann difficulté-la kapav faire nou tellement faible ki nou senti-nou decouragé  malgré tou nou bann zeffort. Prend l’exemple enn frere ki ti aide beaucoup dimoune lor plan spirituel pendant plusieurs dizaine l’année. Kan li ti vinn vié, li ek so madame ti tombe malade ek li ti commence senti-li bien decouragé. Pareil couma sa frere-la, nou tou nou bizin ki Jéhovah donne nou ‘sa puissance ki plis ki normal-la’ ek aussi l’encouragement sakenn nou camarade.

4. Si nou envie encourage lezot, ki conseil l’apotre Paul nou bizin suive?

⁴ Si nou envie encourage lezot, nou bizin suive conseil ki l’apotre Paul ti donne bann Chretien Hébreu. Li ti dire zot: “Anou interesse-nou sakenn ar nou camarade, pou encourage sakenn parmi nou pou montré lamour, ek faire bann bon action, sans ki nou neglige nou bann rassemblement, couma certain ena l’habitude, mais anou encourage sakenn parmi nou, ek ankor plis kan zot trouve jour-la pé kosté.” (Héb. 10:24, 25) Couma nou kapav suive sa conseil important-la?

5. Ki sa vedir “interesse-nou sakenn ar nou camarade,” ek couma nou kapav faire sa?

⁵ L’expression “interesse-nou sakenn ar nou camarade” vedir “prend compte seki lezot bizin, pense zot.” Eski nou pou kapav vrai-mem koné ki lezot bizin si nou zis dire zot enn ti bonjour dan la Salle du Royaume ou-soit nou koz ar zot zis lor bann kitsoz banal? Non. Bien sur, nou pou ‘veille nou prop zaffaire’ ek nou pou faire attention pou pa “rente dan zaffaire lezot dimoune.” (1 Thess. 4:11; 1 Tim. 5:13) Selman, si nou envie encourage nou bann frere, nou bizin bien konn zot situation dan lavi, zot bann qualité, zot spiritualité, zot point fort ek zot point faible. Zot bizin kapav considere nou couma bann camarade ek ena l’assurance ki nou content zot. Pou ki sa arrivé, nou bizin passe le temps avek zot, pa zis kan zot gagne probleme ek kan zot decouragé, mais aussi dan lezot moment.​—Rom. 12:13.

6. Ki pou aide enn ancien pou ‘interesse-li’ ar bann membre so congregation?

⁶ Bann ancien dan congregation encouragé pou “prend bien soin troupeau Bondié ki’nn confié zot,” pa par obligation, mais volontairement. (1 Pierre 5:1-3) Couma zot pou kapav faire sa couma bizin si zot pa konn bien bann brebis ki’nn confié zot? (Lire Proverbes 27:23.) Si bann ancien montré ki zot disponible ek ki zot content pou passe le temps avek bann frere ek soeur, sa bann frere ek soeur-la pou plis a l’aise pou demann bann ancien l’aide kan zot bizin. Li pou aussi pli fasil pou bann frere ek soeur koz avek bann ancien lor seki zot ressenti ek lor zot probleme. Sa pou permette bann ancien pou ‘interesse-zot’ ar bann membre congregation ek aide zot kan zot bizin.

7. Ki nou bizin rappel kan bann dimoune ki decouragé dire bann “kozé sans reflechi”?

⁷ Paul ti dire bann chretien dan congregation Thessalonique: “Soutenir bann ki faible.” (Lire 1 Thessaloniciens 5:14.) “Bann ki deprimé” ek aussi bann ki decouragé, zot faible dan enn certain sens. Proverbes 24:10 dire: “Eski to finn montré ki to decouragé jour ki malheur vinn lor toi? To pou ena enn tigit la force mem.” Parfois enn dimoune deprimé dire bann “kozé sans reflechi.” (Job 6:2, 3) Kan nou “interesse-nou” ar bann dimoune ki dan enn situation coumsa, nou bizin rappel ki parfois, zot pa dire vrai-mem seki ena dan zot leker. Rachelle, enn soeur ki so mama ti bien deprimé, ti aprann sa par l’experience. Rachelle dire: “Plusieurs fois, mo mama ti dire bann kitsoz bien blessant. Mais souvent, mo ti essaye rappel ki qualité dimoune mo mama vrai-mem été​—li ena lamour, li bon ek li genereux. Mo’nn aprann ki bann dimoune  deprimé dire beaucoup kitsoz ki zot pa pensé vrai-mem. Pli pire kitsoz ki enn dimoune kapav faire c’est rann le mal par bann parole ou-soit bann action.” Proverbes 19:11 dire: “Kan enn dimoune comprend seki ena pli loin, vrai-mem sa ralenti so colere, ek li montré so beauté kan li passe lor bann erreur.”

8. Envers kisannla surtout nou bizin “confirme” nou lamour, ek kifer?

⁸ Couma nou kapav “interesse-nou” ar enn kikenn ki’nn corrige so erreur mais ki ankor honté ek ki senti-li decouragé a cause enn peché ki li’nn faire? Concernant enn dimoune ki ti faire peché ek ki ti repenti dan congregation Corinthe, Paul ti ecrire: “Zot bizin pardonne li avek tou zot leker ek console li, pangar ki dan enn certaine fason, li tellement triste ki li perdi courage. Alors, mo demann zot pou confirme zot lamour pou li.” (2 Cor. 2:7, 8) Dapré enn dictionnaire, mot “confirmé” vedir “approuvé, validé, faire vinn legal.” Enn dimoune pa pou koné si nou content li, si nou pa montré sa par nou bann parole ek nou bann action.

9. Ki sa vedir ‘encourage sakenn pou montré lamour ek pou faire bann bon action’?

⁹ Paul ti ecrire: “Anou interesse-nou sakenn ar nou camarade, pou encourage sakenn parmi nou pou montré lamour, ek faire bann bon action.” Nou bizin encourage nou bann frere ek soeur pou manifesté lamour ek pou faire bann bon action. Par exemple, kan enn difé pré pou teigne, kitfois nou bizin tourne bann charbon ek vante bann la flamme. (2 Tim. 1:6) Dan mem fason, avek amour, nou kapav encourage nou bann frere pou montré zot lamour pou Bondié ek pou zot prochain. Pli bon fason ki nou kapav encourage zot pou faire bann bon action c’est kan nou felicite zot.

10, 11. (a) Kisannla parmi nou bizin felicitation? (b) Donne enn l’exemple couma bann felicitation kapav aide enn dimoune ki’nn “faire enn faux pas.”

¹⁰ Nou tou nou bizin felicitation, ki nou decouragé ou-soit non. Enn ancien ti ecrire: “Pa enn sel fois mo papa inn dire  moi ki mo’nn faire enn bon kitsoz. Alors, kan mo’nn grandi, mo pa ti ena l’estime pou mo-mem. . . . Mem si zordi mo ena 50 an, mo ankor toujours apprecié kan mo bann camarade donne moi l’assurance ki mo pé bien faire mo travail en tant ki ancien. . . . Mo prop l’experience inn montré moi ki quantité li important ki nou encourage lezot, ek mo faire tou pou felicite lezot.” Bann felicitation kapav encourage nou tou​—bann pionnier, bann ki agé, ek bann ki’nn decouragé.​—Rom. 12:10.

¹¹ Kan bann ‘ki qualifié lor plan spirituel essaye redresse enn kikenn ki finn faire enn faux pas,’ bann conseil ki zot donné avek amour ek bann felicitation approprié, kapav pousse sa dimoune-la pou change so conduite ek pou faire bann bon action. (Gal. 6:1) C’est seki ti arrive enn soeur ki appel Miriam. Li ecrire: “Mo ti pé passe par enn periode bien difisil dan mo lavi. Certain parmi mo bann pli bon camarade ti quitte congregation ek, en mem temps, mo papa ti gagne enn l’hemorragie cerebral. Mo ti bien deprimé. Pou faire face ar mo depression, mo ti commence sorti avek enn garson ki pa ti enn Témoin.” Sa ti faire Miriam pensé ki li pa ti digne pou gagne lamour Jéhovah, ek li ti pense pou quitte la verité. Kan enn ancien ti rappel Miriam seki li ti faire avek fidelité dan service Jéhovah, sa ti touche li beaucoup. Li ti donne bann ancien l’occasion pou aide li comprend ki Jéhovah ankor content li. Sa ti faire li ré-trouve so lamour pou Jéhovah. Li ti arrete sorti avek sa garson-la ek li ti contigne servi Jéhovah.

12. Ki kapav arrivé si nou compare nou bann frere avek lezot, nou critik zot, ou-soit nou faire zot senti-zot coupable?

¹² Enn dimoune pou honté si touletan nou pé compare li avek lezot, nou critik li parski li pa pé suive bann regle ki nou finn etabli, ou-soit nou faire li senti-li coupable parski li pa pé faire plis dan service Jéhovah. Si nou faire sa, kitfois li pou augmente enn sel coup so l’activité, mais sa pa pou dure longtemps. De lot coté, si nou felicite enn frere ek nou aide li pou comprend ki c’est lamour pou Jéhovah ki bizin motive-li, sa pou ena enn bon l’effet lor li ek sa pou dure pli longtemps.​—Lire Philippiens 2:1-4.

13. Ki sa vedir encourage lezot? (Guette zimage dan commencement lartik.)

¹³ Nou bizin ‘encourage sakenn parmi nou, ek ankor plis kan nou trouve sa jour-la pé kosté.’ Encourage lezot vedir motive zot pou contigne servi Bondié. Kan nou encourage lezot pou ena lamour ek pou faire bann bon action, c’est coumadir nou pé ré-allume enn difé ki pé al teigne, ek nou pé mette petrole lor la pou li reste allumé ou-soit pou li vinn pli fort. Pou nou aide bann ki decouragé, nou bizin fortifié zot ek console zot. Pou faire sa nou bizin koz avek bonté. (Prov. 12:18) En plis nou “bizin pré pou ecouté” ek “pa pressé pou kozé.” (Jacq. 1:19) Kan nou ecoute enn Chretien ki’nn decouragé ek nou essaye comprend so sentiment, kitfois nou pou koné kifer li  decouragé ek nou pou dire enn kitsoz ki pou aide li pou faire face ar so situation.

14. Couma enn ancien ti aide enn frere ki ti decouragé?

¹⁴ Guetté couma enn ancien ki ena compassion ti reussi aide enn frere ki ti inactif pendant plusieurs l’année. Kan sa ancien-la ti pé ecoute li, li ti clair ki sa frere-la ti toujours ena enn grand lamour pou Jéhovah. Li ti etudié chaque La Tour de Garde ek li ti faire zeffort pou assisté reunion regulierement. Selman, seki certain ti faire dan congregation ti decourage li ek li ti vinn amer. Ancien-la ti ecoute li bien ek ti essaye comprend so bann sentiment, sans juge li. Li ti interesse-li avek amour ar sa frere-la ek so famille. Tigit par tigit, frere-la ti realisé ki li ti pé laisse bann mauvais l’experience ki li’nn faire, empeche li servi sa Bondié ki li content-la. Ancien-la ti invite frere-la pou preche avek li. Avek so l’aide, frere-la ti ré-vinn actif dan predication ek plitar ti ré-vinn ancien.

15. Ki nou kapav aprann ar fason ki Jéhovah ti traite bann ki ti decouragé?

¹⁵ Kitfois enn dimoune ki’nn decouragé pa pou senti-li pli bien ou-soit pa pou accepté nou l’aide desuite. Li possible ki nou pou bizin contigne aide li. Paul ti dire: “Contigne tini bann ki faible, ena patience avek tou dimoune.” (1 Thess. 5:14, An American Translation) Au lieu ki desuite nou arrete aide bann ki faible, anou coumadir “contigne tini” zot, ek soutenir zot. Dan le passé, Jéhovah ti ena patience avek so bann serviteur ki parfois ti decouragé. Par exemple, Bondié ti ena patience avek Éliya ek ti prend compte so bann sentiment. Jéhovah ti donne li seki li ti bizin pou contigne so service. (1 Rois 19:1-18) Jéhovah ti pardonne David parski li ti vrai-mem repenti. (Ps. 51:7, 17) Bondié ti aussi aide ecrivain Psaume 73, ki ti preské arrete servi Li. (Ps. 73:13, 16, 17) Jéhovah, Li bon ek Li ena compassion envers nou, surtout kan nou decouragé. (Ex. 34:6) So misericorde “nouveau toulé-gramatin,” ek “jamais pa pou disparette.” (Lam. 3:22, 23) Jéhovah attann ki nou suive so l’exemple ek nou traite bann ki deprimé avek tendresse.

16, 17. A mesure ki lafin sa systeme-la pé kosté, ki nou bizin bien decidé pou faire ek kifer?

¹⁶ Lor 33,000 prisonnier ki ti quitte camp concentration Sachsenhausen, plusieurs millier ti mor. Mais, toulé 230 Témoins de Jéhovah ki ti quitte sa camp-la ti survive. L’encouragement ek soutien ki zot ti donne sakenn zot camarade ti joué enn grand role pou faire sa la marche vers lamor-la vinn enn la marche vers lavi.

¹⁷ Zordi, nou lor “chemin ki amenn vers lavi.” (Mat. 7:14) Bientot, tou bann adorateur Jéhovah pou marche ensam pou rente dan le monde nouveau kot pou ena la justice. (2 Pierre 3:13) Anou bien decidé pou aide sakenn nou camarade pou reste lor chemin ki amenn vers lavi eternel.