AN Out ek Septam 1929, pandan enn gran kanpagn predikasion nef zour, plis ki 10,000 proklamater ti al prese partou an Amérique. Zot ti plas 250,000 liv ek brosir ar bann dimounn. Parmi sa bann proklamater Rwayom Bondie la, ti ena apepre 1,000 colporteur (zordi apel zot pionie). Zordi ena boukou plis pionie! Dapre Bulletin, a li ti “preske inkrwayab” ki kantite pionie ti vinn trwa fwa plis ant 1927 ek 1929.

Ver lafin lane 1929, ti ena enn gran problem finansie. Le 29 Oktob 1929​—Mardi Nwar​—bann pri dan labours New York ti bese dan enn fason terib ek sa ti plonz sistem ekonomik mondial dan seki bann dimounn ti apel La Grande Dépression. Plizir milye labank ti fer fayit. Bann laferm ti aret travay. Bann gran lizinn ti ferme. Plizir milyon dimounn ti perdi zot travay. An 1933, dan l’Amérique, ti sezi ziska 1,000 lakaz par zour.

Kouma bann proklamater a plin tan ti reisi fer zot servis dan enn lepok kritik koumsa? Enn fason, se res dan bann karavann. Lerla, zot pa ti ena ni lakaz, ni tax pou peye. Enn karavann ti permet bann pionie kontign zot servis san ki zot ti ena boukou depans. b Ek pandan lasanble, zot ti res dan zot karavann olie ki zot lwe enn lasam lotel. An 1934, Bulletin ti donn bann plan bien detaye lor fason pou ranz enn ti karavann, me ki konfortab. Dan sa bann plan-la, ti explike kouma pou instal bann kitsoz pratik kouma par exanp sistem delo, enn four, enn lili pliab ek enn sistem izolasion kont freser.

Dan boukou pei, bann proklamater ki ti bien debrouyar ti koumans ranz zot karavann. Victor Blackwell ti rakonte: “Noé pa ti ena lexperyans pou ranz enn bato ek mwa, mo pa ti ena lexperyans, ni okenn konesans pou ranz enn karavann.” Me mo ti reisi fer li.

Avery ek Lovenia Bristow ti ena enn karavann. Avery ti dir: “Mo ti kouma enn torti dan so karapas​—mo lakaz ti touletan avek mwa.” Bann Bristow ti fer pionie ansam avek Harvey ek Anne Conrow. Ti ena bann papie goudrone lor miray karavann bann Conrow. A sak fwa ki zot ti deplas zot karavann, bann bout papie ti tonbe. Avery rakonte: “Zame personn inn trouv enn karavann koumsa, ek zame personn pa pou trouv enn koumsa ankor!” Me Avery ti dir ki bann Conrow ek zot de garson “ti fami pli ere ki ti kapav trouve.” Harvey Conrow ti ekrir: “Nou pa ti mank nanye ek nou santi nou bien an sekirite dan servis Jéhovah ek anba so proteksion.” Plitar, toule kat manb fami Conrow ti asiste Lekol Guiléad ek zot ti nome misioner pou al servi dan Pérou.

Fami Battaino osi ti pionie. Apre ki Giusto ek Vincenza ti aprann ki zot ti pou gagn enn ti-baba, zot ti transform zot Ford, Model A 1929, zot ti fer li vinn enn karavann. Kan zot ti konpar sa avek bann latant kot zot ti reste avan, zot karavann ti “kouma enn zoli lasam lotel.” Avek zot tifi, zot ti  kontign zot servis dan enn teritwar ki zot ti bien kontan, zot ti pres avek bann Italien ki ti viv an Amérique.

Boukou dimounn ti ekout bonn nouvel, me bien rar bann dimounn mizer ek bann ki pa ti ena travay ti kapav kontribie kan zot ti gagn bann piblikasion ki baze lor Labib. Me, zot ti ofer tou sort kalite kitsoz pou gagn bann piblikasion. De pionie ti fer enn lalis 64 diferan kitsoz ki bann dimounn interese ti donn zot. Sa lalis-la ti “kouma enn linvanter ki’nn fer dan enn laboutik dan lakanpagn.”

Fred Anderson ti zwenn enn fermie ki ti anvi gagn plizir liv ek misie-la ti donn li enn linet ki ti pou so mama pou gagn sa bann liv-la. Dan prosin laferm, enn misie ti interese avek nou bann piblikasion, me li ti dir: “Mo pena linet pou lir.” Alor, Fred ti donn li linet so vwazin, ek kan li ti met sa, li ti kapav lir bien. Misie-la ti donn enn bon kontribision pou bann liv ek pou sa linet-la.

Herbert Abbott ti sarye enn kazot poul dan so loto. Apre ki li ti gagn trwa kat poul kont bann piblikasion, li ti al vann zot dan bazar, ek li ti ranpli so tank lesans. Li ti dir: “Eski parfwa ti arive ki nou ti nepli ena enn sou dan nou pos? Wi, me nou pa ti les sa aret nou. Si nou ti ena lesans dan nou tank, nou ti kapav kontigne, nou ti ena lafwa an Jéhovah ek nou ti fer Li konfians.”

Bann serviter Jéhovah dan sa lepok difisil-la ti kont boukou lor Jéhovah ek zot ti bien deside pou kontign servi Li, se sa ki ti ed zot pou andire. Enn zour, kan ti ena enn gro lapli, Maxwell ek Emmy Lewis ti reisi sorti dan zot karavann zis a-tan, avan ki enn pie tom lor zot karavann ek koup li an de. Maxwell ti ekrir: “Sa bann kitsoz-la, pa ti bann obstak, zot ti zis bann ti aksidan, ek zame nou pa ti pans pou abandone. Ti ena ankor boukou travay pou fer ek nou ti ena lintansion pou fer sa.” Maxwell ek Emmy pa ti dekouraze ek avek led zot bann kamarad, zot ti repar zot karavann.

Dan nou lepok difisil, plizir milyon Temwin Jéhovah bien zele ena mem lespri sakrifis. Parey kouma sa bann pionie dan le pase la, nou bien deside pou persevere dan predikasion ziska ki Jéhovah dir nou arete.