Bann sitiasion difisil kapav afekte nou boukou. Kitfwa sa kapav fatig nou latet, diminie nou lafors, ek inflians fason ki nou konsider lavi. David, ki ti lerwa an Israël, ti bien afekte par boukou leprev. Kouma li ti fer fas ar sa? Dan enn psaume bien tousan, David ti reponn: “Avek mo lavwa, mo apel Jéhovah pou Li ed mwa; avek mo lavwa, mo sipliye Jéhovah pou gagn so faver. Devan Li, mo devid mo leker pou dir seki pe trakas mwa; devan Li mo rakont mo problem, kan mo lespri pa trankil. Lerla, to vey lor mo semin.” Wi avek imilite, David ti priye Bondie pou ed li.​—Ps. 142:1-3.

Dan enn lot psaume, David ti sant sa kantik-la: “Mo finn demann Jéhovah enn kitsoz​—se samem ki mo pou rode: Ki mo res dan lakaz Jéhovah toulezour dan mo lavi, pou apresie bann kalite Jéhovah ek pou get so tanp avek admirasion.” (Ps. 27:4) David pa ti enn Levit, me esey mazine ki li pe debout andeor lakour sakre tabernak, pre kot sant vre ladorasion. Telman leker David ti ranpli avek rekonesans ki li ti anvi pas leres so lavi dan tanp pou li kapav “apresie bann kalite Jéhovah.”

Sa mo ‘apresie-la’ ena enn lien avek seki “agreab ouswa seki fer plezir nou lespri, nou bann santiman ouswa nou bann sans.” David ti touletan apresie bann dispozision ki Bondie ti pran pou vre ladorasion. Nou kapav demann noumem: ‘Eski mo ena mem santiman ki David?’

Dan nou lepok, Jéhovah pa servi enn batiman pou nou apros ar Li. Okontrer, Li’nn pran dispozision pou nou apros ar Li gras-a so gran tanp spiritiel​—vre ladorasion ki enn dispozision sakre. a Si nou ena rekonesans pou sa laranzman-la, nou osi nou pou “apresie bann kalite Jéhovah.”

Pran lexanp lotel an kwiv kot bann Izraelit ti fer bann sakrifis ki ti devan lantre tabernak. (Ex. 38:1, 2; 40:6) Sa lotel-la reprezant volonte Bondie pou aksepte lavi ki Jésus inn done an sakrifis. (Héb. 10:5-10) Reflesi seki sa vedir pou nou! Lapot Paul ti ekrir: “Kan nou ti bann lennmi, nou ti rekonsilie avek Bondie gras-a lamor so Garson.” (Rom. 5:10) Kan nou montre ki nou ena lafwa dan sakrifis Jésus, nou kapav gagn faver ek konfians Jéhovah, lerla nou kapav vinn so “bann kamarad bien pros.”​—Ps. 25:14.

Jéhovah ‘efas nou bann pese,’ ek gras-a sa nou kapav profit “bann lepok ki rafresi [ki] sorti kot Jéhovah.” (Actes 3:19) Nou sitiasion parey kouma sitiasion enn prizonie ki’nn kondane a-mor. Li regret seki li’nn fer dan lepase ek li fer bann gran sanzman pandan ki li pe atann zour ki pou touy li. Me, kan enn bon ziz trouv sa sanzman-la, sa pous li pou kennsel so kondanasion a-mor. Pena dout ki sa prizonie-la santi li soulaze ek li extra kontan! Parey kouma sa ziz-la, Jéhovah montre so faver anver bann dimounn ki repanti ek Li kennsel zot kondanasion a-mor.

Parmi bann kitsoz ki ti form parti dan vre ladorasion ki David ti kapav trouve dan lakaz Jéhovah, ti ena bann lafoul Izraelit ki ti rasanble pou ador Jéhovah, li ti tann osi lektir ek explikasion Lalwa an piblik, li ti trouv bann pret bril lansan,  ek li ti trouv ban pret ek bann Levit ofer Jéhovah enn servis sakre. (Ex. 30:34-38; Nomb. 3:5-8; Deut. 31:9-12) Zordi osi kan nou ador Jéhovah, nou fer bann kitsoz ki resanble seki bann Izraelit ti fer dan lepase.

Parey kouma dan lepase, dan nou lepok osi “li vremem bon ek li enn plezir pou bann frer res ansam dan linite!” (Ps. 133:1) Finn ena enn lakrwasman extraordiner dan “lafami nou bann frer” dan lemond antie. (1 Pierre 2:17) Dan nou bann renion, nou lir ek nou explik Labib an piblik. Atraver so lorganizasion, Jéhovah donn nou enn bon program lansegnman. Nou gagn osi nouritir spiritiel an abondans dan bann piblikasion pou nou etidie personelman ek an fami. Enn manb Komite Santral ti fer sa remark-la: “Mo medit lor Parol Jéhovah, mo reflesi lor so sinifikasion ek mo rod gagn bon zizman ek kapasite pou konpran; se sa ki’nn ranpli mo lavi ar bann rises spiritiel ek satisfaksion.” Wi, ‘konesans kapav vinn agreab pou nou nam.’​—Prov. 2:10.

Zordi, Bondie aksepte bann lapriyer ki so bann serviter fer ek sa pe mont ver Li toulezour. Pou Jéhovah, sa bann lapriyer-la zot parey kouma lansan ki ena enn loder agreab. (Ps. 141:2) Sa fer nou vremem plezir pou kone ki Jéhovah bien kontan kan nou priye Li avek imilite!

Moïse ti fer sa lapriyer-la: “Ki faver Jéhovah nou Bondie, lor nou; ki to fer travay ki nou fer ar nou lame, prospere.” (Ps. 90:17) Amezir ki nou akonpli nou minister avek zel, Jéhovah beni seki nou fer. (Prov. 10:22) Kitfwa nou finn ed sertin pou konn laverite. Kitfwa nou finn andire dan nou minister pandan boukou lane malgre lindiferans bann dimounn, enn move lasante, bann soufrans afektif, ouswa persekision. (1 Thess. 2:2) Malgre sa, eski nou pa finn trouv “bann kalite Jéhovah” ek eski nou pa finn rann nou kont ki nou Papa bien apresie nou bann zefor?

David ti sant sa kantik-la: “Jéhovah Limem mo par, par ki’nn rezerve pou mwa, ek mo koup. To protez mo leritaz. Finn mezir bann zoli plas pou mwa.” (Ps. 16:5, 6) David ti bien rekonesan pou “par” ki li ti gagne, setadir, bann bon relasion ki li ti ena avek Jéhovah ek privilez pou servi Li. Parey kouma David, kitfwa nou osi nou soufer akoz bann leprev, me nou gagn boukou benediksion spiritiel. Alor, anou kontign apresie vre ladorasion ek touletan ‘get avek admirasion’ tanp spiritiel Jéhovah!