1, 2. Kouma fason ki Jéhovah vey lor nou avek amour li diferan ar fason ki bann kamera sirveyans anrezistre bann zimaz?

 DAN boukou pei, deplizanpli pe servi bann kamera sirveyans pou chek trafik ek pou anrezistre zimaz bann aksidan. Kan bann kamera anrezistre bann zimaz enn aksidan larout kot enn sofer inn sove, sa bann zimaz-la kapav ed bann lotorite pou trouv ek aret sa sofer-la. Parski ena bann kamera partou, sa pe vinn pli difisil pou bann dimounn evit pey konsekans zot bann aksion.

² Me parski ena bann kamera sirveyans partou, eski sa bizin rapel nou dan enn sertenn fason nou Papa ki ena lamour, Jéhovah? Pourtan, Labib dir ki so lizie “partou.” (Prov. 15:3) Me eski savedir ki touletan Li pe examinn seki nou pe fer? Eski Bondie vey lor nou zis pou gete si nou pe aplik so bann lalwa ek pou pini nou si nou pa fer sa? (Jér. 16:17; Héb. 4:13) Non! Jéhovah obzerv nou sirtou parski Li kontan sakenn parmi nou ek Li interese avek nou bien-et.​—1 Pierre 3:12.

3. Sit sink fason kouma Jéhovah montre ki Li vey lor nou avek amour.

³ Ki pou ed nou apresie ki Jéhovah vey lor nou parski Li kontan nou? Anou examinn sink fason kouma Li fer sa: (1) Li averti nou kan nou ena bann move tandans, (2) Li koriz nou  kan nou pran bann move semin, (3) Li gid nou par bann prinsip ki ena dan so Parol, (4) Li ed nou kan nou fer fas ar diferan difikilte, ek (5) Li rekonpans nou kan Li trouv nou fer seki bon.

4. Kifer Jéhovah ti averti Caïn ki ti ena pese “devan laport”?

⁴ Premierman, anou examine kouma Bondie averti nou kan nou pe devlop bann move tandans. (1 Chron. 28:9) Pou apresie sa fason ki Jéhovah vey lor nou la, anou gete kouma Li ti azir ar Caïn, ki “ti bien ankoler” kan Jéhovah pa ti aksepte so sakrifis. (Lir Genèse 4:​3-7.) Jéhovah ti ankouraz Caïn pou “fer seki bon.” Si li pa ti fer sa, Jéhovah ti averti li ki ti pou ena pese “devan laport.” Bondie ti demann Caïn: “Eski to pou kapav dominn li?” Jéhovah ti anvi ki Caïn ekout so lavertisman ek “regagn [so] faver.” Si Caïn ti ena faver Bondie, sa ti pou permet li gard enn bon relasion avek Bondie.

5. Kouma Jéhovah averti nou kont bann move tandans ki nou kapav ena?

⁵ Eski sa aplik ar nou zordi? Jéhovah trouv dan pli profon nou leker; nou pa kapav kasiet Li nou bann vre tandans ek nou bann vre mobil. Nou Papa ki kontan nou anvi ki nou swiv bann semin lazistis; selman, Li pa fors nou pou sanz semin ki nou’nn pran. Atraver so Parol, Labib, Li averti nou kan nou pe pran enn move direksion. Kouma? Dan nou lektir Labib toulezour, souvan nou tom lor bann verse ki ed nou pou sirmont nou bann move labitid ek nou bann move tandans. Anplis, nou bann piblikasion kapav ekler nou lor enn problem ki kitfwa nou pe bizin andire ek montre nou kouma nou kapav sirmont sa problem-la. Ek dan nou bann renion, nou tou nou gagn bann konsey dan ler ki bizin!

6, 7. (a) Kifer nou kapav dir ki nouritir spiritiel ki lorganizasion Jéhovah prepare pou plizir milyon dimounn, montre ki Li kontan ou personelman? (b) Kan Jéhovah vey lor ou personelman, ki ou bizin fer pou gagn bann bienfe?

⁶ Tou sa bann lavertisman-la montre ki vremem Jéhovah kontan nou ek ki Li vey lor sakenn parmi nou. Li vre ki bann parol ki ena dan Labib zot existe depi plizir siek, bann piblikasion ki lorganizasion Jéhovah prepare, zot fer pou plizir milyon dimounn, ek bann konsey ki done dan renion, zot pou tou dimounn dan kongregasion. Selman, dan tou sa bann ka-la, Jéhovah diriz ou latansion ver so parol pou ki ou kapav koriz ou bann tandans. Alor, nou kapav dir ki se enn prev ki Jéhovah vey lor ou personelman avek amour.

⁷ Pou gagn bann bienfe ar bann lavertisman Bondie, nou bizin avan tou konpran ki Li vremem interese ar nou. Apre sa, nou bizin reazir dan enn fason pozitif ar so Parol, ek fer zefor pou eliminn bann panse ki pa fer Bondie plezir. (Lir Isaïe 55:6, 7.) Si nou pran kont bann lavertisman ki nou gagne, sa pou evit nou boukou sagrin. Me fer koumadir nou’nn les nou gagne par nou bann move tandans ek nou’nn fer pese. Dan sa ka-la, kouma nou Papa ki kontan nou ed nou?

8, 9. Kouma bann konsey ki Jéhovah donn nou par mwayin so bann serviter, montre ki Li bien interese ar nou? Donn enn lexanp.

⁸ Se sirtou kan Jéhovah koriz nou ki kitfwa nou rann nou kont ki Li interese ar nou. (Lir Hébreux 12:5, 6.) Li vre ki nou pa kontan kan donn nou konsey ouswa kan disiplinn nou. (Héb. 12:11) Me reflesi ki bann kitsoz enn kikenn bizin pran an konsiderasion kan li pe donn nou bann konsey. Par exanp, li bizin kone ki nou pe fer ki kapav afekte nou relasion avek Jéhovah, li bizin pran an  konsiderasion nou bann santiman, ek li bizin dispoze pou pran letan ek fer bann zefor neseser pou montre nou dan Labib kouma nou kapav sanz semin ki nou’nn pran pou ki nou fer Bondie plezir. Sirtou, nou bizin pa bliye ki Lasours sa bann konsey-la, se Jéhovah.

⁹ Anou get enn lexanp kouma bann dimounn ki donn konsey kapav montre ki zot interese ar lezot parey kouma Jéhovah. Avan ki li vinn dan laverite, enn frer souvan ti pe get pornografi, me li ti reisi aret sa labitid-la. Selman, so move tandans ti ankor la parey kouma enn labrez dife ki ankor pe brile. Kan li ti gagn enn nouvo portab, li ti rekoumans ena sa bann move tandans la. (Jacq. 1:14, 15) Li ti servi so telefonn pou rant lor bann sit pornografik. Enn zour, kan li ti pe rann temwaniaz lor telefonn, li ti pret so telefonn enn ansien pou ki ansien-la kapav rod de-trwa ladres. Kan ansien-la ti koumans servi so telefonn, bann sit ki pa korek ti aparet. Seki ti arive ti enn benediksion pou sa frer ki ti an danze lor plan spiritiel la. Li ti gagn konsey dan ler ki bizin, gagn bann bienfe ar disiplinn ki li ti gagne, ek avek letan li ti reisi sirmont so bann move tandans. Nou vremem ena rekonesans anver nou bon Papa ki dan lesiel ki trouv mem bann pese ki nou fer an kasiet ek ki koriz nou avan ki nou al tro lwin!

10, 11. (a) Kouma ou kapav rod direksion Bondie? (b) Kouma lexperyans ki enn fami ti fer, montre ki li saz pou swiv direksion Jéhovah?

¹⁰ Enn ekrivin Psaume ti sant pou Jéhovah: “To gid mwa avek to konsey.” (Ps. 73:24) Kan nou bizin direksion Jéhovah, nou montre ki nou “pran Li kont” kan nou get dan so Parol pou kone ki Li panse. Kan nou aplik bann prinsip Labib, sa pa zis fer nou gagn bann bienfe lor plan spiritiel, me parfwa sa kapav ed nou pou gagn seki nou bizin lor plan materyel.​—Prov. 3:6.

¹¹ Pou montre kouma Jéhovah gid sertin so bann serviter, anou get lexanp enn fermie ki ti pe lwe enn terin ek ki ti res dan Masbate, enn landrwa kot ena montagn dan Philippines. Li ek so madam ti pionie permanan ek anmemtan ti pran swin zot fami ki ti gran. Enn zour, zot ti gagn sok kan zot ti gagn enn let kot zot proprieter ti donn zot lord pou kit  terin kot zot ti pe reste. Pou ki rezon? Parski enn kikenn ti fer enn fos lakizasion ki zot ti pe azir dan enn fason malonet. Mem si frer-la ti trakase kotsa li ti pou trouv enn plas pou so fami reste, li ti dir: “Jéhovah pou ed nou. Li’nn touletan donn nou seki nou bizin dan ninport ki sitiasion.” Frer-la ti ena rezon pou met so konfians an Jéhovah. De-trwa zour plitar, sa fami-la ti soulaze kan zot ti aprann ki zot pa ti pou bizin kit terin-la. Ki finn arive? Proprieter-la ti trouve ki malgre sa lakizasion-la, sa fami Temwin la ti les bann prinsip Labib gid zot ek zot ti montre respe ek ti prezerv lape. Sa ti telman inpresionn proprieter-la ki li pa ti zis les zot reste, me li ti osi donn zot ankor terin pou plante. (Lir 1 Pierre 2:12.) Wi, Jéhovah gid nou par mwayin so Parol pou ed nou fer fas ar bann difikilte dan lavi.

12, 13. Dan ki bann sitiasion kitfwa sertin demann zotmem si Bondie vremem trouv zot bann soufrans?

¹² Selman, parfwa enn sitiasion difisil kapav dir lontan. Kitfwa nou pe lit kont enn maladi kronik, lopozision nou bann fami pros, ouswa bann persekision ki pa’le fini. Ek ki nou kapav dir lor bann gran konfli personalite ki detanzantan nou gagne avek enn kikenn dan kongregasion?

¹³ Par exanp, enn frer kapav inn fer ou enn remark ki kitfwa ou’nn trouv blesan. Ou kapav dir: ‘Pa sipoze ena bann kitsoz koumsa dan lorganizasion Bondie!’ Pourtan, sa frer ki’nn fer sa remark-la gagn bann privilez dan kongregasion ek lezot trouv li enn bon frer. Kitfwa ou demann oumem: ‘Kouma enn kitsoz koumsa kapav arive? Eski Jéhovah pa trouve? Eski Li pa pou fer nanye?’​—Ps. 13:1, 2; Hab. 1:2, 3.

14. Sit enn rezon kifer Bondie pa fer nanye pou ed nou regle nou bann problem personel.

¹⁴ Jéhovah kitfwa ena bann bon rezon pou pa fer nanye. Par exanp, ou kapav panse ki lot dimounn-la ena plis tor, alor ki Bondie trouv bann kitsoz dan enn lot fason. Pou Li, kitfwa ou ena plis tor ki ou pe panse. Ofet, sa remark ki ou’nn trouv bien blesan la, kitfwa se enn konsey ki ou ti bizin gagne ek lor ki ou bizin reflesi. Dan so biografi, Frer Karl Klein ki ti enn manb Komite Santral ti dir kouma enn fwa li ti gagn enn konsey sever ek fran avek Frer J. F. Rutherford. Plitar, avek lazwa Frer Rutherford ti dir Frer Klein: “Bonzour, Karl!” Me Frer Klein ki ti ankor santi li blese akoz sa remark-la ti dir li enn bonzour kiafer. Kan li ti rann li kont ki Frer Klein ti pe gard rankinn, Frer Rutherford ti averti li pou li pa tom dan piez Lediab. Plitar, Frer Klein ti ekrir: “Kan nou gard rankinn anver enn frer, sirtou parski li’nn dir nou enn kitsoz ki li ena drwa pou dir akoz so fonksion, nou pe les nou rant dan bann piez Lediab.” a

15. Ki pou anpes ou perdi pasians kan ou pe atann ki Jéhovah ed ou dan enn sitiasion difisil?

¹⁵ Selman, nou kapav perdi pasians kan enn sitiasion difisil paret pa pe fini. Kouma nou pou fer fas ar sa sitiasion-la? Fer koumadir ou pe kondir ou loto lor lotorout ek ou bloke dan sirkilasion. Ou pa kone pou komie letan ou pou res bloke. Si ou koumans irite ek esey rod enn lot semin, kitfwa ou kapav perdi. Ou kapav pran plis letan pou ariv dan ou destinasion, ki si ou ti ena pasians ek res lor ou semin. Li parey kan ou pe fer fas enn sitiasion difisil. Si ou kontign swiv bann direksion ki ena dan Parol Bondie, ou pou reisi andire.

16. Sit enn lot rezon kifer kitfwa Jéhovah swazir pou les letan pase avan ki Li ed nou dan nou bann difikilte.

 ¹⁶ Jéhovah kitfwa les letan pase avan ki Li ed nou dan nou bann difikilte parski Li anvi nou gagn enn formasion ki bien inportan. (Lir 1 Pierre 5:6-10.) Me, pa Bondie ki responsab nou bann difikilte. (Jacq. 1:13) Se “[nou] ladverser, Lediab,” ki responsab laplipar bann difikilte. Selman, Bondie kapav servi enn sitiasion difisil pou ed nou grandi lor plan spiritiel. Li trouv nou bann soufrans, ek “parski Li interese ar” nou, Li pou fer an-sort ki sa dir zis pou “enn tipe letan.” Eski ou apresie ki Jéhovah vey lor ou avek amour kan ou pe pas par bann difikilte? Eski ou ena konfians ki Li pou ed ou trouv enn semin sorti?​—2 Cor. 4:​7-9.

17. Ki kalite dimounn Jéhovah pe rode, ek kifer?

¹⁷ An dernie, Bondie obzerv nou pou enn rezon ki bien rekonfort nou. Par mwayin profet Hanani, Jéhovah ti dir Lerwa Asa: “Lizie Jéhovah pe get partou lor later pou montre so lafors an faver bann dimounn ki ena enn leker konple anver Li.” (2 Chron. 16:9) Alor ki Bondie ti trouve ki Asa pa ti ena enn leker konple anver Li, Li pou “montre so lafors” anver ou si ou kontign fer seki drwat.

18. Kan nou panse ki personn pa remark nou bann bon aksion, ki nou bizin rapel konsernan Jéhovah? (Get zimaz koumansman lartik.)

¹⁸ Bondie anvi ki nou “rod seki bon,” “kontan seki bon,” ek “fer seki bon” pou ki Li kapav “montre [nou] so faver.” (Amos 5:14, 15; 1 Pierre 3:11, 12) Jéhovah trouv bann dimounn ki zis ek beni zot. (Ps. 34:15) Par exanp, reflesi lor sa de famsaz Ebre la, Shiphra ek Poua. Kan nasion Israël ti esklav dan l’Égypte, sa de madam la ti ena plis lakrint pou Bondie ki pou Pharaon ki ti donn zot lord pou touy tou bann garson Ebre ki ti fek ne. Li kler ki zot konsians ki ti dirize par bann prinsip Bondie ti anpes zot pou touy sa bann tibaba-la. Plitar, Bondie ti donn Shiphra ek Poua sakenn zot prop fami. (Ex. 1:15-17, 20, 21) Lizie Jéhovah ki get partou ti trouv zot bann bon aksion. Parfwa, nou kapav panse ki personn pa remark bann bon aksion ki nou fer. Me Jéhovah remarke. Li trouv sak bon aksion ki nou fer, ek Li pou rekonpans nou.​—Mat. 6:​4, 6; 1 Tim. 5:25; Héb. 6:10.

19. Kouma enn ser ti rann li kont ki Jéhovah remark so bann bon aksion?

¹⁹ Enn ser ki res l’Autriche ti rann li kont ki Bondie remark so bann gran zefor. Parski li sorti Hongrie, li ti gagn ladres enn dimounn ki koz Ongrwa pou li al vizite. Deswit, li ti al vizit sa dimounn-la, me personn pa ti la. Li ti re-ale plizir fwa. Parfwa, li ti ena linpresion ki ti ena kikenn la, me personn pa ti ouver laport. Li ti les bann piblikasion, bann let, bann linformasion pou dimounn-la kapav kontakte li, ek lezot kitsoz ankor. Apre enn an edmi, alafin dimounn-la ti ouver so laport! Enn madam bien zanti ti akey ser-la, ek ti dir li: “Rantre silvouple. Mo’nn lir tou seki ou ti kite ek mo ti pe atann ou.” Madam-la ti pe fer bann tretman simioterapi ek li pa ti pe kapav zwenn bann dimounn. Ser-la ti koumans enn letid Labib avek li. Bondie ti vremem rekonpans sa ser-la pou so bann gran zefor!

20. Ki ou panse lor fason ki Jéhovah vey lor ou avek amour?

²⁰ Jéhovah trouv tou seki ou pe fer ek alafin Li pou rekonpans ou. Kan ou rann ou kont ki lizie Jéhovah lor ou, pa panse ki se koumadir enn kamera sirveyans ki pe examinn ou. Olie sa, santi ou pli pros ar sa Bondie ki kontan ou la ek ki vremem interese avek ou!