1, 2. (a) Kifer li paret ki Moïse ti an danze? Explike. (Get zimaz koumansman lartik.) (b) Kifer Moïse pa ti per koler lerwa?

 POU bann Ezipsien, Pharaon ti enn dirizan bien pwisan ek li ti koumadir enn bondie vivan. Liv Kan l’Égypte Ti Diriz Les (an Angle) dir ki pou bann Ezipsien, Pharaon “ti ena plis sazes ek pouvwar ki tou bann kreatir lor later.” Pou fer bann Ezipsien per li, Pharaon ti met enn kouronn lor ki ti ena enn fos kobra ki ti pre pou atake​—sa ti enn rapel ki bann lennmi lerwa pa ti pou tarde pou detrir. Alor, esey mazine ki Moïse ti resanti kan Jéhovah ti dir li: “Mo pou avoy twa kot Pharaon, ek to pou bizin tir mo pep, bann Izraelit, dan l’Égypte.”​—Ex. 3:10.

² Moïse ti al l’Égypte, ti anons mesaz Bondie, ek ti fer fas ar koler Pharaon. Apre ki nef ple ti vinn lor l’Égypte, Pharaon ti menas Moïse: “Fer atansion ki to pa esey revinn devan mwa ankor, parski zour to vinn devan mwa, to pou mor.” (Ex. 10:28) Avan ki Moïse sorti devan Pharaon, li ti profetize ki garson premie-ne lerwa ti pou mor. (Ex. 11:4-8) Apre sa, Moïse ti donn sak fami Izraelit linstriksion pou touy enn bouk ouswa enn mouton mal​—enn zanimo sakre pou Ra, enn bondie Ezipsien​—ek pou pas disan sa zanimo-la lor lankadreman zot laport.  (Ex. 12:5-7) Kouma Pharaon ti pou reazir? Moïse pa ti per reaksion Pharaon. Kifer? Parski avek lafwa li ti obeir Jéhovah, “san ki li per koler lerwa, parski li ti tini ferm, koumadir li ti pe trouv Bondie ki invizib.”​—Lir Hébreux 11:27, 28.

3. Ki nou pou examine lor lafwa ki Moïse ti ena dan “Bondie ki invizib”?

³ Eski ou lafwa telman for ki koumadir ou kapav “trouv Bondie”? (Mat. 5:8) Pou fortifie nou lafwa pou ki nou kapav trouv “Bondie ki invizib,” anou get lexanp Moïse. Kouma so lafwa an Jéhovah ti anpes li ena lakrint bann zom? Dan ki fason li ti manifeste lafwa dan bann promes Bondie? Ek kan Moïse ti arive trouv “Bondie ki invizib,” kouma sa ti fortifie li ek so pep kan zot ti an danze?

4. Pou bann ki pa ti ena lafwa, ki kitfwa zot ti panse kan Moïse ti al devan Pharaon?

⁴ Bann ki pa ti ena lafwa kitfwa ti panse ki Moïse pa ti pou kapav fer nanye kont Pharaon. Li ti paret ki lavi Moïse, so boner, ek so lavenir ti dan lame Pharaon. Moïse limem ti demann Jéhovah: “Ki mo ete mwa pou ki mo al devan Pharaon ek pou tir bann Izraelit dan l’Égypte?” (Ex. 3:11) Apepre 40 an avan, Moïse ti sove depi l’Égypte ek ti viv kouma enn fizitif. Kitfwa li ti demann limem: ‘Eski vremem mo pou azir avek sazes si mo retourn l’Égypte ek fer lerwa ankoler?’

5, 6. Ki ti ed Moïse pou ena lakrint pou Jéhovah, olie ki lakrint pou Pharaon?

⁵ Avan ki Moïse retourn l’Égypte, Bondie ti ansegn li enn prinsip bien inportan, mem prinsip ki plitar Moïse ti ekrir dan liv Job: “Lakrint pou Jéhovah, se samem lasazes.” (Job 28:28) Pou ed Moïse ena sa kalite lakrint la ek azir avek sazes, Jéhovah ti montre li diferans ki ena ant bann dimounn ek Bondie Tou-Pwisan. Li ti demande: “Kisannla ki finn donn dimounn enn labous, ouswa kisannla ki finn fer zot mie, sourd, trouv kler ouswa aveg? Eski se pa mwa, Jéhovah?”​—Ex. 4:11.

⁶ Ki Jéhovah ti pe rod fer Moïse konpran? Ki li pa ti bizin gagn per. Se Jéhovah ki ti avoy li, ek se Limem ki ti pou donn Moïse seki li ti bizin pou anons So mesaz ar Pharaon. Anplis, Pharaon pa ti pou kapav fer nanye kont Jéhovah. Apre tou, se pa premie fwa ki bann serviter Bondie ti an danze anba regn bann Ezipsien. Kitfwa Moïse ti medit lor fason ki Jéhovah ti protez Abraham, Joseph, ek Moïse limem pandan regn bann Pharaon dan lepase. (Gen. 12:17-19; 41:14, 39-41; Ex. 1:22–2:10) Gras-a so lafwa an Jéhovah, “Bondie ki invizib,” avek kouraz Moïse ti al devan Pharaon ek ti dir sak parol ki Jéhovah ti donn li lord pou dir.

7. Kouma lafwa ki enn ser ti ena an Jéhovah ti ed li pou pena lakrint bann zom?

⁷ Parey, lafwa an Jéhovah ti ed enn ser ki apel Ella pou pena lakrint bann zom. An 1949, KGB ti aret li dan l’Estonie, ti tir tou so linz, ek ti fer bann zenn lapolis get li. Li dir: “Mo ti santi mwa imilie. Me, apre ki mo ti priye Jéhovah mo ti gagn lape ek trankilite dan mo leker.” Apre sa, zot ti ferm Ella tousel dan enn kaso pandan trwa zour. Li rakonte: “Bann ofisie-la ti kriye for: ‘Nou pou fer enn manier ki personn pa mem rapel nom Jéhovah dan l’Estonie! Twa to pou al dan enn kan, ek lezot pou al Sibérie!’ Zot ti boufonn mwa ek ti dir: ‘Kot to Jéhovah ete?’” Eski Ella ti pou per bann zom ouswa li ti pou fer Jéhovah konfians? Kan bannla ti interoz li, li ti reponn zot san okenn laper: “Mo’nn bien reflesi lor sa sitiasion-la, ek mo prefer res dan prizon ek gard mo bon relasion avek Bondie ki gagn liberte ek perdi so faver.” Pou Ella, Jéhovah ti enn kikenn ki reel parey kouma  sa bann zom ki ti devan li la. Gras-a so lafwa, li ti kontign gard so lintegrite.

8, 9. (a) Ki pou anpes nou ena lakrint bann zom? (b) Si akoz lakrint bann zom ou tante pou sede, lor kisannla ou bizin fixe ou latansion?

⁸ Lafwa an Jéhovah pou ed ou vink ou bann laper. Si bann ofisie ki ena enn gran lotorite esey anpes ou ador Bondie, kitfwa li pou paret ki ou lavi, ou boner ek ou lavenir dan lame bann imin. Kitfwa ou kapav demann oumem si ou pou azir avek sazes si ou kontign servi Jéhovah ek fer bann lotorite ankoler. Me pa bliye: Se lafwa dan Bondie ki pou anpes ou ena lakrint bann zom. (Lir Proverbes 29:25.) Jéhovah poz sa kestion-la: “Kifer to bizin per enn zom mortel ki pou mor ek garson enn imin ki pou fletri kouma lerb ver?”​—Is. 51:12, 13.

⁹ Fixe ou latansion lor ou Papa ki tou-pwisan. Li trouv bann ki pe soufer akoz bann dirizan inzis. Li resanti zot lapenn, ek Li ed zot. (Ex. 3:7-10) Mem si ou bizin defann ou lafwa devan bann ofisie ki ena enn gran lotorite, “pa trakase kouma [ou] pou koze ouswa ki [ou] pou dir, parski dan sa ler-la, pou donn [ou] bann parol ki [ou] bizin dir.” (Mat. 10:18-20) Bann dirizan imin ek bann ofisie gouvernman pa kapav fer nanye kont Jéhovah. Si depi asterla mem ou ranforsi ou lafwa, ou pou kapav trouv Jéhovah kouma enn Kikenn reel ek ki bien anvi ed ou.

10. (a) Ki bann linstriksion Jéhovah ti donn bann Izraelit dan mwa Nizan an 1513 Avan Nou Lepok? (b) Kifer Moïse ti obeir bann linstriksion Bondie?

¹⁰ Dan mwa Nizan an 1513 Avan Nou Lepok, Jéhovah ti dir Moïse ek Aaron donn bann Izraelit sa bann linstriksion ki zame zot ti’nn tande la: Swazir enn mouton mal ouswa enn bouk ki an bonn sante, touy li, ek pas so disan lor zot bann lankadreman laport. (Ex. 12:3-7) Ki Moïse ti fer? Plitar, lapot Paul ti ekrir konsernan Moïse: “Par lafwa li ti fer Pâque ek li ti pas disan lor laport, pou ki destrikter-la pa vinn fer ditor zot premie-ne.” (Héb. 11:28) Moïse ti kone ki li kapav fer Jéhovah konfians, ek li ti manifeste lafwa dan promes ki Jéhovah ti fer pou touy bann garson premie-ne dan l’Égypte.

11. Kifer Moïse ti averti lezot?

¹¹ Li paret ki bann garson Moïse ti dan Madiân, bien lwin ar “destrikter.” a (Ex. 18:1-6) Pourtan, li ti obeir ek li ti fer bann lezot fami Izraelit kone ki zot bann garson premie-ne ti an danze. Boukou lavi ti an danze, ek Moïse ti kontan so bann frer Izraelit. Labib dir: “Deswit Moïse ti apel bann ansien ek ti dir zot: . . . ‘Touy sakrifis Pâque.’”​—Ex. 12:21.

12. Ki mesaz inportan Jéhovah inn demann nou pou anonse?

¹² Anba direksion bann anz, pep Jéhovah pe anons sa mesaz inportan la: “Ena lakrint pou Bondie ek donn Li laglwar, parski ler so zizman inn arive, ador sa Kikenn ki’nn kree lesiel ek later ek lamer ek bann lasours delo.” (Rév. 14:7) Se asterla letan pou anons sa mesaz-la. Nou bizin averti bann dimounn pou sorti dan Gran Babylone, pou ki zot pa “gagn enn par dan so bann maler.” (Rév. 18:4) Bann “lezot brebi” ansam avek bann Kretien ki ena lesperans pou al viv dan lesiel pe sipliy bann ki elwagne ar Bondie pou “rekonsilie zot” avek Li.​—Jean 10:16; 2 Cor. 5:20.

13. Ki pou ed nou ogmant nou dezir pou partaz bon nouvel?

¹³ Nou sir ki vremem “ler zizman” inn arive. Nou ena lafwa osi ki Jéhovah pa’nn exazere kan Li’nn dir ki nou travay predikasion ek nou travay pou fer bann disip, li irzan. Dan enn vizion, lapot Jean  “ti trouv kat anz ki ti pe debout dan kat kwin later, zot ti pe tini bien for kat divan later.” (Rév. 7:1) Gras-a ou lafwa, eski ou trouv sa bann anz-la pre pou larg bann divan gran detres ki pou amenn destriksion lor sa lemond-la? Si ou trouv sa bann anz-la gras-a ou lafwa, avek lasirans ou pou kapav partaz bon nouvel.

14. Ki pous nou pou “averti enn move dimounn pou ki li detourn li ar so move semin”?

¹⁴ Bann vre Kretien pe deza profit enn lamitie avek Jéhovah ek ena lespwar pou viv pou touletan. Me, nou rekonet ki nou ena responsabilite pou “averti enn move dimounn pou ki li detourn li ar so move semin pou ki li pa mor.” (Lir Ézékiel 3:17-19.) Biensir, nou pa prese zis pou evit enn det disan. Nou prese parski nou kontan Jéhovah ek nou kontan nou prosin. Dan so parabol lor bon Samaritin, Jésus ti ansegn nou ki ete vre lamour ek vre mizerikord. Nou kapav demann noumem: ‘Eski parey kouma sa Samaritin-la mo “resanti enn gran pitie” pou bann dimounn ek sa pous mwa pou rann zot temwaniaz?’ Apre tou, zame nou pa ti pou anvi resanble sa pret ek sa Levit ki ena dan sa parabol la ek rod bann pretex pou “al lot kote.” (Luc 10:25-37) Lafwa dan bann promes Bondie ek lamour pou nou prosin pou pous nou partisip afon dan travay predikasion avan ki li tro tar.

15. Kifer bann Izraelit ti santi zot pieze?

¹⁵ Lafwa ki Moïse ti ena dan “Bondie ki invizib” ti ed li kan bann  Izraelit ti an danze apre ki zot ti kit l’Égypte. Labib dir: “Bann Izraelit ti lev zot lizie ek zot ti trouv bann Ezipsien pe swiv zot. Bann Izraelit ti gagn extra per ek ti koumans kriy ver Jéhovah.” (Ex. 14:10-12) Eski se enn sitiasion ki zot pa ti atann? Bann Izraelit ti bizin atann ki ti pou ariv sa, parski Jéhovah ti predir: “Mo pou les leker Pharaon vinn dir, ek li pou pourswiv bannla, ek mo pou glorifie momem par mwayin Pharaon ek tou so larme; ek vremem bann Ezipsien pou kone ki momem Jéhovah.” (Ex. 14:4) Malgre sa, bann Izraelit ti trouv zis seki ti vizib​—par devan zot ti ena Lamer Rouge ki ti inposib pou traverse, par deryer zot ti ena bann sar lager Pharaon ki ti pe vini lor vites, ek enn vie berze 80 an ki ti pe gid zot! Zot ti santi zot pieze.

16. Kouma lafwa Moïse ti fortifie li devan Lamer Rouge?

¹⁶ Pourtan, Moïse ti tini ferm. Kifer? Parski gras-a so lafwa li ti trouv enn kitsoz bien pli pwisan ki enn lamer ouswa enn larme. Li ti kapav trouv ‘delivrans ki Jéhovah ti pou amene,’ ek li ti kone ki Jéhovah ti pou lager pou bann Izraelit. (Lir Exode 14:13, 14.) Lafwa Moïse ti donn pep Bondie lafors ek kouraz. Labib dir: “Par lafwa, zot finn travers Lamer Rouge koumadir lor later sek, me kan bann Ezipsien ti esey fer parey, zot ti nwaye.” (Héb. 11:29) Apre sa, “pep Israël ti koumans ena lakrint pou Jéhovah ek ena lafwa an Jéhovah ek dan so serviter Moïse.”​—Ex. 14:31.

17. Ki levennman dan lavenir pou teste nou lafwa?

¹⁷ Biento, nou lavi pou paret an danze. Kan pou ena Har-Maguédôn, bann gouvernman sa lemond-la pou’nn fini detrir net bann lorganizasion relizie ki ti ena enn pli gran linflians ek ki ti pli boukou ki nou. (Rév. 17:16) Dan enn profesi, Jéhovah ti konpar nou sitiasion san defans ar “enn pei ki so bann abitasion pa proteze . . . ki pa proteze par bann miray, bar, ouswa laport.” (Ézék. 38:10-12, 14-16) Si nou pena lafwa, kitfwa li pou paret ki nou pena okenn sans pou gagn lavi sov. Kouma nou pou reazir?

18. Explike kifer nou pou kapav tini ferm pandan gran detres.

¹⁸ Nou bizin tini ferm ek pa gagn per. Kifer? Parski Jéhovah ti predir ki pou ena enn latak koumsa kont pep Bondie. Li ti predir osi kouma sa ti pou fini. “‘Sa zour-la, zour kot Gog pou anvayir pei Israël,’ se seki Souverin Segner Jéhovah dir: ‘Mo gran koler pou monte. Dan mo zel ek dan mo koler ki’nn pran kouma enn dife, mo pou koze.’” (Ézék. 38:18-23) Bondie pou detrir tou bann ki anvi fer ditor so pep. Si ou ena lafwa ki Jéhovah pou protez ou pandan so ‘gran zour ki fer per,’ sa pou ed ou pou trouv “delivrans ki Jéhovah pou amene” ek pou kontign gard ou lintegrite.​—Yoël 2:31, 32.

19. (a) Ki kalite lamitie ti ena ant Jéhovah ek Moïse? (b) Si ou pran Jéhovah kont dan tou seki ou fer, ki benediksion ou pou gagne?

¹⁹ Pou prepar ou depi asterla mem pou sa bann levennman extraordiner la, kontign ‘tini ferm, koumadir ou pe trouv Bondie ki invizib’! Pou fortifie ou lamitie avek Jéhovah, etidie ek priye regilierman. Moïse ti ena telman enn bon lamitie avek Jéhovah ek Jéhovah ti servi li dan enn fason telman extraordiner, ki Labib dir ki Jéhovah ti konn Moïse “fas-a-fas,” setadir ki Jéhovah ti konn li extra bien. (Deut. 34:10) Moïse ti enn profet extraordiner. Selman, par lafwa, ou’si ou kapav ena enn relasion bien pros avek Jéhovah parey kouma ou ti pou ena si ou ti kapav trouv Li. Si ou kontign pran Li kont “dan tou seki [ou] fer,” parey kouma Parol Bondie ankouraz ou pou fer, “Li pou fer [ou] bann semin vinn drwat.”​—Prov. 3:6.