Dan enn sante kot Lerwa David ti pe loue Kreater liniver, li ti dir: “A Bondie, mo finn pran plezir pou fer to volonte, ek to lalwa li dan fon mo leker.” (Ps. 40:8) Malgre bann difikilte ek bann presion ki li ti gagne dan so lavi, David ti pran plezir pou fer volonte Bondie. Me, David pa ti sel adorater Jéhovah ki ti pran plezir pou fer volonte Bondie.

Kan li ti pe aplik bann parol Psaume 40:8 ar Lemesi, ouswa Christ, lapot Paul ti ekrir: “Kan li [Jésus] rant dan lemond, li dir: ‘“Sakrifis ek ofrand to pa finn oule, me to finn prepar enn lekor pou mwa. To pa finn aksepte bann sakrifis brile ek sakrifis pou pese.” Apre mo ti dir: “Gete! Mo finn vini (dan roulo inn ekrir lor mwa) pou fer to volonte, A mo Bondie.”’”​—Héb. 10:5-7.

Kan li ti lor later, Jésus ti kontan obzerv kreasion, pas letan avek bann kamarad, ek pran enn repa avek lezot. (Mat. 6:26-29; Jean 2:1, 2; 12:1, 2) Pourtan, seki ti plis interes li ek seki ti fer li gagn plis lazwa, se fer volonte so Papa ki dan lesiel. Ofet, Jésus ti dir: “Fer volonte Bondie ki’nn avoy mwa ek fini so travay, se koumadir enn manze pou mwa.” (Jean 4:34; 6:38) Se avek zot Met ki bann disip Jésus ti aprann kouma zot kapav gagn vre boner. Avek enn gran lazwa, zot ti pres mesaz Rwayom Bondie avek lezot volonterman ek avek zel.​—Luc 10:1, 8, 9, 17.

Jésus ti donn so bann disip sa lord-la: “Ale ek fer bann disip parmi bann dimounn dan tou bann nasion, batiz zot o-nom mo Papa, so Garson ek lespri sin, ansegn zot pou swiv tou bann komannman ki mo’nn donn zot. Ek, gete! Mo avek zot toulezour ziska lafin sa sistem-la.” (Mat. 28:19, 20) Pou akonpli sa mision-la, nou bizin pres avek bann dimounn partou kot zot ete, revizit bann ki interese, ek fer letid Labib avek zot. Kan nou  fer sa travay-la, sa kapav fer nou gagn enn gran lazwa.

Mem si bann dimounn interese ar nou mesaz ouswa non, se avan tou nou latitid ki kapav ed nou pou akonpli nou minister avek lazwa. Kifer nou kontign pres bon nouvel mem si nou zwenn bann dimounn ki pa interese ouswa ki indiferan? Parski nou kone ki, kan nou pres Rwayom Bondie ek fer bann disip, se enn fason ki nou montre nou kontan Bondie ek bann dimounn. An realite, lavi bann dimounn an danze​—nou lavi ek lavi lezot toulede. (Ézék. 3:17-21; 1 Tim. 4:16) Anou examinn sertin pwin ki finn ed boukou nou bann konpagnon Kretien gard zot zel ouswa ena plis zel dan zot minister, mem dan bann teritwar difisil.

Kan nou poz bann bon kestion dan nou minister, sa fer nou gagn bann bon rezilta. Enn gramatin, Amalia ti trouv enn misie pe lir lagazet dan enn zardin. Amalia ti al ver misie-la ek ti demann li si li’nn lir kit bon nouvel. Kan li ti dir non, Amalia ti dir li: “Mo ti pou kontan partaz avek ou enn bon nouvel lor Rwayom Bondie.” Sa ti fer dimounn-la interese, ek li ti aksepte enn letid Labib. Ofet, Amalia finn kapav koumans trwa letid Labib dan sa park-la.

Janice ti fer plas kot li travay vinn teritwar kot li prese. Kan enn sekirikor ek so koleg ti interese avek enn lartik ki ti pibliye dan Latour Degard, Janice ti propoz pou amenn sa magazinn-la regilierman pou zot. Li ti fer parey pou enn lot koleg ki ti inpresione ar bann diferan size ki ena dan Latour Degard ek Réveillez-vous ! Sa ti amenn enn lot koleg ankor pou demann bann magazinn. Janice dir: “Se vremem enn benediksion Jéhovah!” Alafin li ti ena 11 tourne peryodik dan so travay.

Enn sirveyan ki vizit bann kongregasion ti dir ki dan predikasion lakaz-lakaz, fode pa ki kan bann proklamater terminn zot konversasion, zot zis dir dimounn-la ki zot pou repase enn lot zour. Okontrer, zot kapav demann dimounn-la: “Eski ou ti pou kontan mo montre ou kouma enn letid Labib pase?” ouswa, “Ki zour ek ki ler ou ti pou kontan mo repas get ou pou kontign nou konversasion?” Sa sirveyan-la ti dir ki kan bann frer ek ser dan enn kongregasion ki li ti pe vizite ti swiv sa metod-la, zot ti koumans 44 letid Labib dan enn semenn.

Kan nou pa tarde pou al revizit bann dimounn​—mem de-trwa zour apre ki nou’nn zwenn zot​—sa kapav donn bann bon rezilta. Kifer? Parski sa montre ki nou vremem anvi ed bann dimounn sinser pou konpran Labib. Kan ti demann enn madam kifer li ti aksepte enn letid Labib avek bann Temwin Jéhovah, li ti dir: “Mo ti koumans  etidie parski zot ti montre ki zot vremem interese ar mwa ek kontan mwa.”

Enn tigit letan apre ki li ti asiste Lekol Pionie, Madaí ti pe fer 15 letid Labib ek li ti donn lezot proklamater plis ki 5. Plizir parmi so bann etidian ti koumans asiste nou bann renion regilierman. Ki ti ed Madaí pou koumans tou sa letid-la? Sa lekol-la ti’nn montre li linportans pou kontign revizit bann dimounn ki ti montre lintere ziska ki li zwenn zot. Enn lot Temwin ki finn ed boukou dimounn aprann laverite ki ena dan Labib, dir: “Mo finn aprann ki, kitsoz pli inportan ki nou bizin fer pou ed bann dimounn ki anvi konn Jéhovah, se kontign fer bann vizit.”

Sa demann bann gran zefor pou fer bann vizit ek bann letid. Selman, bann benediksion ki nou gagne zot boukou pli gran ki sa bann zefor-la. Kan nou res konsantre lor nou predikasion, nou kapav ed lezot pou “gagn enn konesans exakt lor laverite,” ek sa kapav fer zot gagn lavi. (1 Tim. 2:3, 4) Ek nou, nou kapav gagn enn satisfaksion ek enn lazwa ki pa kapav konpare.