1, 2. (a) Rakont enn lexperyans ki montre linportans pou bien swazir nou bann kestion. (Get zimaz koumansman lartik.) (b) Kifer fode pa nou ezite pou koz lor bann size difisil?

 FINN gagn plizir lane, enn ser ti pe koz lor Labib avek so misie ki pa Temwin. Dan lepase, misie-la ti enn Kretien ek ti form parti dan enn bann legliz la chrétienté. Kan zot ti pe koze, so misie ti dir ki li krwar dan Trinite. Kan ser-la ti rann li kont ki kitfwa so misie pa ti kone vremem lor ki kitsoz lansegnman Trinite koze, avek tak li ti demann li: “Eski to krwar ki Bondie se Bondie, Jésus se Bondie, ek lespri sin se Bondie; selman, zot pa trwa Bondie me enn sel Bondie?” So misie ti gagn sok ek ti dir: “Non, mo pa krwar sa!” Lerla, zot inn koumans gagn enn konversasion bien anime lor kouma Bondie ete vremem.

² Sa lexperyans-la montre nou linportans pou bien swazir nou bann kestion ek pou poz zot avek tak. Li osi atir nou latansion lor enn pwin inportan: Fode pa nou ezite pou koz lor bann size difisil kouma Trinite, lanfer dife, ouswa lexistans enn Kreater. Si nou kont lor Jéhovah ek lor formasion ki Li donn nou, souvan nou pou kapav donn enn repons ki konvink ek ki tous leker bann ki ekout nou. (Col. 4:6) Asterla, anou gete seki  bann proklamater efikas fer kan zot koz lor bann size koumsa. Nou pou examine kouma pou (1) poz bann kestion ki pous dimounn-la exprim li, (2) rezonn lor bann verse, ek (3) servi bann lexanp pou ed dimounn-la bien konpran enn pwin.

3, 4. Kifer li inportan servi bann kestion pou konn seki enn dimounn krwar? Donn enn lexanp.

³ Bann kestion kapav ed nou pou kone seki enn dimounn krwar. Kifer eski sa inportan? Proverbes 18:13 dir: “Kan enn dimounn donn enn repons lor enn kitsoz avan mem ki li ekout bann fe, se enn kitsoz bet ek se enn laont pou li.” Ofet, avan ki nou koumans dir seki Labib ansegne lor enn sertin size, li bon ki nou esey kone ki kitsoz dimounn ki pe ekout nou la vremem krwar. Sinon, nou pou pas enn kantite letan pou kontredir enn lide ki li pa vremem krwar!​—1 Cor. 9:26.

⁴ Fer koumadir nou pe koz lor lanfer avek enn dimounn. Pa tou dimounn ki krwar ki lanfer se enn landrwa literal kot bann dimounn brile dan dife. Boukou krwar ki se enn kondision kot enn dimounn konsian ki li pena lamitie Bondie. Alor, kitfwa nou kapav dir enn kitsoz koumsa: “Bann dimounn ena diferan lopinion lor lanfer, me ou ki ou panse lor lanfer?” Apre ki dimounn-la inn dir nou seki li panse, nou pou pli kapav ed li konpran seki Labib dir lor sa size-la.

5. Kouma bann kestion kapav ed nou pou kone kifer enn dimounn krwar dan enn sertenn kitsoz?

⁵ Kan nou poz bann kestion avek tak, sa kapav osi ed nou pou kone kifer enn dimounn krwar dan enn sertenn kitsoz. Par exanp, ki nou pou dir si dan predikasion, enn dimounn dir nou li pa krwar dan Bondie? Kitfwa deswit nou kapav panse ki sa dimounn-la inn les li inflianse par bann panse sa lemond-la, kouma teori levolision. (Ps. 10:4) Selman, sertin dimounn nepli ena lafwa dan Bondie parski zot inn trouv lezot soufer ouswa zotmem zot inn pas dan bann gran soufrans. Kitfwa zot trouv sa difisil pou aksepte ki enn Kreater ki ena lamour permet sa kalite soufrans la. Alor, si enn dimounn dir ki li pa krwar ki Bondie existe, nou kapav demann li: “Eski touletan ou ti pans koumsa?” Si li dir non, kitfwa nou kapav demann li ki kitsoz ki’nn amenn li pou nepli krwar ki Bondie existe. So repons kapav ed nou pou konn meyer fason pou ed li lor plan spiritiel.​—Lir Proverbes 20:5.

6. Ki nou bizin fer apre ki nou’nn poz enn kestion?

⁶ Apre ki nou’nn poz enn kestion, nou bien bizin ekout repons dimounn-la ek esey konpran seki li resanti. Par exanp, kitfwa enn kikenn kapav dir nou ki se enn trazedi ki’nn amenn li pou nepli krwar dan enn Kreater ki ena lamour. Avan ki nou donn bann prev ki Bondie existe, li bon ki nou esey konpran dimounn-la ek fer li kone ki pena nanye demal pou demande kifer nou soufer. (Hab. 1:2, 3) Kan nou ena pasians ek lamour, sa kapav pous dimounn-la pou anvi konn plis. a

7. Pou nou vinn efikas dan nou minister, sa depann lor ki kitsoz?

⁷ Asterla, anou examine kouma nou pou rezonn lor bann verse. Pena dout, Labib se nou zouti prinsipal dan nou minister. Li permet nou vinn “bien kalifie, bien ekipe pou tou bon travay.” (2 Tim. 3:16, 17) Pou vinn efikas dan nou minister,  sa pa depann lor kantite verse ki nou lir, me lor fason ki nou rezonn lor bann verse ki nou lir ek explik zot. (Lir Actes 17:2, 3.) Anou examinn trwa lexanp.

8, 9. (a) Sit enn fason pou rezonn avek enn dimounn ki krwar ki Jésus egal ar Bondie. (b) Sit lezot fason ki ou’nn trouv efikas pou rezonn lor sa size-la.

⁸ Lexanp 1: Dan nou minister, nou zwenn enn dimounn ki krwar ki Jésus egal ar Bondie. Ki bann verse nou kapav servi pou rezonn lor sa size-la? Nou kapav demann dimounn-la pou lir Jean 6:38, kot Jésus dir: “Mo finn sorti dan lesiel mo finn vinn lor later, pa pou fer mo volonte, me volonte Bondie ki finn avoy mwa.” Apre ki nou’nn lir sa verse-la, nou kapav demann dimounn-la: “Si Jésus Bondie, kisannla inn avoy li lor later? Eski sa Kikenn-la pa bizin pli gran ki Jésus? Apre tou, si enn kikenn avoy enn lot dimounn, eski li pa pli siperyer ki sa dimounn li’nn avoye la?”

⁹ Nou kapav lir osi Philippiens 2:9, kot lapot Paul dir seki Bondie ti fer apre lamor ek rezireksion Jésus. Sa verse-la dir: “Bondie ti donn li [Jésus] enn pli gran pozision ek ti kontan pou donn li enn nom ki pli gran ki tou lezot nom.” Pou ed sa dimounn-la rezonn lor sa verse-la, nou kapav demande: “Si Jésus ti egal ar Bondie avan li mor, ek si kan li ti resisite Bondie ti donn li enn pli gran pozision, eski sa pa ti pou fer Jésus vinn pli siperyer ki Bondie? Pourtan, kouma enn kikenn kapav vinn pli siperyer ki Bondie?” Si sa dimounn-la respekte Parol Bondie ek ena enn leker sinser, enn rezonnman koumsa kapav pous li pou examinn sa size-la plis an profonder.​—Actes 17:11.

10. (a) Kouma nou kapav rezonn avek enn dimounn ki krwar dan lanfer dife? (b) Ki fason rezone ou’nn trouv efikas kan ou koz lor lanfer dife?

¹⁰ Lexanp 2: Enn dimounn bien relizie trouv sa difisil pou aksepte ki bann move pa pou al brile pou touletan dan lanfer dife. Kitfwa li krwar dan lanfer dife parski li anvi trouv bann move dimounn gagn enn pinision pou zot bann move aksion. Kouma nou kapav rezonn avek enn dimounn ki pans koumsa? Pou koumanse, nou kapav rasir li ki bann move pou gagn enn pinision. (2 Thess. 1:9) Apre sa, nou kapav demann li lir Genèse 2:16, 17, ki montre ki konsekans pese se lamor. Nou kapav explik li ki, kan Adam inn fer pese, li’nn fer tou bann dimounn ne dan pese. (Rom. 5:12) Me nou kapav atir so latansion ki Bondie pa ti dir ki Adam pou pini dan lanfer dife. Apre sa nou kapav demann li: “Si Adam ek Ève ti pou al brile dan lanfer dife pou touletan, eski li pa ti pou bon ki Bondie fer zot  konn sa?” Lerla nou kapav lir Genèse 3:19, kot apre pese Adam ek Ève, Bondie ti pronons zot kondanasion, me li pa ti dir nanye konsernan lanfer dife. Okontrer, Li ti dir Adam ki li ti pou revinn lapousier. Nou kapav demann dimounn-la: “Eski sa ti pou bon ki Bondie dir Adam ki li pou retourn dan later, alor ki an realite li ti pou al dan lanfer dife?” Si dimounn-la ena enn lespri ouver, enn kestion koumsa kapav pous li pou reflesi plis lor sa size-la.

11. (a) Sit enn fason pou rezonn avek enn dimounn ki krwar ki tou bann bon al dan lesiel. (b) Ki fason rezone ou’nn trouv efikas kan ou koz lor kisannla pou al dan lesiel?

¹¹ Lexanp 3: Dan nou minister, nou zwenn enn dimounn ki krwar ki tou bann bon al dan lesiel. Sa krwayans-la kapav afekte fason ki sa dimounn-la konpran Labib. Par exanp, fer koumadir nou ti bizin examinn avek li Révélation 21:4. (Lir.) Dimounn-la kapav panse ki bann benediksion ki ena dan sa verse-la konsern lavi dan lesiel. Kouma nou kapav rezonn avek li? Olie ki nou servi lezot verse pou donn bann prev, nou kapav konsantre nou lor enn detay dan sa verse-la mem. Sa verse-la dir ki “lamor nepli pou existe.” Nou kapav demann dimounn-la: “Pou ki enn kitsoz nepli existe, kitfwa ou dakor ki sa kitsoz-la finn bizin existe?” Sirman li pou dir wi. Apre sa, nou kapav atir so latansion ki zame finn ena lamor dan lesiel; se zis isi lor later ki dimounn mor. Alor, li lozik ki Révélation 21:4 pe fer referans ar bann benediksion ki pou ena isi lor later dan lavenir.​—Ps. 37:29.

12. Kifer Jésus ti servi bann lexanp?

¹² Anplis ki li ti poz bann kestion, Jésus ti osi servi bann lexanp dan so predikasion. (Lir Matthieu 13:34, 35.) Bann lexanp ki Jésus ti servi ti ed li pou konn mobil bann ki ti pe ekout li. (Mat. 13:10-15) Bann lexanp ti osi fer bann lansegnman Jésus vinn pli interesan ek fasil pou rapel. Kouma nou kapav servi bann lexanp dan nou lansegnman?

13. Kouma nou kapav montre ki Bondie pli siperyer ki Jésus?

¹³ Souvan li pli bon nou servi bann lexanp ki sinp. Par exanp, kan nou pe explike ki Bondie pli siperyer ki Jésus, kitfwa nou kapav swiv sa sigzesion-la. Nou kapav dir ki Bondie ek Jésus toulede ti servi relasion ki ena dan enn fami pou dekrir relasion ki ena ant zot. Bondie ti dir ki Jésus se so Garson, ek Jésus ti dir ki Bondie se so Papa. (Luc 3:21, 22; Jean 14:28) Apre nou kapav demann dimounn-la: “Si ou anvi montre mwa ki dan enn fami de dimounn ena mem pozision, setadir zot egal, ki de manb sa fami-la ou ti pou servi pou ed mwa konpran sa?” Kitfwa dimounn-la kapav pran lexanp bann frer-ser​—ouswa mem bann zimo. Si li fer sa, nou kapav dir li ki li’nn servi enn bon konparezon. Apre sa nou kapav demann li: “Si ou ek mwa fasilman nou’nn arive pans sa konparezon-la, eski Jésus​—nou Gran Ansegnan​—pa ti pou pans mem konparezon? Me, Jésus li, li ti dir ki Bondie se so Papa. Kan Jésus ti dir sa, li ti montre ki Bondie pli gran ek ena plis lotorite ki li.”

14. Ki lexanp nou kapav servi pou montre ki Bondie pa fer Satan bril bann dimounn dan lanfer dife?

¹⁴ Anou get enn lot lexanp. Sertin panse ki se Satan ki ena “responsabilite pou vey” lanfer dife. Nou kapav servi enn lexanp pou ed enn paran trouve ki li pa lozik pou panse ki Bondie fer Lediab bril bann dimounn dan lanfer dife. Par exanp, nou kapav dir: “Esey mazine ki ou zanfan nepli ekout ou ek pe fer boukou move kitsoz. Ki ou pou fer?” Sirman paran-la pou dir nou ki li pou koriz so zanfan. Kitfwa,  plizir fwa li pou esey ed zanfan-la aret fer seki pa bon. (Prov. 22:15) Lerla nou kapav demann paran-la ki li pou fer si, malgre sa bann zefor-la, zanfan-la pa ekout li. Laplipar bann paran pou dir ki finalman zot pa pou ena swa ek zot pou bizin pini zanfan-la. Apre nou kapav demande: “Ki ou pou fer si ou aprann ki enn move dimounn inn inflians ou zanfan pou ki li rebel kont ou?” Pena dout ki paran-la pou ankoler kont sa dimounn-la. Pou ed enn paran bien konpran sa lexanp-la, nou kapav demann li: “Si ou kone ki enn move dimounn inn inflians ou zanfan, eski ou pou demann sa dimounn-la pou pini ou zanfan dan ou plas?” Nou sir ki paran-la pou dir non. Alor, li kler ki Bondie pa pou servi Satan pou pini bann dimounn ki Satan Lediab limem inn inflianse pou fer bann move kitsoz!

15, 16. (a) Kifer fode pa nou atann ki tou dimounn avek ki nou prese aksepte mesaz Rwayom Bondie? (b) Eski nou bizin ena enn don spesial pou ansegn dan enn fason efikas? Explike. (Get osi lankadre “ Enn Seri Lartik ki Ed Nou pou Bien Reponn.”)

¹⁵ Nou rekonet ki pa tou dimounn avek ki nou prese pou aksepte mesaz Rwayom Bondie. (Mat. 10:11-14) Zot pa pou fer sa mem si nou poz bann kestion ki bizin, servi meyer rezonnman ek pli bon lexanp ki ena. Apre tou, bien tigit ti aksepte lansegnman Jésus​—pourtan li ti pli gran Ansegnan ki finn existe lor later.​—Jean 6:66; 7:45-48.

¹⁶ Dan enn lot kote, mem si nou panse ki nou pena bann don spesial, nou kapav vinn efikas dan nou minister. (Lir Actes 4:13.) Parol Bondie donn nou bann bon rezon pou krwar ki “tou bann ki . . . ena latitid ki bizin pou gagn lavi eternel” pou aksepte bon nouvel. (Actes 13:48) Alor, anou devlop ek gard enn pwindevi ekilibre lor noumem ek lor bann dimounn avek ki nou esey partaz bon nouvel lor Rwayom Bondie. Anou profit bien formasion ki Jéhovah donn nou, parski nou sir ki sa pou fer nou ek bann dimounn ki ekout nou gagn bann bienfe. (1 Tim. 4:16) Jéhovah kapav ed nou pou kone kouma nou bizin “reponn sak dimounn.” Kouma nou pou trouve dan prosin lartik, enn fason pou reisi dan nou minister se kan nou swiv seki souvan nou apel la Règle d’or.