1, 2. (a) Ki komannman Jésus ti dekrir kouma deziem pli gran komannman dan Lalwa? (b) Ki bann kestion nou pou examine asterla?

 POU teste Jésus, enn zour enn Farizien ti demann li: “Ansegnan, ki pli gran komannman dan Lalwa?” Kouma nou ti trouve dan lartik avan, Jésus ti dir ki “pli gran ek premie komannman” se: “To bizin kontan Jéhovah to Bondie avek tou to leker ek avek tou to nam ek avek tou to lespri.” Jésus ti dir osi: “Deziem komannman ki parey, se: ‘To bizin kontan to prosin kouma tomem.’”​—Mat. 22:34-39.

² Jésus ti dir ki nou bizin kontan nou prosin parey kouma nou kontan noumem. Alor, li bon nou demann noumem: Kisannla ki vremem nou prosin? Kouma nou kapav montre lamour anver nou prosin?

3, 4. (a) Ki lexanp Jésus ti servi pou reponn kestion: “Kisannla ki vremem mo prosin”? (b) Kouma sa Samaritin-la ti ed sa misie ki bann voler ti’nn atake, bate ek les demi-mor la? (Get zimaz dan koumansman lartik.)

³ Kitfwa nou kapav panse ki nou prosin se enn kamarad ki res akote ar nou, ek ki bien pros ar nou ek ki kontan ede. (Prov. 27:10) Me get seki Jésus ti dir kan enn dimounn ki ti  panse li zis, ti demann Jésus: “Kisannla ki vremem mo prosin?” Pou reponn li, Jésus ti servi lexanp bon Samaritin. (Lir Luc 10:29-37.) Kitfwa nou ti pou atann ki enn pret Izraelit ek enn Levit ti pou montre lamour anver enn misie ki bann voler ti’nn atake, bate ek les demi-mor. Me zot inn pas akote san fer nanye. Se enn Samaritin ki ti ed sa misie-la. Bann Samaritin ti enn pep ki ti respekte Lalwa Mozaik, me bann Zwif ti ena laenn pou zot.​—Jean 4:9.

⁴ Pou geri blesir sa misie-la, sa bon Samaritin-la ti vers delwil ek divin lor so bann blesir. De denie ki sa Samaritin-la ti kit avek sa dimounn ki ti pou okip sa misie blese la, ti reprezant lapey pou de zour travay. (Mat. 20:2) Alor li fasil pou trouve kisannla ki’nn azir kouma prosin sa misie ki ti blese la. Pena dout ki lexanp ki Jésus ti servi ansegn nou pou ena konpasion ek lamour pou nou prosin.

5. Kouma bann serviter Jéhovah ti manifeste lamour anver zot prosin kan ti ena enn katastrof natirel?

⁵ Li pa touzour fasil pou trouv bann dimounn ki ena konpasion parey kouma sa Samaritin-la. Sirtou dan sa “bann dernie zour” kritik la, kot laplipar dimounn pena lafeksion natirel, pena okenn pitie, ek pa kontan fer dibien anver lezot. (2 Tim. 3:1-3) Par exanp, pandan bann katastrof natirel, nou kapav trouv nou dan bann sitiasion kritik. Get seki ti arive kan Ouragan Sandy ti pas lor New York ver lafin Oktob 2012. Enn parti sa lavil-la ti’nn bien afekte ek bann voler ti pe profite pou kokin bann dimounn ki res laba ek ki ti pe deza soufer parski pa ti ena kouran, sofaz ek lezot kitsoz ki zot ti bizin. Dan mem landrwa, bann Temwin Jéhovah ti organiz enn program ki ti permet zot ed zot bann kamarad ek osi lezot dimounn. Bann Kretien azir dan sa fason-la parski zot kontan zot prosin. Dan ki lezot fason ankor nou kapav montre lamour pou nou prosin?

6. Kouma nou predikasion montre ki nou kontan nou prosin?

⁶ Ed bann dimounn lor plan spiritiel. Nou fer sa kan nou fer zefor pou montre zot ‘konsolasion ki zot kapav gagne dan bann Lekritir.’ (Rom. 15:4) Kan dan predikasion nou partaz bann verite ki ena dan Labib avek nou prosin, pena dout ki nou pe montre nou kontan zot. (Mat. 24:14) Nou vremem ena enn gran privilez pou pres mesaz Rwayom ki sorti kot “Bondie ki donn lesperans”!​—Rom. 15:13.

7. Ki ete la Règle d’or, ek ki benediksion nou gagne kan nou swiv sa prinsip-la?

⁷ Swiv la Règle d’or. Nou trouv sa prinsip-la dan bann parol ki Jésus ti dir dan so Sermon lor Montagn: “Tou kitsoz ki zot anvi bann dimounn fer pou zot, zot bizin fer parey pou bannla. Parski an realite, samem ki Lalwa ek bann Profet vedir.” (Mat. 7:12) Kan nou tret lezot parey kouma Jésus ti konsey nou, nou azir an-akor avek fason panse ki ena dan “Lalwa” (Genèse ziska Deutéronome) ek “bann Profet” (bann liv profetik ki ena dan bann Lekritir Ebre). Sa bann liv-la montre dan enn fason kler ki Bondie beni bann ki manifeste lamour anver lezot. Par exanp, atraver profet Isaïe, Jéhovah ti dir: “Gard lazistis, fer seki drwat . . . Ere enn dimounn ki fer sa.” (Is. 56:1, 2) Kan nou montre lamour ek azir dan enn fason drwat anver nou prosin, nou vremem gagn bann benediksion

8. Kifer nou bizin kontan nou bann lennmi, ek ki kapav arive si nou fer sa?

⁸ Kontan nou bann lennmi. Jésus ti  dir: “Zot inn tande ki’nn dir: ‘To bizin kontan to prosin ek ena laenn pou to lennmi.’ Me mwa mo dir zot: Kontign kontan zot bann lennmi ek priye pou bann ki persekit zot, pou ki zot kapav montre ki zot bann garson zot Papa ki dan lesiel.” (Mat. 5:43-45) Lapot Paul ti donn apepre mem konsey kan li ti ekrir: “Si to lennmi fin, donn li manze; si li swaf, donn li bwar.” (Rom. 12:20; Prov. 25:21) Dapre Lalwa Mozaik, enn dimounn ti bizin ed so lennmi pou soulaz so zanimo si zanimo-la ti’nn tonbe parski li ti pe sarye enn pwa tro lour. (Ex. 23:5) Kan bann dimounn travay ansam koumsa, bann ki ti lennmi avan kapav vinn bann bon kamarad. Parski antan ki Kretien nou manifeste lamour, boukou nou bann lennmi inn sanz zot latitid anver nou. Si nou manifeste lamour anver nou bann lennmi​—mem anver bann ki persekit nou boukou​—nou pou vremem ere si sertin sanze ek vinn dan laverite!

9. Ki Jésus ti dir konsernan fer lape avek nou bann frer?

⁹ ‘Fer tou pou viv anpe avek tou dimounn.’ (Héb. 12:14) Biensir, nou bizin viv anpe avek nou bann frer osi, parski Jésus ti dir: “Si to pe amenn to don devan lotel ek ki la to rapel ki to frer ena kitsoz kont twa, les to don la, devan lotel, ek ale. Dabor al fer lape avek to frer, ek apre retourne ek ofer to don.” (Mat. 5:23, 24) Bondie pou beni nou kan nou montre lamour pou nou bann frer ek kan nou pa tarde pou fer lape avek zot.

10. Kifer fode pa nou ziz lezot?

¹⁰ Pa ziz lezot. Jésus ti dir: “Aret zize pou ki pa ziz zot; parski se avek zizman ki zot zize ki pou ziz zot; ek se avek mezir ki zot mezire ki pou mezir pou zot. Alor kifer to get lapay ki dan lizie to frer, me to pa pran kont poto ki to ena dan to prop lizie? Ouswa kouma to kapav dir to frer: ‘Les mwa tir lapay ki dan to lizie’, alor ki ena enn poto dan to prop lizie? Ipokrit! Tir poto ki dan to prop lizie avan, lerla to pou trouv bien kouma pou tir lapay ki dan lizie to frer.” (Mat. 7:1-5) Se vremem enn fason bien ferm pou dir nou pa kritik bann ti defo lezot, alor ki kitfwa noumem nou ena bann pli gro defo!

11, 12. Ki pli bon fason nou montre ki nou kontan nou prosin?

¹¹ Nou anvi montre ki nou kontan nou prosin dan enn pli bon fason. Parey kouma Jésus, nou pres bonn nouvel lor Rwayom. (Luc 8:1) Jésus ti donn so bann disip mision pou “fer bann disip parmi bann dimounn dan tou bann nasion.” (Mat. 28:19, 20) Kan nou fer nou par ek akonpli sa mision-la, nou pe esey ed nou prosin pou kit semin ki gran ek larz ki al ver destriksion, ek pou mars lor semin ki sere ki amenn ver lavi. (Mat. 7:13, 14) Nou sir ki nou bann zefor fer Jéhovah plezir.

¹² Parey kouma Jésus, nou ed bann dimounn pou rekonet ki zot ena bann bezwin spiritiel. (Mat. 5:3) Nou ed bann ki interese ar nou mesaz pou satisfer zot bezwin spiritiel kan nou partaz “bon nouvel Bondie” avek zot. (Rom. 1:1) Bann ki aksepte mesaz Rwayom Bondie zot rekonsilie zot avek Bondie atraver Jésus Christ. (2 Cor. 5:18, 19) Alor, kan nou pres bon nouvel, se vremem enn fason inportan pou montre ki nou ena lamour pou nou prosin.

13. Kouma ou konsider privilez ki ou ena pou partisip dan predikasion Rwayom Bondie?

¹³ Kan nou prepar nou bien avan nou fer bann vizit ek bann letid, nou pou ena lazwa pou ed bann dimounn viv an-akor avek bann prinsip zis ki Bondie done. Sa kapav ed nou etidian Labib pou fer bann sanzman dan so lavi. (1 Cor. 6:9-11) Vremem, sa bien rekonfort nou kan nou trouve kouma Bondie ed bann ki “ena latitid ki bizin pou gagn lavi eternel” fer bann sanzman ek vinn pros avek Li. (Actes 13:48) Pou boukou ki avan ti dekouraze, zot pli ere, ek bann ki ti ena bann gran traka, zot ena plis konfians dan nou Papa ki dan lesiel. Nou vremem kontan pou trouv bann nouvo fer bann progre lor plan spiritiel! Eski ou pa dakor ki se enn privilez pou montre lamour pou nou prosin kan nou pres mesaz Rwayom Bondie avek zot?

14. Sit sertin karakteristik lor lamour ki ena dan 1 Corinthiens 13:​4-8.

¹⁴ Kan dan nou relasion avek lezot nou met an pratik seki Paul ti dir, sa kapav anpes nou gagn boukou problem, fer nou ere, ek fer nou gagn benediksion Bondie. (Lir 1 Corinthiens 13:4-8.) Pou enn ti moman, anou re-examinn seki Paul ti dir lor lamour ek gete kouma nou kapav aplik so bann parol dan nou relasion avek lezot.

15. (a) Kifer nou bizin ena pasians ek bonte? (b) Kifer nou bizin pa zalou ek pa fer vantar?

¹⁵ “Lamour ena pasians ek li bon.” Parey kouma Jéhovah manifeste pasians ek bonte anver bann dimounn inparfe, nou’si nou bizin ena pasians ek bonte kan lezot fer bann erer ek fer bann kitsoz san reflesi, ouswa pena manier. “Lamour li pa zalou,” alor vre lamour pou anpes nou konvwat seki enn lot dimounn ena ouswa konvwat bann privilez ki li ena dan kongregasion. Anplis, si nou ena lamour, nou pa pou fer vantar ouswa gonfle ar lorgey. Apre tou, “enn regar vantar ek enn leker ki ranpli ar lorgey​—lalanp ki gid bann move dimounn se pese.”​—Prov. 21:4.

16, 17. Kouma nou kapav aplik 1 Corinthiens 13:5, 6?

¹⁶ Lamour pous nou pou konport nou dan enn fason desan anver nou prosin. Nou pa pou koz li manti, kokin li, ouswa fer lezot kitsoz ki kont bann lalwa ek bann prinsip Jéhovah. Lamour pou osi pous nou rod lintere lezot olie rod zis nou prop lintere.​—Phil. 2:4.

 ¹⁷ Vre lamour li pa ofanse vit ek “li pa gard enn kont pou tou ditor ki’nn fer li,” koumadir nou pe ekrir dan enn liv kan lezot fer nou ditor. (1 Thess. 5:15) Si nou gard rankinn, nou pa pou fer Bondie plezir ek an realite, nou koler pou kouma enn labrez dife ki enn kout kapav alime, ek fer noumem ek lezot ditor. (Lév. 19:18) Lamour fer nou trouv lazwa avek laverite, ek anpes nou “trouv lazwa dan linzistis,” mem si enn dimounn ki ena laenn pou nou pe soufer akoz linzistis.​—Lir Proverbes 24:17, 18.

18. Ki nou aprann lor lamour dan 1 Corinthiens 13:7, 8?

¹⁸ Get seki Paul ti dir ankor lor lamour. Paul ti dir ki lamour “siport tou.” Si kikenn ofans nou me demann nou pardon, lamour pous nou pou pardonn li. Lamour “krwar tou” seki ena dan Parol Bondie ek pous nou pou ena rekonesans pou manze spiritiel ki nou gagne. Lamour “esper tou” seki ena dan Labib ek motiv nou pou koz lor nou lesperans ar lezot. (1 Pierre 3:15) Nou osi priye ek atann ki bann sitiasion pou ameliore kan nou pe pas dan bann sitiasion difisil. Lamour “andir tou,” mem bann pese ki’nn fer kont nou, persekision, ouswa lezot leprev. Anplis, “lamour pa pou disparet zame.” Bann dimounn obeisan pou manifeste lamour pou touletan.

19, 20. Ki konsey Biblik bizin pous nou pou kontign montre lamour pou nou prosin?

¹⁹ Si nou aplik konsey ki ena dan Labib, nou kapav kontign montre lamour pou nou prosin. Nou bizin montre sa kalite lamour-la anver tou dimounn, pa zis anver bann ki dan mem kiltir ki nou. Nou bizin rapel osi seki Jésus ti dir: “To bizin kontan to prosin kouma tomem.” (Mat. 22:39) Bondie ek Christ, toulede atann ki nou kontan nou prosin. Si dan sertin sitiasion nou pa kone kouma nou bizin azir anver nou prosin, anou priye Bondie pou ki Li gid nou par so lespri sin. Kan nou fer sa, nou pou gagn benediksion Jéhovah ek Li pou ed nou pou azir avek amour.​—Rom. 8:26, 27.

²⁰ Labib apel komannman pou kontan nou prosin kouma noumem, “lalwa rwayal.” (Jacq. 2:8) Apre ki li ti sit sertin komannman ki ena dan Lalwa Mozaik, Paul ti dir: “Tou lezot komannman ki ena, kapav rezim zot par sa bann parol-la: ‘To bizin kontan to prosin kouma tomem.’ Lamour pa fer nou prosin ditor; alor lamour, li akonpli lalwa.” (Rom. 13:8-10) Alor, nou bizin kontign montre lamour pou nou prosin.

21, 22. Kifer nou bizin kontan Bondie ek nou prosin?

²¹ Kifer nou bizin montre lamour pou nou prosin? Kan nou medit lor la, li bon nou reflesi lor seki Jésus ti dir konsernan so Papa. So Papa “fer so soley leve lor bann move dimounn ek bon dimounn toulede, ek Li fer lapli tonbe lor bann dimounn zis ek inzis toulede.” (Mat. 5:43-45) Nou bizin manifeste lamour anver nou prosin mem si li zis ouswa inzis. Kouma nou ti trouve dan bann paragraf avan, enn fason inportan ki nou montre sa kalite lamour-la, se kan nou pres mesaz Rwayom Bondie avek li. Nou prosin pou vremem gagn bann benediksion si li aksepte bon nouvel ek met sa an pratik!

²² Nou ena plizir rezon pou kontan Jéhovah avek tou nou leker. Nou kapav osi montre lamour pou nou prosin dan diferan fason. Kan nou manifeste lamour anver Bondie ek nou prosin, nou montre ki nou pe obeir de pli gran komannman. Seki pli inportan, nou pe fer plezir Jéhovah, nou Papa ki kontan nou.