1, 2. (a) Kisannla ki pli gran temwin Jéhovah? (b) Ki sinifikasion nom Jésus, ek kouma li ti viv an-akor avek so nom?

 “SE POU sa ki mo finn ne, ek se pou sa ki mo finn vinn dan lemond: pou rann temwaniaz lor laverite.” (Lir Jean 18:33-37.) Kan ti pe ziz Jésus Christ, li ti dir sa bann parol-la gouverner Romin dan Judée. Jésus ti’nn fek fer kone ki li enn lerwa. Plizir lane apre, lapot Paul ti koz lor kouraz ki Jésus ti ena dan sa sitiasion-la kan, ‘antan ki enn temwin, Jésus ti fer sa bon deklarasion piblik la devan Ponce Pilate.’ (1 Tim. 6:13) Vremem, dan lemond Satan ki ranpli ar laenn, parfwa nou bizin ena enn gran kouraz pou vinn enn “temwin fidel ki dir laverite”!​—Rév. 3:14.

² Antan ki enn manb nasion Zwif, Jésus ti enn temwin Jéhovah depi so nesans. (Is. 43:10) An realite, par fason li’nn azir li’nn montre ki li pli gran temwin ki Bondie inn avoye pou So nom. Jésus ti donn boukou linportans sinifikasion so prop nom ki Bondie ti donn li. Anz ki ti dir Joseph, papa adoptif Jésus, ki zanfan dan vant Marie ti’nn forme gras-a lespri sin, ti azoute: “Li pou gagn enn garson, ek to bizin apel li Jésus, parski li pou sap so pep dan zot pese.” (Mat. 1:20, 21; not) An zeneral, bann Biblis dakor ki nom Jésus sorti dan  enn nom Ebre, Yéshoua, ek sa nom-la vedir “Jéhovah Li Delivrans.” An-akor avek sinifikasion so nom, Jésus ti ed “bann brebi ki’nn perdi dan lakaz Israël” pou repanti ek pou aret fer pese, pou ki zot kapav regagn faver Jéhovah. (Mat. 10:6; 15:24; Luc 19:10) Pou fer sa, Jésus ti rann temwaniaz lor Rwayom Bondie avek zel. Dan so levanzil, Marc ti ekrir: “Jésus ti al dan Galilée, ti pres bon nouvel Bondie ek ti dir: ‘Letan fixe inn arive, ek Rwayom Bondie inn koste. Repanti, ek ena lafwa dan bonn nouvel.’” (Marc 1:14, 15) Jésus ti osi denons avek kouraz bann sef relizie Zwif, ek akoz sa zot ti fer exekit li lor enn poto.​—Marc 11:17, 18; 15:1-15.

3. Ki ti arive trwaziem zour apre lamor Jésus?

³ Enn kitsoz extraordiner ti arive! Trwa zour apre ki ti touy Jésus dan enn fason kriel, Jéhovah ti resisit li, pa antan ki enn imin, me antan ki enn kreatir spiritiel imortel. (1 Pierre 3:18) Pou prouve ki li ti’nn resisite, nou Segner Jésus ti pran bann lekor imin. Mem zour ki li ti resisite, li ti aparet omwin sink fwa ar plizir disip.​—Mat. 28:8-10; Luc 24:13-16, 30-36; Jean 20:11-18.

4. Ki renion Jésus ti dirize, ek dan enn fason bien kler, lor ki responsabilite li ti atir latansion so bann disip?

⁴ Sinkiem fwa-la, Jésus ti aparet ar so bann zapot ek lezot disip ki ti rasanble ansam. Dan sa lokazion spesial la, li ti kondir seki nou kapav apel enn letid lor Parol Bondie. “Li ti ouver zot lespri pou ki zot konpran sinifikasion bann Lekritir.” Lerla, zot ti konpran ki bann Lekritir ti’nn fini predir ki Jésus ti pou mor dan lame bann lennmi Bondie ek ti pou resisite gras-a enn mirak. Alafin sa renion-la, Jésus ti dir so bann disip dan enn fason bien kler ki responsabilite zot ti ena. Li ti dir zot ki “lor so nom zot pou pres repantans pou pardon bann pese, dan tou bann nasion​—sa pou koumanse dan Jérusalem.” Li ti azoute: “Zot pou vinn bann temwin sa bann kitsoz-la.”​—Luc 24:44-48.

5, 6. (a) Kifer Jésus ti dir: “Zot pou vinn mo bann temwin”? (b) Ki nouvo laspe proze Jéhovah bann disip Jésus ti pou bizin fer bann dimounn kone?

⁵ Alor, 40 zour apre, kan Jésus ti pou aparet dernie fwa, so bann zapot ti pou konpran lord ki li ti donn zot, par sa bann parol sinp me pwisan la: “Zot pou vinn mo bann temwin dan Jérusalem, partou dan Judée ek Samarie, ek ziska dan rezion pli lwin lor later.” (Actes 1:8) Kifer Jésus ti dir: “Zot pou vinn mo bann temwin,” ek pa bann temwin Jéhovah? Jésus ti kapav dir bann temwin Jéhovah, me bann ar ki li ti pe koze ti bann Izraelit, ek antan ki bann Izraelit zot ti deza bann temwin Jéhovah.

⁶ Asterla bann disip Jésus ti bizin fer konn enn nouvo laspe proze Jéhovah​—enn delivrans pli gran ki bann Izraelit ti kone kan Jéhovah ti delivre zot depi lesklavaz dan l’Égypte ek plitar kan Li ti delivre zot depi Babylone. Lamor ek rezireksion Jésus Christ liber bann dimounn ar pir lesklavaz ki ena, setadir pese ek lamor. Zour Pentecôte 33 Nou Lepok, bann disip Jésus ki lespri sin ti’nn fek swazir ti fer bann dimounn konn “bann kitsoz extraordiner ki Bondie fer.” Ek boukou dimounn ki ti tann sa bann kitsoz-la ti bien reazir. Alor, dan kote drwat so Papa dan lesiel, Jésus ti koumans trouve kouma sinifikasion so nom ti pe gagn enn pli gran linportans kan plizir milyon dimounn ti repanti ek ti ena lafwa an li, mwayin ki Jéhovah servi pou delivre bann dimounn.​—Actes 2:5, 11, 37-41.

7. Bann levennman ki ti ena zour Pentecôte 33 Nou Lepok ti montre ki kitsoz?

⁷ Bann levennman ki ti ena zour Pentecôte 33 Nou Lepok ti montre ki Jéhovah ti’nn aksepte valer sakrifis lavi parfe Jésus, pou ki nou gagn pardon nou bann pese. (Héb. 9:11, 12, 24) Parey kouma Jésus ti explike, li ti vini “pa pou fer lezot servi li, me pou li servi lezot ek pou donn so lavi kouma enn ranson an esanz pou boukou.” (Mat. 20:28) Kan Labib dir ki “boukou” ti pou gagn bann bienfe gras-a ranson Jésus, sa pa ti konsern zis bann Zwif ki ti’nn repanti. Okontrer, volonte Bondie se ki “tou sort kalite dimounn gagn lavi sov,” parski ranson “tir pese lemond!”​—1 Tim. 2:4-6; Jean 1:29.

8. Ziska ki pwin bann disip Jésus ti rann temwaniaz, ek kouma zot ti reisi fer sa?

⁸ Eski bann premie disip Jésus ti ena kouraz ki bizin pou kontign rann temwaniaz lor li? Biensir, me zot pa ti fer sa par zot prop lafors. Lespri sin Jéhovah ki pwisan ti motiv zot ek ti donn zot lafors pou kontign rann temwaniaz. (Lir Actes 5:30-32.) Anviron 27 an apre Pentecôte 33 Nou Lepok, ti kapav dir ki bann Zwif ek bann non-Zwif “dan tou kreasion ki anba lesiel” ti’nn tann “mesaz laverite lor bonn nouvel.”​—Col. 1:5, 23.

9. Parey kouma ti’nn predir, ki ti ariv premie kongregasion Kretien?

⁹ Me malerezman, premie kongregasion Kretien, tigit-tigit ti’nn koronpi. (Actes 20:29, 30; 2 Pierre 2:2, 3; Jude 3, 4) Jésus ti dir ki lapostazi ki “sa kikenn ki move la,” setadir Satan, ti ankouraze, ti pou ogmante ek ti pou maske vre relizion Kretien ziska “konklizion sa sistem-la.” (Mat. 13:37-43) Apre sa, Jéhovah ti pou fer Jésus vinn Lerwa later. Sa ti arive an Oktob 1914, ek “bann dernie zour” move lemond Satan ti koumanse.​—2 Tim. 3:1.

10. (a) Lor ki dat inportan bann Kretien ki ena lesperans pou al viv dan lesiel ti atir latansion? (b) Ki ti arive an Oktob 1914, ek kouma tou dimounn ti kapav trouv sa dan enn fason bien kler?

¹⁰ Dan nou lepok, bann Kretien ki ena lesperans pou al dan lesiel, alavans ti dir ki Oktob 1914 ti pou enn dat inportan. Zot ti baz zot lor profesi Daniel konsernan  enn gran pie ki enn anz ti dir koupe ek ki ti pou repouse apre “set letan.” (Dan. 4:16) Dan profesi konsernan so prezans ek “konklizion sa sistem-la,” Jésus ti mansionn sa mem peryod letan la kouma “letan fixe bann nasion.” Apartir 1914, tou dimounn ti kapav trouv dan enn fason bien kler “sign . . . prezans” Christ antan ki nouvo Lerwa later. (Mat. 24:3, 7, 14; Luc 21:24) Alor, depi sa lane-la, bann disip Jésus fer kone ki Jéhovah inn etabli Jésus Lerwa lor later ek sa osi form parti “bann kitsoz extraordiner ki Bondie fer.”

11, 12. (a) An 1919, nouvo Lerwa later ti koumans fer ki kitsoz? (b) Apartir 1935, ki kitsoz ti vinn kler? (Get zimaz dan koumansman lartik.)

¹¹ Antan ki nouvo Lerwa later, Jésus Christ pa’nn tarde pou delivre so bann disip ki ena lesperans pou al dan lesiel ar “Gran Babylone.” (Rév. 18:2, 4) Apre lager, an 1919, sa bann disip Jésus la ti gagn lokazion pou rann temwaniaz dan lemond antie konsernan mwayin ki Bondie servi pou delivre bann dimounn, ek konsernan bon nouvel lor Rwayom ki’nn etabli. Kan sa bann Kretien-la ti sezi sa lokazion-la pou rann temwaniaz, sa ti permet pou rasanble plizir milyon lezot Kretien ki pou al regn avek Jésus dan lesiel.

¹² Apartir 1935, li ti kler ki Christ ti koumans rasanble plizir milyon “lezot brebi,” ki ti pou form enn “gran lafoul” bann dimounn ki sorti dan plizir nasion. Anba direksion bann Kretien ki ena lesperans pou al dan lesiel, sa gran lafoul-la osi imit kouraz Jésus, ek fer kone an piblik ki se gras-a Bondie ek Christ ki zot gagn lavi sov. Si zot kontign andire dan laktivite predikasion ek kontign ena lafwa dan ranson Christ, sa bann Kretien-la pou ena privilez pou sorti dan “gran detres,” ki pou amenn lafin lemond Satan.​—Jean 10:16; Rév. 7:9, 10, 14.

13. Antan ki Temwin Jéhovah, ki nou bien determine pou fer, ek kouma nou sir nou pou reisi?

¹³ Anou kontign apresie privilez ki nou ena antan ki Temwin “bann kitsoz extraordiner” ki Jéhovah inn fer ek pou fer dan lavenir. Li vre, li pa touletan fasil pou rann temwaniaz. Boukou nou bann frer pres dan bann teritwar kot ena bann dimounn ki pa interese avek nou mesaz, boufonn nou, ouswa persekit nou. Nou kapav imit lapot Paul ek so bann konpagnon. Paul ti dir: “Nou ti pran boukou kouraz gras-a nou Bondie pou dir zot bon nouvel Bondie, malgre boukou persekision.” (1 Thess. 2:2) Alor, fode zame nou bes lebra.  Okontrer, nou bizin ankor pe viv an-akor avek ve ki nou’nn fer Jéhovah kan sistem Satan pou detrir. (Is. 6:11) Nou pa pou kapav fer sa par nou prop lafors, me parey kouma bann premie Kretien, nou bizin priye Jéhovah pou ki par mwayin so lespri sin Li donn nou “sa pwisans ki plis ki seki normal la.”​—Lir 2 Corinthiens 4:1, 7; Luc 11:13.

14, 15. (a) Kouma bann dimounn ti konsider bann Kretien dan premie siek Nou Lepok, ek ki lapot Pierre ti dir konsernan sa bann Kretien-la? (b) Ki nou bizin rapel si nou gagn persekision akoz nou bann Temwin Jéhovah?

¹⁴ Azordi, plizir milyon dimounn pretann ki zot Kretien, “me zot renie [Bondie] par zot bann aksion, parski zot ofans Li ek dezobeir Li ek zot pa fer okenn bon travay.” (Tite 1:16) Li bon nou rapel ki dan premie siek, boukou dimounn​—nou kapav mem dir mazorite​—ti ayir bann vre Kretien. Akoz sa lapot Pierre ti ekrir: “Si pe koz an mal lor zot akoz nom Christ, zot ere, parski . . . lespri Bondie . . . pe repoz lor zot.”​—1 Pierre 4:14.

¹⁵ Eski kapav aplik sa bann parol inspire la ar bann Temwin Jéhovah azordi? Wi, parski nou rann temwaniaz ki Jésus inn vinn lerwa. Alor, kan bann dimounn ayir nou parski nou port nom Jéhovah, li parey koumadir zot “pe koz an mal lor [nou] akoz nom [Jésus] Christ,” ki ti dir so bann lennmi: “Mo finn vinn o-nom mo Papa, me zot pa aksepte mwa.” (Jean 5:43) Alor, prosenn fwa ki ou gagn persekision dan predikasion, pran kouraz. Kan ou gagn persekision, sa montre ki ou ena faver Bondie ek ki So lespri “pe repoz lor [ou].”

16, 17. (a) Ki bann serviter Jéhovah partou dan lemond resanti konsernan laktivite predikasion? (b) Ki ou bien determine pou fer?

¹⁶ Me rapel ki anmemtan, dan boukou pei pli boukou dimounn pe vinn dan lorganizasion Jéhovah. Mem dan bann teritwar kot souvan prese, nou ankor zwenn bann dimounn ki interese ek avek ki nou kapav partaz mesaz delivrans ki extraordiner. Anou fer tou seki nou kapav pou revizit bann dimounn ki interese, ek si posib etidie Labib avek zot, koumsa nou pou kapav ed zot voue zot lavi ar Jéhovah ek pran batem. Kitfwa ou ena mem santiman ki Sarie ki res l’Afrique du Sud, ek ki pe prese depi plis ki 60 an. Li dir: “Mo leker ranpli ar rekonesans parski gras-a sakrifis Jésus mo ena bann bon relasion avek Jéhovah, Souverin liniver, ek mo kontan ki mo kapav fer konn So nom extraordiner.” Li ek so misie, Martinus, inn ed boukou dimounn, parmi ena zot trwa zanfan, pou vinn bann adorater Jéhovah. Sarie azoute: “Pena okenn lot aktivite ki fer mwa gagn enn pli gran satisfaksion, ek par mwayin so lespri sin, Jéhovah donn nou tou lafors ki bizin pou kontign sa laktivite ki sov lavi bann dimounn la.”

¹⁷ Ki nou enn Kretien batize ouswa nou pe fer zefor pou realiz sa lobzektif-la, nou ena tou bann rezon pou montre nou rekonesans pou privilez ki nou ena pou form parti dan Kongregasion mondial bann Temwin Jéhovah. Alor, kontign rann temwaniaz afon ek fer zefor pou res separe ar lemond Satan ki pa sin. Kan ou fer sa, ou pou donn loner nou bon Papa ki dan lesiel, ki nou ena privilez pou port so nom.