1, 2. Ki mision Jéhovah ti donn Moïse, ek kouma Jéhovah ti rasir li?

 ESEY mazine ki ou ti pou resanti si ou ti ena pou debout devan dirizan pli pwisan lor later ek koz pou pep Jéhovah. Sirman ou ti pou trakase, santi ki ou pena kapasite pou koze, ek gagn per. Ki ou ti pou dir? Antan ki reprezantan Bondie tou-pwisan, ki ou ti pou fer pou ki ou bann parol ena plis lotorite?

² Moïse ti dan enn sitiasion koumsa. Jéhovah ti’nn dir Moïse, ki ti “pli inb ki tou bann dimounn ki ti ena lor later,” ki Li ti pou avoy li kot Pharaon pou delivre pep Bondie ar lesklavaz dan l’Égypte pou ki Pharaon aret fer dominer ar zot. (Nomb. 12:3) Parey kouma bann levennman ti pou montre, Pharaon pa ti ena okenn respe ek li ti arogan. (Ex. 5:1, 2) Pourtan, Jéhovah ti anvi ki Moïse donn Pharaon lord pou les plizir milyon so bann esklav kit l’Égypte! Nou konpran kifer Moïse ti demann Jéhovah: “Ki mo ete mwa pou ki mo al devan Pharaon ek tir bann Izraelit dan l’Égypte?” Sirman Moïse ti panse ki li pa ti ena kapasite pou koz ar Pharaon. Me Bondie ti rasir li ki li pa ti pou tousel. Jéhovah ti dir li: “Mo pou avek twa.”​—Ex. 3:9-12.

3, 4. (a) Ki bann lakrint Moïse ti ena? (b) Dan ki fason ou kapav ena bann mem santiman ki Moïse?

³ Ki bann lakrint Moïse ti ena? Li kler ki Moïse ti per ki Pharaon pa akeyir ouswa ekout enn reprezantan Jéhovah. Li ti osi  per ki bann Izraelit pa krwar ki se Jéhovah ki’nn swazir li pou tir zot dan l’Égypte. Akoz sa, Moïse ti dir Jéhovah: “Fer koumadir zot pa krwar mwa ek zot pa ekout mo lavwa, parski zot pou dir: ‘Jéhovah pa’nn aparet ar twa.’”​—Ex. 3:15-18; 4:1.

⁴ Seki Jéhovah ti dir Moïse ek bann levennman ki ti ena apre kapav ansegn sakenn parmi nou enn leson bien inportan. Li vre, kitfwa zame ou pou bizin al devan enn dirizan. Me eski ou’nn deza trouv sa difisil pou koz lor Bondie ek so Rwayom mem avek bann dimounn ki ou zwenn toulezour? Si wi, gete ki ou kapav aprann ar lexanp Moïse.

5. Ki Jéhovah ti met dan lame Moïse, ek kouma sa ti fer li nepli ena lakrint? (Get zimaz dan koumansman lartik.)

⁵ Kan Moïse ti dir Jéhovah ki li per ki bann dimounn pa krwar li, Jéhovah ti prepar li pou seki ti pe atann li apre. Liv Exode dir: “Jéhovah ti dir [Moïse]: ‘Ki to ena dan to lame?’ Li ti reponn: ‘Enn baton.’ Li ti dir: ‘Zet li anba.’ Alor, li ti zet baton-la anba ek sa ti vinn enn serpan; ek Moïse ti sove ek ti al lwin ar sa. Lerla Jéhovah ti dir Moïse: ‘Avans to lame ek atrap li par so lake.’ Alor li ti avans so lame ek ti atrap serpan-la, ek sa ti vinn enn baton dan so lame. Apre Bondie ti dir: ‘Koumsa zot pou krwar ki Jéhovah . . . inn aparet ar twa.’” (Ex. 4:2-5) Wi, Bondie ti met dan lame Moïse mwayin ki ti pou permet li montre ki so mesaz sorti kot Jéhovah. Seki ti paret zis enn baton pou lezot ti vinn vivan gras-a pwisans Bondie! Sa mirak-la ti pou fer bann parol Moïse ena plis lotorite, ek sa ti pou prouve ki se Jéhovah ki ti pe soutenir li! Akoz sa, Jéhovah ti dir li: “To pou pran sa baton-la dan to lame ek fer bann mirak avek sa.” (Ex. 4:17) Sa baton dan lame Moïse la ti montre ki li ti gagn lotorite ar Bondie. Alor, li ti kapav ale ek avek konfians reprezant vre Bondie devan lezot Izraelit ek devan Pharaon.​—Ex. 4:29-31; 7:8-13.

6. (a) Ki nou bizin ena dan nou lame kan nou pe prese, ek kifer? (b) Dan ki fason “parol Bondie li vivan” ek “li pwisan”?

⁶ Kan nou pe partaz mesaz Bondie avek bann dimounn, ki ena dan nou lame? Bien souvan nou ena Labib pou ki nou servi li kouma nou gagn lokazion. Malgre ki sertin konsider Labib kouma enn sinp liv, Jéhovah koz avek nou atraver so Parol ki Li’nn inspire. (2 Pierre 1:21) Dan Labib ena bann promes Bondie konsernan bann kitsoz ki pou arive kan so Rwayom pou dirize. Akoz sa, lapot Paul ti kapav ekrir: “Parol Bondie, li vivan ek li pwisan.” (Lir Hébreux 4:12.) Tou bann promes Jéhovah touletan realize parski Li touletan pe travay pou akonpli sa bann promes-la. (Is. 46:10; 55:11) Kan enn dimounn konpran sa, seki li lir dan Labib kapav ena enn gran linflians lor so lavi.

7. Kouma nou kapav “konn servi parol laverite kouma bizin”?

⁷ Wi, Jéhovah inn met dan nou lame so Parol ki vivan ek ki nou kapav servi pou prouve ki nou mesaz ena valer ek sorti kot Li. Sa pa etonn nou ki apre ki li ti ekrir bann Ebre, Paul ti konsey Timothée ki li ti forme, pou ‘fer tou so posib pou konn servi parol laverite kouma bizin.’ (2 Tim. 2:15) Kouma nou kapav aplik konsey Paul? Se kan nou lir avek bann dimounn ki ekout nou mesaz, bann verse ki’nn bien swazire ek ki kapav tous zot leker. Zisteman, bann trak ki ti sorti an 2013 inn fer dan enn fason pou ed nou fer sa.

8. Ki enn sirveyan servis ti dir konsernan bann nouvo trak?

⁸ Tou bann nouvo trak ena mem karakteristik.  Alor, kan nou’nn aprann kouma servi enn ladan, nou’nn aprann pou servi tou. Eski li fasil pou servi zot? Enn sirveyan servis dan Hawaii, l’États-Unis, ti ekrir: “Nou pa ti realize ki kantite sa bann nouvo zouti la ti pou efikas dan predikasion lakaz-lakaz ek dan bann plas piblik toulede.” Li’nn trouve ki fason ki’nn ekrir sa bann trak-la, sa pous bann dimounn pou reponn pli fasilman, ek souvan sa fer gagn bann bon konversasion. Par exanp, lor premie paz sa bann trak-la ena enn kestion ek diferan repons ki bann dimounn kapav swazir. Dimounn-la pena pou trakase si li pe donn enn move repons ouswa non.

9, 10. (a) Kouma nou bann trak ankouraz nou pou servi Labib? (b) Avek ki trak ou’nn gagn pli bon rezilta, ek kifer?

⁹ Sak trak ankouraz nou pou lir enn verse Labib ki’nn bien swazire. Par exanp, get trak Eski Soufrans Pou Arete enn Zour? Ki dimounn-la swazir “wi,” “non,” ouswa “kitfwa” pou reponn sa kestion-la, ouver trak-la ek san azout lezot kitsoz, dir: “Get seki Labib dir.” Apre sa, lir Révélation 21:3, 4.

¹⁰ Li parey, kan ou pe servi trak Kouma Ou Konsider Labib?, sa pa fer diferans ki repons dimounn-la swazir lor premie paz trak-la. Zis ouver trak-la ek dir: “Labib dir ki ‘tou Lekritir inspire par Bondie.’” Ou kapav azoute: “Ofet, sa verse-la dir plis ki sa.” Apre sa ouver ou Labib, ek lir 2 Timothée 3:16, 17 an-antie.

11, 12. (a) Kouma bann trak kapav fer ou gagn satisfaksion dan ou minister? (b) Kouma bann trak kapav ed ou prepar ou pou fer bann vizit?

¹¹ Fason ki dimounn-la reazir, pou fer ou kone ki kantite ankor dan trak-la ou kapav lir ek examine avek li. Ki dimounn-la anvi kontign konversasion-la ouswa non, ou pou’nn kit enn trak avek li ek ou pou ena satisfaksion ki ou’nn lir Parol Bondie ar li, mem si ou’nn lir zis enn ouswa de verse premie fwa ki ou’nn zwenn li. Plitar, ou kapav kontign konversasion-la.

¹² Lor dernie paz sak trak ena enn kestion anba tit “Reflesi lor La” ek bann verse ki ou kapav examine kan ou al fer vizit. Dan trak Ki Ou Panse lor Lavenir?, kestion ki ou kapav servi kan ou pou fer vizit se: “Kouma Bondie pou sanz sa lemond-la ek fer li vinn pli bon?” Ena  Matthieu 6:9, 10 ek Daniel 2:44 ki’nn site. Pou trak Eski Vremem Bann Ki’nn Mor Kapav Reviv? ena kestion: “Kifer nou vinn vie ek nou mor?” Ena Genèse 3:17-19 ek Romains 5:12 ki’nn site.

13. Kouma ou kapav servi bann trak pou koumans bann letid Labib?

¹³ Inn fer sa bann trak-la dan enn fason pou ed nou koumans bann letid Labib. Kan enn dimounn scan kod QR a ki ena lor dernie paz enn trak, sa pou diriz li ver nou sit. Lor sa sit-la, li pou trouv linvitasion pou etidie Labib. Bann trak-la atir osi latansion lor brosir Enn Bon Nouvel Ki Sorti kot Bondie! ek montre enn leson presi ladan. Par exanp, trak Kisannla Pe Vremem Kontrol Lemond? diriz dimounn-la ver leson 5 sa brosir-la. Trak Ki Kitsoz Fer enn Fami Ere? diriz dimounn-la ver leson 9. Kan ou servi bann trak dan fason ki bizin, ou pou pran bon labitid pou servi Labib dan predikasion ek kan ou fer bann vizit. An retour, sa kapav fer ou koumans pli boukou letid. Ki ou kapav fer ankor pou servi Parol Bondie dan enn fason efikas dan ou minister?

14, 15. Kouma ou kapav imit Paul dan ou minister?

¹⁴ Paul ti bien anvi konpran fason panse “plis dimounn posib” dan so minister. (Lir 1 Corinthiens 9:19-23.) Remarke ki Paul ti ena lespwar “pou sov bann Zwif . . . , pou sov bann ki swiv lalwa . . . , pou sov bann ki pena lalwa . . . , pou sov bann feb.” Wi, li ti anvi zwenn “tou sort kalite dimounn, pou ki par tou mwayin posib [li] kapav sov sertin parmi zot.” (Actes 20:21) Kouma nou kapav imit Paul kan nou pe prepar nou pou partaz laverite avek “tou sort kalite dimounn” dan nou teritwar?​—1 Tim. 2:3, 4.

¹⁵ Sak mwa, dan Nou Minister ena bann model prezantasion. Kifer ou pa esey zot? Me si ena lezot size ki trakas bann dimounn dan ou teritwar, ou kapav prepar bann prezantasion ki pou kapte zot latansion ek ki adapte ar zot. Reflesi lor lanvironnman kot ou reste, lor lezot dimounn ki res laba, ek lor bann kitsoz ki plis konsern zot. Apre sa, reflesi lor enn verse ki apropriye pou zot. Enn sirveyan sirkonskripsion dir kouma li ek so madam inn plis kapav servi Labib: “Laplipar dimounn dan predikasion les nou lir enn verse si nou bref ek direk. Apre ki nou dir zot bonzour, nou lir enn verse avek zot dan nou Labib ki deza ouver dan nou lame.” Anou examinn de-trwa size, kestion, ek verse ki’nn bien marse dan predikasion ek ki ou kapav eseye dan ou teritwar.

16. Kouma nou kapav servi Isaïe 14:7 dan nou minister?

¹⁶ Si ou res dan enn landrwa kot souvan ena laviolans, ou kapav dir enn dimounn: “Mazine ki sa nouvel-la pe fer laktialite: ‘Lor later antie ena kalm ek trankilite. Bann dimounn pe kriye dan lazwa’! Se seki Labib dir dan Isaïe 14:7. Ofet, dan Labib, Bondie inn fer plizir promes ki dan lavenir pou ena lape.” Apre sa, propoz dimounn-la pou lir avek li enn sa bann promes-la dan Labib.

17. Kouma ou kapav servi Matthieu 5:3 dan ou konversasion?

¹⁷ Eski dan ou landrwa li difisil pou bann misie zwenn le-debout? Si wi, ou kapav koumans ou konversasion koumsa: “Dapre ou, komie larzan enn misie bizin gagne pou ki so fami ere?” Apre ki ou’nn ekout dimounn-la, ou kapav dir: “Boukou misie gagn plis ki sa, selman zot fami touzour pa satisfe. Alor, ki kitsoz  vremem inportan pou ki enn fami ere?” Apre sa, lir Matthieu 5:3 ek propoz dimounn-la enn letid Labib.

18. Kouma ou kapav servi Jérémie 29:11 pou rekonfort lezot?

¹⁸ Eski bann dimounn dan ou landrwa pe soufer akoz enn maler ki’nn fek arive? Ou kapav koumans ou prezantasion koumsa: “Mo’nn vinn kot ou pou partaz enn panse ki kapav rekonfort ou. (Lir Jérémie 29:11.) b Eski ou’nn remark sa trwa kitsoz ki Bondie anvi pou nou la? ‘Lape,’ ‘enn lavenir,’ ek ‘enn lespwar.’ Eski nou pa kontan pou kone ki Bondie anvi nou viv bien? Me kouma sa pou arive?” Apre sa, atir so latansion lor enn leson apropriye dan brosir Bon Nouvel.

19. Kouma ou kapav servi Révélation 14:6, 7 avek bann dimounn ki interese ar relizion?

¹⁹ Dan ou vwazinaz, eski ena bann dimounn ki interese ar relizion? Si wi, ou kapav koumans ou konversasion koumsa: “Si enn anz ti koz avek ou, eski ou pa ti pou ekout seki li ena pou dir? (Lir Révélation 14:6, 7.) Dan sa verse-la, sa anz-la dir ‘ena lakrint pou Bondie.’ Alor, eski li pa inportan ki nou kone lor ki Bondie li pe koze? Sa anz-la donn nou enn indis kan li dir ki se ‘sa Kikenn ki’nn kree lesiel ek later’ la. Lor kisannla li pe koze?” Apre sa, lir Psaume 124:8 ki dir: “Nou gagn sekour dan nom Jéhovah, Bondie ki’nn fer lesiel ek later.” Apre sa, propoz pou explik dimounn-la plis lor Jéhovah.

20. (a) Kouma ou kapav servi Proverbes 30:4 pou fer enn zenn konn nom Bondie? (b) Eski ena enn verse an partikilie ki ou servi ek ki fer ou gagn bann bon rezilta?

²⁰ Ou kapav koumans enn konversasion avek enn zenn par sa bann parol-la: “Mo ti pou kontan lir enn verse avek twa. Sa verse-la poz enn kestion bien inportan. (Lir Proverbes 30:4.) c Pena okenn dimounn ki koresponn ar sa deskripsion-la, alor pena dout ki sa pe dekrir nou Kreater. d Kouma nou kapav konn so nom? Mo ti pou kontan montre twa sa dan Labib.”

21, 22. (a) Kouma enn verse ki’nn bien swazire kapav sanz enn dimounn? (b) Ki ou bien determine pou fer dan ou minister?

²¹ Nou pa kone kouma bann dimounn pou reazir kan nou lir avek zot enn verse ki’nn bien swazire. Par exanp, de Temwin dan l’Australie ti tap laport enn zenn madam. Enn ladan ti demann li: “Eski ou kone kouma Bondie apele?” ek apre li ti lir enn verse​—Psaume 83:18. Madam-la dir: “Mo ti gagn sok! Apre ki zot ti ale, mo ti roul 56 kilomet pou al dan enn libreri pou verifie sa nom-la dan lezot tradiksion Labib ek dan enn diksioner. Kan mo ti’nn sir ki nom Bondie se Jéhovah, mo ti demann momem ki kitsoz mo pa kone ankor.” Enn tipe letan apre, li ek so fitir misie ti koumans etidie Labib, ek plitar zot ti pran batem.

²² Parol Bondie sanz bann ki lir li ek ki ena lafwa dan bann promes Jéhovah. (Lir 1 Thessaloniciens 2:13.) Mesaz Labib pli pwisan ki ninport ki kitsoz ki nou kapav dir pou esey tous leker enn dimounn. Ala kifer, sak fwa ki nou gagn lokazion, nou bizin servi Parol Bondie. Li vivan!