GUY HOLLIS PIERCE, ki ti enn manb Komite Santral bann Temwin Jéhovah, inn mor Mardi le 18 Mars 2014, laz 79 an. Antan ki enn frer Christ, li’nn resisite ek li’nn gagn so rekonpans dan lesiel.—Héb. 2:10-12; 1 Pierre 3:18.

Guy Pierce ti ne le 6 Novam 1934 an Auburn, Californie, dan l’Amérique ek li ti batize an 1955. An 1977 li ti marye avek Penny, ki li ti bien kontan, ek zot ti gagn plizir zanfan. Me, li ti osi kouma enn papa pou boukou. An 1982, li ek Penny ti koumans fer pionie ansam. Apartir 1986, li ti servi pandan 11 an kouma sirveyan sirkonskripsion dan l’États-Unis.

An 1997, Guy ek Penny Pierce ti vinn bann manb fami Béthel l’États-Unis. Frer Pierce ti travay dan Departman Servis, ek an 1998 li ti nome kouma asistan dan Komite Personel, ki form parti Komite Santral. Dan renion aniel ki ti ena le 2 Oktob 1999, ti anonse ki Frer Pierce ti nome kouma enn manb Komite Santral. Dan bann lane ki’nn pase, li’nn servi dan Komite Personel, Redaksion, Edision, ek Kordinater.

Frer Pierce ti touletan ena enn sourir lor so figir ek ti kontan riye-badine. Bann dimounn diferan nivo sosial ek diferan kiltir ti santi zot alez avek li. Me seki ti sirtou atir bann dimounn se so lamour, so limilite, so respe pou bann lalwa ek prinsip Bondie, ek so konfians total an Jéhovah. Guy Pierce souvan ti dir ki soley kapav pa leve me bann promes Jéhovah touletan pou realize, ek li ti anvi ki lemond antie konn sa.

Frer Pierce ti travay dir pou Jéhovah, parfwa depi boner gramatin ziska bien tar aswar. Li ti vwayaz partou dan lemond pou ankouraz so bann frer ek ser Kretien. Mem si li ti bien okipe, li ti trouv letan pou bann ki bizin so led ouswa enn konsey. Mem plizir lane apre, bann frer ek ser ankor rapel so lospitalite, so lamitie, ek so bann lankourazman baze lor Labib.

So madam, so sis zanfan, so bann ti-zanfan ek aryer ti-zanfan, ek so bann zanfan spiritiel pou mank nou frer boukou. Samdi le 22 Mars 2014, Mark Sanderson, enn manb Komite Santral, ti fer diskour lanterman Frer Pierce dan Béthel Brooklyn. Li ti koz lor lesperans ki Frer Pierce ti ena pou al dan lesiel ek li ti lir sa bann parol Jésus la: “Dan lakaz mo papa ena boukou plas pou reste. . . . Si mo pe al prepar enn plas pou zot, mo pou retourne ek mo pou akeyir zot kot mwa, pou ki la kot mo ete zot osi zot la. Ek la kot mo pou ale, zot konn semin-la.”—Jean 14:2-4.

Nou pou mank Frer Pierce boukou. Me nou bien kontan ki ti ‘konn semin’ pou al dan ‘plas kot li pou reste’ pou touletan.