Si ou ena enn adolesan, kitfwa bann diskision se enn bann defi pli difisil ki ou bizin fer fas antan ki paran, ek ou pou bizin boukou pasians. Dan Brésil, Maria ki ena enn zanfan 14 an, dir: “Kan mo tifi defie mo lotorite, sa fer mo disan bwi. Nou telman ankoler, ki sakenn kriy ar so kamarad.” Dan l’Italie, Carmela fer fas ar mem sitiasion. Li dir: “Mwa ek mo garson touletan gagn bann diskision ki bien so, ek finalman li ferm limem dan so lasam.”

Kifer sertin adolesan kontan diskite? Eski se akoz zot bann frekantasion? Kitfwa. Labib dir ki bann dimounn ki nou frekante kapav ena enn gran linflians lor nou, sa kapav enn bon ouswa enn move linflians. (Proverbes 13:20; 1 Corinthiens 15:33) Me osi, laplipar divertisman ki bann zenn kontan zordi, montre ki li akseptab ki bann zenn ena enn konportman rebel ek ki zot mank respe ant zotmem.

Me ena lezot kitsoz ki ou bizin gete​—bann kitsoz ki pa tro difisil pou sirmonte enn fwa ki ou’nn konpran kouma sa inflians ou adolesan. Anou get de-trwa lexanp.

Lapot Paul ti ekrir: “Kan mo ti enn tibaba, mo ti koz kouma enn tibaba, mo ti pans kouma enn tibaba, mo ti rezonn kouma enn tibaba; me asterla  ki mo’nn vinn enn zom, mo finn abandonn tou seki kapav fer mwa azir kouma enn tibaba.” (1 Corinthiens 13:11) Sa bann parol Paul la montre nou ki bann zanfan ek bann paran pa pans parey. Kifer nou dir sa?

Bann zanfan ena tandans pou trouv tou kitsoz swa bon swa move. Parkont, bann adilt souvan zot kapav rezonn pli bien lor bann size ki pa tro kler ek pans dan enn fason pli profon kan zot ena pou tir bann konklizion ouswa pran bann desizion. Par exanp, bann adilt pou plis get bann prinsip ki inplike dan enn sitiasion ek pou reflesi ki lefe zot bann aksion pou ena lor lezot. Zot inn abitie pans koumsa. Parkont, bann adolesan pankor ariv sa staz-la.

Labib ankouraz bann zenn pou devlop zot “kapasite pou reflesi.” (Proverbes 1:4) Ofet, Labib ankouraz tou bann Kretien pou servi zot “kapasite pou rezone.” (Romains 12:1, 2; Hébreux 5:14) Me parfwa, fason ki ou adolesan rezone kapav amenn li pou diskit ar ou, mem lor bann ti kitsoz. Ouswa li kapav exprim enn lopinion ki montre bien ki li pena enn bon zizman. (Proverbes 14:12) Dan sa ka-la, kouma ou kapav rezonn avek li olie ki ou diskit ar li?

Me fer atansion: Kan ou pe rezonn avek ou adolesan, pa panse ki se touletan ou ki bizin ena dernie mo. Mem si seki ou’nn dir paret inn rant dan enn zorey inn sorti par enn lot, sirman ou adolesan inn bizin tir kitsoz ar sa konversasion-la plis ki ou pe panse​—mem si li pa rekonet sa. Pa etone si dan de-trwa zour, ou adolesan inn fini adopte ou pwindevi​—kitfwa mem dir ki se so fason panse.

“Parfwa mwa ek mo garson nou diskit lor bann ti kitsoz​—kouma par exanp, fode pa li fer gaspiyaz ouswa takinn so ser. Me bien souvan koumadir li pe anvi mo demann li so lopinion, mo montre li ki mo konpran li ek dir: ‘A! Dakor. Koumsa to trouv sa twa’ ouswa ‘A! Se seki to panse.’ Kan mo reflesi, mo trouve ki si mo ti dir li enn kitsoz koumsa, kitfwa nou ti pou evit boukou diskision.”​—Kenji, Japon

Enn bann kitsoz inportan ki bann paran bizin fer kan zot pe elve enn adolesan, se prepar li pou ki kan enn zour li kit lakaz, li vinn enn adilt responsab. (Genèse 2:24) Sa inplik form so lidantite​—so personalite, so bann krwayans, ek bann valer ki montre kisannla li ete. Kan li pe fer fas ar bann presion pou fer seki pa bon, enn adolesan ki ena so prop lidantite pou bien reflesi lor konsekans so bann desizion. Li pou osi demann limem: ‘Ki kalite dimounn mo ete? Ki bann prinsip ki inportan pou mwa? Kouma enn kikenn ki ena sa bann prinsip-la ti pou azir dan sa sitiasion-la?’​—2 Pierre 3:11.

Labib koz lor Joseph kouma enn zenom ki ti ena so prop lidantite. Par exanp, kan madam Potiphar, ti pe fors Joseph pou gagn relasion avek li, Joseph ti reponn: “Kouma mo kapav fer enn move kitsoz koumsa ek vremem fer pese kont Bondie?” (Genèse 39:9) Mem si Bondie pa ti ankor donn bann Izraelit enn lalwa ki interdi ladilter, Joseph ti kapav trouve seki Bondie panse lor sa size-la. Anplis, bann parol “kouma mo kapav,” montre nou ki Joseph ti’nn adopte fason panse Bondie​—sa ti form parti so lidantite.​—Éphésiens 5:1.

Ou adolesan osi ankor pe form so lidantite. Se enn bon kitsoz, parski sa pou ed li pou reziste kont presion so bann kamarad. (Proverbes 1:10-15) Dan enn lot kote, li kapav arive ki sa fer li reziste kont ou lotorite osi. Si sa arive, ki ou kapav fer?

Li normal ek sa fer enn dimounn gagn bann bienfe kan li devlop enn lidantite​—ek bann lopinion ki ena enn rapor avek sa. Apre tou, Labib dir ki bann Kretien bizin pa vinn kouma bann ti zanfan ki “koumadir pe balote par bann vag ek pe les tou sort kalite lansegnman sarye [zot] partou-partou kouma divan.” (Éphésiens 4:14) Alor, ankouraz ek donn ou adolesan lokazion pou devlop enn lidantite ek pou ena so prop lopinion.

“Kan mo montre mo bann tifi ki mo dispoze pou ekout zot, zot ena plis tandans pou pran mo lopinion an konsiderasion, mem si li diferan ar pou zot. Mo fer atansion pou pa fors zot pou pans kouma mwa, me plito pou devlop zot bann prop lopinion.”​—Ivana, République Tchèque.

Parey kouma bann tipti zanfan, bann adolesan osi dir bann kitsoz kat-sink fwa pou ki alafin zot paran oblize dakor. Si souvan sa arive kot ou, fer atansion. Mem si kan ou sede sa fer ou gagn lape pou enn ti-moman, an realite, sa pe montre ou adolesan ki kan li diskite se enn fason pou gagn seki li anvi. Kouma ou bizin azir? Swiv konsey ki Jésus done: “Ki zot Wi vedir Wi, zot Non, Non.” (Matthieu 5:37) Ou bann adolesan pou ena mwins tandans pou diskit ar ou kan zot kone ki ou bien ferm dan ou repons.

Me anmemtan, ou bizin rezonab. Par exanp, les ou adolesan explike kifer li panse bizin sanz ler ki li rant lakaz dan sertin lokazion. Dan sa ka-la, ou pa pe sede ar so bann presion, me ou pe zis swiv sa konsey Labib la: “Les zot tou kone ki zot bann dimounn rezonab.”​—Philippiens 4:5.

Biensir, okenn paran pa parfe. Labib dir: “Nou tou, souvan nou fer erer.” (Jacques 3:2) Si ou trouve ki ou an parti responsab pou enn diskision ki’nn leve, pa ezite pou demann ou adolesan pardon. Kan ou rekonet ou erer, sa montre ki ou inb ek sa pou ed li pou azir parey.

“Apre enn diskision, kan mo ti kalme, mo ti demann mo garson exkiz pou bann kitsoz ki mo ti dir dan koler. Sa ti ed li pou kalme li osi ek lerla sa ti pli fasil pou li ekout mwa.”​—Kenji, Japon.