“MO KAPAV reziste tou kitsoz apart tantasion.” An badinaz sertin dimounn abitie dir sa. Me sa ti koze-la dekrir bien seki zot panse lor tantasion​—o-fon zotmem zot kontan sa. Me parkont lezot trouv tantasion kouma enn lennmi ki kol ar zot ek zot ti pou bien kontan zet li anba. Twa, ki to panse? Si to devan enn tantasion, kouma to pou reazir? To pou sede ouswa to pou reziste?

Bien sir, pa tou tantasion ki amenn bann gro problem. Par exanp, si to manz enn trans gato alor ki to pe fer rezim, sa pa vedir ki to lavi inn fini. Me sede devan bann lezot tantasion​—sirtou devan bann tantasion ki kapav fer nou tom dan limoralite sexiel​—kapav amenn bann konsekans bien grav. Labib met nou angard: “Enn kikenn ki komet ladilter . . . Li pena bon sans; enn kikenn ki fer sa pe amenn maler lor limem.”​—Proverbes 6:32, 33.

Si enn sel kout, san to atann to retrouv twa devan enn tantasion imoral, kouma to pou reazir? Labib reponn: “Ala volonte Bondie: Zot bizin res sin ek rezet limoralite sexiel. Sakenn parmi zot bizin kone kouma li pou kontrol so prop lekor dan enn fason ki sin ek onorab.” (1 Thessaloniciens 4:3, 4) Kouma to kapav devlop sa determinasion-la? Anou examinn trwa letap ki pou ed twa.

Kan nou get bann zimaz imoral se koumadir nou pe zet petrol lor dife, setadir nou pe anflam nou bann move dezir. Pou konfirm rapor ki ena ant nou lizie ek bann dezir, Jésus donn sa lavertisman-la: “Enn dimounn ki kontign get enn fam ziska ki sa fer li gagn enn dezir pou li, finn fini komet ladilter avek li dan so leker.” Apre sa, li servi enn lexanp exazere pou donn sa konsey-la: “Si to lizie drwat pe fer twa tonbe, ras li ek zet li lwin ar twa.” (Matthieu 5:28, 29) Ki Jésus pe rod dir? Pou nou reisi reziste kont bann tantasion, fode pa nou  tard-tarde pou azir ek fode pa nou fer nou lizie kontan avek bann zimaz provokan.

Anou pran enn lexanp: Fer koumadir to pe marse lor semin aswar. Enn loto pe vini anfas, li’nn met so foul far. Ki to pou fer? Eski to pou kontign get sa lalimier-la? Non, biensir! To pou vir to figir enn kote, ouswa to pou bar to figir pou ki lalimier-la pa bat dan to lizie. Li parey pou bann zimaz erotik. Si to lizie al tap lor enn kikenn ki indesan, ouswa enn zimaz imoral dan enn liv, enn magazinn, ouswa mem lor lekran, pa perdi letan, get lot kote! Protez to lespri, pa les li kontamine. Get seki Juan, ki avan pa ti kapav sanpas pornografi, dir: “Kan mo trouv enn zoli tifi, bien souvan mo anvi reget li enn deziem fwa, enn trwaziem fwa. Alor, mo fors mo lizie pou get enn kote, ek mo dir dan mo leker: ‘Priye Jéhovah! To bien bizin priye asterla mem!’ Kouma mo fini priye, enn ti moman apre sa dezir-la disparet.”​—Matthieu 6:9, 13; 1 Corinthiens 10:13.

Get osi seki Job, enn zom fidel ti dir: “Mo’nn fer enn lalians avek mo lizie. Alor, kouma mo kapav get enn vierz avek enn move lintansion?” (Job 31:1) To’si to kapav ena mem determinasion.

Sey sa: Si to trouv enn zimaz erotik, deswit get lot kote. Imit ekrivin Labib ki ti fer sa lapriyer-la: “Fer ki mo lizie pa get bann kitsoz ki pa vo nanye.”​—Psaume 119:37.

Nou tou nou inparfe, akoz sa parfwa nou bizin lite kont bann move dezir. Labib dir: “Enn dimounn tante kan li les so prop dezir antrenn li. Apre, kan sa dezir-la inn devlope, sa fer li fer pese.” (Jacques 1:14, 15, Nouvo Testaman an Kreol Morisien) Kouma enn kikenn kapav evit rant dan sa trou ki pena fon-la?

Kan to resanti bann move dezir, rapel ki to kapav swazir kouma to pou reazir. Alor, lager kont sa bann dezir-la. Tir zot dan to lespri. Refiz pou nouri bann panse kot to mazinn tomem dan bann sitiasion imoral. Pornografi lor Internet ti vinn koumadir enn ladrog pou Troy. Get seki li dir: “Mo ti konsantre lor bann panse pozitif ek sa ti ed mwa pou lite kont  bann move panse. Li pa ti fasil. Mo’nn tonbe plizir fwa. Me alafin, mo’nn aprann kontrol mo panse.” Enn madam ki apel Elsa, ki’nn lite avek bann tantasion imoral kan li ti enn adolesan, dir: “Mo’nn kapav kontrol mo bann move panse kan mo’nn res okipe ek kan mo’nn priye Jéhovah.”

Sey sa: Kan to lespri ranpli avek bann panse imoral, arete deswit ek priye. Lager kont sa bann move panse-la avek “tou kitsoz ki vre, tou kitsoz ki serye, tou kitsoz ki drwat, tou kitsoz ki pir, tou kitsoz ki merite ki nou kontan zot, tou kitsoz ki dimounn koz an bien, tou kitsoz ki bon lor plan moral ek ki merit gagn loner.”​—Philippiens 4:8.

Kan sa trwa kitsoz-la zwenn ansam; dezir, tantasion ek enn lokazion ki prezante, se sir ki problem pa pou tarde pou swiv apre. (Proverbes 7:6-23) Kouma to kapav evit vinn enn viktim?

Labib donn nou enn konsey bien saz: “Enn dimounn ki ena bon zizman kasiet kan li trouv enn danze, me enn kikenn ki pena lexperyans kontign ale, ek li gagn bann konsekans.” (Proverbes 22:3) Alor vey sak pa ki to fer. Reflesi lor bann sitiasion ki kapav deklans enn problem, ek evit zot. (Proverbes 7:25) Filipe, enn misie ki’nn vink so labitid pou get pornografi, dir: “Mo’nn met nou computer enn plas kot zot tou kapav trouve ek mo’nn instal enn program ki filtre tou bann sit Internet. Mo pa al lor Internet kan mo tousel.” Troy osi, ki nou ti mansione lao, dir: “Mo evit get bann fim kot ena bann senn imoral ek frekant bann dimounn ki koz bann koze vilger lor sex. Mo pa anvi met momem dan enn sitiasion danzere.”

Sey sa: Analiz to bann pwin feb dan enn fason onet, ek fini prepar twa alavans pou evit bann sitiasion ki kapav met twa devan bann tantasion.​—Matthieu 6:13.

Me ki pou arive si malgre tou to bann zefor, to afebli ek to sede devan enn tantasion? Pa perdi lespwar ek fode pa to aret fer zefor. Labib dir: “Enn dimounn zis, kapav tonbe set fwa, me a sak fwa li pou releve.” (Proverbes 24:16) Nou Papa ki dan lesiel ankouraz nou pou “releve.” Eski to pou aksepte so led ki ranpli avek lamour? Alor fode zame to dir: “Mo’nn fatige priye, mo’nn plin.” Fer to lafwa vinn pli solid kan to etidie so Parol. Ranforsi to determinasion kan to asiste bann renion. Pran kouraz ar sa promes Bondie la: “Mo pou fortifie twa, wi, mo pou ed twa.”​—Isaïe 41:10.

Cody, ki nou’nn mansione dan lintrodiksion, dir: “Sa demann boukou zefor pou eliminn mo labitid pou get pornografi. Plizir fwa mo’nn tonbe, me avek led Bondie, finalman mo’nn reisi.” Dylan, ki nou ti mansione avan, dir: “Fasilman mo ti kapav gagn relasion sexiel avek mo koleg. Me mo’nn res lor mo pozision ek mo’nn dir li: ‘Non!’ Mo santi mwa extra bien ki mo ena enn konsians kler. Pli inportan, mo kone ki mo’nn fer Jéhovah so leker kontan.”

Si to tini ferm ek to reziste bann tantasion, to kapav sir ki to pou fer Jéhovah so leker kontan!​—Proverbes 27:11.