MARIE tom lor so de zenou. Pena mo pou exprim sa douler ki li pe resanti dan so leker-la. Sa dernie kriye so garson inn kriye apre ki li’nn res plizir lertan lor poto soufrans la, ankor pe rezone dan so zorey. Inn ariv midi. Lesiel inn vinn nwar, ek enn gran tranbleman-de-ter koumans sakouy later. (Matthieu 27:45, 51) Kitfwa Marie ena linpresion ki Jéhovah pe fer lemond kone ki kantite Li, plis ki ninport kisannla, bien-bien sagrin ki Jésus Christ inn mor.

Amezir ki sa nwarte ki’nn kouver Golgotha-la (ouswa Landrwa Krann), koumans disparet avek lalimier lapremidi, Marie pe plor so garson. (Jean 19:17, 25) Enn kantite souvenir pe travers so lespri. Li retrouv limem 33 an avan ansam avek Joseph pe amenn zot tibaba dan tanp, dan Jérusalem. Sa zour-la, lespri sin pous Siméon, enn misie ki aze, pou anons enn profesi. Siméon anons bann gran kitsoz pou Jésus, me li azoute ki enn zour, Marie pou santi koumadir enn long lepe pe travers so lekor. (Luc 2:25-35) Se asterla, dan sa ler-la, dan sa sitiasion bien difisil la, ki Marie al konpran seki Siméon ti pe rod dir.

Boukou dimounn dir ki lamor enn zanfan se pli gran pert, pli gran soufrans ki enn imin kapav kone. Lamor li enn lennmi terib, ek li bles nou tou dan enn sertenn fason. (Romains 5:12; 1 Corinthiens 15:26) Me, eski nou kapav andir sa bann blesir-la? Amezir ki nou examinn lavi Marie, depi ki Jésus inn koumans so minister ziska ki li trouv lamor ek mem apre, nou pou aprann boukou lor so lafwa. Se sa lafwa-la ki’nn ed li fer fas ar pli gran sagrin ki kapav ena.

Anou retourn trwa-z-an-edmi avan. Marie santi ki biento so lavi pou devir anba-lao. Mem dan sa ti lavil Nazareth kot li reste la, tou dimounn pe koz lor Jean Baptiste ek lor so mesaz repantans bien pwisan. Marie remarke ki, pou so gran garson, sa nouvel-la li koumadir enn signal; inn ariv ler pou li koumans so minister. (Matthieu 3:1, 13) Labsans Jésus dan lakaz pou kree enn boulversman dan lavi Marie ek so fami. Kifer?

Li paret ki Marie inn fini vinn vev; so misie, Joseph, ti fini mor. Si vremem sa ti arive, Marie ti kone ki ete perdi enn kikenn ki li bien kontan. a Asterla, bann dimounn apel Jésus “sarpantie,” pa zis “garson sarpantie.” Sa fer nou konpran ki Jésus sirman finn pran biznes so papa, ek ki se li ki pe pran swin so mama ek sa sis zanfan ki’nn ne apre li la. (Matthieu 13:55, 56; Marc 6:3) Mem si li’nn montre Jacques, ki ti pli gran parmi so kat frer, kouma pou fer travay so papa, depar sa gran frer-la pa pou fasil pou personn. Marie deza ena enn gran responsabilite; eski li pe per sa sanzman-la? Li posib. Me, ena enn kitsoz ki pli inportan ankor: Kouma li pou reazir kan Jésus ki sorti Nazareth pou vinn Jésus Christ, Mesi ki zot tou pe atann depi lontan? Anou get sa atraver enn levennman ki’nn arive, ki trouv dan Labib.​—Jean 2:1-12.

 Jésus al zwenn Jean pou ki Jean batiz li. Se lerla ki li vinn Sa Kikenn ki Bondie Inn Swazir la, ouswa Lemesi. (Luc 3:21, 22) Apre sa, li koumans swazir so bann disip. Mem si so travay bien irzan, li pran letan pou pas bann bon moman avek so fami ek so bann kamarad. Enn zour, ansam avek so mama, so bann frer, ek so bann disip, li al asiste enn maryaz dan Cana, enn lavil ki trouv dan bout enn kolinn, 13 kilomet ar Nazareth. Pandan fet, Marie trouv sertin manb fami sa nouvo koup-la pe panike, sakenn pe koz ar zot kamarad dousman-dousman. Li rann li kont ki ena enn problem: zot nepli ena divin! Dan kiltir Zwif, si, pandan enn maryaz, enn kitsoz koumsa arive, sa li enn gran laont pou sa fami-la, ek sa kapav gat fet-la net. Marie trakase pou zot; li al get Jésus.

Li dir so garson: “Zot pena divin.” Ki li pe atann Jésus fer? Li tousel kone. Me seki nou sir se ki li kone ki so garson li enn gran personaz ki pou fer bann gran kitsoz dan lavenir. Kitfwa o-fon limem li pe espere ki Jésus pou koumanse asterla mem. An realite, se koumadir li pe dir Jésus: “Mo garson, silteple, fer kitsoz pou zot!” Repons Jésus sirman etonn li: “Fam, dan ki fason sa konsern mwa ek twa?” Jésus pa pe mank respe anver so mama, mem si boukou kapav pans sa. Me se plito enn fason pou Jésus koriz so mama avek zantiyes. Li rapel Marie ki li pena nanye pou dir lor fason ki li pe fer so minister; se zis so Papa, Jéhovah, ki ena sa drwa-la.

Avek limilite, Marie aksepte remark ki so garson fer li. Li zis dir bann server: “Fer tou seki li dir zot.” Marie rann li kont ki se nepli so rol pou dir so garson ki li bizin fer. Okontrer, asterla se li ek lezot ki bizin swiv so bann instriksion. Me, Jésus montre ki li osi, parey kouma so mama, li ena konpasion pou sa nouvo koup-la. Li fer so premie mirak: Li fer delo vinn divin bon kalite. Rezilta? “So bann disip met zot lafwa an li.” Marie osi met so lafwa an Jésus. Asterla, li nepli trouv Jésus zis kouma so garson, me kouma so Segner ek so Sover.

Bann paran zordi kapav aprann boukou avek lafwa Marie. Li vre ki, zame personn pa pou elve enn zanfan kouma Jésus. Me, kan enn zanfan vinn adilt, mem si li inparfe, sa sanzman-la kapav bien difisil. Kitfwa enn paran pou kontign tret so garson ouswa so tifi kouma enn zanfan, alor ki li’nn vinn enn adilt. (1 Corinthiens 13:11) Kouma enn paran kapav soutenir so zanfan ki’nn grandi? Enn fason se kan li dir so zanfan: “Mo ena konfians an twa, mo garson (tifi). Mo kone ki to pou kontign aplik bann lansegnman Labib ek ki Jéhovah pou beni twa si to fer sa.” Kan, avek limilite, enn paran exprim so lafwa ek so konfians koumsa, sa kapav fer so bann zanfan boukou dibien. Pena dout ki Jésus inn bien apresie soutien ki Marie inn donn li pandan bann lane bien mouvmante ki’nn vini apre.

Bann Levanzil pa dir gran zafer lor Marie pandan sa trwa-z-an-edmi ki Jésus ti akonpli so minister la. Me, li bon nou rapel ki Marie ti enn vev ek li ti bizin elve tousel so bann zanfan ki ti ankor tipti. Alor nou kapav konpran kifer li pa’nn kapav akonpagn Jésus kan li ti pe prese partou dan so pei. (1 Timothée 5:8) Malgre sa, li kontign medit lor bann kitsoz spiritiel ki li aprann lor Lemesi ek li kontign asiste bann renion dan sinagog, parey kouma zot ti abitie fer an fami.​—Luc 2:19, 51; 4:16.

Li posib ki li ti la, parmi bann dimounn ki ti pe ekout Jésus koze dan sinagog Nazareth. Sirman  sa ti tous li boukou kan li ti tann so garson anonse ki enn vie profesi Mesianik finn realize sa zour-la atraver li! Devet sa pa ti fasil pou li kan li ti trouv bann Nazareen rezet so garson. Zot finn mem esey touy li!​—Luc 4:17-30.

Seki ti afekte li osi, se manier ki so bann lezot garson ti reazir anver Jésus. Kan nou lir Jean 7:5 nou aprann ki Jésus “so bann frer pa ti ena lafwa an li.” Parkont, konsernan bann ser Jésus​—ti ena omwin de​—Labib pa dir nanye. b Antouka Marie inn kone ki ete viv dan enn fami kot zot tou pena mem krwayans, li’nn kone ki ete sa soufrans-la. Li’nn bizin fer zefor pou trouv enn lekilib ant sa de kitsoz-la: res fidel ar laverite lor Bondie ek anmemtan fer tou pou gagn bann manb so bann fami san ki li fors zot pou vinn bann disip Christ.

Enn zour, sertin manb dan fami Jésus​—sirman parmi ena so bann frer osi​—desid pou al “atrap” li. An realite, zot pe dir: “Li finn perdi latet.” (Marc 3:21, 31) Biensir Marie pa pans parey kouma zot. Me, li al avek zot dan lespwar ki zot pou aprann kitsoz ki pou fer zot sanz zot fason panse. Eski vremem zot inn sanze? Mem si Jésus ti kontign fer bann mirak ek ansegn bann verite extraordiner, sa pa ti sanz nanye. Bann lezot garson Marie, ti touzour pa krwar an li. Kitfwa nou kapav mazinn Marie pe pous enn soupir pe dir: “Be ki bizin fer pou tous zot leker?”

Eski to viv dan enn lakaz kot zot tou pena mem krwayans? Lafwa ki Marie ti ena kapav aprann nou boukou. Li pa’nn bes lebra avek bann manb so fami. Okontrer li’nn fer tou pou ki zot trouve ki so lafwa ti donn li boukou lazwa ek lape lespri. Anmemtan, li’nn kontign soutenir Jésus. Eski li’nn mank so garson? Eski parfwa li’nn regrete ki so garson pa lakaz avek zot? Si wi, li’nn konn kontrol so bann santiman. Li ti konsider sa kouma enn privilez pou soutenir Jésus ek ankouraz li. Eski twa osi to kapav ed to bann zanfan pou met Bondie an premie dan zot lavi?

Eski Jéhovah ti rekonpans Marie pou so lafwa? Jéhovah zame pa bliye rekonpans bann ki ena lafwa, ek se sir ki Li’nn rekonpans Marie osi. (Hébreux 11:6) Zis mazine ki li’nn resanti kan li’nn ekout so garson ansegne, ouswa kan li’nn tann lezot koz lor Jésus apre ki zot inn ekout li fer bann diskour.

Sirman Marie rapel lanfans Jésus dan Nazareth kan li tann so bann lexanp. Kan Marie tann Jésus koz lor enn madam ki pe pas balie dan so lakaz pou rod enn pies larzan, ki pe kraz lafarinn pou fer dipin, ouswa ki pe alim enn lalanp ek pe met li dan enn plas lao, kitfwa sa fer li pans sa ti garson ki ti akote li kan li ti pe fer louvraz lakaz! (Luc 11:33; 15:8, 9; 17:35) Kan Jésus dir ki so zoug pa fer dimal ek ki so fardo li leze, kitfwa sa fer Marie pans bann zoli ti souvenir. Li rapel kouma enn lapre-midi, Joseph ti pe montre Jésus kouma fabrik enn zoug ki pa pou bles enn zanimo kan li pou met sa lor li. (Matthieu 11:30) Sirman Marie resanti enn gran satisfaksion kan li pans privilez ki Jéhovah inn donn li, setadir ede pou elve ek form sa garson ki pou vinn Mesi la. Sirman li resanti enn gran lazwa kan li tann pli gran ansegnan ki kapav ena, servi bann ti kitsoz, ouswa bann ti sitiasion ki arive dan lavi toulezour, pou ansegn bann leson bien profon!

 Pourtan, Marie res inb. So garson zame finn elev li ouswa mem met li dan enn pozision kot lezot pou donn li loner, ouswa mem pou ador li. Enn zour, alor ki Jésus pe ansegn enn lafoul, enn madam koumans kriye, ek li dir ki mama Jésus sirman bizin bien ere ki li’nn donn Jésus nesans. Gete kouma Jésus reponn: “Non, me, ere bann dimounn ki tann parol Bondie ek ki obeir li!” (Luc 11:27, 28) Enn lot fwa, alor ki li pe ansegne, sertin dir li ki so mama ek so bann frer inn vini. Li explik zot ki se bann dimounn ki ena lafwa ki vremem so bann mama ek so bann frer. Marie pa’nn pran sa pou enn ofans. Sirman li’nn konpran ki pou Jésus, bann lien spiritiel zot boukou pli inportan ki bann lien disan.​—Marc 3:32-35.

Malgre sa, pena mo pou dekrir seki Marie finn resanti kan li’nn trouv so garson pe konn enn lamor atros lor poto! Lapot Jean, ki ti temwin lamor Jésus, donn enn presizion plitar ki kapav fer nou konpran boukou kitsoz. Li dir ki sa moman-la, Marie ti pe deboute “pre ar poto soufrans Jésus.” Pena nanye ki ti kapav anpes sa mama fidel ki ti ena enn gran lamour la pou res akote so garson ziska lafin. Dan sa ler-la, sak zefor ki Jésus ti pe fer pou respire, ouswa pou ouver so labous pou pronons enn mo, ti koumadir enn montagn telman li ti pe soufer. Pourtan, li’nn ouver so labous, li’nn koze. Li’nn demann Jean, enn parmi so bann zapot ki li ti bien kontan, pou pran swin so mama parski, sa lepok-la, so bann frer pa ti ankor ena lafwa an li. Seki Jésus inn fer montre bien ki kantite li inportan ki enn zom ki ena lafwa pran swin so fami, sirtou lor plan spiritiel.​—Jean 19:25-27.

Sa moman ki Jésus pe rann so dernie souf-la, Marie resanti enn gran douler, koumadir enn long lepe pe transpers so leker, parey kouma ti anonse. Li difisil pou konpran lapenn ki Marie inn resanti sa zour-la, me li ankor pli difisil pou konpran sa gran lazwa ki li’nn resanti trwa zour plitar la! An realite, li al aprann ki enn parmi bann pli gran mirak finn arive​—Jésus finn resisite! Ek so lazwa finn double kan li tann dir ki Jésus finn aparet ar so demi frer Jacques, sirman kan li ti tousel. (1 Corinthiens 15:7) Sa finn ena enn gran lefe lor Jacques ek so bann frer. Plitar nou aprann ki zot osi zot koumans krwar ki Jésus limem Christ. Enn tipe apre, zot ti pe asiste bann renion avek zot mama ek Labib dir ki zot ti “persevere dan lapriyer.” (Actes 1:14) Plitar, de parmi zot, Jacques ek Jude, ti ekrir de liv dan Labib.

Dernie fwa ki Labib koz lor Marie, li akote so bann garson ek li pe priye dan renion. Se koumsa ki Labib terminn sa zistwar lor Marie la. Pa kapav ena enn pli zoli finision ki sa! Anplis, Marie finn les nou enn zoli lexanp! So lafwa finn ed li andir pli gro sagrin ki kapav ena, ek alafin li’nn gagn enn gran rekonpans. Si nou imit so lafwa, nou osi nou pou kapav andir ninport ki blesir, ninport ki kou ki nou gagne ar sa move lemond-la, ek nou pou gagn boukou plis rekonpans ki seki nou kapav mazine.