Smita, a 35 an, ki res Dhaka dan Bhangladesh, ti enn bon madam. Li ti bien kontan pran kont lezot dimounn. Zot tou ti konn li kouma enn zenn madam ki travay dir, ki touletan zwaye, ek ki anvi fer lezot kone seki li’nn aprann lor Bondie. So fami ek so bann kamarad ti gagn sok kan enn sel kou zot finn aprann ki li’nn gagn enn maladi grav. Dan mwins ki enn semenn li’nn fini mor!

James ek so madam, se enn zenn koup ki ena apepre 30 an ek ki res New York. Zot osi zot ena mem repitasion ki Smita. Enn printan, zot ti al rann vizit zot bann kamarad ki res lor Lakot Les l’Amérique. Me, zame zot inn retourn kot zot. Laba, zot inn fer enn grav aksidan ek zot inn perdi lavi. Pou tou bann ki ti kontan zot ek zot bann koleg travay, zot lamor finn les enn gran vid.

Nou pa bizin al lwin pou trouve ki maler ek soufrans pe ogmante azordi. Lager touy bann solda me osi bann sivil. Krim ek violans finn pran lavi boukou inosan. Bann dimounn tou ran sosial ek ninport ki laz, pe mor dan bann aksidan ek pe gagn bann maladi ki andikap zot net. Bann katastrof natirel pa get figir; zot balie enn rezion an-antie. Diskriminasion ek linzistis pe fane partou. Kitfwa oumem ou’nn viv sa.

Li normal ki nou demann noumem:

• Kifer bann bon dimounn gagn maler?

• Eski se Bondie ki responsab sa bann maler-la?

• Eski bann maler arive par azar ouswa se dimounn ki provok sa?

• Eski se akoz Karma ki dimounn soufer? b

• Si vremem ena enn Bondie tou-pwisan, kifer Li pa protez bann bon dimounn kont bann maler?

• Eski soufrans ek maler pou disparet enn zour?

Pou reponn sa bann kestion-la, nou bizin, avan tou, gagn repons sa de kestion-la: Kifer ena maler, ek ki Bondie pou fer?