KI SEKIRITE enn misie bizin donn so madam? Boukou dimounn inn grandi avek lide ki premie kitsoz ki enn mari bizin fer, se ed so fami pou vinn stab lor plan finans. Selman, sertin madam ki ena boukou kitsoz materyel ankor santi ki zot mank lafeksion zot misie ek zot mem viv dan laper. Enn madam Espagnol ki apel Rosa fer sa komanter-la lor so misie: “Avek bann dimounn andeor li ti enn bon dimounn, me dan lakaz li ti move.” Joy, ki sorti Nigeria, dir: “Kan mo pa ti dakor ar mo misie, li ti dir mwa: ‘To bizin fer tou seki mo dir twa parski mo to mari.’”

Kouma eski enn misie kapav amenn so rol mari avek amour? Ki zefor enn mari bizin fer pou ki so madam kapav kont lor li ek santi ki li pe res dan enn “plas trankil”?​—Rit 1:9.

Mem si devan lizie Bondie mari-fam zot egal, Labib dir ki sak konzwin ena enn rol diferan dan lafami. Romin 7:2 [NW] dir ki enn madam marye li anba “lalwa so mari.” Parey kouma dan boukou konpagni ena enn sef ki okip tou bann zafer, Bondie osi inn etabli bann mari kouma sef lor zot madam. (1 Korintien 11:3) Bann mari bizin pran latet dan zot lakaz.

Antan ki mari, kouma ou bizin servi lotorite ki Bondie inn donn ou? Labib dir: “Kontign kontan zot fam, parey kouma Kris osi finn kontan kongregasion.” (Efezien 5:25, NW) Mem si Zezi zame finn marye, so lexanp kapav ed ou vinn enn bon mari. Anou gete kouma.

Zezi ti anvi rekonfort ek soulaz lezot. Zezi ti fer enn promes ar tou bann ki ti pe soufer ek deprime akoz bann problem personel. Li ti dir: ‘Vinn ver mwa, . . . ek mo pou soulaz zot.’ (Matie 11:28, 29) Souvan li ti soulaz zot bann soufrans fizik ek ti ed zot pou ena enn pli bon relasion avek Bondie. Akoz sa boukou ti santi zot atire ar Zezi. Zot ti sir ki li ti pou soulaz zot fardo!

Kouma bann mari kapav imit Zezi? Rod bann mwayin pou diminie fardo ou madam. Sertin madam ena mem  santiman ki Rosa, ki ti dir: “Pou mo misie, mo ti zis koumadir so servant.” Parkont Kweku, enn misie ki ena enn bon lavi maryaz, dir: “Mo abitie demann mo madam ki mo kapav fer pou ed li. Parski mo kontan li, souvan san ki li demann mwa mo ed li pou fer louvraz.”

Zezi ti ena konsiderasion ek ti konpran lezot. Pandan 12 an, enn madam ki ti pov ti pe soufer akoz enn maladi bien grav. Kan li ti tann bann mirak ki Zezi ti pe fer, “dan so latet li ti pe dir, ‘Si selman mo reysi tous so linz, mo pou geri.’” Li ti ena rezon. Li ti koste ar Zezi, li ti tous rebor so linz, ek deswit li ti geri. Sertin ki ti la kitfwa ti panse ki sa madam-la pa ti gagn drwa fer sa, me Zezi li, li ti trouve ki so ka ti dezespere. a Avek bonte li ti dir li: “Mo tifi, . . . to finn gagn to gerizon.” Zezi pa ti met madam-la malalez, ni li ti kriy ar li. Me plito Zezi ti konpran so soufrans. Koumsa, Zezi ti montre ki  kalite zom li ti ete​—enn zom ki konpran lezot.​—Mark 5:25-34.

Kouma bann mari kapav imit Zezi? Kan ou madam pa pe santi li bien, ena konsiderasion pou li ek montre ki ou ena pasians. Esey pans kouma li ek konpran so reaksion. Par exanp, Ricardo explike: “Kan mo remarke ki mo madam extra sansib, mo fer enn gran zefor pou pa dir bann kitsoz ki kapav agas li ankor plis.”

Zezi ti kominik avek so bann disip. Zezi ti ena enn bon kominikasion avek so bann kamarad. Li ti dir: “Tou seki mo finn tande kot mo Papa, mo finn fer zot kone.” (Zan 15:15) Li vre ki parfwa Zezi ti anvi res tousel pou reflesi ek pou priye. Me souvan li ti partaz so bann santiman pli profon avek so bann disip. Lanwit avan ki touy li kouma enn kriminel, Zezi ti fran avek zot. Li ti dir zot ki li ti ena enn “gran tristes.” (Matie 26:38) Mem kan so bann kamarad ti desevwar li, zame Zezi ti aret koz ar zot.​—Matie 26:40, 41.

Kouma bann mari kapav imit Zezi? Kan ou koz avek ou madam, dir li seki ou panse ek seki ou resanti. Sertin madam plengne ki dan lakaz zot misie pa koz ditou, alor ki andeor zot bien koze. Parkont, get seki Ana resanti kan so misie ouver so leker ar li: “Mo santi ki li vremem kontan mwa, ek mo santi mwa pros ar li.”

Pa servi silans kouma enn zarm pou pini ou madam. Enn madam dir: “Kan mo mari ti ankoler ar mwa, li pa ti koz ar mwa pandan plizir zour. Li ti fer mwa santi mwa koupab ek li ti abes mwa.” Selman, enn mari ki apel Edwin ti esey imit lexanp Zezi. Li dir: “Kan mo agase, mo pa reponn deswit, me mo rod enn bon moman kot nou kapav koze.”

Joy, ki nou ti mansione dan koumansman, inn trouve ki so misie inn fer bann sanzman depi ki li’nn koumans etidie Labib avek bann Temwin Zeova. Joy dir: “Mo mari inn bien sanze ek li pe fer bann gran zefor pou ena plis lamour parey kouma Zezi.” Gras-a sa bann mem linstriksion Biblik la, plizir milyon koup pe viv pli bien. Eski ou’si ou ti pou kontan gagn sa bann linstriksion-la? Ou kapav demann enn Temwin Zeova enn letid Labib gratis.