Mo’nn ne dan Baku, Azerbaïdjan, ek mo deziem dan enn fami de zanfan. Mo papa ti enn Mizilman, ek mo mama ti enn Zwif. Mo bann paran ti kontan zot kamarad ek sakenn ti aksepte krwayans so kamarad. Mo mama ti soutenir mo papa kan li ti gard karem pou Ramadan, ek mo papa osi ti soutenir mo mama kan li ti selebre Pak. Lakaz kot nou, ti ena Koran, Tora, ek Labib.

Mo ti konsider momem kouma enn Mizilman. Mem si zame mo’nn dout lexistans Bondie, ti ena bann kitsoz ki mo ti anvi konpran. Mo ti demann momem: ‘Kifer Bondie inn kree dimounn, ek pou ki rezon enn kikenn soufer toutlong so lavi pou ki apre li al tourmante dan lanfer?’ Lefe ki dimounn dir ki tou kitsoz ki arive se volonte Bondie, mo ti pe reflesi: ‘Eski se Bondie ki donn nou problem ek apre Li kontan get nou soufer?’

Kan mo ti ena 12 an, mo ti koumans fer namaz, enn lapriyer ki bann Mizilman fer sink fwa par zour. Sa lepok-la, mo papa ti avoy mwa ek mo ser enn lekol Zwif. Parmi bann size ki nou ti aprann, ti ena bann tradision Tora ek lang Ebre. Toulezour avan klas koumanse, nou ti bizin fer lapriyer dapre koutim Zwif. Alor, dan gramatin, mo ti fer namaz lakaz, ek apre dan lazourne, mo ti fer lapriyer Zwif dan lekol.

Mo ti vremem anvi gagn bann repons lozik pou mo bann kestion. Touletan mo ti pe demann bann rabin dan lekol: “Kifer Bondie inn kree dimounn? Kouma Bondie trouv mo papa ki Mizilman? Li enn bon dimounn, alor kifer zot dir li inpir? Kifer Bondie inn kree li?” Bann repons ki mo ti gagne pa ti ena sans ek zot pa ti konvink mwa.

An 2002 mo ti’nn perdi lafwa net dan Bondie. Zis enn semenn apre ki nou ti vinn res l’Allemagne, mo papa ti fer enn atak ek ti tom dan enn koma. Touletan mo ti abitie priye pou lasante ek bien-net  mo fami. Mo ti sir ki zis Bondie Tou-Pwisan ki ena pouvwar lor lavi ek lamor, alor toulezour mo ti priye pou ki mo papa bien. Mo ti panse: ‘Li pa difisil pou Bondie realiz dezir enn tipti tifi.’ Mo ti sir ki Li ti pou exos mo bann siplikasion. Me mo papa inn mor.

Mo pa ti atann ki Bondie ti pou montre Li insansib ek sa ti extra afekte mwa. Mo ti pe panse: ‘Swa mo pa pe priye kouma bizin, swa Bondie pa existe.’ Mo ti pas dan enn sok ek mo ti nepli kapav fer namaz. Bann lezot relizion pa ti reprezant nanye pou mwa, alor mo ti tir konklizion ki pena Bondie.

Sis mwa apre, bann Temwin Zeova ti tap nou laport. Lefe ki nou pa ti ena enn tro bon lopinion lor bann Kretien, mwa ek mo ser ti anvi montre zot zantiman ki zot dan lerer. Nou ti demann zot: “Kifer bann Kretien ador Zezi, lakrwa, Marie, ek lezot zidol, alor ki sa pa an-akor avek bann Dis Komannman?” Bann Temwin-la ti montre nou bann prev konvinkan dan Labib ki bann vre Kretien pa gagn drwa ador zidol ek ki bizin priye zis Bondie tousel. Sa ti etonn mwa.

Lerla nou ti demann zot: “Me ki zot panse lor Trinite? Si Zezi Bondie, kouma li kapav viv lor later ek bann dimounn touy li?” La osi zot ti reponn nou atraver Labib ek zot ti explike ki Zezi li pa Bondie ni li egal ar Bondie. Bann Temwin-la ti explik nou ki se akoz sa zot pa krwar dan Trinite. Mo ti etone ek mo ti panse: ‘Zot inpe bizar sa bann Kretien-la.’

Me kanmem, mo ti anvi kone kifer dimounn mor ek kifer Bondie les dimounn soufer. Bann Temwin-la ti montre mwa liv Konesans Ki Amenn ver Lavi pu Tuletan, a kot ti ena bann sapit antie ki ti reponn mo bann kestion. Deswit zot ti koumans enn letid Labib avek mwa.

Sak fwa ki nou ti fer letid, mo ti gagn bann repons lozik pou mo bann kestion ek ki ti baze lor Labib. Mo ti aprann ki nom Bondie se Zeova. (Psom 83:18) So pli gran kalite se ki Li ena enn lamour ki pa egois. (1 Zan 4:8) Li’nn kree bann dimounn parski Li ti anvi ki zot konn lazwa pou viv. Ek mo finn konpran ki mem si Bondie pe permet linzistis, Li deteste sa ek biento Li pou tir linzistis pou touletan. Mo finn aprann ki se akoz rebelion Adan ek Ev ki bann dimounn pe soufer sa kantite-la. (Romin 5:12) Parmi bann move konsekans ki zot rebelion finn amene, ena lamor bann ki nou kontan, kouma mo papa. Me selman, Bondie pou tir tou sa bann problem-la dan lemond nouvo ki pou ena ek bann ki’nn mor pou reviv.​—Zistwar Bann Apot 24:15.

Bann verite ki ena dan Labib ti reponn mo bann kestion ek mo ti rekoumans krwar dan Bondie. Amezir ki mo ti pe konn bann Temwin Zeova pli bien, mo ti rann mwa kont ki zot enn fami internasional. Mo ti inpresione ar linite ek lamour ki ti ena parmi zot. (Zan 13:34, 35) Seki mo ti aprann lor Zeova ti fer mwa anvi servi Li, alor mo ti deside pou vinn enn Temwin Zeova. Mo ti batize le 8 Zanvie 2005.

Bann repons lozik ek konvinkan ki ena dan Labib finn sanz mo fason panse lor lavi. Gras-a bann lexplikasion konvinkan ki mo finn trouve dan Parol Bondie, mo santi mwa pli bien. Promes Zeova lor rezireksion fer mwa gagn boukou lazwa ek rekonfor parski mo kone ki enn zour mo pou retrouv mo papa.​—Zan 5:28, 29.

Sa fer si-z-an ki mo’nn marye avek Jonathan, enn kikenn ki kontan Bondie. Nou toule-de nou’nn aprann ki laverite lor Bondie li lozik ek sinp, me anmemtan li enn trezor ki ena boukou valer. Akoz sa nou kontan partaz nou lafwa ek nou zoli lesperans avek lezot. Azordi mo kone ki bann Temwin Zeova zot pa “bizar” me bann vre Kretien.