Depi bien lontan, bann dimounn finn esey mazine kouma lavi ti pou extraordiner si zot ti res zenn ek an bonn sante pou touletan. Me malerezman, nou mor. Sa fer plis ki trwa mil an depi ki Zob ti dir bann parol ki nou’nn trouve lao, ek pourtan zot ankor vre.

Bann dimounn ena enn gran dezir pou viv pou touletan, ek partou lor later li koumsa. Labib dir ki Bondie finn met dan nou leker dezir pou viv pou touletan ek osi dezir pou esey konn plis lor la. (Ekleziast 3:11) Lefe nou ena sa dezir-la, eski li paret lozik ki Bondie, ki ena lamour, pou met dan nou enn dezir ki inposib realize? Si ou’nn reponn non, ou ena rezon. Parol Bondie apel lamor enn lennmi ek promet ki Bondie pou “detrir” li.​—1 Korintien 15:26.

Vremem lamor li enn lennmi. Enn dimounn ki ena tou so lespri pa pou kontan mor. Kan enn danze pe vini, nou esey evit li, nou kasiet, ouswa sove. Kan nou malad, nou rod bann mwayin pou nou bien. Nou fer tou pou evit bann kitsoz ki kapav fer nou mor.

Eski nou ena bann rezon pou krwar ki sa vie lennmi-la pou detrir? Wi. Zeova, nou Kreater, pa’nn fer bann dimounn pou viv zis de-trwa lane ek apre mor. Kan Bondie ti kree bann dimounn, sa pa ti dan so proze ki zot mor. Li ti anvi zot viv pou touletan lor later, ek Li pou realiz sa proze-la.​—Izai 55:11.

Alor, kouma eski pou detrir lamor? Toutlong listwar, bann dimounn finn esey tou mwayin pou trouv enn remed kont lamor, me zot pa’nn reisi. Ziska zordi, zot ankor pe fer sa. Bann exper finn invant bann vaksin ek bann medsinn ki finn konbat sertenn maladi. Zot finn fer bann resers lor ADN bann kreatir vivan. Dan boukou pei, an zeneral, bann dimounn azordi viv pli lontan ki bann dimounn ki ti viv enn siek avan. Pourtan, pankor gagn viktwar lor lamor. Parey kouma Labib dir: “Zot tou pe retourn dan lapousier.”​—Ekleziast 3:20.

Me seki rasir nou, nou pena pou kont lor linvansion bann dimounn pou regle sa problem ki pe dire la. Zeova finn fini pran bann dispozision pou sov nou ouswa liber nou ar lamor, ek personaz prinsipal dan sa dispozision-la se Zezi Kris.