Labib fer nou kone ki pou ena enn destriksion kan lafin pou vini: “Parski lerla pou ena enn gran detres kouma zame inn ena depi koumansman lemond ziska asterla, non, ek ki pa pou ena ankor. An realite, si pa ti fer sa bann zour-la vinn pli kourt, okenn dimounn pa ti pou sove.” (Matie 24:21, 22, NW.) Me Bondie promet nou ki boukou dimounn pou sape: “Lemonn . . . pe al fini, me bann ki fer volonte Bondie pou viv pou touzour.”​—1 Zan 2:17.

Si ou anvi sape kan sa lemond-la pou al fini ek “viv pou touzour,” ki ou bizin fer? Eski ou bizin koumans ramas enn stok bann zafer ouswa fer bann lezot preparasion? Non. Labib konsey nou pou fixe bann lezot priorite. Li dir: “Parski tou sa bann kitsoz-la bizin disparet, ki kalite dimounn zot bizin ete par bann aksion ki montre ki zot kondwit sin ek ki zot atase ar Bondie, alor ki zot pe atann ek pe gard prezans zour Zeova touletan dan zot lespri.” (2 Pier 3:10-12, NW.) Kontex sa verse-la montre ki parmi “tou sa bann kitsoz” ki pou disparet la ena bann gouvernman sa lemond koronpi la ek tou bann ki’nn swazir sa bann gouvernman-la olie ki gouvernman Bondie. Mem si nou ramas bann provizion, pa sa ki pou fer nou sape kan pou ena sa destriksion-la.

Ofet pou nou sape, nou bizin res atase ar Zeova ek aprann ki bann kondwit ek aksion fer Li plezir. (Sefania 2:3) Olie ki nou fer kouma laplipar dimounn azordi ek nou pa pran kont bann sign bien vizib ki nou pe viv enn lepok bien inportan, nou bizin ‘gard prezans zour Zeova touletan dan nou lespri.’ Bann Temwin Zeova kapav montre ou atraver Labib kouma ou kapav sape kan lafin pou vini.