“KIFER mwa? Kifer Bondie inn les sa ariv mwa?” Sa bann kestion-la ti fatig Sidnei ki ti ena 24 an, ek ki res Brésil. Apre enn aksidan lor enn tobogan dan enn waterpark, li’nn kondane pou res lor enn fotey roulant.

Bann dimounn ki soufer akoz enn aksidan, enn maladi, lamor enn manb zot fami, enn katastrof natirel ouswa lager, kapav ena linpresion ki Bondie inn desevwar zot. Dan lepase osi sa ti koumsa. Par exanp, Zob ti konn bann maler enn lor lot ek li ti akiz Bondie: “Mo kriye twa pou gagn led, me to pa reponn mwa; Mo deboute, me to zis get mwa. To’nn vir kont mwa dan enn fason kriel; avek tou lafors to lame, to atak mwa.”​—Zob 30:20, 21.

Zob pa ti kone kotsa so bann problem sorti, kifer li pe gagn problem, ek kifer Bondie pe permet li soufer. Erezman, Labib montre kifer ena problem ek kouma nou bizin reazir fas ar bann problem.

Labib dir lor Bondie: “Seki Li fer, parfe, parski dan tou seki Li fer ena lazistis. Li enn Bondie fidel, ki zame fer linzistis; Li zis ek drwat.” (Deteronom 32:4) Si sa li vre, eski enn Bondie “zis ek drwat” pou anvi ki bann dimounn soufer? Eski Li pou servi bann maler pou pini zot?

Okontrer, Labib dir nou: “Si dimoun tante par leprev, fode pa ki li dir, ‘Bondie ki tant mwa.’ Bondie pa kapav tante par lemal, e limem li pa tant personn.” (Zak 1:13) An realite, Labib montre ki dan koumansman Bondie ti fer tou kitsoz parfe pou limanite. Li ti donn Adan ek Ev, bann premie imin, enn zoli plas pou reste, tou seki zot bizin pou viv, ek enn travay ki donn zot satisfaksion. Bondie ti dir zot: “Gagn boukou zanfan, miltipliye, ranpli later ek ena kontrol lor li.” Alor, li kler ki Adan ek Ev pa ti ena okenn rezon pou panse ki Bondie inn desevwar zot.​—Zenez 1:28.

Me zordi nou pa pe viv dan bann kondision parfe. Ofet, toutlong listwar, limanite finn bien soufer. Labib ena rezon kan li dir: “Ziska zordi kreasion antie pe kontign plengne ek soufer ansam.” (Romin 8:22, NW.) Kouma sa inn arive?

Pou kone kifer nou soufer, nou bizin retourn dan lepok kot soufrans inn koumanse. Bondie ti donn Adan ek Ev lord pou pa manz frwi “pie konesans bon ek move.” Sa lord-la ti reprezant so bann prinsip lor seki bon ek seki pa bon. Me enn anz rebel, ki plitar inn gagn tit Satan Lediab, ti pous Adan ek Ev pou rezet sa bann prinsip-la. Lediab ti dir Ev ki zot pa pou mor si zot dezobeir Bondie. Kan li’nn fer sa, li’nn fer Bondie pas pou enn manter. Satan ti osi akiz Bondie ki Li ti pe refiz donn bann imin drwa pou desid par zotmem seki bon ek seki pa bon. (Zenez 2:17; 3:1–6) Satan ti pe rod dir ki limanite pou pli dan bien san direksion Bondie. Tousala finn soulev enn kestion bien inportan​—Eski se Bondie mem ki ti bizin dirize?

Lediab finn soulev enn lot kestion. Li’nn akiz bann imin ki zot servi Bondie par lintere. Konsernan Zob ki ti fidel, Lediab ti dir Bondie: “Eski to pa finn mont enn baraz otour li, otour so lakaz ek otour tou seki li ena? . . . Me pou sanze, avoy to lame, detrir tou seki li ena, ek vremem li pou modi twa dan to figir.” (Zob 1:10, 11) Li vre ki seki Satan ti dir ti konsern Zob, me li ti pe rod dir osi ki tou bann imin servi Bondie par lintere.

Ki meyer fason Bondie ti pou reponn bann lakizasion bien grav ki Satan inn fer? Bondie Li saz ek Li ena meyer solision. Sa solision-la pa desevwar nou. (Romin 11:33) Li’nn swazir pou les bann imin diriz zot par zotmem pou enn sertenn  tan. Lerla rezilta pou montre kisannla pli konn dirize.

Azordi bann move kondision ki ena lor later prouve dan enn fason bien kler ki bann imin pena kapasite pou dirize. Bann gouvernman pa’nn reisi amenn lape, sekirite ek boner. Ek mem akoz zot, later pre pou al konn larwinn. Sa konfirm seki Labib dir: “Enn dimounn ki pe marse pa finn kree pou diriz so pa.” (Zeremi 10:23) Se zis kan Bondie pou dirize ki limanite pou konn lape, boner ek prosperite pou touletan. Se samem ki Bondie anvi pou bann imin.​—Izai 45:18.

Me kouma Bondie pou akonpli so proze pou limanite? Nou rapel ki Zezi ti ansegn so bann disip pou priye: ‘Fer to regn vini, realiz to volonte lor later kouma dan lesiel.’ (Matie 6:10) Pena dout ki dan ler ki Li’nn fixe, par mwayin so Rwayom, Bondie pou tir tou seki fer nou soufer. (Daniel 2:44) Lamizer, maladi ek lamor pou nepli existe. Labib montre ki Bondie ‘pou sap bann dimounn mizer ki kriye o-sekour.’ (Psom 72:12–14, NW.) Konsernan bann malad, Labib dir: “Okenn abitan pa pou dir: ‘Mo malad.’” (Izai 33:24) Mem konsernan bann mor ki dan memwar Bondie, Zezi ti dir: ‘Ler pe vini kot tou dimoun ki dan tom pou sorti.’ (Zan 5:28, 29) Eski sa bann promes-la pa tous ou leker?

Anviron 17 an apre so aksidan, Sidnei, ki nou’nn mansione avan, dir: “Zame mo’nn blam Zeova pou sa aksidan-la, me mo rekonet ki o-koumansman mo ti ena linpresion Li’nn desevwar mwa. Ena zour mo moral bien ba, ek kan mo reflesi lor mo leta mo plore. Selman gras-a Labib, mo’nn arive konpran ki mo aksidan se pa enn pinision Bondie. Me parey kouma Labib dir: ‘Bann moman ek bann levennman ki nou pa atann ariv nou tou.’ Me lapriyer ek sertin verse bien presi inn rapros mwa ar Zeova ek ed mwa res pozitif.”​—Ekleziast 9:11; Psom 145:18; 2 Korintien 4:8, 9, 16.

Ki pou ed nou si zame nou ena linpresion ki Bondie inn desevwar nou? Se kan nou rapel kifer Bondie permet soufrans ek kouma biento Li pou tir tou seki fer nou soufer. Labib donn nou sa lasirans-la: “Bondie rekonpans dimoun ki rod li.” Ni Zeova ni so Garson Zezi, zame pou desevwar enn dimounn ki fer zot konfians.​—Ebre 11:6; Romin 10:11.