KAN ou’nn lir sa de premie fraz-la, lekel dekrir pli bien ou bann santiman? Boukou atire ek gagn rekonfor ar seki Sol ki sorti Tars ti dir. Enn lot nom pou Sol se lapot Pol. (Zistwar Bann Apot 17:26, 27) Dan Labib ena bann lezot parol rasiran koumsa. Par exanp, dan enn lapriyer, Zezi ti dir ki so bann disip kapav aprann konn Bondie ek gagn So benediksion.​—Zan 17:3.

Selman, sertin filozof kouma Philon pa ti pans parey kouma lapot Pol ek Zezi. Zot ti pretann ki zame nou pou kapav aprann konn Bondie. Alor, kotsa nou kapav trouv laverite?

Labib rekonet ki ena sertin kitsoz lor Bondie ki li difisil pou bann imin konpran. Par exanp, li difisil pou kalkile ki kantite letan nou Kreater existe, pou konpran ki kantite li intelizan, ouswa pou mezir profonder so sazes. Li inposib pou bann imin konpran tousala. Me sa pa anpes nou aprann konn Bondie. An realite, kan nou medit lor sa bann laspe dan personalite Bondie la, sa  kapav ed nou ‘pou apros ar Bondie.’ (Zak 4:8) Anou examinn de-trwa kitsoz konsernan Bondie ki difisil pou konpran. Apre nou pou get bann kitsoz lor Bondie ki nou kapav konpran.

BONDIE TOULETAN EXISTE: Labib ansegne ki Bondie existe ‘depi touzour e pou touzour.’ (Psom 90:2) Savedir, Bondie pena koumansman ek zame Li pou ena lafin. Li bien difisil pou bann dimounn “kont kantite lane ki Li existe.”​—Zob 36:26.

Kouma sa kapav ed ou? Bondie promet pou donn ou lavi eternel si ou vremem aprann konn Li. (Zan 17:3) Eski ou ti pou krwar sa promes-la si Bondie Limem pa ti viv pou touletan? Se zis sa Lerwa ki “regne pou touzour” la ki kapav realiz enn promes koumsa.​—1 Timote 1:17.

LINTELIZANS BONDIE: Labib ansegne ki li “inposib konpran so lintelizans” parski so bann panse telman pli gran ki pou nou. (Izai 40:28; 55:9) Labib ena rezon kan li poz sa bann kestion-la: “Kisannla konn panse Lesegner? Kisannla kapav donn li konsey?”​—1 Korintien 2:16.

Kouma sa kapav ed ou? Bondie kapav ekout lapriyer plizir milyon dimounn anmemtan. (Psom 65:2) Li mem remark sak mwano ki tom anba. Eski enn zour lespri Bondie pou telman ranpli ar bann kitsoz ki sa pou anpes Li remark ou ouswa ekout ou lapriyer? Non. Zame sa pou arive parski so lespri pena limit. Anplis, pou Li, ou “ena plis valer ki enn mwano.”​—Matie 10:29, 31.

FASON AZIR BONDIE: Labib ansegne ki zame bann dimounn pou “dekouver travay ki vre Bondie finn fer depi koumansman ziska lafin.” (Ekleziast 3:11) Akoz sa, zame nou pou konn tou kitsoz konsernan Bondie. Nou pa kapav “konpran” sazes ki ena deryer so fason azir. (Romin 11:33) Selman, Bondie dispoze pou fer bann ki anvi fer Li plezir konn so fason azir.​—Amos 3:7.

Kouma sa kapav ed ou? Si ou lir ek etidie Labib, zame ou pou aret aprann bann nouvo kitsoz lor Bondie ek lor so fason azir. Savedir ki pou leternite, nou pou kontign vinn pli pros ar nou Papa ki dan lesiel.

Mem si nou pa reisi konpran sertin laspe konsernan Bondie, sa pa vedir ki nou pa kapav aprann konn Li ditou. Dan Labib ena boukou ransegnman ki ed nou pou aprann konn Bondie pli bien. Anou get de-trwa lexanp:

NOM BONDIE: Labib ansegn nou ki Bondie inn donn Limem enn nom. Li dir: “Mwa mo Zeova. Samem mo nom.” Dan Labib ena nom Bondie anviron 7,000 fwa, ek sa nom-la paret plis ki tou lezot nom.​—Izai 42:8.

Kouma sa kapav ed ou? Zezi ti dir dan so lapriyer model: “Nou Papa [ki] lao dan lesiel, ki to nom sanktifie.” (Matie 6:9) Eski ou’si ou kapav servi nom Bondie dan ou lapriyer? Labib dir ki Zeova anvi sov tou dimounn ki montre respe ki bizin pou so nom.​—Romin 10:13.

LANDRWA KOT BONDIE RESTE: Labib ansegne ki ena de “rezion”​—enn rezion invizib kot ena bann lespri invizib ek enn rezion vizib ki konsern later ek liniver. (Zan 8:23, NW; 1 Korintien 15:44) Dan Labib “lesiel” souvan reprezant sa rezion invizib la. Alor, landrwa kot nou Kreater reste, se dan “lesiel.”​—1 Lerwa 8:43.

 Kouma sa kapav ed ou? Ou kapav konn Bondie pli bien. Nou Kreater Li pa enn lafors ki partou-partou ek ki dan tou kitsoz. Zeova Li reel ek Li res dan enn landrwa ki reel. Selman, “dan kreasion, nanye pa invizib pou lizie Bondie.”​—Ebre 4:13.

PERSONALITE BONDIE: Labib ansegn nou ki Zeova ena bann zoli kalite. “Bondie limem lamour.” (1 Zan 4:8) Zame Li koz manti. (Tit 1:2) Li pa fer preferans, Li ena mizerikord, konpasion, ek Li pa ankoler vit. (Exod 34:6; Zistwar Bann Apot 10:34) Boukou dimounn etone kan zot aprann ki Bondie anvi “ena lamitie” avek bann ki respekte Li.​—Psom 25:14.

Kouma sa kapav ed ou? Ou kapav vinn kamarad Zeova. (Zak 2:23) Kan ou aprann konn personalite Zeova, lerla ou pou konpran pli bien bann zistwar Labib.

Labib permet nou konn bien Zeova. Kontrerman ar seki sertin panse, ou kapav aprann konn nou Kreater parski Li anvi ki ou konn Li. So Parol Labib fer sa promes-la: “Si to rod Li, Li pou les twa trouv Li.” (1 Kronik 28:9) Alor, kifer ou pa lir ek medit lor bann zistwar Labib pou aprann konn Bondie? Si ou fer sa, Labib promet ki Bondie “pou vinn pros ar [ou].”​—Zak 4:8.

Kitfwa ou dir oumem: ‘Mo pa kapav konpran tou kitsoz lor Bondie, be kouma mo pou kapav vinn so kamarad?’ Reflesi lor la: Eski meyer kamarad enn dokter oblize ena enn degre dan medsinn? Non! Kamarad sa dokter-la kitfwa fer enn lot metie. Kanmem, sa pa anpes zot pou vinn kamarad. Seki inportan se kamarad-la konn personalite dokter-la. Li konn osi ki li kontan ek ki li pa kontan. Pou ou’si parey. Dan Labib ou kapav aprann ki kalite Bondie, Zeova ete. Ek sa kapav ed ou pou devlop enn lamitie avek Li.

Dan Labib ena bann ransegnman ki nou bizin pou aprann konn nou Kreater, Zeova. Eski ou ti pou kontan aprann lor sa Bondie-la? Bann Temwin Zeova donn bann kour Labib gratis kot bann dimounn. Nou ankouraz ou pou kontakte bann Temwin dan ou landrwa ouswa pou vizit nou sit www.dan124.com.