BANN ZENN DEMANDE
Eski Lomosexialite Li Pa Bon?
“Enn parmi bann pli gro problem ki mo’nn gagne kan mo ti pe grandi, se ki bann garson ti pe atir mwa. Mo ti panse ki sa bann santiman-la ti pou ale amezir ki mo grandi, me zot ankor la.”—David, 23 an.
David li enn Kretien ki anvi fer Bondie plezir. Me eski li kapav fer sa, alor ki li atire ar bann dimounn ki mem sex ki li? Ki Bondie panse lor lomosexialite?
Ki Labib dir lor la?
Seki bann dimounn panse lor lomosexialite depann lor kotsa zot reste ouswa ki lepok zot inn viv. Me bann Kretien pa les seki laplipar dimounn panse inflians zot, ek zot pa ‘les toutsort kalite lansegnman sarye zot partou-partou.’ (Efezien 4:14) Okontrer, seki bann Kretien panse lor lomosexialite ouswa lor ninport ki kitsoz, li baze lor Labib.
Seki Parol Bondie dir lor bann pratik omosexiel bien kler. Labib dir:
“Fode pa ki to dormi avek enn zom parey kouma to dormi avek enn fam.”—Levitik 18:22.
“Bondie finn abandonn zot . . . dapre dezir zot leker; . . . dan zot dezir degradan. Mem zot bann fam finn sanz relasion natirel pou relasion ki kont natir.”—Romin 1:24, 26, Nouvo Testaman Dan Kreol Morisien, NTKM.
“Pa anbet zotmem. Bann ki pratik limoralite sexiel, lidolatri, adilter, bann zom ki les lezot zom fer bann aksion omosexiel avek zot, bann zom ki gagn relasion avek bann zom, bann voler, bann ki touzour anvi gagn plis, bann soular, bann ki insilte lezot, ek bann eskro, pa pou gagn Rwayom Bondie.”—1 Korintien 6:9, 10.
Bann prinsip Labib aplik ar tou dimounn, ki nou atire ar bann dimounn mem sex ki nou, ouswa ki nou atire ar bann dimounn lot sex. Parski nou tou nou inparfe, li kapav arive ki nou anvi fer bann kitsoz ki pa bon. Me si nou anvi viv dan enn fason ki fer Bondie plezir, nou bizin kontrol nou bann dezir.—Kolosien 3:5, NTKM.
Eski . . . ?
Eski Labib dir ki nou bizin ena laenn pou bann omosexiel?
Non. Labib montre ki fode pa ki nou ena laenn pou personn, ki li enn omosexiel ouswa non. Okontrer, li dir nou “viv anpe avek tou dimounn.” Ek nou bizin fer sa ki dimounn-la viv dan enn fason ki fer Bondie plezir ouswa non. (Ebre 12:14, NTKM) Alor, li pa bon ki nou maltret bann dimounn parski zot bann omosexiel.
Eski savedir ki bann Kretien pou kont bann lalwa ki permet bann dimounn mem sex marye?
Labib montre nou ki Bondie finn kree maryaz pou ini enn zom ek enn fam. (Matie 19:4-6, NTKM) Me parkont, enn gouvernman baz li lor seki bann dimounn panse pou etabli enn lalwa, li pa baz li lor seki Bondie panse. Labib demann bann Kretien pou pa mel zot dan bann zafer politik. (Zan 18:36, NTKM) Alor, bann Kretien pa pou soutenir ouswa al kont bann lalwa gouvernman lor maryaz ant bann dimounn mem sex ouswa lor lomosexialite.
Me ki pou arive si . . . ?
Me ki pou arive si enn kikenn pratik lomosexialite? Eski sa dimounn-la kapav sanze?
Wi. Se seki sertin parmi bann premie Kretien ti fer! Apre ki Labib dir ki bann ki pratik lomosexialite pa pou erit Rwayom Bondie, Labib dir: “Ala kouma sertin parmi zot ti ete.”—1 Korintien 6:11, NTKM.
Eski savedir ki bann ki ti pe pratik lomosexialite pou nepli atire ar bann dimounn mem sex? Non. Labib dir: “Met nouvo personalite lor zot, ki gras-a konesans exakt pe kontign renouvle.” (Kolosien 3:10) Se pa enn kitsoz ki nou pou kapav fer enn sel kout, se enn kitsoz ki nou bizin kontign fer.
Me ki pou arive si enn dimounn ki anvi swiv bann prinsip Bondie ankor ena bann dezir omosexiel?
Parey kouma ninport ki move dezir ki enn dimounn ena, dimounn-la kapav swazir pou pa pans lor la ouswa pou pa satisfer sa move dezir-la. Labib dir: “Les zot lavi dirize par Lespri, lerla zot pa pou viv dapre dezir laser imin.”—Galat 5:16, NTKM.
Remarke ki sa verse-la pa dir ki dimounn-la pou nepli ena bann dezir laser imin. Parkont, si li etidie Labib ek priye, li pou kapav gagn lafors pou reziste kont sa bann move dezir la.
David, ki nou ti mansione koumansman sa lartik-la, dir ki sa ti enn gran soulazman pou li kan li ti aprann sa, sirtou apre ki li’nn explik so bann paran so sitiasion. Li dir: “Mo ti santi mwa soulaze, ek kitfwa si mo ti dir zot sa pli boner, mo ti pou profit pli bien mo ladolesans.”
Nou pou touletan ere kan nou swiv bann prinsip Zeova. Nou sir ki So bann prinsip ‘drwat ek zis, zot ranpli leker ar lazwa,’ ek ‘kan nou obeir zot nou gagn rekonpans.’—Psom 19:8, 11, Psom an Kreol Morisien.
