LED POU LAFAMI | ELVE BANN ZANFAN
Protez To Zanfan Kont Pornografi
“Nou konn bien ki danze ena akoz pornografi, me nou pa ti realize ki kantite li fasil pou ki nou tifi gagn akse ar sa.”—Nicole.
Dan sa lartik la
Ki kitsoz to bizin kone?
Bann zanfan kapav gagn akse ar pornografi depi bien tipti. Bann letid inn montre ki an zeneral, enn zanfan get pornografi pou premie fwa kan li ena apepre 11 an.
Bann zanfan kapav gagn akse ar pornografi san ki zot anvi get sa. Par exanp, zot kapav tom lor enn kitsoz porno alor ki zot pe fer enn sinp resers lor Internet ouswa ki zot pe al lor enn rezo sosial. Bann piblisite lor pornografi kapav nek aparet enn kout koumsa alor ki zanfan-la pe zwe enn video game lor Internet. Pornografi vinn dan diferan form, me pli souvan se bann foto ek bann video. Me selman, ena osi bann zistwar erotik ki bann dimounn kapav lir ouswa ekoute lor Internet.
Bann paran bizin kone ki ena bann dimounn ki kapav avoy bann zanfan bann mesaz porno lor zot portab. Dapre enn letid ki’nn fer avek preske plis ki 900 zenes, preske 90 poursan bann tifi ek preske 50 poursan bann garson inn dir ki souvan, zot bann kamarad lekol inn avoy zot bann foto ek bann video kot ena bann dimounn touni.
Bann video porno ki popiler bien souvan montre violans. Bann video porno ki bien popiler ek ki plis aksesib, bien souvan ena violans, ek sirtou kont bann madam.
Pornografi fer ditor bann zanfan. Bann resers inn montre ki bann zanfan ki’nn gagn akse ar pornografi, ena sa bann tandans-la:
pa travay bien dan lekol
strese, gagn depresion, ek ena santiman ki zot pena valer
trouv agresion sexiel kouma enn kitsoz normal
An rezime: Si bann zanfan get pornografi sa pou ena enn lefe negatif lor zot. Se bann paran ki plis kapav protez zot.
Prinsip Labib: “Sa bann komannman ki mo pe donn twa azordi la, bizin dan to leker, ek to bizin ansegn sa to bann garson ek koz sa ar zot kan to asize dan to lakaz, kan to marse lor semin, kan to pe alonze, ek kan to leve.”—Deteronom 6:6, 7.
Kouma to kapav protez to zanfan kont pornografi?
Bann kitsoz ki to bizin kone. Reflesi kan ek kotsa li pli fasil pou ki to zanfan gagn akse ar pornografi. Par exanp, eski li tousel kan li pe servi Internet dan lekol pandan brek?
To zanfan kapav gagn akse ar pornografi dan diferan fason
Aprann ki reglaz sekirite ena lor so a portab, ek konn bann aplikasion ki li abitie servi ek bann zwe ki li zwe. Par exanp, dan sertin aplikasion mesaz ena enn opsion ki permet enn mesaz, foto, ouswa video porno pou efase apre enn sertenn peryod letan. Ek azordi, boukou video game lor Internet pe permet bann zwer pou get pornografi ouswa mem pou gagn bann relasion sexiel dan sa bann zwe-la.
“Se avek lexperyans ki mo pe dir sa: Si to zanfan ena enn portab, antan ki paran to bizin kone kouma pou servi portab-la. To bizin kone ki reglaz to kapav mete lor portab to zanfan pou ki to ena kontrol lor seki li kapav gete ouswa lor ki sit li kapav ale. To bizin kone kouma pou verifie seki to zanfan pe fer lor so portab.”—David.
Prinsip Labib: “Leker enn dimounn ki konpran gagn konesans.”—Proverb 18:15.
Fer tou seki to kapav pou anpes to zanfan gagn akse ar pornografi. Fer tou pou diminie risk ki to zanfan gagn akse ar pornografi. Par exanp, verifie bann reglaz ki ena lor portab to zanfan ek osi lor bann lezot laparey elektronik ki ena dan to lakaz pou blok bann kitsoz porno. Met reglaz ‘kontrol parantal’ (reglaz pou kontrol seki kapav gete lor enn laparey elektronik [an Angle: parental control]) ek konn tou bann kod (password) ki to zanfan servi.
“Mo trouv sa pratik pou met kontrol parantal lor nou bann laparey, pou limit bann program ki mo garson kapav gete lor nou smart TV, ek pou konn kod so portab.”—Maurizio.
“Mo pa les mo bann garson get bann video dan zot lasam kan zot laport ferme. Kan inn ariv ler pou al dormi, mo pa les zot amenn zot bann laparey dan zot lasam.”—Gianluca.
Prinsip Labib: “Enn dimounn ki ena bon zizman kasiet kan li trouv enn danze.”—Proverb 22:3.
Prepar to zanfan kont pornografi. Enn mama ki apel Flavia dir: “Sertin paran evit koz lor pornografi ar zot bann zanfan, parski zot panse ki zame zot zanfan pou gagn sa problem-la.” Lezot paran kapav panse: ‘Si mo koz lor pornografi, mo per tansion mo bann zanfan al get sa.’ Sa fason panse la li danzere. Bann paran ki ena sazes, pou ansegn zot zanfan lor bann danze konsernan pornografi avan ki zot trouv zot dan sa sitiasion-la. Kouma eski to kapav fer sa?
Ansegn bann ti zanfan ki zot bizin fer si zot trouv enn kitsoz porno. Par exanp, zot kapav ferm zot lizie ouswa tengn zot laparey. Ek ankouraz zot pou vinn koz ar twa lor seki zot inn trouve ouswa tande. b
“Nou ti koumans koz lor bann danze konsernan pornografi kan mo garson ti bien tipti. Kan li ti ena apepre 11 an, bann piblisite porno ti koumans aparet lor zwe ki li ti download lor so portab. Ansam avek bann zimaz-la, ti ena bann linvitasion pou ki li avoy so bann foto. Parski nou ti fini koz lor seki li bizin fer dan sa sitiasion-la, li ti vinn get mwa deswit ek li ti dir mwa seki’nn arive.”—Maurizio.
Prinsip Labib: “Ansegn enn garson ki semin li bizin pran; mem kan li pou vinn vie, li pa pou kit li.”—Proverb 22:6.
Ed bann adolesan pou reziste kont tantasion pou get, ekout, ouswa lir bann kitsoz porno. Par exanp, to kapav ed to zanfan pou prepar enn kontra kot ena bann reg ki to’nn fixe. Ladan li kapav ekrir seki li pou fer si li trouv bann kitsoz porno, ek kifer li anvi fer sa. Ek osi dan kontra-la, fer li ekrir bann konsekans ki li pou gagne kan li get porno volonterman. Par exanp, li kapav perdi respe pou limem, perdi konfians so bann paran, ek gat so lamitie ar Bondie. c
“Amezir ki enn zanfan grandi, ed li pou reziste kont tantasion pou get pornografi kan li reflesi lor konsekans ki li pou gagne dan lavenir.”—Lauretta.
“Si nou bann zanfan konpran ki bann danze ena kan get pornografi, me osi ki Zeova resanti lor la, li pou pli fasil pou zot reziste kont sa danze-la.”—David.
Prinsip Labib: “Sazes li enn proteksion.”—Ekleziast 7:12.
Gagn bann konversasion souvan. Li kapav difisil pou krwar, me bann zanfan vremem anvi koz lor bann kitsoz ki konsern sex avek zot bann paran, mem lor pornografi. Dame Rachel de Souza, Children’s Commissioner for England dir: “Nou’nn konpran ki bann zanfan souvan anvi koz lor bann kitsoz ki konsern sex avek zot paran kan zot ankor tipti. “Bann zanfan anvi koz lor sa bann kitsoz-la dan enn fason ki adapte avek zot laz. Amezir ki zot grandi, li inportan ki zot koz lor bann lezot detay konsernan sa size-la.”
“Kan mo ti pe grandi, ti ena bann size lor ki mo bann paran zame ti koz avek mwa. Mo ti pou pli kontan si zot ti santi zot pli lib pou koz lor diferan size ar mwa. Aster-la ki mo enn mama, mo fer tou seki mo kapav pou koz souvan avek mo bann zanfan lor sex dan enn fason cool.”—Flavia.
Si to zanfan inn get pornografi
Gard to kalm. Si to’nn aprann ki to zanfan inn get, ekout, ouswa lir bann kitsoz porno, esey kontrol to reaksion. Kitfwa li regrete, li soke, ouswa li santi li koupab pou seki’nn arive. Si to ankoler, sa pou fer li santi li pli pa bien, ek li kapav mem santi li mwins alez pou koz lor sa size-la avek twa apre.
Prinsip Labib: “Enn dimounn ki ena sazes tini so lalang, ek enn dimounn ki ena bon zizman pou res kalm.”—Proverb 17:27.
Gagn tou bann linformasion. Olie ki to tir enn konklizion vit-vit, poz to zanfan bann kestion pou kone kouma li’nn gagn akse ar pornografi. Par exanp, eski enn kikenn inn avoy li sa zimaz-la, ouswa li’nn gagn sa par limem? Eski sa inn arive enn sel fwa, ouswa eski li’nn deza get pornografi avan? Eski ti ena kit restriksion ouswa kontrol parantal lor laparey ki li ti pe servi? Si wi, eski li’nn sey magouy enn ti kitsoz pou get porno? Rapel ki to lobzektif se pou ankouraz to zanfan pou koze, pa pou fer enn lanket ar li.
Prinsip Labib: “Bann panse enn dimounn zot parey kouma delo ki dan enn pwi profon, me enn kikenn ki ena bon zizman kapav tir zot.”—Proverb 20:5.
To bizin azir. Par exanp, si li pa’nn fer sa par expre, kitfwa to bizin reget kontrol parantal ek restriksion ki ena lor so laparey.
Si to’nn aprann ki li’nn rod bann kitsoz porno, koriz li avek lamour. Servi bann prinsip Labib ki trouv dan Zob 31:1, Psom 97:10, ek Psom 101:3 pou rezonn avek to zanfan pou ki li bien determine pou rezet pornografi. d Ek fer li kone ki to pou fer enn swivi avek li sak semenn pou get so bann progre ouswa si li bizin ankor plis led.
Prinsip Labib: “Pa enerv zot zanfan, me kontign elve zot dan disiplinn ek dan bann lavertisman Zeova.”—Efezien 6:4.
a Bann linformasion dan sa lartik-la aplik pou tifi ek garson toule-de.
b Pou kone kouma to kapav koz lor sex ar to zanfan dan enn fason ki adapte ar so laz, get lartik « Comment donner une éducation sexuelle à ses enfants ? »
c Pou gagn plis lide ki kapav mete lor sa kontra-la, get aktivite « Comment rejeter la pornographie ».
d Zot kapav osi get ansam lartik « Pourquoi rejeter la pornographie ? »
Ena Osi
LANSEGNMAN LABIB KI INPORTAN
Eski Pornografi Se enn Pese Kont Bondie?
Eski ena mo”pornografi” dan Labib? Kouma eski nou kapav kone seki Bondie resanti lor pornografi?