Mo “nam” ki ena dan Labib baze lor enn mo Ebre nèphèsh, ek enn mo Grek psukhê. Sa mo Ebre-la vedir “enn kreatir ki respire,” ek mo Grek-la vedir “enn kikenn ki vivan.” a Alor nam se pa enn kitsoz separe ek ki kontign viv apre ki enn lekor inn mor, se dimounn-la an-antie. Anou gete kouma Labib montre ki nam enn dimounn fer referans ar enn dimounn limem:

•   Kan Zeova ti kree premie zom, Adan, Labib dir ki “zom-la ti vinn enn kreatir vivan.” (Zenez 2:7) Pa ti donn Adan enn nam, me li ti vinn enn kreatir ki vivan, ouswa enn dimounn.

•   Labib dir ki enn nam kapav travay, gagn fin, manze, obeir bann lalwa, ek tous enn kadav. (Levitik 5:2; 7:20; 23:30; Deteronom 12:20; Romin 13:1, NTKM) Se bann kitsoz ki inplik dimounn-la net.

Eski enn nam zame mor?

 Non, enn nam kapav mor. Ena plizir verse dan Labib ki montre ki enn nam kapav mor. Anou get de-trwa lexanp:

•   “Nam ki fer pese, limem ki pou mor.”​—Ezekiel 18:4, 20, Louis Second (1910).

•   Dan lepok lontan dan Izrael, kan enn dimounn ti fer enn kitsoz bien grav, pli gran pinision ki ti ena se, ki ti bizin “tir sa nam-la.” (Exod 12:15, 19; Levitik 7:20, 21, 27; 19:8, Darby) Savedir ki ti bizin “touy” dimounn-la.​—Exod 31:14, Parole de Vie.

•   Dan sertin verse, lexpresion “nam ki’nn mor” vedir lekor enn dimounn ki’nn mor. (Levitik 21:11, not; Nonb 6:6, not) Dan boukou tradiksion Labib servi lexpresion “lekor ki’nn mor” ouswa “dimounn mor” dan sa bann verse-la. Me se mo nèphèsh, ouswa “nam” ki finn servi dan text Ebre.

“Nam” kapav vedir “lavi”

 Dan Labib servi osi mo “nam” pou fer referans ar “lavi.” Par exanp, dan Zob 33:22 servi mo Ebre pou “nam” (nèphèsh) pou fer referans ar “lavi.” Dan mem lide, Labib montre ki enn dimounn kapav riske so nam, ouswa perdi so nam, setadir so lavi.​—Exod 4:19; Ziz 9:17; Filipien 2:30, NTKM.

 Sa ed nou pou konpran fason ki servi mo “nam” dan Zenez 35:18, kan li dir ki “so nam ti pe ale” (Darby). Se enn fason koze ki montre ki enn dimounn pe mor. Dan sertin tradiksion, zot finn tradir sa mem lexpresion la dan Zenez 35:18 par “li pe rann so dernie soupir.”​—Traduction Œcuménique de la Bible.

Ki lorizinn krwayans ki nam pa mor?

 Bann legliz Kretien ki dir ki nam pa mor pa finn gagn sa lansegnman-la dan Labib, okontrer li baze lor bann filozofi Grek. Enn ansiklopedi dir ki dan Labib, nam vedir enn kitsoz ki respire. Nam se pa enn kitsoz ki nou pa kapav trouve ek ki separe ar lekor. Bann Legliz finn gagn sa lide ki nam separe ar lekor la dan bann vie lansegnman Grek.

 Bondie pa anvi ki nou melanz so bann lansegnman avek bann krwayans imin, kouma par exanp ki nam pa mor. Okontrer Labib donn sa lavertisman-la: “Pran gard ki personn pa piez zot dan bann bel lide, sa bann tronpri ki imin finn invante.”​—Kolosien 2:8, NTKM.