Pese se ninport ki santiman, fason panse ki nou ena, ek bann kitsoz ki nou fer ki al kont bann prinsip Bondie. Se osi bann kitsoz ki nou fer ki al kont lalwa Bondie, ek ki inzis pou Bondie. (1 Zan 3:4, NTKM; 5:17, NTKM) Labib dir ki si enn dimounn kone seki bon ek ki li pa fer li, sa osi li enn pese.​—Zak 4:17, NTKM.

 Dan lang ki finn ekrir Labib, bann mo ki’nn servi pou pese vedir “rat seki pe vize,” ouswa rat enn lobzektif. Par exanp, dan lepok Biblik ti ena enn group solda Izraelit ki ti telman bon dan avoy ros ki zot “pa ti rat seki zot ti vize.” Si tradir sa lexpresion-la literalman, ti kapav tradir li koumsa: “Pa ti fer pese.” (Ziz 20:16) Alor, fer pese se rat lobzektif pou swiv bann prinsip Bondie ki parfe.

 Antan ki nou Kreater, Bondie ena drwa pou etabli bann lalwa lor seki bon ek seki pa bon. (Revelasion 4:11, NTKM) Nou ena bann kont pou rann Bondie konsernan bann kitsoz ki nou fer.​—Romin 14:12, NTKM.

Eski nou kapav pa fer pese ditou?

 Non. Labib dir ki “tou finn fer pese e tou mank seki bizin pou rant dan laglwar Bondie.” (Romin 3:23, NTKM; 1 Lerwa 8:46; Ekleziast 7:20; 1 Zan 1:8, NTKM) Kifer nou dir sa?

 Bann premie imin, Adan ek Ev, pa ti fer pese parski kan Bondie ti kree zot, zot ti parfe. Bondie ti kree zot dan so resanblans. (Zenez 1:27) Me selman, kan zot ti dezobeir Bondie zot ti nepli parfe. (Zenez 3:5, 6, 17-19) Kan zot finn gagn bann zanfan, zot finn transmet zot bann zanfan pese ek linperfeksion. (Romin 5:12, NTKM) Parey kouma Lerwa David ti dir: “Mo finn ne dan pese.”​—Psom 51:5, PKM.

Eski ena bann pese ki pli grav ki lezot?

 Wi. Par exanp, Labib dir ki bann dimounn ki ti pe viv dan Sodom “ti move, zot ti fer bann gran pese,” ek sa bann pese-la ti “bien lour.” (Zenez 13:13; 18:20) Anou get trwa kitsoz ki pou ed nou pou konpran ki kitsoz fer ki enn pese grav.

1.   Ki kantite li grav? Labib averti nou kont bann pese grav kouma limoralite sexiel, lidolatri, kokin, soular, eskro, touy dimounn, ek bann pratik ki ena enn lien avek bann demon. (1 Korintien 6:9-11, NTKM; Revelasion 21:8, NTKM) Labib fer enn diferans ant sa bann pese-la ek bann pese ki bann dimounn fer san ki zot rann zot kont, kouma par exanp dir ouswa fer bann kitsoz ki bles lezot. (Proverb 12:18; Efezien 4:31, 32, NTKM) Mem si enn pese li pa sa kantite grav-la, Labib ankouraz nou pou fer atansion, parski sa bann pese-la kapav fer nou fer bann kitsoz ki pli grav ek ki al kont lalwa Bondie.​—Matie 5:27, 28, NTKM.

2.   Avek ki lintansion? Sertin dimounn fer bann pese parski zot pa konn bann lalwa Bondie. (Zistwar Bann Apot 17:30, NTKM; 1 Timote 1:13, NTKM) Labib pa dir ki sa bann pese-la pa grav, me li fer enn diferans ant sa kalite pese-la ek bann pese ki enn dimounn fer volonterman ki al kont lalwa Bondie. (Nonb 15:30, 31) Bann pese ki volonter sorti dan enn “leker ki move.”​—Zeremi 16:12.

3.   Ki kantite fwa? Labib fer enn diferans osi ant enn pese ki nou fer enn sel fwa, ek enn pese ki nou kontign fer pandan enn bon bout letan. (1 Zan 3:4-8, NTKM) Bondie pou deklar koupab bann ki “persiste dan pese,” mem si zot finn aprann kouma pou fer seki bon.​—Ebre 10:26, 27.

 Bann ki’nn fer bann pese grav kapav santi zot koupab akoz bann erer ki zot finn fer. Par exanp, Lerwa David ti ekrir: “Mo pe nwaye dan kaskad pese; fardo la tro lour pou sarye.” (Psom 38:4, PKM) Me kanmem sa, Labib donn nou sa lespwar-la: “Fode ki dimounn ki fer seki pa bon kit so move semin, ek enn move dimounn sanz so fason panse. Ki li retourn ver Zeova, ki pou ena pitie pou li, ki li retourn ver nou Bondie parski So pardon bien gran.”​—Izai 55:7.