Dan Labib, mo ki servi pou “rezireksion” sorti dan enn mo Grek anastasis, ki vedir “leve” ouswa “deboute ankor enn fwa.” Enn dimounn ki resisite, se enn dimounn ki’nn mor me ki regagn lavi, ek li revinn dimounn ki li ti ete avan li mor.​—1 Korintien 15:12, 13, NTKM.

 Dan bann Lekritir Ebre, setadir Ansien Testaman, pena mo “rezireksion.” Me kanmem sa, nou retrouv lansegnman lor rezireksion dan sa parti Labib-la. Par exanp, Bondie ti fer profet Oze ekrir sa promes-la: “Mo pou liber zot ar pouvwar Tom; mo pou delivre zot ar lamor.”​—Oze 13:14; Zob 14:13-15; Izai 26:19; Daniel 12:2, 13.

 Kotsa bann dimounn pou resisite?Sertin dimounn pou resisite pou al viv dan lesiel, ek regn ansam avek Lekris, antan ki lerwa. (2 Korintien 5:1, NTKM; Revelasion 5:9, 10, NTKM) Labib apel sa “ premie rezireksion” ek “rezireksion ki pou ena pli boner.” Savedir ki pou ena enn lot rezireksion apre. (Revelasion 20:6, NTKM; Filipien 3:11) Sa deziem rezireksion-la pou lor later, ek se sa rezireksion-la ki laplipar dimounn pou gagne.​—Psom 37:29, PKM.

 Kouma bann dimounn pou resisite? Bondie finn donn Zezi pouvwar pou resisit bann mor. (Zan 11:25, NTKM) Zezi pou redonn lavi “tou dimounn ki dan tom,” ek zot pou revinn parey kouma zot ti ete avan, setadir avek zot prop personalite, ek zot souvenir. (Zan 5:28, 29, NTKM) Bann ki pou resisite dan lesiel pou resisite kouma bann lespri, alor ki bann ki pou resisite lor later pou gagn enn lekor fizik ki parfe ek enn bon lasante.​—Izai 33:24; 35:5, 6; 1 Korintien 15:42-44, 50, NTKM.

 Kisann-la pou resisite? Labib dir ki “pou ena enn rezireksion bann dimounn ki zis ek inzis, toule-de.” (Zistwar Bann Zapot 24:15) Parmi bann dimounn ki zis, ena bann dimounn ki ti fidel kouma Noe, Sara, ek Abraam. (Zenez 6:9; Ebre 11:11, NTKM; Zak 2:21, NTKM) Bann inzis se bann dimounn ki pa ti respekte bann prinsip Bondie, parski zot pa’nn gagn lokazion pou aprann konn Li.

 Parkont, ena sertin dimounn ki telman move ki zot pa pou sanze. Alor kan zot pou mor zot pou detrir net ek zot pa pou resisite.​—Matie 23:33, NTKM; Ebre 10:26, 27.

 Kan pou ena rezireksion? Labib ti predir ki rezireksion dan lesiel ti pou koumanse pandan prezans Lekris, ki finn koumanse an 1914. (1 Korintien 15:21-23, NTKM) Se kan later pou vinn enn paradi, pandan Regn Mil an Zezi Kris, ki bann dimounn pou resisite lor later.​—Lik 23:43, NTKM; Revelasion 20:6, 12, 13, NTKM.

 Kifer ou kapav krwar dan rezireksion? Labib koz lor nef dimounn ki finn resisite, ek dan sak ka, ti ena bann temwin. (1 Lerwa 17:17-24; 2 Lerwa 4:32-37; 13:20, 21; Lik 7:11-17, NTKM; 8:40-56, NTKM; Zan 11:38-44, NTKM; Zistwar Bann Zapot 9:36-42, NTKM; Zistwar Bann Zapot 20:7-12, NTKM; 1 Korintien 15:3-6, NTKM) Par exanp, Zezi ti resisit Lazar ki ti mor depi kat zour, ek Zezi ti fer sa mirak-la devan enn lafoul dimounn. (Zan 11:39, 42, NTKM) Mem bann ki ti ena laenn pou Zezi ti rekonet seki li ti fer. Akoz sa, zot ti maniganse pou touy Zezi ek Lazar, toule-de.​—Zan 11:47, 53, NTKM; 12:9-11, NTKM.

 Labib montre ki Bondie ena pouvwar ek dezir pou redonn lavi bann mor. Bondie rapel tou ti kitsoz konsernan sak dimounn ki Li pou resisite, ek Li pou resisit zot gras-a so gran pwisans. (Zob 37:23; Matie 10:30, NTKM; Lik 20:37, 38, NTKM) Bondie kapav resisit bann mor, ek Li vremem anvi fer li! Labib dir nou seki Bondie resanti konsernan rezireksion: “To pou atann avek inpasians pou trouv travay ki to lame finn fer.”​—Zob 14:15.

Seki sertin dimounn panse lor rezireksion

 Seki bann dimounn panse: Rezireksion se moman kot enn dimounn so nam rezwenn so lekor.

 Laverite: Labib dir ki nam se dimounn-la limem, pa enn kitsoz ki kontign viv apre lamor dimounn-la. (Zenez 2:7, not; Ezekiel 18:4) Kan enn dimounn pou resisite, Bondie pou re-kree li.

 Seki bann dimounn panse: Sertin dimounn pou resisite ek pou detrir zot deswit.

 Laverite: Labib dir ki bann “ki finn fer lemal pou resisite pou enn zizman.” (Zan 5:29, NTKM) Me selman, pou ziz zot lor seki zot pou fer apre zot rezireksion, pa lor seki zot inn fer avan zot rezireksion. Zezi ti dir: “Bann mor pou tann lavwa Garson Bondie e dimoun ki tande pou viv.” (Zan 5:25, NTKM) Apre zot rezireksion, Bondie pou met nom bann ki pou “tande,” setadir bann ki pou obeir, dan “liv lavi.”​—Revelasion 20:12, 13, NTKM.

 Seki bann dimounn panse: Kan enn dimounn pou resisite, li pou regagn exakteman mem lekor ki li ti ena avan li mor.

 Laverite: Kan enn dimounn mor, so lekor dekonpoze.​—Ekleziast 3:19, 20.