Zezi inn mor pou ki bann dimounn kapav gagn pardon zot pese ek lavi pou touletan. (Romin 6:23; Efezien 1:7) Lamor Zezi inn osi prouve ki enn dimounn kapav res fidel ar Bondie mem kan li bizin fer fas ar pli gran leprev ki ena.​—Ebre 4:15.

 Anou gete kouma lamor enn sel dimounn kapav akonpli tousala.

1.   Zezi inn mor pou ki nou gagn ‘pardon nou pese.’​—Kolosien 1:14.

    Kan Bondie ti kree premie zom, Adan, li ti parfe. Me selman, Adan ti swazir pou dezobeir Bondie. Dezobeisans ouswa pese Adan finn ena enn gran lefe lor tou so bann desandan. Labib dir: “Par dezobeisans sa sel zom-la, boukou dimounn finn vinn bann dimounn ki fer pese.”​—Romin 5:19.

    Zezi osi ti parfe, me zame li pa’nn fer pese. Alor, li ti kapav “enn sakrifis ki kouver nou bann pese.” (1 Zan 2:2) Akoz dezobeisans Adan, bann dimounn finn tom dan pese. Me gras-a lamor Zezi, tou bann dimounn ki ena lafwa dan li, kapav gagn enn remed kont pese.

    Se koumadir Adan finn vann tou bann imin ar pese. Alor ki Zezi li, li finn mor volonterman pou re-aste tou bann imin. Gras-a sa, “si enn kikenn fer enn pese, nou ena enn asistan kot nou Papa: Zezi Kris, enn kikenn ki drwat.”​—1 Zan 2:1.

2.   Zezi inn mor “pou ki tou seki ena lafwa an li pa detrir, me gagn lavi eternel.”​—Zan 3:16.

    Mem si Bondie ti kree Adan pou ki li viv pou touletan, Adan inn mor akoz pese ki li ti fer. Akoz Adan, “pese finn rant dan lemond ek pese finn amenn lamor, ek alor lamor finn fane parmi tou bann dimounn parski zot tou finn fer pese.”​—Romin 5:12.

    Parkont, gras-a lamor Zezi, tou dimounn ki ena lafwa dan li kapav gagn pardon zot pese ek osi gagn delivrans ar lamor. Labib dir: “Parey kouma pese finn regne avek lamor, koumsa mem faver ki personn pa merite pe regne par lazistis pou amenn lavi eternel atraver Zezi Kris, nou Segner.”​—Romin 5:21.

    Li vre ki azordi bann dimounn pa kapav viv pou touletan. Me selman, Bondie promet ki Li pou donn bann dimounn drwat lavi pou touletan, ek Li pou redonn lavi bann dimounn ki’nn mor pou ki zot osi zot kapav gagn bann bienfe gras-a sakrifis Zezi.​—Psom 37:29; 1 Korintien 15:22.

3.   Zezi “ti obeir ziska lamor.” Sa prouve ki enn dimounn kapav res fidel anver Bondie mem kan li fer fas ar ninport ki leprev.​—Filipien 2:8.

    Mem si Adan ti ena enn lekor ek enn lespri parfe, li ti dezobeir Bondie parski li ti egois ek li ti anvi gagn enn kitsoz ki pa ti pou li. (Zenez 2:16, 17; 3:6) Plitar, Satan, pli gran lennmi Bondie, ti dir ki personn pa ti pou obeir Bondie avek tou so leker, sirtou si so lavi an danze. (Zob 2:4) Pourtan, Zezi, enn zom parfe, ti obeir Bondie ek ti res fidel, mem si li ti bien soufer avan ki li mor. (Ebre 7:26) Dan enn fason bien kler, Zezi ti prouve ki enn dimounn kapav res fidel anver Bondie, mem si li bizin fer fas ar ninport ki leprev ouswa difikilte.

Bann kestion lor lamor Zezi

•   Kifer Zezi ti bizin soufer ek mor pou ki Bondie kapav re-aste bann imin? Kifer Bondie pa ti zis kennsel santans lamor?

   Dapre lalwa Bondie, “saler ki pese peye, se lamor.” (Romin 6:23) Bondie pa ti kasiet sa lalwa-la ar Adan. Li ti dir Adan ki si li dezobeir, li pou mor. (Zenez 3:3) Kan Adan ti fer pese, Bondie, “ki pa kapav koz manti,” ti tini so parol. (Tit 1:2) Adan pa ti zis donn so bann desandan pese kouma leritaz, me li ti osi donn zot konsekans pese, setadir lamor.

   Mem si bann imin inparfe merit lamor, Bondie inn donn nou “labondans so faver ki personn pa merite.” (Efezien 1:7) Bondie ti dispoze pou re-aste bann imin gras-a sakrifis Zezi. Sa dispozision-la li zis ek ranpli ar mizerikord.

•   Kan eski Zezi ti mor?

   Zezi ti mor zour ki bann Zwif ti fet Pak ver trwa-zer tanto. (Mark 15:33-37) Dapre bann kalandriye modern, sa zour-la ti tom Vandredi le 1^e Avril lane 33 Nou Lepok.

•   Kotsa Zezi ti mor?

   Zezi ti mor dan “landrwa ki ti apel Krann, an Ebre so nom se Golgota.” (Zan 19:17, 18) Dan lepok Zezi, sa landrwa-la ti trouv “andeor lavil” Zerizalem. (Ebre 13:12) Kitfwa li ti lor enn kolinn, parski dapre Labib, bann dimounn ti kapav trouv Zezi “delwin.” (Mark 15:40) Me selman, azordi nou pa kone kotsa Golgota trouve exakteman.

•   Kouma Zezi ti mor?

   Mem si boukou dimounn krwar ki Zezi inn mor krisifie, setadir ki’nn koulout li lor enn lakrwa, Labib dir: “Li finn sarye nou bann pese lor enn dibwa.” (1 Pier 2:24, Traduction Oecuménique de la Bible) Bann ekrivin Labib finn servi de mo Grek, stauros ek xulon, pou fer referans ar linstriman ki’nn servi pou touy Zezi. Boukou biblis dir ki sa bann mo-la fer referans ar enn poto ouswa ar enn dibwa ki drwat ek ki ti fer ar enn sel pies dibwa.

•   Kouma nou bizin rapel lamor Zezi?

   Lanwit ki Zezi ti selebre Pak Zwif avek so bann disip, li ti etabli enn seremoni bien sinp avek zot ek li ti donn zot sa lord-la: “Kontign fer sa an mo memwar.” (1 Korintien 11:24) De-trwa lertan apre, bann dimounn ti touy Zezi.

   Bann ekrivin Labib ti konpar Zezi ar mouton ki ti sakrifie zour Pak. (1 Korintien 5:7) Parey kouma Pak ti rapel bann Izraelit ki zot finn libere ar lesklavaz, Memoryal lamor Zezi Kris rapel bann Kretien ki zot finn libere ar pese ek lamor. Bann Izraelit ti selebre Pak enn fwa par an, le 14 Nizan, dapre kalandriye ki baze lor lalinn. Dan mem fason, bann premie Kretien ti selebre Memoryal lamor Zezi enn fwa par an.

   Toule lane, zour ki koresponn ar le 14 Nizan, bann milyon dimounn dan lemond antie selebre Memoryal lamor Zezi.