Okenn dimounn zame pa’nn trouv Bondie. (Exod 33:20; Zan 1:18; 1 Zan 4:12) Labib dir ki “Bondie Li enn Lespri,” enn form lavi ki invizib pou nou, bann dimounn.​—Zan 4:24; 1 Timote 1:17.

 Me bann anz kapav trouv Bondie, parski zot bann kreatir spiritiel. (Matie 18:10) Anplis, kan sertin dimounn mor, zot resisite pou al viv dan lesiel avek enn lekor spiritiel ek lerla, zot kapav trouv Bondie.​—Filipien 3:20, 21; 1 Zan 3:2.

 Souvan Labib servi lexpresion “trouve” dan enn fason sinbolik. Sa lexpresion-la kapav vedir konpran pli bien enn kitsoz. (Izai 6:10; Zeremi 5:21; Zan 9:39-41) Savedir ki enn dimounn kapav trouv Bondie avek “lizie [so] leker.” Pou nou kapav fer sa, nou bizin ena lafwa pou aprann konn Li ek apresie So bann kalite. (Efezien 1:18) Labib montre bann letap ki nou bizin fer pou nou devlop sa kalite lafwa la.

•   Nou kapav aprann lor Bondie so bann kalite, kouma so lamour, so zenerozite, so sazes ek so pwisans, atraver so kreasion. (Romin 1:20) Kan Zob, enn zom fidel, ti reflesi lor kreasion Bondie, se koumadir li ti kapav trouv Bondie avek so prop lizie.​—Zob 42:5.

•   Nou kapav aprann konn Bondie kan nou etidie Labib. Labib donn nou sa lasirans-la: “Si to rod [Bondie], Li pou les twa trouv Li.”​—1 Kronik 28:9; Psom 119:2; Zan 17:3.

•   Nou kapav aprann lor Bondie atraver lavi Zezi. Parski Zezi inn reflekte personalite so Papa, Zeova, dan enn fason parfe li ti kapav dir: “Seki finn trouv mwa finn trouv mo Papa.”​—Zan 14:9, NTKM.

•   Viv dan enn fason ki fer Bondie plezir, ek gete kouma Li azir dan ou lavi. Zezi ti dir: “Ere bann ki ena enn leker san tas, parski zot pou trouv Bondie.” Kouma nou ti gete avan, sertin dimounn ki fer Bondie plezir pou resisite pou al dan lesiel ek lerla, zot pou kapav “trouv Bondie.”​—Matie 5:8; Psom 11:7.

 Dan bann plas kot Labib dir ki bann dimounn inn trouv Bondie, kontex-la montre ki se swa enn anz ki ti reprezant Bondie, swa Li ti aparet atraver enn vizion.

 Bann anz.

Dan lepase, Bondie ti avoy bann anz kouma so bann reprezantan pou aparet ar bann dimounn ek pou koz dan so plas. (Psom 103:20) Par exanp, Bondie ti koz ar Moiz depi enn pie pikan ki ti pe brile, ek Labib dir ki “Moiz ti kasiet so figir, parski li ti gagn per pou get vre Bondie.” (Exod 3:4, 6) Moiz pa ti vremem trouv Bondie. Kontex-la montre ki ofet Moiz ti trouv “anz Zeova.”​—Exod 3:2.

 Dan mem fason, kan Labib dir ki Bondie “ti koz ar Moiz fas-a-fas,” savedir ki Bondie ti gagn bann konversasion avek Moiz. (Exod 4:10, 11; 33:11) An realite, Moiz pa’nn trouv Bondie so figir, parski tou linformasion ki li ti gagne ar Bondie finn “transmet par bann anz.” (Galat 3:19; Zistwar Bann Apot 7:53) Kanmem sa, Moiz so lafwa an Bondie ti telman for ki Labib dir “koumadir li ti pe trouv Bondie ki invizib.”​—Ebre 11:27.

 Parey kouma Li ti koz ar Moiz, Bondie ti servi bann anz pou koz avek Abraam. Se vre, kan nou lir Labib, nou kapav gagn linpresion ki Abraam ti trouv Bondie. (Zenez 18:1, 33) Me selman, kontex-la montre ki sa “trwa zom” ki ti vinn kot Abraam la, ti bann anz ki Bondie ti avoye. Abraam ti konpran ki zot ti bann reprezantan Bondie ek li ti koz ar zot koumadir li ti pe koz ar Bondie Limem.​—Zenez 18:2, 3, 22, 32; 19:1.

 Bann vizion.

Bondie finn aparet osi ar bann dimounn par bann vizion, setadir bann zimaz mantal dan lespri enn dimounn. Par exanp, kan Labib dir ki Moiz ek bann Izraelit ti “trouv Bondie Izrael,” zot ti vremem “gagn enn vizion kot zot ti trouv vre Bondie.” (Exod 24:9-11) Dan mem fason, Labib parfwa dir ki bann profet ti “trouv Zeova.” (Izai 6:1; Daniel 7:9; Amos 9:1) Dan sak ka, kontex-la montre ki zot ti gagn enn vizion olie ki zot ti trouv Bondie direkteman.​—Izai 1:1; Daniel 7:2; Amos 1:1.