Bann dofin fer bann diferan son, ek lerla zot ekout eko sa bann son-la pou ki zot kapav vwayaze ek explor zot lanvironnman. Bann siantis pe etidie sistem radar natirel bann gran dofin (Tursiops truncatus), pou devlop enn sistem son anba delo, ki pou kapav rezoud bann problem ki bann teknolozi pankor kapav regle ziska ler.

 Reflesi lor la: Sistem radar enn dofin permet li pou trouv enn pwason ki pe kasiet dan disab ek pou fer diferans ant enn pwason ek enn ros. Keith Brown, enn profeser dan Liniversite Heriot-Watt, dan Edinburgh, Lekos, dir ki dofin-la kapav osi “fer diferans ant bann resipian ki ena delo dou, delo lamer, siro, ek delwil ziska enn distans dis met.” Bann siantis anvi fer bann laparey ki ena sa bann mem kapasite la.

 Bann siantis inn analiz son bann dofin ek kapasite ki zot ena pou ekoute, ek inn esey kopie zot. Zot inn aranz enn laparey radar avek bann pies elektronik sofistike ek zot inn met tousala dan enn silenn mwins ki enn met longer (anviron 3.3 pie). Zot inn met sa laparey-la lor enn robo ki kapav bouze anba lamer ek ki resanble enn misil. Sa laparey-la kapav examinn disab anba lamer, rod bann kitsoz ki’nn antere kouma bann kab ouswa bann tiyo, ek li kapav analiz zot san ki tous zot. Bann dimounn ki’nn fer sa pe pans pou servi sa laparey-la dan lindistri gaz ek petrol. Sa laparey-la kapav kolekte pli boukou linformasion, ed bann teknisien pou plas bann lekipman dan bann landrwa ki bizin anba lamer, detekte si ena enn plas ki andomaze (kouma par exanp, bann ti-krak dan striktir ki tini bann platform petrol), ek mem trouve kotsa enn tiyo inn bloke.

 Ki ou panse? Eski radar bann gran dofin inn aparet par limem? Ouswa eski inn kree sa?