TUNDL 03
A bu fid gii dug Biibl n maad yal nba po oo?
Puoni yen cegli bonciɛnn be Biibl n ninŋ. L bu fid g tuu k a bua ŋan bann l bona kul ama g yen jie k l kan fid g tod’a lann i kaa k l g tie mɔni. L biɛ bu fid g tuu k a bual a kua: Kadaaɔg ne n kpelg nand nba ne, n gii dug l puoni po g biɛ tug l cegli g sun yen tuonn l bu fid g tod’n ii? Biibl n puon yal nba bu tien ii? Niib bonciɛnn diid g sua g Biibl puoni mɔg todl. B biɛ dug k l puoni bu tien. Tundl ne ninŋ t bu la yal nba tod’b k b dug Biibl po, l puol po ŋan diid g liɛ l bu fid g tod a mɔ ɔɔ?
1. Biibl n maad bona nba maam bo tien yen mɔni bii l tie telmi i?
L diɛn Biibl n ninŋ g maad g yal be l n kul tie “mamɔni” i. (San 17:17) Bona nba g Biibl maad l maam bo tien niib binbem n ninŋ yen mɔni. (Lii man Luk 1:3; 3:1, 2.) Gbanbanda nba kpaan k ban bann bona nba tien siɛnyoug kpaan g la g Biibl n maad danm nba maam, bona nba bo tien, lan bo tien naan buol yen lan bo tien youg nba tie i jaa jaa jaa nyan Biibl n ŋɔn nand nba nyan.
2. Yen Biibl n l tie kadaaɔg nba kpelg kul, bɛ po i k t ban k l biɛ bu fid g tod’ti dinne i?
Biibl bo tuod g maad bona bonciɛnn maam g danm nba bo be l youg daa bo g ban. L bona n ninŋ, t bu fid g dugn yal g gbanbanda kpaan g la dinne. Biibl n bo maad l maam, danm nba bo be l youg, b ninŋ bonciɛnn bo g tuo k l tie mɔni. Ama gbanbanda n kpaan g la yal nba dinne yen Biibl n bo maad yal nba tie yenm i. Yen mɔni, Yendu maam “tie mɔni i youg kul.”—Biɛyani 111:8, MN.
3. Bɛ po i k t bu fid gii dug g puoni nba be Biibl ninŋ bu tien yen mɔni i?
Biibl n ninŋ, Yendu sogni-nba * bo tuod g ŋɔn “bona nba bu tien g sua k l daa g tien.” (Esaayi 46:10, MN.) Bona bonciɛnn tien g pend g Biibl bo maad l maam g sua daa g ban k l bu tien. Biibl n bo ŋɔn k l bona bu tien youg nba yen nand nba nyan, l bona kul bo tien nnyan i jaa jaa jaa. Bona nba tie dinne mɔ, Biibl bo tuod g maad l maam. Tundl ne ninŋ, t bu la bona nba g Biibl bo maad l maam yenn-nba. Fin mɔno bu la k lan bo tien nand nba mɔg yaalidug!
BANŊ BONA G PUGN
Diid Biibl n bo tuod g maad yal nba g gbanbanda mɔ kpaan g la k l tie mɔni yen bonlaa nba g Biibl bo maad k l bu tien k l tan tien nyua nyua nyua.
4. Gbanbanda n kpaan g la yal taa yen Biibl n bo tuod g maad yal nba i
Siɛnyoug, niib bonciɛnn bo mali g tinŋ maa siɛl po i. Diid man FIIDIO.
L saa bina 3 500 n nyan g Sɔb bo maad lanbona nba be Sɔb 26:7 n ninŋ. Lii man l lanml, l puol po yin pag buali nba ne po:
-
L saa bina 3 500 n nyan g Biibl bo maad g tinŋ “g maa baa siɛl” po. Bɛ po i k l mɔg yaalidug u?
Niib ŋanm g bann lan tu tien nand taag n baa l daa tie nyan bina 200 nne i. Ama l saa bina 3 500 n nyan g Biibl bo tuod g maad lanbona nba be Sɔb 36:27, 28 n ninŋ. Lii man l lanbona, l puol po yin pag buali nba ne po:
-
Biibl n ŋɔn k l tu tien nand taag n baa nyan, a mali bɛ i l po i?
-
Lanbona nba k a lii Biibl n ninŋ ne tod’a k a ŋanm g dug Biibl po oo?
5. Biibl bo tuod g ŋɔn bona nba bu tien g sua k l daa g tien
Lii man Esaayi 44:27–45:2, l puol po yin pag buali nba ne po:
-
Biibl bo tuod g maad k l bu tien nle i Babilɔnn yab ninnanda n paad’b k l tan tien bina 200 puol po i?
Nyan Biibl n bo maad nand nyan, gbanbanda ŋɔn g Pɛrs bad Sirus yen u sijenm bo paad Babilɔnn yab bina 539 n ninŋ g sua g Yiesu daa g mal. Sirus yen u sijenm bo pad bɔnŋ nba bo kaan g lind Babilɔnn doug nyan k l nyum kuod k b puod g kua doug n. B bo kua doug n ninŋ faala i, g dugn l daal Babilɔnn yab bo ŋaa b doug gana k l yaa i. Nnyan i k b bo baal g libl Babilɔnn yab g paad’b. Babilɔnn yab bo g fid g kɔn yen’m mɔno. Sirus yen u sijenm n paad Babilɔnn yab, l cie bina 2 500. Dinne l doug ji tie digbeonŋ u. Diid Biibl n bo maad yal.
Lii man Esaayi 13:19, 20, l puol po yin pag buali nba ne po:
-
Nle i g Biibl n bo maad yal Babilɔnn po te mɔni i?
Babilɔnn digbeonŋ k l be Irak doug n ninŋ
6. Biibl bo tuod g maad bona nba tie dinne maam
Biibl ŋɔn k t be “dijijuog dani n ninŋ” i. (2 Timote 3:1) Diid Biibl n bo tuod g ŋɔn g bona nba baa tie dijijuog dani n ninŋ.
Lii man Matieog 24:6, 7, l puol po yin pag buali nba ne po:
-
N liɛ bona nba g Biibl bo ŋɔn k l baa tie dijijuog dani n ninŋ i?
Lii man 2 Timote 3:1-5, l puol po yin pag buali nba ne po:
-
Biibl bo ŋɔn g niib bontitied baa tie nle i dijijuog dani n ninŋ i?
-
Biibl n bo dugn bontitied nba, n liɛ yal k a nyuan g niib mɔg i?
SIƐB TU MAAD G: “Biibl tie kpanjam yen telmi kadaaɔg u.”
-
A yaa po i, bɛ ń ŋanm g ŋɔnŋ k t bu fid gii dug Biibl po i?
TIN BANŊ YAL TUNDL NE NINŊ
Bona nba tien g pend, gbanbanda n kpaan g la yal yen Yendu sogni-nba n bo tuod g maad yal ŋɔnŋ k a bu fid gii dug Biibl po.
A tiɛn nii?
-
Biibl n maad bona nba maam bo tien yen mɔni bii l tie telmi i?
-
N liɛ yal g gbanbanda kpaan g la k l taa yen Biibl n maad yal nba i?
-
A mali g Biibl ŋɔnŋ bona nba bu tien wonn po oo? Ŋɔn yal po te k a mali nnyan.
DIID NE MƆ
Bona be Biibl n ninŋ g gbanbanda kpaan g la k l tie faaɔg uu?
“Gbanbanda n kpaan g la yal nba taa yen Biibl n bo tuod g maad yal nba aa?” (L tundl be t siit po i)
N liɛ bona nba g Biibl bo maad k l bu tien “dijijuog dani n ninŋ” k a nyuan k l tie dinne i?
“Bona 6 g Biibl bo maad k l bu tien k a nyuan k l tie dinne” (La Tour de Garde, 1er mai 2011)
Diid Biibl n bo maad yal doug nba k b yi Grɛs nyan po n bo tan te mɔni nand nba.
Diid nand g Biibl puoni bo tod jua nne k u lebd maalm nba k u bo mɔg Biibl po.
^ lɔnŋ. 9 Yendu sogni-nba tie danm nba g Yendu bo sun’m k ban muand u laabaal i. Ban bo maad yal nba nyan i k t yi Yendu sogni-nba maam lann i kaa Biibl puoni.
