Nivoaka tamin’ny endrika elektronika Ny Baiboly: Ny Vaovao Tsara Nosoratan’i Matio amin’ny teny sidama sy wolaitsa, tamin’ny 23 Jolay 2023. Ny Rahalahy Lemma Koyra, anisan’ny Komitin’ny Sampan’i Etiopia, no namoaka an’ireo boky ireo nandritra an’ilay fivoriana manokana natao tao amin’ny Efitrano Fivoriambe any Addis-Abeba, any Etiopia. Nisy 1 800 latsaka kely ny nanatrika mivantana an’ilay fandaharana, ary nisy 12 669 no nanaraka an’ilay izy tamin’ny vidéoconférence sy tamin’ny alalan’ny tele satelita. Azo nalaina avy hatrany tao amin’ny Internet ireo boky ireo, raha vao nivoaka. Hahazo vita pirinty amin’ireo boky ireo kosa ny fiangonana afaka volana vitsivitsy.

Mipetraka any atsimon’i Etiopia ny ankamaroan’ny olona miteny sidama sy wolaitsa. Tamin’ny 2005 no natsangana ny ekipa mpandika teny ho an’ny teny wolaitsa, fa tamin’ny 2007 kosa ny ho an’ny teny sidama. Samy miasa ao amin’ny birao fandikan-teny any amin’ny toerana be olona mampiasa ny fiteniny avy ireo ekipa roa ireo.

Efa voadika manontolo amin’ireo fiteny anankiroa ireo Baiboly, kanefa tsy mora hita ireny Baiboly ireny sady lafo be. Hoy ny mpandika teny iray rehefa nitantara ny zavatra niainan’ny rahalahy sy anabavy miteny sidama: “Tsy nanana afa-tsy Baiboly anankiray ny ankamaroan’ny fiangonana, ka izay manao anjara ihany no mampiasa Baiboly rehefa mivory. Mila mankany amin’ny Efitrano Fanjakana mihitsy ianao, dia mampiasa an’ilay Baiboly ao, rehefa te hamaky Baiboly mitokana. Lasa afaka mamaky sy mianatra ny Tenin’Andriamanitra any an-tranonay anefa izahay izao, satria efa manana ny bokin’i Matio amin’ny teny sidama.”

Teny mora azo no ampiasaina ao amin’ny Fandikan-tenin’ny Tontolo Vaovao, ka mankasitraka an’izany ny rahalahy iray anisan’ny ekipa mpandika teny ho an’ny teny wolaitsa. Hoy izy: “Misy Baiboly fandikan-teny hafa miresaka hoe olona ilay fanahy masina ao amin’ny Matio 28:19. Dia rehefa nitory izahay, dia lasa sarotra be ny nanazava tamin’ny olona hoe tsy mitovy ilay hoe Ray sy Zanaka ary fanahy masina resahina ao. Marina tsara anefa ny Fandikan-tenin’ny Tontolo Vaovao, ka hita mazava ao hoe hery miasa ny fanahy masina. Matoky aho fa hanampy be anay io bokin’i Matio amin’ny teny wolaitsa io rehefa manompo izahay.”

Ny namoahana Ny Baiboly: Ny Vaovao Tsara Nosoratan’i Matio amin’ny teny sidama sy wolaitsa, dia anisan’ny porofo hoe torina amin’ny “firenena sy foko sy olona samy hafa fiteny” ny vaovao tsara.​—Apokalypsy 14:6.