1 DESAMBRA 2021
KIRGHIZISTAN
Boky sy Gazety 13 Avoakan’ny Vavolombelon’i Jehovah no Tadiavin’ny Fitsarana any Kirghizistan Horarana
Nolavin’ny Fitsaram-paritr’i Pervomayskiy any Bichkek, Kirghizistan, ny fiampangan’ny Tonia Mpampanoa Lalàna hoe mampidi-doza ny boky sy gazety 13 avoakan’ny Vavolombelon’i Jehovah, tamin’ny 2 Desambra 2021. Nataon’io Tonia Mpampanoa Lalàna io izay hahatongavan’ny fitsarana haingana, dia amin’izay ny rahalahintsika tsy manam-potoana firy hiomanana amin’ilay izy. Soa ihany anefa fa nahavita nanoratra taratasy fiarovan-tena avy amin’ny Watch Tower Bible and Tract Society of Pennsylvania sy ny Fikambanan’ny Vavolombelon’i Jehovah any amin’ny Repoblika Kirghiz ny mpisolovava. Rehefa nandinika an’ireny fiarovan-tena ireny ny mpitsara dia nahita hoe tsy nanaraka ny lamina apetraky ny fitsarana ilay raharaha dia nolavin-dry zareo. Nanana folo andro ny mpampanoa lalàna hampakarana an’ilay raharaha taorian’ilay didy.
Amin’ny 2 Desambra 2021 ny fitsaram-paritr’i Pervomayskiy any Bichkek, any Kirghizistan, no hanapa-kevitra raha hosokajina hoe mampidi-doza ny boky sy gazety 13 avoakantsika na tsia. Hita amin’ireo antontan-taratasy fiampangana fa ny hanao hoatran’i Rosia no tanjona, izany hoe tsy boky sy gazety ihany no horarana. Voalaza ao amin’ny taratasy iray nalefan’ny Komitim-panjakana ho An’ny Filaminam-pirenena tamin’ny Tonia Mpampanoa Lalàna, ohatra, hoe “horarana aloha ny zavatra avoakan’io fikambanana ara-pivavahana io, dia avy eo hoeritreretina indray ny handrara ny asany eran’ny Repoblika Kirghiz.”