20 AOGOSITRA 2021 | VAOVAO FARANY: 28 Novambra 2022
ROSIA

VAOVAO FARANY: DIDIM-PITSARANA | Ampian’i Jehovah ny Rahalahy Telo sy ny Anabavy Iray any Dagestan na dia Migadra Aza

HANDEFA

Nomelohin’ny Fitsaram-paritr’i Kirovskiy any Makhachkala ny Rahalahy Marat Abdulgalimov, Arsen Abdullaev, Anton Dergalev, ary ny Ranabavy Mariya Karpova, tamin’ny 24 Novambra 2022. Nomena sazy mihantona enin-taona ka hatramin’ny enin-taona sy tapany izy ireo. Mbola tsy miditra am-ponja aloha izy ireo izao.

Zava-nitranga

27 Mey 2020

Lasa nambenana tao an-tranony i Marat, Arsen, Anton, ary Mariya, rehefa avy notanana am-ponja vonjimaika nandritra ny 362 andro, izany hoe herintaona latsaka kely
4 Jona 2019

Nasain’ny Fitsaram-paritr’i Sovetskiy any Makhachkala notanana am-ponja vonjimaika izy efatra mianadahy
1 Jona 2019

Nanao bemidina tany amin’ny tranon’ny Vavolombelon’i Jehovah 13 tany Dagestan ny polisy miafina rosianina, izany hoe ny polisin’ny FSB
27 Mey 2019

Nampangain’ny biraon’ny FSB any Dagestan ho mpanao heloka bevava i Marat, Arsen, Anton, ary Mariya

Ireo voampanga

Marat Abdulgalimov

Teraka: 1991 (Makhachkala, Repoblikan’i Dagestan)

Mombamomba azy: Efatra ry zareo no mpiray tam-po. Tia manao baolina. Nianatra nanao sodira. Niasa tao amina toerana fivarotana kiraro izy vao haingana

Efa hatramin’ny mbola kely izy no tia mamaky Baiboly. Nahafinaritra azy ny olona manahaka an’i Kristy sy tia ny mpiara-belona aminy. Lasa Vavolombelon’i Jehovah vita batisa izy tamin’ny 2013

Resadresaka nifanaovana taminy

Efa ho herintaona ianao no notanana am-ponja vonjimaika. Inona no nanampy anao hiaritra an’izany?

Nanomboka nisaintsaina ny zavatra niainako aho, dia nampitaha an’ilay izy tamin’ny an’i Josefa. Mety higadra folo taona aho, fara fahabetsany, nefa ny an’i Josefa 13 taona. Hampian’i Jehovah koa aho, dia ho vitako ny tsy hivadika na mafy aza ny mahazo ahy. Napetrako tamin’i Jehovah daholo izay nanavesatra ahy, satria hitako hoe mamaly vavaka izy. Ny Salamo 55:22 no nanampy ahy hiaritra an’iny fitsapana iny. Mampanantena ilay andininy hoe hanohana ahy i Jehovah raha apetrako aminy izay manavesatra ahy. Dia izay mihitsy no nataoko.

Arsen Abdullaev

Teraka: 1979 (Kasumkent, Repoblikan’i Dagestan)

Mombamomba azy: Tia manao voley sy mamaky boky, efa hatramin’ny mbola kely. Nahazo diplaoma tamin’ny fanamboarana divay. Mpanamboatra ny simba amin’ny fantson-drano sy fitaovana fanafanana trano no asany vao haingana

Lasa Vavolombelon’i Jehovah vita batisa i Arsen tamin’ny 2000, na dia nanohitra aza ny ray aman-dreniny tamin’izy vao nianatra Baiboly. Nanambady an’i Suat izy, ary manan-janaka lahikely ry zareo

Resadresaka nifanaovana taminy

Ahoana no nahavitanao nandresy ny hakiviana tamin’ianao notanana am-ponja vonjimaika?

Tena nanampy ahy ireny hirantsika ireny. Nohiraiko matetika izy ireny, dia nahatsiaro ho maivamaivana aho. Lasa ilay hira faha-45 hoe “Izay Saintsainiko ato Am-poko” iny izao no tiako indrindra. Nisy fotoana ihany aloha aho kivy e! Vizana sy sorisorena koa aho indraindray, dia tsy te hanao na inona na inona mihitsy. Tsy navelako hitohy mihoatra ny iray andro anefa ny zavatra hoatr’izany. Rehefa mitranga ilay izy, dia hozy aho tany an-tsaiko tany hoe: ‘Hilamina io rehefa mifoha ialahy rahampitso. Mandalo fotsiny izany fihetseham-po izany. Mijoroa fa mila an’ialahy ny fianakavian’ialahy sy ny mpiara-manompo amin’ialahy.’

Anton Dergalev

Teraka: 1985 (Rostov-on-Don, Faritanin’i Rostov)

Mombamomba azy: Ny mamany irery no nitaiza azy sy ny rahalahiny. Ny mamany sy ny bebeny no nampianatra azy ho tia ny torolalan’ny Baiboly. Elektrisianina sy mpanamboatra zaridaina no asany. Lasa Vavolombelon’i Jehovah vita batisa tamin’ny 2002

Resadresaka nifanaovana taminy

Ahoana no nanampian’i Jehovah anao tamin’iny fitsapana iny?

Nahavita be mihitsy ny rahalahy sy anabavy tamin’ny fikarakarana anay. Hozy ny iray tamin’ireo niara-nigadra tamiko hoe tsy hahazo zavatra avy any amin’ny namako intsony aho rehefa afaka volana vitsivitsy. Gaga anefa izy fa mbola nandefa zavatra ho ahy foana ry zareo rehefa afaka enim-bolana, ary na efa ho herintaona tatỳ aoriana aza!

Inona ny soso-kevitrao ho an’ny hafa mba hiomanany hiatrika fanenjehana?

Ny torohevitro dia hoe aza mahafoy ny fiarahana mivory. Ny fivoriana ny ahy no tena nalahelovako. Hararaoty izay fahafahana rehetra omen’i Jehovah anao. Ataovy matanjaka tsara ny ara-panahinao, dia aza matahotra na inona na inona mihitsy. Eo akaikintsika foana i Jehovah!

Mariya Karpova

Teraka: 1980 (Magadan, Faritanin’i Magadan)

Mombamomba azy: Manana anadahy roa. Tia manao ski sy manao dia lavitra ary mamaky boky. Nahazo diplaoma tamin’ny fitsaboana biby

Nahazo valiny mahafa-po tao amin’ny Baiboly momba an’izay hitranga amin’ny hoavy, dia tapa-kevitra hoe ho lasa Vavolombelon’i Jehovah. Natao batisa izy tamin’ny 1998

Resadresaka nifanaovana taminy

Inona no nanampy anao tsy hanahy be loatra nandritra ny fotoana nijanonanao tany am-ponja?

Nahatadidy andinin-teny be dia be aho, dia nosoratako tao anatin’izay kahie izay daholo ilay izy. Tsy nanana Baiboly aho nandritra ny telo volana, dia ireny andinin-teny ireny no nanatanjaka ahy. Tena nampahery ahy ny Filipianina 4:6, 7. Rehefa nisy zavatra vaovao nampiady saina ahy, dia nosokafako ilay kahie, novakiko ilay andininy, dia hozy aho hoe: ‘Aza manahy na amin’inona na amin’inona.’ Maivamaivana erỳ aho avy eo.

Nahoana ianao no resy lahatra hoe nanampy anao i Jehovah tao anatin’iny fotoan-tsarotra iny?

Maty ny dadako [tamin’izaho mbola tany am-ponja], dia tamin’io no anisan’ny nahatsapako hoe nanampy ahy izy. Mba tsy tamin’olona tsy fantatro mantsy no nandrenesako an’ilay vaovao fa tamin’ny mamanay, satria navelan’ny mpampanoa lalàna hiresaka an-telefaonina izahay mianaka. Nisy namako be anankiroa koa niaraka tamin’ny mamanay foana, satria izaho tsy teo. Lavitra ry zareo no mipetraka nefa tonga tany sy nanohana azy nandritra ny fandevenana. Tsy nanadino an’i Mama mihitsy ny mpiara-manompo. Nitelefaonina azy ry zareo, nanoratra ho azy, nandefa karta kely, ary nanome fanampiana mba hahafahany manatrika ny fitsarana ahy.

Matoky tanteraka isika fa hanao zavatra mifanaraka amin’ny anarany i Jehovah Andriamanitra, ka ho tonga izay rehetra ilaina mba hiarovana sy hanampiana ny vahoakany.—Eksodosy 3:14.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO