8 JOLAY 2022 | VAOVAO FARANY: 13 MEY 2024
ROSIA

VAOVAO FARANY: GADRAINA IREO RAHALAHY | Lasa Nahery Satria Nivavaka

HANDEFA

Nomelohin’ny Fitsaram-paritr’i Pervomayskiy any Ijevsk ny Rahalahy Sergey Ashikhmin sy Maksim Derendyaev ary Aleksandr Kutin, tamin’ny 13 Mey 2024. Samy voaheloka higadra telo taona avy ry zareo, ary tonga dia naiditra am-ponja raha vao niala tao amin’ny fitsarana.

Zava-nitranga

14 Aprily 2021

Tranona Vavolombelon’i Jehovah 12 fara fahakeliny no nosavan’ny polisy avy ao amin’ny FSB. Nadinadinina nandritra ny adin’ny fito i Sergey. Notazonina sy natao am-ponja vonjimaika kosa i Maksim sy Aleksandr
15 Aprily 2021

Notanana am-ponja vonjimaika i Maksim sy Aleksandr
29 Aprily 2021

Navoaka avy tany am-ponja i Aleksandr
14 Mey 2021

Nambenana an-trano i Aleksandr
9 Jolay 2021

Nafahana tany am-ponja i Maksim, dia nambenana an-trano
14 Martsa 2022

Nanomboka notsaraina

Ireo voampanga

Sergey Ashikhmin

Teraka: 1973 (tany Zheshart, any amin’ny Repoblikan’i Komi)

Mombamomba azy: Mpiambina no asany taloha dia lasa mpivarotra tatỳ aoriana. Nodidiana vao haingana ny fony dia lasa tsy afaka miasa izy

Nanohana be ny fony ny nianatra hoe nanome vidim-panavotana i Jesosy. Natao batisa dia lasa Vavolombelon’i Jehovah tamin’ny 2001. Nanambady an’i Anastasiy tamin’ny 2007

Resadresaka nifanaovana taminy

Efa nisy zavatra nitranga ve nahitanao hoe tena nanampy anao ny vavaka?

Tampoka be ilay fotoana nisavana ny tranonay, dia tsy nanam-potoana nanaovana vavaka lavalava akory aho. Dia nanao vavaka fohifohy anakampo fotsiny aho, hoatran’ilay nataon’i Nehemia ao amin’ny Baiboly. Nangataka fahendrena sy fahasahiana ary herim-po aho.

Rehefa nandeha amin’izay ny famotopotorana, dia nametrahan-dry zareo fanontaniana fandrika be dia be aho. Nangataka tamin’i Jehovah aho mba hanampy ahy hahalala hoe rahoviana aho no tokony hangina dia rahoviana no tokony hiteny rehefa ilaina izany.

Maksim Derendyaev

Teraka: 1985 (tany Ijevsk, any amin’ny Repoblikan’ny Udmurtiya)

Mombamomba azy: Elektrisianina no asany

Hitany hoe tsara fanahy be ny Vavolombelon’i Jehovah dia izany no nahatonga azy hianatra Baiboly tamin-dry zareo. Natao batisa tamin’ny 2000. Nanambady an’i Tatyana tamin’ny 2015

Resadresaka nifanaovana taminy

Inona no zavatra mafy indrindra taminao tany am-ponja vonjimaika, dia ahoana no nahavitanao niatrika an’ilay izy?

Ianao aloha tsy afaka mifidy hoe iza no tianao hiara-migadra aminao. Matetika aho no nanalan’ny mpiara-migadra tamiko, dia sarotra be tamiko ilay mody tsy niraharaha an’ilay izy.

Tonga saina aho hoe noraisiko am-po loatra ny tenin-dry zareo. Nivavaka tamin’i Jehovah aho dia niteny taminy hoe mafy be ny zavatra iainako, dia niangavy azy aho mba ho tsara fanahy aho rehefa mamaly an-dry zareo. Tsapako hoe tena niahy sy nieritreritra momba an’ahy i Jehovah nandritra an’iny fotoan-tsarotra iny.

Aleksandr Kutin

Teraka: 1982 (tany Ijevsk)

Mombamomba azy: Mpanao sodira no asany

Rehefa nianatra momba an’i Jesosy izy dia te hanaraka ny modeliny. Natao batisa tamin’ny 2002. Nanambady an’i Guzel tamin’ny 2018

Resadresaka nifanaovana taminy

Inona no nataonao mba hahatonga anao ho falifaly foana na dia tany am-ponja vonjimaika aza?

Nesorina tamiko daholo ny zavatra nahazatra ahy rehefa tany amin’ny toby fitanana aho, anisan’izany ny olona tiako rehetra, ny fivoriana, ny Baiboly, ary na ny zavatra fanaoko andavanandro aza. Any an-trano, ohatra, rehefa mifoha amin’ny maraina aho, dia manao dite na kafe dia avy eo mamaky sy miara-mandinika andinin-teny ao amin’ny Baiboly miaraka amin’ny vadiko. Tsy tonga tao an-tsaiko mihitsy hoe hisy olona hanala an’ireo zavatra ireo amiko indray andro any. Tsapako anefa hoe ny vavaka no zavatra iray tsy azon-dry zareo esorina amiko mihitsy. Rehefa nivavaka aho dia tsapako hoe nomen’i Jehovah fanahy masina aho, dia izany no nahatonga an’ahy ho falifaly foana sy tsy ho kivy.

Imbetsaka koa aho no nanana fahafahana nitory. . . . Nisy fotoana aho niara-nigadra tamin’ny lehilahy fito hafa, dia nanontany ahy ry zareo hoe naninona aho no nigadra. Nipetraka aho dia nohazavaiko an-dry zareo ny antony. Nampian’i Jehovah ho tony sy hanana fiadanana aho, tamin’izay fotoana izay. Nisaotra an’i Jehovah mangina aho avy eo.

Tsy rariny ny zavatra mahazo ny rahalahintsika, nefa matoky an’i Jehovah ry zareo. Mampanantena mantsy izy hoe: “Aza matahotra fa manohana anao aho.”—Isaia 43:5.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO