1 JONA 2022 | VAOVAO FARANY: 6 SEPTAMBRA 2023
ROSIA

VAOVAO FARANY: VOAHELOKA IREO RAHALAHY | Tsy Mivadika Mihitsy Izy Ireo Satria Tohanan’i Jehovah

HANDEFA

Tamin’ny 5 Septambra 2023, dia nomelohin’ny fitsarana any Nijnekamsk, any amin’ny Repoblikan’i Tatarstan, ny Rahalahy Denis Filatov sy Stanislav Klyuchnikov ary Dmitriy Yarchak. Nahazo sazy mihantona enin-taona avy ry zareo fa mbola tsy nampidirina am-ponja aloha izao.

Zava-nitranga

18 Novambra 2020

Nanao bemidina tany amin’ny tranon’ny fianakaviana Vavolombelon’i Jehovah 12 tany Nijnekamsk ny polisin’ny FSB sy ny polisy hafa nirongo fiadiana. Rahalahy sivy sy anabavy telo no nentin-dry zareo mba hatao famotorana
24 Aogositra 2021

Vokatry ny fanadihadiana dia lasa voafetra ny toerana azon’i Denis sy Stanislav ary Dmitriy naleha
7 Oktobra 2021

Nampangaina tamin’ny fomba ofisialy hoe mpanao heloka bevava i Denis sy Stanislav ary Dmitriy. Nampangaina ry zareo hoe “nihira hiram-pivavahana manokana sy nivavaka”
27 Janoary 2022

Nafindra tany amin’ny fitsarana any Nijnekamsk, any amin’ny Repoblikan’i Tatarstan, ilay raharaha

Ireo voampanga

Stanislav Klyuchnikov

Teraka: 1982 (Nijnekamsk)

Mombamomba azy: Manana orinasa mpamokatra video. Tia manangona hajia sy mandeha mitsangantsangana

Nihaona tamin’ny Vavolombelon’i Jehovah tamin’izy tanora. Tena nanohina ny fony ny hatsaram-panahy sy ny fitiavana nasehon-dry zareo taminy. Natao batisa tamin’ny 1998

Nanambady an’i Oksana tamin’ny 2003. Manan-janaka vavy iray ry zareo

Resadresaka nifanaovana taminy

Inona no mahatonga anao hiezaka hiaritra foana?

Miezaka miaritra foana aho satria te hijanona eo amin’ilay lalana tery mankany amin’ny tena fiainana. Marina mihitsy ilay tenin’ny apostoly Petera ao amin’ny Jaona 6:68 hoe: “Tompo ô, hankany amin’iza moa izahay? Ny teny lazainao no hahazoana fiainana mandrakizay.” Asehon’ireo teniny ireo hoe na aiza na aiza lalana tadiavin’i Satana handehanantsika, dia iray ihany ny lalana mitondra mankany amin’ilay tena Andriamanitra. Adala isika raha mivadika amin’i Jehovah. Izy mantsy no hanampy sy hanohana antsika rehefa ao anatin’ny sarotra isika!

Dmitriy Yarchak

Teraka: 1984 (Nijnekamsk)

Mombamomba azy: Voan’ny paralysie cérébrale. Mpanao kaonty tao amin’ny fikambanana manampy zaza sembana, rehefa vita ny fianarany. Mpiandraikitra ny varotra tao amin’ny orinasa mpikirakira fifandraisan-davitra no asany farany

Nanomboka nianatra Baiboly tamin’izy tanora. Nanohina ny fony ny zavatra nianarany momba ny toetran’i Jehovah. Natao batisa tamin’ny 1998

Nanambady an’i Svetlana tamin’ny 2010

Resadresaka nifanaovana taminy

Inona tamin’ny fanampian’i Jehovah no hitanao hoe tena nahasoa anao?

Tena tia nivavaka aho hatramin’izay. Tsapako hoe teo akaikiko foana i Jehovah Raiko teo amin’ny fiainako ary mbola eo akaikiko foana izy hatramin’izao. Mivavaka aminy aho dia mangataka aminy mba hanome ahy fahendrena hahafahako mitondra tena tsara. Mangataka aminy koa aho mba hampiany ho tony foana sy hanana toe-tsaina tsara hiatrehana an’izao zavatra mahazo ahy izao.

Miantehitra amin’i Jehovah foana ny rahalahintsika mba hahazo hery. Azo antoka fa tsapan’izy ireo ny fihetseham-pon’i Davida mpanao salamo, izay nilaza hoe: “Izao no atokisako: Manohana ahy Andriamanitra.”—Salamo 56:9.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO