(Gesòra).

1. Fanjakana aramianina tany akaikin’ny faritr’i Argoba tany Basana, atsinanan’ny Reniranon’i Jordana. I Makata no teo avarany. Nanafika hatrany Gesora ny Israely tamin’izy ireo tonga tany Kanana, saingy tsy azony ilay faritra. (De 3:14; Js 12:1, 4, 5; 13:13) Nandositra tany Gesora i Absaloma rehefa avy namono an’i Amnona rahalahiny. Mpanjakan’i Gesora mantsy i Talmay raibeny avy amin’ny reniny. Nijanona telo taona tany izy, ary tsy nody tany Jerosalema raha tsy nalain’i Joaba. (2Sa 3:2, 3; 13:28-38; 14:23; 15:8) Lasan’i Gesora sy Syria ny tanàna israelita maro tany atsinanan’i Jordana, tatỳ aoriana.​—1Ta 2:23.

2. Fonenan’ny Gesorita tany amin’ny faritra atsimon’i Palestina, tany akaikin’i Filistia. (Js 13:2; 1Sa 27:7-11) Tsy dia antsoina hoe “Gesora” anefa ilay faritra.