HOY NY BAIBOLY: “Nanao soa [Andriamanitra] ka nanome anareo ranonorana avy eny amin’ny lanitra sy taon-jina, ary nahavoky ny fonareo tamin’ny hanina sy ny fifaliana.”​—Asan’ny Apostoly 14:17.

AHOANA IZANY? Fanomezana avy amin’ny Mpamorona daholo ny zavaboary ankafizintsika. Vao mainka hahafaly anao izy ireny raha fantatrao hoe tena tia anao ilay nanome azy ireny.

HOY NY BAIBOLY: “Ho takatrao ny atao hoe fahamarinana sy rariny ary fahitsiana, eny, izay tsara rehetra.”​—Ohabolana 2:9.

AHOANA IZANY? Fantatr’Andriamanitra hoe inona no hahasambatra anao, satria izy no namorona anao. Raha mamaky Baiboly ianao, dia hahita torohevitra hahasoa anao.

HOY NY BAIBOLY: “Ho hitanao ny fahalalana an’Andriamanitra.”​—Ohabolana 2:5.

AHOANA IZANY? Rehefa mahafantatra ny Mpamorona ianao, dia mety ho hitanao koa ny valin’ireo fanontaniana lehibe eo amin’ny fiainana. Anisan’izany ireto: Nahoana isika no velona? Nahoana no be dia be ny olona mijaly? Manao ahoana ny olona rehefa maty? Mamaly an’ireo ny Baiboly.

HOY NY BAIBOLY: “‘Fantatro tsara ny zavatra efa noeritreretiko hatao aminareo’, hoy i Jehovah. ‘Mieritreritra ny hanome anareo fiadanana aho fa tsy loza, mba hahatonga anareo hanana ny hoavinareo sy hanana fanantenana.’”​—Jeremia 29:11.

AHOANA IZANY? Mampanantena Andriamanitra fa hesoriny ny faharatsiana sy ny fijaliana ary na ny fahafatesana aza. Raha matoky ny fampanantenan’Andriamanitra ianao, dia ho lasa be herim-po ka hahavita hiatrika olana.