Ihapari Comaana Cantikhiye ni Joau 9:1-41
9 Yesu eettakoono, aahomoona nlopwana ahoona iyaryeelo.
2 Vano, eetthucyaawe yahonkoha co: “Raapi, wiira ula nlopwanoola ayariye woohoona tipani tthekile, ula nlopwanoola awula asithumwaane?”
3 Yesu ahowaakhula eeraka: “Ula nlopwanoola, hataa asipaapaawe khaavo tthekile. Iyo itthwiiyo yiirannyeele wiira coonnye miteko ca Nluku nlattu wawawe.
4 Hiiva nihaana uvara miteko cawe ule kirumile nanlelo unari uthana; kontha uhanle wiila, wiilaka khaavo nokhitiri uvara nteko.
5 Ukati kiryaaka mu ntuninyani mu, miiva kikhanle nthuko wo ila ituninyeela.”
6 Umaliha wawe wuuluma nnya citthunnya, ahosuwela vathi aheethyaa itthaya niisenye cawe, ni ahotthikitthela mmiithoni wawe uyo nlopwanooyo,
7 ni ahomwiirela co: “Urwee ni wakhuce itanki yo Silowe (yataphuleliyaka maanaaya “Urumiya”). Vano, uyo ahorwaa ukhuca ni aaturuwile oonaka.
8 Vano, amwaattamanannyaawe ni atthu yancuwela khalayiiru wiira uyo aari nacimoola, yahopacera ukohana yeeraka: “Ula khanakhala yoole nlopwana onkomakoole alepelaka icimoola?”
9 Akina yeera: “Phiyooloola.” Akhwaawe yeera: “ Mena khanakhala, ahoolattanaca paahi.” Vano uyo nlopwanooyo eeraka: “Phimiiva.”
10 Vano, yaahonkoha yeeraka: “ Vano uwile cani upaceraka woona?”
11 Uyo ahakhula eeraka: “ Nlopwana neehaniya Yesu ahoweethya itthaya nuukittikitthela mmithoni waka, ni nuukiirela: ‘Urwee itanki yo Silowe ni wakhuce.’ Vano, mi phaarwaaka ukhuca ni phaapaceraaka woona.”
12 Wiiwa waya iyo itthwiiyo, yaahonkoha yeeraka: “Vano uyo nlopwanooyo ri vayi?” Uyo ahaakhula eeraka: “Akincuwela.”
13 Ni ayo, yaahonrwaana wo mafariseu ule nlopwana aavonihiyoole.
14 Nihuku Yesu neethelyaawe itthaya, atthukulaka miitho anlopwanooyo, naari isaapatu.
15 Vano,mafariseu ciicammo yaahopacera unkoha mananna uyo nlopwanooyo wancenryawe woona, uyo ahowaakhula eeraka: “Uyo aattikitthenle itthaya mmiithoni waka, ni mi phaarwaaka ukhuca vano phaapaceraaka woona. ”
16 Vano, mafariseu akhwaawe yaheera: “Uyo nlopwanooyo khanakhala ntthu a Nluku, kontha khanhisima nihuku nosaapatu. Akina yeera: “Unari wiira uyo nlopwanooyo aari namatampi niireke wiira anhala ukhitiri upanka mwiiriirya toko ula?” Vano, waahokhumelela ukawannyaaca iriyaryaaya ayo atthwaayo.
17 Ayo atthwaayo yaahonkoha-tho ule nlopwana ahoonoole, yeeraka: “Weeva, nkanihimyeere, unkupali wiira uyo nlopwanooyo tipani? kontha phiweeva uvonihiye.” Uyo nlopwanooyo ahaakhula eeraka: “Uyo khanle porofeeta.”
18 Vano, ayuuta khayaakupali wiira uyo nlopwanooyo aayariye hoonaka ni aahoovonihiya, mpaka yahowiihana asithumwaane ule nlopwana aavonihiyoole.
19 Yahaakoha: “Niireke wiira ula phiyooyo mwaninyu nnohimyeenyu wiira munnyare hoonaka? Vano pacenre cani woona?”
20 Asithumwaane yahowaakhula yiiraka: “Hi ninaacuwela wiira ula mwanihu ni ninyanre hoonaka.
21 Masi hiiva khanincuwela mananna waalyaawe apaceeraka woona, ni hiiva khanincuwela tipani nvonihile. Munkohe mwaneene. Uyo khanle muulupale; uyo naahala wuuhimeeryani.”
22 Asithumwaane yaakhunle commo, kontha yanwoova ayuuta, kontha yaaholeehana wiira ntthu aahala umwaamini Yesu aahaana oomoliyaka usinakooka.
23 Phimaana asipaapaawe waakhunlyaaya yiiraka: “Uyo ukhanle muulupale. Munkohe mwaneene.”
24 Vano, yahomwiihana-tho ikwaha yonayeeli ule nlopwana ahoonoole ni yahomwiirela: “Unttitthimihe Nluku! Kontha ninaacuwela wiira ule nlopwanoole khanle namatampi.”
25 Uyo aheera: “Uyo nlopwanooyo wakhala wiira khanle namatampi mi akincuwela. Masi itthu incuwelaaka kaari ntthu oohoona masi nna co kinawoona.”
26 Vano, ayo yahonkoha yiiraka: “Uyo pankile cani iyo? Uyo khitinri cani utthukula miithwaa?”
27 Masi uyo ahowaakhula eeraka: “Mi kihoohimeeryani, masi khankiiwelenle. Vano, nnoopheela ukiiwa-tho isiyani? Kiireke nyuuva ciicammo nnopheela ukhala attharyaawe?”
28 Nlattu wo iyo itthwiiyo, yanthanyakoono yahomwiirela ule nlopwanoole co: “Weeva ukhanle nttharyaawe ule nlopwanoole, masi hiiva nikhanle atthari a Moceesi.
29 Hi ninaacuwela wiira Nluku ahomuulumana Moceesi, masi uyo nlopwanooyo, khanincuwela nipuro ninkhumaawe.”
30 Nlopwanooyo ahowaakhula co: “Khweeliini iyo ikhanle itthu yootikhiniha! Nyuuva khannocuwela unkhumaawe masi uyo hovoniha miithwaaka.
31 Ninaacuwela wiira Nluku khammwiiwelela namatampi, masi ule nomoova ni nopanka ile impheelaawe, naamwiiwelela uyo ntthuuyo.
32 Ikhumelo yokhalayi, khaavo pacile wiiwa wiiriyaka wiira ahaavo ntthu tokile unvoniha ntthu oohoona iyaryeelo.
33 Unari wiira uyo nlopwanooyo khaarumiye ni Nluku, khaahala upanka nnya citthunnya.”
34 Ayo yahomwaakhula: “Weeva uyariye nimatampi ni hataa ukhalaka commo ummananiha uniitthuciha?” Vano yahomoomola.
35 Yesu aheewa wiira uyo nlopwanooyo ahoomoliya. Umoonanana wawe, ahonkoha: “Kiireke wiira weeva unaamwaamini Mwaana Apinaatamu?”
36 Nlopwanooyo aahaakhula co: Tipani yooyo, pwiiya wiira miiva kimwaamini?”
37 Yesu ahomwiirela: “Weeva uhomoona, ni phiyoola ummuulumanoola va.”
38 Nlopwanooyo aheera co: “Mi kinamwaamini uyo Pwiiya! Ni ahokhoroma uhoolo wawe.
39 Vano Yesu aheera co: “Kiwile ntuninyani wiira kihukhumu, wiira ale ahiinoona apacere woona ni ale anoona akhale atthu oohoona.”
40 Mafariseu makhwaawe yaheewa ukati woolumaawe nnya citthunnya ni yahomwiirela: “Niireke wiira hiiva ciicammo nikhanle atthu oohoona?”
41 Vano Yesu ahowiirela co: “Unari wiira nyuuva mwankupali wiira khannoona, khamwaahala ukhalana matampi. Masi, nyuuva nneera: ‘Hi ninawoona,’ nlattu wo iyo matampiinyu khanhala uleveleliya.”
