Ihapari Comaana Cantikhiye ni Markus 14:1-72
-
Anankuttho anaaleehana umwiiva Yesu (1, 2)
-
Makhura oonukhela cinene nawoottihiya Yesu (3-9)
-
Yuta Iskariyoti nantumiha Yesu (10, 11)
-
Paasikuwa oomalela (12-21)
-
Upacerihiya uliya Iyoolya Yoohiyu Yaapwiiya (22-26)
-
Yesu naahimyaca wiira Peturu anhala unkhotta (27-31)
-
Yesu naalompa u Getseemani (32-42)
-
Yesu naatthukiya (43-52)
-
Uhukhumwiya utiripunaali (53-65)
-
Peturu nankhotta Yesu (66-72)
14 Yahaleelaka mahuku meeli wiira niphiye nihuku no Paasikuwa, ni ifesta yophaawu coohiheliya ifermentu, ahooleli aanankuttho ni anamantikha yaaholeehana umwaavya Yesu yeevithavithaka wiira antthuke ni amwiive.
2 Masi yeerelana co: “Uhikhaleke ukati wopaasikuwa, kontha atthwaayo anaahala unyakulaca.”
3 Naryeene u Petaaniya, alyaaka uwannyawe Simau, namakuttula, nthiyana mmoca ahowa anacisile ikaraafa yankaani yomakhura oonukhela ni onsurukhu mwinci, ni uyo ahotthukula ni ahancera umoottiha Yesu mmuru wawe.
4 Nlattu wo iyo itthwiiyo, atthu yaari nne nipuronne yaaherelana: “Arihakaceliyeni ala makhura oonukhelaala?
5 Kontha ayo pooti waatumihiyaaya itenaariyu 300 ni nsurukhuuyo urwaa uvahiya atthu oohuva!” Ni ayo yaahonyoonyiya cinene nlattu wo uyo nthiyanooyo.
6 Masi, Yesu aahowiirela: “Mwaahiye. Nnoolumacerani commo? Ala athiyanaala ahokipanka itthu yomaana cinene.
7 Kontha nyuuva nnawaakhalana amasikhini nenne-nenne ni pooti waapankela khula itthu nnopheeleenyu, masi miiva khannohala ukikhalana mahuku otheene.
8 Ala athiyanaala ahopanka ikhitinryaaya; ahohooleliha ukiitthela makhura mwiirutthuni waka kihinaaya usikhiya.
9 Kinoohimyeerani ikhweeli wiira: Khula nipuru unhaalaaya ulalyeeriya ihapari comaana ntuninyani motheene, itthu ipankilyaawe ula nthiyanoola ciicammo inaahala wuulumiya, wiira yuupuweleliye.”
10 Vano, Yuda Iskariyoti, ari ntthari mmoca a Yesu, aahorwaa uwoonanana ahooleli aanankuttho wiira aatumihere Yesu.
11 Ahooleli aanankuttho wiiwa waya ile itthwiile, yaahotteeliya nrima cinene ni yaahonkhuluveliha Yuda Iskariyoti unvaha nsurukhu woparaata.Vano, ikhumelo yooyo ukatyuuyo, uyo aanaavya ukati womaana wiira anvariihe Yesu.
12 Waaphilyaaya nihuku noopacera nomikatthe coohiheliya ifermentu, toko caalimaleliyaaya uvahiya itthuvo copaasikuwa, atthari a Yesu yahonkoha, yeeraka: “Nipuroni noocivenleni wiira nirwee natthenkace iyoolya yopaasikuwa?”
13 Yesu aahaaruma attharyaawe eeli ni ahowiirela co: “Nrwee mpaka usittatti, ni nnaahala unkumaanana nlopwana mmoca nakusile mwaapu womaaci. Vano, mwantthare yooyo nlopwanooyo, ni
14 inupa inhalaawe ukela, mmwiirele mwaneene inupooyo co: ‘Mwiitthucihi enre: “Iri vayi isaala yaaletto wiira kinlye paasikuwa wamoca naattharyaaka?’”
15 Ni uyo naahala wuuthoonyerani isaala yuulupale yonculu, yootthenkaciya saana. Wonwo mwantthenkace paasikuweehu.”
16 Vano, attharyaawe yaahorwaa usittatti ni yaahophwanya citthu cotheene Yesu caahimalyaawe, ni yaahotthenkaca iyoolya yopaasikuwa.
17 Wiila waya, Yesu aahophiya nkhayi naattharyaawe.
18 Ni, anoonkomacile, anaphitenre meeca ni yalyaaka, Yesu aaheera: “Kinoohimeeryani ikhweeli wiira: Mmoca-mmoca ri vaa ni nolya nkhayi ni miiva naahala ukivariiha.”
19 Anariipiyeene nrima, ayo yaahopacera ukohana mmoca-mmoca, yiiraka: “Phi mi kinhala upanka iyo?”
20 Uyo aahowiirela co: “Mmoca-mmoca va niriihuva, ule nokeliha ntata nawe mparathoni wamoca ni miiva.
21 Kontha Mwaana a Pinaatamu naarwaa, toko cantikhiyaaya, masi hotakhaliya ule nohala unvariiha Mwaana a Pinaatamu! Phataari uyo ntthuuyo hiyariye!”
22 Ni nanlelo alyaaka, aahokusa iphaawu, aholompa, aahomyaaniha ni aahaavaha attharyaawe, eeraka: “Nkhuureke. Ila iphaawiila inthoonyera irutthwaaka.”
23 Ni ciicammo, ahokusa ikopu yoviinyu ni ulompa wawe, ahaavaha attharyaawe, ni otheene yaahowurya.
24 Uyo aahowiirela: “Ila inthoonyera iphomyaaka yonleehano, inhala umwarusiya wiira yaakavihere atthu enci.
25 Kinoohimeeryaani ikhweeli wiira: Akinhala-tho uwurya iviinyu, mpaka nihuku ninhalaaka uwurya iviinyu yonaanaano, muumweneni wa Nluku.”
26 Vano, umaliha waya wiipa icipo, yahorwaa umwaakoni Oliveera.
27 Ciicammo, Yesu aahowiirela co: “Otheene cinyu nnaahala ukikhotta, kontha uhantikhiya wiira: ‘Kinaahala unrakaliha makampuci, ni ikhontwaa cinaahala umwaryaana.’
28 Masi, kunwelelihiyaka vale, kinaahala uhoolela u Kalileeya.”
29 Vano, Peturu aheera co: “Hataa atthu otheene yookhottakani, mi akinhala wuukhottani.”
30 Vano, Yesu aahomwiirela co: “Kinoohimeerya ikhweeli wiira ilelo uhiyu, nthupi uhinaaya wiipa imaara piili, unaahala ukikhotta imaara tthaaru.”
31 Masi, Peturu aahokhanyerera, eeraka: “Pooti waneeriyaaya wiira kinahala wiiviya nkhayi ni nyuuva, mi akinhala wuukhottani.” Ni attharyaawe otheene yaahooluma itthu imocaaru.
32 Vano, Yesu nkhayi naattharyaawe yaahophiya nipuro neehaniya Getiseemani, ni aahowiirela attharyaawe co: “Munkomaceke vaa, mi kinkoolompa.”
33 Vano, aahonkusa Peturu, Tiyaku ni Joau, ni ahopacera usanka ni wahonriipa nrima cinene.
34 Yesu ahowiirela co: “Kiri ooripiya nrima cinene, mpaka kihanle ukhwa. Nhale vaa ni nhiitthaale.”
35 Neettaleene vakaani, ahokhoroma ni, nooromenleene vathi, aholompa eeraka wiira wakhitiryaavale, masakha yaahala unkhumelela avire.
36 Ni aaheera: “Aba, Paapa, nyuuva khiivo itthu ihinkhitiriinyu; nkikumihe ala masakhaala. Masi, ihiirannye intthunaaka masi yiirannye itthu nyuuva impheeleenyu.”
37 Uturuwela wawe nipuro naaryaaya attharyaawe, ahaaphwanya yarupaka, ni ahomwiirela Peturu co: “Simau, unaarupa? Khukhitinri ukhala woohiitthaala iwoora imoca paahi?
38 Nhiitthaale ni nlompe woohihiyerera, wiira nhikhitiriye mwattehiyaka vale. Khweeliini, nrima unaatthuna, masi irutthu khinlipa.”
39 Uyo ahaahiya-tho ni aahorwaa ulompa oolumaka itthu imocaaru.
40 Vano, aahoturuwa-tho ni ahaaphwanya yarupaka, kontha yaari niikhove cinci, phimaana khayoona yoomwaakhula.
41 Ahoturuwa-tho ikwaha yoneeraru ni aahowiirela: “Nanlelo nyuuva nnaarupa ni nnaamumula! Uhotosa! Uhophiya ukati anamatampi unhalaaya uvahiya Mwaana a Pinaatamu.
42 Munwe, nttwee nikhume vaa. Mmooneke! Ule nohala ukitumiha neera awaaka.”
43 Woohipica, oolumacakoono, ahowa Yuda Iskariyoti, aapanka mphantte waatthari 12, nari wamoca naatthu enci niikatana caya ni ikopo. Ayo yaarumiye naahooleli aanankuttho, anamantikha ni mahumu.
44 Vano, ule ahaala unvariiha Yesu ahaavaha nthoonyero, eeraka: “Ule nohalaaka unvaha ipeecu, phi yooyo, munvare ni munciseke.”
45 Vano, Yuda ahaattamela nipuro naaryaawe Yesu ni aahomwiirela: “Cani Rapi!” ni aahonvaha ipeecu.
46 Vano, ayo yaahonvara ni yaahontthuka.
47 Masi, ntthari mmoca ahotholola ikatanaawe ni ahothikila nnyaru nananteko anankuttho muulupale.
48 Vano, Yesu aahowiirela: “Nkiweelale ukitthuka niikatana ni ikopo, toko wiira miiva kihookhala nakhirini?
49 Khula mahuku, mi kaakhala nkhayi ni nyuuva ntempulu keetthucihaka, uhookhalaru commo, nyuuva khamwaakitthukile. Masi, ila ikhumelenle wiira ciirannye citthu cantikhiye.”
50 Vano, attharyaawe otheene yahonhiya ni yahotthawa.
51 Vano, mmirawo mmoca aawanre ihancu yoovevyaala ni nhina waya woohiitthu aahopacera untthara Yesu, ni atthu waamoonilyaaya yaahomananiha unvara wiira antthuke,
52 masi, uyo ahaahiyera mmatatani waya ikuwo yaawanryaawe ni aahotthawa woohiwara.
53 Vano, yaahonrweeha Yesu wa nankuttho muulupale; ni ahooleli otheene aanankuttho, mahumu ni anamantikha yaahothukumana.
54 Masi, Peturu, naaryeene uttayi-uttayi, aahontthara Yesu mpaka waaphiiyaaya uwanuwawe nankuttho muulupale, ni ahonkoma nkhayi naananteko owapuwannyaayo, ootthaka mooro.
55 Ahooleli aanankuttho ni itiripunaali yotheene yaayuuta yaanawaatotha atthu oomootherya Yesu, wiira amwiiviihe, masi khayamphwanyile hataa mmoca.
56 Khweeliini, yaahaavo atthu enci yaamootherya Yesu, masi ayo yanvaanyihana ayaayoru.
57 Ni yahaavo yeemela wiira amootherye citthu, yeeraka:
58 “Hi nihomwiiwa ula eeraka: ‘Kinaahala ukwanyulaca ila itempulu itekiye nimatata aapinaatamwiila ni, nhina wo mahuku mararu paahi, kinaahala uteka itempulu ikiina, yoohitekiya nimatata aapinaatamu.’”
59 Masi, hataa yuulumaka commo, usaahiti waavahaaya waakhala woovirikana.
60 Phimaana, nankuttho muulupalyooyo ahunwa ni ahonkoha Yesu: “Khunaakhula itthu? Unoonela cani itthu ihimilyaaya ala alopwanaala?”
61 Uhookhalaru commo, nanlelo Yesu ahomaala ni khiivo yaakhunlyaawe. Nankuttho muulupalyooyo ahonkoha co: “Thi weeva Kristu, mwaana a Nluku Nkhulupale?”
62 Vano, Yesu aahaakhula, eeraaka: “Iye, thi miiva; nyuuva nnaahala umoona Mwaana a Pinaatamu nonkomile moono wonlopwana wokuru ni awaaka mmahutteni.”
63 Nankuttho muulupale aahaanyula ikuwaawe ni aaheera: “Nihaana-tho itthu yoopheela uwaavya masaahiti?
64 Nhoona mananna civeehilyaawe. Vano nnoonela cani?” Otheene yaaholakela wiira aahaana wiiviya.
65 Atthu akiina yaahopacera unsuwela, unkhuneela uwiitho, yahonvaha isooku ni yeera: “Unhimye ntthu waattile!” Ni umwaatta waya, ananteko ootiripunaali yahonkusa.
66 Vano, ukati Peturu waaryaawe wapuwani, aahowa nthiyana mmoca aari nanteko anankuttho muulupale.
67 Nthiyanooyo umoona wawe Peturu ootthaka mooro, aahonweheeha sana-saana ni aahomwiirela: “Weeva ciicammo waari ni Yesu, Nnasareenu.”
68 Masi, uyo aahonkhotta, eeraka: “Mi akincuwela itthu inoolumeenyu, ni aahokhuma arwaaka unkhorani woluwani.”
69 Ni nwo, nthiyanooyo aahomoona-tho ni aahopacera owiirela-tho atthu yaarivo nno nipuronno co: “Ula ciicammo ammweettana.”
70 Peturu aahonkhotta-tho ni, woohipica, atthu yaari nne nipuronne yaahopacera umwiirela: “Khweeliini, weeva waari yeeyo ikhurupwiiyo, kontha unawoonnya wiira weeva nkalileya.”
71 Masi, uyo ahopacera wiilaphakaca ni aholupela, eeraka: “Mi akinoncuwela nlopwana nnomwaaceenyuuyo!”
72 Woohipica, nthupi waahiipa ikwaha yonayeeli, ni Peturu aahoopuwela itthu yuulumilyaawe Yesu: “Unaahala ukikhotta imaara tthaaru, nthupi hinaaya wiipa imaara piili.” Ni, unanriipile nrima cinene, uyo aahopacera wunla.
