Ahaleelaka mahuku vakaani Yesu ukhwa, ahowoopana mwaha attharyaawe acese: Peturu, Tiyaku, Joau ni Antre. Ukati waahimyeraawe citthu caahala wiirannya ni uthoonyera wiira ahopiya mahuku ookicera, Yesu ahopanka nikoho nuulupale eeraka: “Tipani khanle khweeliini ipottha yookhuluvelya ni yankhili, ithanliye naaphwiiyaaya waasunka owapuwani waya, wiira yaavahe iyoolya ukati umpheelaaya?” (Matewus 24:3, 45; Markus 13:3, 4) Yesu, ukhala wiira uyo “Pwiiya” aattharyaawe, nikoho naapankalyaawe naari inanna yowaakhuluveliha wiira anhala uthanla “ipottha” yaahala uwaaverya woohihiyerera iyoolya yomminepani mahuku ookhicera. Tipani khanle ipottha?

Iyo ikhanle ikhurupu yankaani yaatthari oothanliya a Yesu. Iyo “ipottheeyo” incuweliya ukhala Mphwinko wo Mahumu Unhoolela wo Massahiti a Yehova. Iyo inaawaaverya iyoola yomminepani ale anonswalela Yehova. Hiivano ninkhuluvela iyo ipottheeyo wiira ‘iniphimele iyoolya ukati umpheeleehu.’—Luka 12:42.

Iyo inawaatafiti amuci a Nluku. (1 Timotiyu 3:15) Yesu hovaha ipottha nrintti muulupale ukhanle utafiti nteko umpankiya ni mphwinko wa Yehova watuninyani va: utafiti mihakhu cawe, uhoolela nteko woolalyeera ni uniitthuciha mmalokoni wihu. “Ipottha yookhuluvelya ni yankhili” wiira inivahe itthu impheeleehu ni ukati umpheeleehu, inaakawa iyoolya yomminepani, toko ilivuru ninvareleehu nteko wuulalyeerani, wamoca iporokarama cinkumiheriya mmikutthaanoni cihu khula isumana ni mmithukumanoni cihu cuulupale khula mwaakha.

Iyo ipottheeyo inkhala yookhuluvelya ukhala wiira inaahimya saana ikhweeli co mbiiblyani ni inaavara nteko uvahiyaaya woolalyeera ihapari comaana; ni inkhala yankhili ukhala wiira inaatafiti uratteene ile impheelaawe wiiraneeha Kristu walaponi. (Miteko 10:42) Yehova neera avahaka iparakha ula ntekoola wiira yincive atthu mumphwinkoni wawe ni neera akaviheraka ipottha uvaha iyoolya comminepani.—Isaiya 60:22; 65:13.

• Tipani thanliye ni Yesu wiira aavahe attharyaawe iyoolya yomminepani?

• Manannani “ipottha” inkhalaaya yookhuluvelya ni yankhili?