1-3. a) Makohoni atthu ampankaaya nhina muukhwani? b) Ittiini cinaakhula cani ala makohwaala?

IBIIBLYA inaakhuluveliha wiira wahoolo “khunhala ukhala-tho ukhwa.” (Apokalipise 21:4) Nhina ikapiitulu 5, niheetthuca wiira Yesu khwile wiira hiivano nikhalane iparakha yoohala ukhala watuninyani mpaka. Uhookhalaru commo, nanlelo atthu anaakhwa. (Eklesyaste 9:5) Phimaana, nikoho nuulupale nimpankakeehu phi nna: Isiyani inniirannyeela nakhwaaka?

² Hiivano nintepaka upheela ucuwela waakhuliya waya nno nikohonno, wakhalaka wiira ntthu nanfenteehu hookhwa. Atthunaka ninawiikohaka co: ‘Ri vayini nna co? Kiireke naakoona ni pooti ukikavihera? Kiireke wiira wanihukuni ninaahala woonanaca-tho?’

³ Ala makohwaala, ittiini cinaakhula mananna oovirikanaca. Cihaavo ittiini cineetthuciha wiira atthu ampanka citthu comaana, yakhwaaka anrwaa wiirimu ni ale ampanka citthu coohinamaana anaapahiya umootthooni awula umooroni. Ittiini cikiina cineera wiira ntthu akhwaaka nothatuwa nnepa ni naarwaa ukhala wamoca naamucyaawe akhwile. Ni cihaawo ittiini cineetthuciha wiira ntthu akhwaaka, wahoolo naayariya niirutthu ikiina nipuro nikhwaawe, awula nothatuwa inama.

4. Isiyani ittiini cinci cineetthucihaaya nhina muukhwani?

⁴ Ittiini cineetthuciha citthu coovirikanaca nhina muukhwani. Masi cincinnyo cimpheela uhimya itthu imocaaru. Isiyani yeeyo? Nnyo cineetthuciha wiira ntthu akhwaaka vale irutthwiiyo paasi pinkhwa, masi ihaavo itthu nanlelo inhala nuukumi. Niireke iyo itthwiiyo ikhweeli?

5, 6. Isiyani inniirannyeela nakhwaaka?

⁵ Yehova naacuwela isiyani inniirannyeela nakhwaaka. Uyo  neera wiira ntthu akhwaaka vale ukumyaawe unaamala. Ukhwa unkhala uhikhala ukumi. Coo, ntthu akhwaaka khanfenta awula kharina uthunku ni khanoopuwela hataa vakaani citthu caavaraawe. * Nakhwaaka, khaninoona, khanineewa ni khaninoopuwela hataa vakaani.

⁶ Mwene Salomau ahantikha wiira “atthu ookhwa khanoopuwela hataa itthu.” Ntthu ookhwa kharina nifento ni kharina urama. “Khuuvo nteko, hataa utthenkaca, ucuweleca, ni ankhili mmahiyeni.” (Eklesyaste 9:5, 6, 10.) Uhiya commo, nhina ilivuru ya Isaalimu 146:4, Ibiiblya ineera wiira, ntthu akhwaaka vale “moopuwelelwaawe anaamalamala.”

7. Isiyani Yesu ilikanihenryaawe nuukhwa?

⁷ Ukati waakhwilyaawe mpwanaawe Yesu anfentaawe cinene, Yesu ahowiirela attharyaawe: “Laazaru, mpatthaniihu horupa.” Masi khunakahala wiira Laazaru aanaarupa. Vano isiyani Yesu yaapheelaawe uhimya? Uyo ahoolumaca-tho eeraka: “Laazaru hokhwa.” (Joau 11:11-14) Yesu likanihile ukhwa nuurupa ikhove. Yesu kheerile wiira Laazaru aari wiirimu awula aari naamucyaawe akhwile. Ciicammo Yesu kheerile wiira Laazaru ri moohuva umootthoni awula aanaahala uyariya-tho niirutthu ikiina. Khweeliini, wakhanle toko wiira Laazaru aanaarupa. Cihaavo ciicammo iversiikulu co mbiiblyani cinlikanihera ukhwa nuurupa ikhove. Ukati Estevau weeviyaawe Ibiiblya ineera wiira “uyo ahorupa muukhwani.” (Miteko 7:60) Ni apostolu Paulu ahantikha wiira makristau “ahorupa muukhwani.”—1 Akorintu 15:6.

8. Isiyani inthoonyera wiira Nluku khanumpile wiira nikhwe?

⁸ Niireke wiira Nluku aawumpile Atamu ni Hawa wiira akhale ukati vakaani ni wahoolo waya akhwe? Mena! Yehova aawumpile Atamu ni Hawa wiira akhale mpaka. Ayo yahaana ukumi woohipahuwa.  Ni Yehova uwumpa wawe apinaatamu, uyo haavaha itthu inwiiriha upheela ukhala mpaka. (Eklesyaste 3:11) Iyo inoonihera wiira Nluku khanumpile wiira nikhwe. Khaavo nyari unoncivela uwoona asaanaawe yuuluvalaka ni yakhwaaka. Yehova khanle Paapeehu ni khunoncivela uwoona atthu yakhwaaka. Vano, hiivano ninkhwela isiyani?

9. Kontha isiyani nrumo Yehova naavahilyaawe Atamu ni Hawa naari noohirika wiiwelela?

⁹ Unlavani no Eeteni, Yehova ahomwiirela Atamu: “Miri cotheene co wanlavani pooti ulya niiraati. Masi mwiri umphwanyiha  ankhili omaana ni oohinamaana, uhilyeeni, kontha nihuku ninhalaa ulya, weeva khweeliini unaahala ukhwa.” (Uphattuwaca 2:9, 16, 17) Nno khanaari nrumo noorika wiiwelela. Konta isiyai? Kontha naari nrumo noohirika wiiweeha ni ayo pooti waahalaaya ulya mihokorokho cikiina. Ni Yehova waanomphwanela waahimyeera Atamu ni Hawa isiyani yaari itthu yooreera ni yootakhala. Waari wiira yahomwiiwelela Nluku, ayo yaanaahala woonihera uhisimu ukhulupale urinaawe. Ciicammo iyo yaahala ukhala inanna yowoonihera wiira yansukhuru citthu cotheene caavahiyaaya ni Nluku.

10, 11. a) Sotwani aawooryaanihile cani Atamu ni Hawa waahiiha umwiiwela Nluku? b) Kontha isiyani Atamu ni Hawa khayaarina isariya wiira aleveleliye itthu yaapankilyaaya?

¹⁰ Woocukuliha nrima, Atamu ni Hawa yahothanla uhimwiiwelela Yehova. Sotwani ahomwiirela Hawa: “Iyo phi itthu Nluku khweeliini yiiralyaawe, wiira nhilyeeni miri co wanlavani cotheene?” Hawa ahaakhula eeraka: “Niholeveliya ulya mihokorokho cotheene co miri ciri wanlavani va. Masi, nhokorokho wo mwiri mmoca umphwanyannya iriyari nlava, Nluku eeralee co: ‘Nhilyeeni ni nhikwanye; kontha nnaarwaa ukhwa.’”—Uphattuwaca 3:1-3.

¹¹ Vano Sotwani aheera: “Nyuuva khweeliini khannohala ukhwa. Kontha Nluku naacuwela wiira, nihuku ninhaleenyu ulya, nnaahala utthukuwa meetho ni nnaahala unlikanana Nluku, ncuwelaka yooreera ni yootakhala.” (Uphattuwaca 3:4-6) Sotwani aapheela wiira Hawa oopuweleke wiira pooti waalakelaawe veekhaawe isiyani yooreera ni yootakhala. Ciicammo, uyo ahonthepya anhimyeeraka itthu yaahala wiirannya ahiyaka umwiiwelela Nluku. Sotwani aamwiirenle Hawa wiira alyaaka nhokorokho waakhottihiyaawe khaahala ukhwa. Vano, Hawa aholya ni nuuwakatyaaya ahonvaha Atamu, ni uyo aholya. Khayaarina isariya wiira aleveleliye itthu yaapankilyaaya. Kontha isiyani? Kontha ayo yancuwela wiira Nluku enre wiira khayaalamuliya ulya ule nhokorokhoole. Unookhalaru commo, ayo yahothanla  uhimwiiwelela. Ulya waya ule nhokorokhoole ayo yahoonihera wiira khayanhisimu Paapaaya nanifento, Yehova.

12. Kontha isiyani Atamu ni Hawa uhimwiiwelela waya Yehova, uyo ahoriipiya nrima?

¹² Yehova ahoriipiya nrima cinene nlattu woohiiweleliya ni Atamu ni Hawa. Masi yaapankeleni commo! Ayo yahoonihera unthweela inaasi Mumpyaaya. Muupuwele nyuuva nnari nyari ni nnawiikurumica uwuunuwiha asaaniinyu eeli, nthiyana ni nlopwana. Masi nuuwakatyaaya ayo khantthuna-tho uwiiwelelani ni anaapanka citthu cennyo cahaarumileenyu upanka. Nyuuva mwaahala ukhala cani? Khamwaahala unyoonyiya?

13. Isiyani Yehova yaahimyaawe wiira wawe “wantthupini phinhalaa uhokoleela”?

¹³ Ukati Atamu ni Hawa waahiilyaaya umwiiwelela Nluku, ayo yahohaleela iparakha yoohala ukhala mpaka. Yehova ahomwiirela Atamu: “Weeva untthupi ni wantthupini phinhalaa uhokoleela.” (Nsome Uphattuwaca 3:19.) Iyo maanaaya wiira Atamu aanaahala uturuwela ukhala ntthupi, ukhala khampa wiira aari hinatoko wumpiya. (Uphattuwaca 2:7) Nlattu woovara matampi, Atamu hokhwa ni khaavo-tho.

14. Kontha isiyani hiivano ninaakhwa?

¹⁴ Waari wiira Atamu ni Hawa yahomwiiwelela Nluku, ayo yaanaahala ukhala akumi mpaka ilelo. Masi nlattu woohimwiiwelela Nluku ayo yahophwanya matampi. Phimaana, ayo ahokhwa. Otheene cihu ninyariya ni matampi kontha matampi anlikanaca niikwerere yuulupale nyari nonravihaawe mwanawe. Phimaana hiiva ninaakhwa. (Arooma 5:12) Masi iyo khinakhala itthu  Nluku yaapheelelaawe apinaatamu. Nluku khanumpile wiira nikhwe. Ibiiblya, ukhwa ineehana “mmwanani.”—1 Akorintu 15:26.

15. Kontha isiyani unaareera ucuwela itthu inwiirannyeela atthu akhwile?

¹⁵ Ittiini cinci cineera wiira atthu ookhwa nanlelo ahaavo akumi nipuro nikhwaawe ni cineera wiira unawooryannya waapankela citthu comaana. Imaara cikhwaawe, ale akhweliye anawaalivaka ahooleli ommattiinini toko, mapastore awula mapaatiri, wiira ampankele nivekelo ule khwile. Masi Ibiiblya ineera wiira khawankhitirya uwuulumana ni waakavihera atthu ookhwa. Kontha ayo khaanoona uwerya ni khaarina icuku. Khaanoorya wuulumaca ni khaanoorya upanka itthu yomaana awula yootakhala. Phimaana, khaninlamuliya uwoova atthu akhwile. Ucuwela isiyani inwiirannyeela atthu akhwile inkhala itthu yomaana. Kontha isiyani? Kontha khaninthepiya ni ninawoopwa citthu coohinamaana cinoolumiya.

16. Sotwani nopheela wiira atthu akupaliki isiyani?

¹⁶ Sotwani nopheela wiira atthu akupaliki wiira ale akhwile nanlelo ahaavo akumi. Uyo novarela nteko ittiini cowootha wiira eetthucihe citthu coohikhweeli nhina muukhwani. Wootakihera, cihaavo ittiini cineera wiira ntthu akhwaaka vale irutthwiiyo paasi pinkhwa, mas ihaavo itthu nanlelo inhala nuukumi. Vano ittiini iriinywiiyo? Ciicammo ineetthuciha yeeyo? Awula ineetthuciha itthu inhimyaaya Ibiiblya? Sotwani novarela nteko nnya citthu cowoothiyannya wiira aahiihe atthu unswalela Yehova.

17. Kontha isiyani ile ineetthucihiyeele wiira uhaavo umootthooni, ikhanle itthu inonveeha Yehova?

¹⁷ Imaara cikhwaawe, ittiini cinawiitthuciha citthu cinvirikana ni citthu cineetthucihaaya Ibiiblya. Wootakihera, cihaavo ittiini cineetthuciha wiira ale ampanka citthu coohinamaana anaarwaa utulumwiya umootthooni mpaka. Ila itthu yowoothiyeela inanveeha Yehova. Uyova khanapaca wuupuwela thanku  unttarusa ntthu umooroni! (Nsome 1 Joau 4:8.) Nyuuva mwaahala umoonela cani ntthu nontulumu mwanawe ampahaka matataawe wamooroni? Khweeliini, nyuuva mwaahala umoona uyo ntthuuyo upanka ikhirini yuulupale. Ni khamwaahala utthuna ukhala mpatthaniinyu. Masi Sotwani nopheela wiira atthu akupaliki wiira Yehova nawaapaha atthu umooroni.

18. Kontha isiyani nihinlamuliyeehu uwoova atthu akhwile?

¹⁸ Ittiini cikhwaawe cineetthuciha wiira atthu ookhwa anthatuwa minepa cokuru cinene ni pooti ukhala apatthani awula awanani aatthu ahinakhwa. Iyo itthwiiyo inaawiiriha atthu uwoova atthu akhwile ni ayo anaamananiha wiikhikiceraca wiira ahipankiye itthu yoohiloka. Atthu akiina anaamananihaka waapankela citthu comaana atthu ookhwa wiira yaatteelihe nrima awula anawaalompaka yaalepelaka wiira yaakavihere. Masi hiiva khaninlamuliya uliyala wiira atthu ookhwa khaanoona ni kharina icuku. Phimaana, khaninlamuliya uwoova atthu ookhwa. Hiiva ninlamuliya unswalela ni unlepela unikavihera Yehova paasi kontha uyo phiri Mumpiihu. Ni uyo phiri Nluku eekhweeli.—Apokalipise 4:11.

19. Ucuwela itthu immwiirannyeela ntthu akhwaaka, isiyani innikaviheraaya wiiweeha?

¹⁹ Toko niitthucileehu, ntthu akhwaaka, khankhala-tho nkumi nipuro nikhwaawe. Iyo itthwiiyo inaanoopola nhina wo citthu cowoothiya cineetthucihiya mmattiinini. Ucuwela wiira ntthu akhwaaka khankhala-tho nkumi nipuro nikiina unaanikavihera wiiweeha kontha isiyani Yehova mpankilyaawe natiri oohala waavaha apinaatamu ukumi woohimala wapheephoni Watuninyani.

20. Ninhala wiitthucani nhina ikapiitulu inhaleehu ukela?

²⁰ Niireke wiira unaakhitiryaa ntthu khwile uturuwela ukhala nkumi? Khalayi, nlopwana mmoca answalela Yehova eehaniya Jó ahokoha: “Ntthu akhwaaka naahala uhokoleela ukhala nkumi?” (Jó 14:14) Nhina ikapiitulu inhaleehu usoma ninaahala wiitthuca itthu Nluku inhimyaawe nhina nno nikohonno. Itthu Ibiiblya inaakhulaaya, ikhanle itthu yootteeliha nrima!