UTANICERE nathamenle meetiku ncokwaa. Wowancera weeva atthunaka pooti nhala uyooveleliha umuulumana. Masi yakhala wiira asimpwanaa ahomuulumana ni haavoniha? Khawuupuwelela ukoomuulumana meetiku yoola?

Woolikanaca, Cowantikhiya Cowaarya, cikhanlee toko meetiku. Akhwaawe anawoovelela ukhunula. Masi wavarelaka nteko ikano cimphwanyannyaa mmo, makhalelwaa anaakhala saana. Woone matakihero.

“Waathelanacaleehu phiyaaru, kiicoona uhipheeliya naawanuwaka, Dumas”, nhimya Sumiatun. “Kaakhala oonyoonyiyeene cinene ni kaanawaaruwanaka, waavonyakaca ni citthu mpaka waatuphela mwiirutthuni. Ikwaha ikhwaawe kaanaviruwaka mpaka ucirikha.”

Sumiatun aheera-tho: “Wancenryaawe Dumas usoma Cowantikhiya Cowaarya, kaanantarawaca. Masi, uyova woohicuwela, kaakhalaka mphantte nkhwaawe wo wasaala kiviriyanaka ukathi waasomawe. Wanihukuni, kaheewa isomiyaka ila itextu ila: ‘Athiyana ootheliya ahaana waatthunela asiwanuwaya toko Apwiiya . . . Nthiyana haana aahisimaka cinene awanuwawe.’ (Efesu 5:22, 33) Ala moolumo ala yahokiphiya wanrimani, ni kahonlepela nsammaha Nluku nlattu wo waatulumu awanuwaka ni kahonlepela ciicammo wiira akikavihere ukhala nthiyana omaana. Wahipicale, ooyeeli wihu nahancera usoma Cowantikhiya Cowaarya nkhayi.”

Cowantikhiya Cowaarya tootho cinaahimya wiira: “Alopwana oothela akhaleke yaafentaka asaaraya khampa cinfentaaya irutthwaaya.” (Efesu 5:28) Sumiatun naattonka: “Wiitthuca nnya citthu nnya cihonikhalihera ooyeeli wihu, ni kihohiya upanka citthu coohiloka. Khula nkwaha Dumas waahokolyaawe untekoni, kaanaampankela ishaa. Kahanca umuulumana uratteene. Dumas, ciicammo ahokela ukipanka ratta ni ukikavihera miteko cowapuwani. Miiva ni uyova khaninreera wiikurumica wiira ‘nipankane maana, nicivelane cinene, nilevelelanaka’. (Efesu 4:32) Coo, ufentana ni ihisima caathoonyeraneehu cahokela ulipa. Nnava cihovira myaakha 40 ninathelanneene ni nirii ootteeliyeene. Ikano co Nuulumo na Nluku cihaakihera uthelanaca wihu!”

“Miiva kaarii naceere,” neera Tayib. “Miiva keetta kiwanihanaka ni kanawoopopiheraka  atthu ikaputthi. Ciicammo kakhalaka oorusiyeene, kaanawaattakaca amwaaraka, Kustriyah. Atthu enci yanaakoova.”

Nno nihuku nno, kahosoma ala moolumo ala a Yesu: ‘Miiva kinoovahani nrumo nonaanaano, wiira nfentane; toko cuufentalyaakani.’ (Joau 13:34) Ala moolumo ala yahokivara nrima, ni kaholakela uhiya iceere. Kakhalaka ookasiriyeene, kaananlompa Nluku kinlepelaka wiira akikavihere umaala. Woohipica urusiya waka waanaamaala. Miiva naamwaaraka nihanca uvarela nteko ikano co Efesu 4:26, 27: ‘Nihikeleni ncuwa nnaviruwelanne, walaa nhimphwanyihe ikhato Tiyapu.’ Naanaasoma Nuulumo na Nluku ni naanaalompa nkhayi uhiyu woothene. Iyo yaanaanimaaliha urusihana wo nihuku ni naaneewanana.

“Ilelo kincuweliya ukhala ntthu owaatanannyaa. Amwaaraka ni asaanaaka anaakifenta ni anaakihisima. Kihaana asimpwanaaka enci ni kineecoona umphiyeerera Nluku. Pooti waneeraaka kintthu ootteeliya.”

“Miiva keettaka ni amiravo anannyatha, kaanaatthumiri cinene coohapala ni ikwaha ikina kaanaaviraka uhiyu nterweene kinarupalee mphironi, ohapaliyeene”, neera Goin. “Ciicammo kaanaatthumiri ni kaanaathumiha coohapala cinkhottihiya—isuruma ni ecstasy—caavithaaka nkuletini waka yahaattenliya ni kaputthi. Unookhalaru wiira kaanaalipa, miiva kaakhala koovaka iwora yootheene.”

Vano, haavo ntthu aakithoonyihenre ila itextu ila: ‘Mwaamwanaka, uhiliyale nlamulonaka . . . kontha unaahala wuncereriya uttalivaca wo mahuku ni myaakha caa cookumi ni nnema.’ (Miruku 3:1, 2) Caapheelaaka miiva ukhalana ukumi woottaliva ni wonnema! Ciicammo kihosoma ala moolumo ala: ‘nyu afentyaaka,  ukhala wiira nihaana cooweherera, niirapihe cootakhala coothene mwiirutthuniwihu ni nnepeehu, nilamalelihaka unreerihela woomoova Nluku.’ (2 Akorintu 7:1) Coo, kihohiya coohapala, kihohiya weetta ni anannyatha ni kihanca unswalela Nluku.

“Kirii owoopweene nhina muutthumirini coohapala myaakha 17 uttuli. Ukumyaaka urii saana, amucyaaka akhanlee ootteeliya, kihaana asipatthannyaaka omaana ni ankhilyaaka oolankala. Ni, kahi toko waawuluwesaaka mphironi nlattu woohapaliya, nnava kinrupa wootteeliyeene wankorini waka uhiyu woothene.”

“Waaryaaka mmiravo, kahokela unammalukuni”, nhimya Bambang, “ni enci yaatuphelaaka yaakhala atthu onihimo nankani naakirusa.”

“Masi, nuuwakathyaaya kahancera untotha Nluku. Ukathi yooyo kahophwanya mphwinko mmoca waathukumanela wiitthuca Cowantikhiya Cowaarya. Kahaakheleliya saana ni atthu yaayo yaari onihimo naakirusaka. Ciicammo kahoona wiira mweemmwe mumphwinkoni mmwe yahaavo atthu oovirikana ikhapila masi anari oovaranaca ni ootteeliya. Kahokhala ootikinihiya venci cinene.” Ukathi yooyo phaacuwelenlyaaka itthu inhimyaaya itextu ineera: ‘Nluku khanthanla ikhapila, masi, wokhula ilapo, pinaatamu mmoova ni mpanka yosariya naamwaakhelela.’—Miteko 10:34-35.

“Ilelo, nrimaaka khurina-tho uthanyathanya. asipatthannyaaka oolupale akhwaawe akhanlee onihimo neenne naakirusaka. Ni Cowantikhiya Cowaarya, Nluku hokiitthuciha ufenta.”

“Waaryaaka nanlelo mmiravo, kahotthukiya imaara tthaaru—imaara piili nlattu wo wiinnya ni imaara imoca nlattu wonhoma nlopwana mmoca ni mwaalo,” nhimya Garoga. “Uwakathi nkhwaawe kahotakaneela nkupitti wo anammalukuni ni kahowiiva atthu enci. Waamanlyaaya ila inttevweela, kahancera uhoolela nkupitti waanyonkaca atthu. Miiva keettaka ni  atthu ookikhalenla. Miiva kaari nsene ni kaanoopiha.”

“Nihuku nimoca kahosoma ila itextu ila: ‘Nifento ninaavileliha ni ninaapankiha yomaana. Nifento khaninkhalana ihace, khanineettottopela, khannihimyahimerya, khanimpankiha uhinamaana, khanineehoolelihera coopheela cowanrimani, khaninviruwela. Khaninttharatthara upaciya.’ (1 Akorintu 13:4, 5) Ala moolumo ala yahokivara nrima. Vano kahothamela nipuro nikina, kihosoma Nuulumo na Nluku ni uvarela nteko ikano caya muukumini waka”.

“Ilelo akinakhala-tho nanttevo. Uhiya ukhala commo, kinhisimwiya ukhala mwiitthucihi o Nuulumo na Nluku. Kinaasukhurwela makhalelo aka ni ukumyaaka uhaana yoolakela yokhweeli.”

Nnya ni cootakihera cinci cikina cinawoonihera wiira “Nuulumo na Nluku nikumi ni ninaathoonyera ikuru.” (Maberewu 4:12) Ikano caya khacinrikarika, cinkhala coovareliya nteko ni cinaanlipihera ntthu.

Niireke Cowantikhiya Cowaarya pooti wuukavihera weeva? Iyee. Nnyo pooti wuukavihera ucuwela yoopanka, wariyari wo khula masankiho arinaa. “Cowantikhiya coothene ciphattuwalee wa Nluku ni cikhanlee co wiitthuciha, coovaanyiha nuuhimerya, wookolela, weettiha nsariyani, wowiira anontthara Nluku akhale ookhitiri uvarela, oolikaneliya wiira apanke miteko comaana.”—2 Timotiyu 3:16, 17.

Vano nttwee noone meetthuciho moolupale ucuwela, akhumaniye nhina mu Cowantikhiya Cowaarya.