NLUKU ahaahimerya anonswalela wiira waamini waya waanaahala uttehiya. Nuulumo nawe ninhimya wiira: “Nkhale owiikhalihera, nhiitthaale. Nwananiinyu Tiyapu, nweettani uttuli khampa kharamu neepa nrunkulu antothaka ntthu onkhura.” (1 Peturu 5:8) Sotwani nhala upanka isiyani woomananiha utankanya waamini waa?

Sotwani atthunaka pooti waaruma atthu akina, hataa ale anaafentaa, wiira oonyoonyihe uwehaweha nhina waya Cowantikhiya Cowaarya. Phimaana Yesu ahopacerera uhimya eeraka: “Alupatthi a pinaatamu anhala ukhala atthu owanlokoni nawe.” (Matewus 10:36) Pooti ukhalaka wiira amucya ni asipatthannyaa owuuwacera khancuwela ikhweeli comaana co Nuulumo na Nluku. Awula pooti woovaka cinhalaaya woonela atthu akina. Masi Nuulumo na Nluku ninhimya coo: “Waattettemela apinaatamu unkhala weerya ntapha, masi ule nonkhuluvela Yehova nrwaa ukhaliheriya.” (Miruku 29:25) Woolwaanaka usoma Nuulumo na Nluku wiira waatteelihe nrima atthu akina, Nluku inaahala uncivela? Mena! Wiikina, nathoonyiheraka waamini weekhweeli, Nluku naanikavihera. “Hiiva khaninakhala atthu anhokoleela uttuli wuutankanyiyani, masi nikhanlee atthu owaamini, wiira noopole ukumiihu.”—Maberewu 10:39.

Wuupuwelele ihantisi ya Dumas, yoopeliye mwaha. Woopacapaca, amwaarawe yanantarawa nlattu wo waamini wawe. Masi uhoolo ayova yahanca usoma Nuulumo na Nluku nkhayi ni uyova. Inanna imoca, wakhanyereraka upanka cooloka, pooti weeriha asimpwanaa ni amucyaa upanka itthu imocaaru. Imaara cinci, mmuci hinwehaweha cookupali ca ntthu rina waamini weekhweeli, ‘naatthemiya woohinuulumo, masi ni meettelo ooreera’ wamoca ni ihisima inthoonyeraawe.—1 Peturu 3:1, 2.

Sotwani ciicammo naatteha woopuweleliha atthu wiira ayova kharina ukathi woosoma Nuulumo na Nluku. Mpheela wiira isukhuli ni nsurukhu ni citthu cikina coveekha muukumini, ‘caamelelihe Nuulumo na Nluku’ wanrimani waya wiira waamini waya ‘uhiimihe mihokorokho’. (Markus 4:19) Unyeme muupuwelelo ala oohiloka! Nuulumo na Nluku ninhimya: “Ukumi woohimala phuula, ahaana yuucuwelaka weeva ukhanle Nluku  mmoca okhweeli, ni ule unveleelihalyaa, Yesu Kristu.” (Joau 17:3) Khweeli, uhihiyerera umwiitthucera Nluku ni Yesu, Mesiya, itthu yuulupale imphwanyiha ukumi woohimala upeephoni!

Umuupuwelele Moses, aakhala ni amuci aamwene u Egitu. Uyova pooti waahalaawe ukhalana mihakhu, usamihiya ni Ukhala Nkulupale. Masi Moses ahothanla “uhuvihiya wamoca ni nloko na Nluku, uhiya ukhalana mpuha weetampi uhimpica uvira.” Kontha isiyani? “Kontha nenne nenne aakhala khampa oomoona Ule hinoonnyaa.” (Maberewu 11:24, 25, 27) Moses khweeli aholipihaca umwaamini Nluku. Uyo ahohooleliha yootthuna ya Nluku, ni uhiya uttuli cancivela wanrimani wawe, ni ahovahiya iparakha cinci nlattu wo iyo. Weeva wapanka ciicammo, Nluku naahala wuuvaha iparakha.

Toko kharamu, Sotwani pooti umananiha ni mananna menci ‘wuukhura’. Masi uhinhiyerere oovaraka. Nuulumo na Nluku nnaanirunyela: “Mmweese ittuli Tiyapu, ni uyova naahala wuutthawani.” (Tiyaku 4:7) Unhala umweesa ittuli cani Sotwani?

Ukhanyerere usoma Cowantikhiya Cowaarya. Usome Nuulumo na Nluku mahuku oothene. Ufuntte cineetthucihaaya. Uvarele nteko ikano caya. Wapanka coo, weeva unhala wiiwarela “ikaruma yoolikana ya Nluku,” inhala wuukavihera uyaakiha mmalupatthoni a Sotwani.—Efesu 6:13.

Umweettane ntthu rina waamini weekhweeli. Upheele upatthani wo ale ansoma, aneetthuca ni aneettela Cowantikhiya Cowaarya. Atthu yaala anawoonihera waalemeliha akhunanaya, wiira ‘akhitiri uthoonyerana nifento ni upankelana miteko comaana, . . . asovenrihanaka’. Ayo anaahala wuukavihera ukhomaaliha waamini waa.—Maberewu 10:24, 25.

Umwaattamele Yehova. Ulompe unlepelaka Nluku wiira ookavihere ni unkhuluvele. Uhiliyale: Nluku mpheela wuukavihera. ‘Unttikhele usankawaa woothene, kontha uyo nawuukhalihera.’ (1 Peturu 5:6, 7) ‘Nluku ookhuluvelyaa, ni uyova khanhala wuuhiya uttehiyaka wahinhalaa ukhitiri, masi wamoca ni uttehiya naahala wuuvaha ciicammo inanna, wowiira ukhitiri uvilela.’—1 Akorintu 10:13.

Sotwani nantarawaca Nluku, ahimyaka wiira khaavo nhala ukhitiri umweettela uyova wariyari wo masankiho. Masi weeva uhaana ukathi woopheela uthoonyera wiira Sotwani moothi. Nluku neera coo: “Ukhalane ankhili . . . wankitteelihaa nrima, wiira kimwaakhule ule nkiveehaca.” (Miruku 27:11) Uminyaalele uthoonyera wiira weeva uhaana waamini weekhweeli.