MWAHA WOOSOMIYA 42
Munkavihere ntthu nonsomiheenyu Ibiiblya urwaa uhoolo mpaka wampattisiyaawe—Mphantte 2
“Uhihiye wiiweheeha weeva ni uweheeha mananna cineetthucihaa.”—1 TIM. 4:16.
NCIPO 77 Luz Num Mundo Sombrio
NINHALA WIITTHUCANI? *
1. Nincuwela cani wiira nteko wo waapanka eetthuci ukhanle nteko unoopola ukumi waatthu?
NTEKO wo waapanka eetthuci ukhanle nteko unoopola ukumi waatthu! Nincuwela cani iyo? Ukati Yesu waarumalyaawe attharyaawe itthu yantikhiye nhina Matewus 28:19, 20, uyo ahowiirela: “Nrwee, . . . mwaapanke eetthuci, . . . mwaapattisaka.” Kontha isiyani ntthu haana apattisiyaka? Kontha upattisiya phi itthu inhala unkhitiriha uphwanya ukumi woohimala. Ntthu nopheela upattisiya haana aaminiki wiira hiiva ninhala uphwanya ukumi woohimala nlattu Yesu woovaherera ukumyaawe ni ukhwa wiira anoopole. Phimaana, apostolu Peturu ahowiirela makristau akhwaawe: ‘Upattisiya unaawoopolani nenna co nlattu wo wumwelelihiya Yesu Kristu.’ (1 Pet. 3:21) Coo, ntthu nosomihiya Ibiiblya apattisiyaka, uyo pooti uweherera uphwanya ukumi woohimala wahoolo.
2. Hiiva ninvara nteko woowiitthuciha atthu, isiyani inkurumiciyeehu nhina 2 Timotiyu 4:1, 2?
2 Wiira nikhitiri waapanka eetthuci, nihaana ‘niitthucihaka ratta.’ (Nsome 2 Timotiyu 4:1, 2. *) Kontha isiyani? Kontha Yesu honiruma co: “Nrwee, . . . mwaapanke eetthuci, . . . mwawiitthucihaka.” Apostolu Paulu heera wiira nihaana ‘uvaresesa’ ula ntekoola, ‘kontha napankaka commo ninaahala wiicoopola hiiva ni ninaahala uwoopola atthu anniviriyana.’ Phimaana, apostolu Paulu ahaana isariya ukati wenryaawe: ‘Uhihiye uweheeha mananna cineetthucihaa.’ (1 Tim. 4:16) Ukhala wiira nihaana niwiitthucihaka atthu wiira naapanke eetthuci, nimpheela wiikurumica wiira nicuwele wiitthuciha ratta.
3. Ninhala wiitthucani nhina ula mwahoola?
3 Hiiva ninawaasomiha Ibiiblya atthu enci ntuninyani motheene. Masi toko cihimiyaaya nhina mwaha uvinre, nimpheela waakavihera ayo atthwaayo wiira apattisiye. Nhina ula mwahoola, ninaahala woopela mwaha citthu 5 cinlamuliyaawe upanka khula ntthu nosomiha Ibiiblya wiira ankavihere ntthu nonsomihaawe urwaa uhoolo ni upattisiya.
NVARELE NTEKO IBIIBLYA UKATI WO WIITTHUCIHA
Munlepele namalalyeera okhalayi wiira ookavihereni ukhitiri uvarela nteko Ibiiblya ukati wonsomiha ntthu (Nwehe iparaagarafu 4-6) *
4. Kontha isiyani ntthu nosomiha Ibiiblya haana eevaracaka? (Nwehe ciicammo niwehero no vathi ipaagina.)
4 Hiiva cinaanicivela ikhweeli co mbiiblyani cineetthuciheehu. Phimaana hiiva pooti upheela wuuluma cinene nnyo ikhweelinnyo. Masi, ukati woosomiya irevista Ukhalenla, usomiya Ibiiblya wanlokoni awula ukati woosomihiya ntthu Ibiiblya uwannyawe, ule nosomiha khanlamuliya wuulumana cinene. Ule nosomiha haana eevaracaka wiira ahiye Ibiiblya yuulumaka ni khanlamuliya utaphulela citthu cotheene cincuwelaawe nhina mwaha uneetthucihaawe. * (Joau 16:12) Muupuwele myaha co mbiiblyani caacuweleenyu ukati upattisiyeenyu ni nlattanihe ni citthu cincuweleenyu nnava. Atthunaka ule ukatyuule, nyuuva mwaacuwela paahi ikhweeli cofayita, coohitepa urika. (Mabere. 6:1) Ni cihovira myaakha cinci wiira mwiitthuce citthu cincuweleenyu nnava. Phimaana, ukati wonsomiha ntthu Ibiiblya, nhimananihe umwiitthuciha citthu cotheene wonkwaha mmoca.
5. a) Toko cinthoonyeraaya 1 Atesalonika 2:13, hiiva nimpheela unkavihera ntthu nonsomiheehu Ibiiblya ucuwela isiyani? b) Isiyani ninlamuliyeehu upanka wiira ninkavihere ntthu nonsomiheehu Ibiiblya wuuluma citthu cineetthucaawe?
5 Nimpheela unkavihera ntthu nonsomiheehu Ibiiblya ucuwela wiira citthu cineetthucaawe cinkhuma nnuulumoni na Nluku. (Nsome 1 Atesalonika 2:13. *) Ninhala upanka cani iyo? Munkurumice wuuluma citthu cineetthucaawe. Uhiya untaphulela iveerusu co mbiiblyani cotheene, munlepele wiira uyo ataphulele itthu inhimyaaya. Munkavihere woona mananna cinlamuliyaawe weettela muukumini wawe citthu cineetthucihaaya Nuulumo na Nluku. Mpanke makoho anhala unkavihera uhimya itthu inoopuwelaawe nhina iveerusu isomalyaawe. (Luka 10:25-28) Munkohe toko co: “Nhina ila iveeruswiila, nhoona mananna Yehova ciryaawe awula makhalelwaawe?” “Itthu yiitthucaleenyu va inhala wuukaviherani cani?” “Nnoonela cani itthu yiitthucaleenyu va?” (Miru. 20:5) Itthu impheeleehu cinene khunakhala wiira ntthu nonsomiheehu Ibiiblya eetthuce citthu cinci, masi nimpheela wiira cincivele ni eettele citthu ciitthucalyaawe.
6. Kontha isiyani wanhala ureera nlattula namalalyeera okhalayi wiira aniveleele ukati unrweehu unsomiha ntthu Ibiiblya?
6 Nyuuva ukati woorwaa unsomiha ntthu Ibiiblya, nnawaalattulaka anamalalyeera okhalayi wiira yuuveleeleni? Mwaalattulaka, mwaalepele uweheeha mananna nyuuva cinsomiheenyu Ibiiblya ni mwaalepele wuuhimyerani wakhala wiira nyuuva nnaavarela nteko Ibiiblya saana awula mena. Nyuuva nhaana mwiiyevihaka wiira ncuwele wiitthuciha saana. (Nwehe ciicammo Mite. 18:24-26.) Ciicammo, munkohe namalalyeera okhalayi munlattunleenyu wakhala wiira ntthu nonsomiheenyu Ibiiblya nawiiweeha saana awula mena ikhweeli cinonsomiheenyu. Ni moonaka wiira nnaahala uviriha isumana imoca awula cinci woohikhitiri urwaa unsomiha, munlepele uyo wiira arwee ansomihe. Iyo inaahala unkavihera ntthu nonsomiheenyu woona wiira usomihiya Ibiiblya ikhanle itthu yofayita. Nhuupuwele wiira thi nyu nnolamuliya unsomiha paahi, woohikhala ntthu nkhwaawe. Muupuwele wiira nnopheela unkavihera uhihiya wiitthuca ikhweeli.
NTHOONYERE WIIRA CINAWUUCIVELANI NI NNAAKUPALI CITTHU CINEETTHUCIHEENYU
Munttonkele matakihero o mayamunna ni asirokorihu akhitinri waanana marikariko. Mwapankaka commo, uyo naahala woona wiira Ibiiblya inaahala unkavihera muukumini wawe (Nwehe iparaagarafu 7-9) *
7. Isiyani inhala unkavihera ntthu nonsomiheehu Ibiiblya uncivela citthu cineethucaawe?
7 Ntthu nonsomiheehu Ibiiblya haana oonaka wiira hiiva cinaanicivela ni ninaakupali ikhweeli co mbiiblyani. (1 Atesal. 1:5) Commo, uyo atthunaka cinaahala uncivela citthu cineetthucaawe. Ikwaha cikiina, nyuuva pooti unhimyera mananna Ibiiblya cuukavihenryaayani muukumini winyu. Mwapankaka commo, uyo naahala ucuwela wiira Ibiiblya ihaana malakihero omaana anhala unkavihera uyoova ciicammo muukumini wawe.
8. Isiyani-tho inlamuliyeenyu upanka wiira munkavihere ntthu nonsomiheenyu Ibiiblya, ni kontha isiyani nhaana upanka iyo?
8 Ukati unonsomiheenyu ntthu Ibiiblya, munttonkele matakihero o mayamunna ni asirokorihu akhitinri waanana marikariko anaananaawe uyova. Ni pooti unkusa munna o wanlokoni nomooneenyu wiira ntakihero nawe ninaahala unkavihera ntthu nonsomiheenyu Ibiiblya. Awula nyuuva pooti uphwanya myaha ni ividiyu nhina jw.org, mphantte wantikhiye “A Bíblia Muda Vidas.” * Myaha ni ividiyu cinhaleenyu uphwanya uyo mphanttyooyo, pooti unkavihera ntthu nonsomiheenyu woona wiira Ibiiblya inaahala unkavihera muukumini wawe.
9. Manannani cinlamuliyeenyu unkurumica ntthu nonsomiheenyu Ibiiblya wiira aahimyere amucyaawe ni asipatthannyaawe citthu cineetthucaawe?
9 Wakhala wiira ntthu nonsomiheenyu Ibiiblya hothela awula hotheliya, niireke amwaarawe awula awannyawe ciicammo anaasoma Ibiiblya? Wakhala wiira khansoma, mwaalattule wiira naayo ciicammo akhale ukati unonsomiheenyu Ibiiblya uyo ntthuuyo. Munkurumice ntthu nonsomiheenyu Ibiiblya waahimyera citthu cineetthucaawe amucyaawe ni asipatthannyaawe. (Joau 1:40-45) Nnohala unkurumica cani wiira apanke iyo? Nyuuva pooti unkoha co: “Mwaahala waataphulela cani amuciinyu ila ikhweeliila?” awula “Iveerusuni yo mbiiblyani yaahaleenyu usoma wiira munthoonyere mpatthaniinyu ila ikhweeliila?” Mwapankaka commo, nyuuva nnaahala umwiitthuciha ntthu nonsomiheenyu Ibiiblya wiira nuuyo ancere uwiitthuciha akhwaawe. Ni wakhalaka wiira heetthenkaca, uyo pooti ukhala namalalyeera oohipattisiya. Ciicammo, munkohe ntthu nonsomiheenyu Ibiiblya wakhala wiira nancuwela ntthu nkiina nopheela wiitthucihiya Ibiiblya. Wakhala wiira haavo ntthu noncuwelaawe, mmuulumane uyo ntthuuyo woohipica ni munlattule wiira mwancere ciicammo unsomiha Ibiiblya. Munthoonyere ividiyu Inkhumelela Isiyani Yeesomiyaka Ibiiblya? *
MUNKURUMICE NTTHU NONSOMIHEENYU IBIIBLYA WAAKHALANA APATTHANI WANLOKONI
Munkurumice wiira aapatthanane atthu o wanlokoni (Nwehe iparaagarafu 10-11) *
10. Isiyani inlamuliyeenyu upanka wiira muntakihe Paulu toko cinttonkiyaaya nhina 1 Atesalonika 2:7, 8?
10 Nhaana mwaawaceraka atthu anaasomiheenyu Ibiiblya. Mwaawehere khampa atthu anhala ukhala wahoolo mayamunneenyu awula asirokorinyu o wanlokoni. (Nsome 1 Atesalonika 2:7, 8. *) Waahiya apatthani o ntuniyani ni upanka marukunuso muukumini wiira answalele Yehova ikhanle itthu yoorika ipankalyaaya. Nihaana naakaviheraka waaphwanya apatthani eekhweeli wanlokoni. Mumpatthanane ntthu nonsomiheenyu Ibiiblya kahi paahi ukati unonsomiheenyu, masi ciicammo ukati nkiina. Mwanlikarelaka, umwantikhela imensagem ntelefooneni awula mwamootolaka, uyo naahala woona wiira nyuuva khweeliini nnanwacera.
11. Isiyani inaapheeleleehu wanlokoni atthu anaasomiheehu Ibiiblya, ni nlattuni?
11 Ahaavo aneera: “Watthokoni ri mwaana, atthu otheene pooti unkavihera wuunuwa.” Ni hiiva pooti waneereehu wiira wanlokoni, atthu otheene pooti unkavihera ntthu nonsomiheehu Ibiiblya. Phimaana, anamalalyeera oocuwelaca anankavihera ntthu nonsomihaaya Ibiiblya waacuwela atthu akhwaawe o wanlokoni. Iyo inankavihera ntthu nonsomiheehu Ibiiblya waapatthanana atthu anonswalela Nluku ni ayo pooti unkavihera akhalanaka marikariko. Hiiva nimpheela wiira khula ntthu nonsomiheehu Ibiiblya eecooneke ukhala ntthu o wanlokoni ni mmuciihu oominepani. Nimpheela wiira uyo nincivele nloko nihu no mayamunna ni asirokorihu oofentana. Coo, uyo khunhala unrika uhiya waapatthanana atthu ahinhala unkavihera unswalela Yehova. (Miru. 13:20) Uyo khanhala usanka atthu yaapatthananaawe khalayi yankhottaka, kontha naahala ucuwela wiira haana apatthani eekhweeli iriyari waapoovu a Yehova.—Mark. 10:29, 30; 1 Pet. 4:4.
KHULA UKATI MOOPELE MWAHA WIIVAHERERA NI UPATTISIYA
Cihaavo citthu cinci cinlamuliyaawe upanka ntthu nonsomiheehu Ibiiblya wiira apattisiye! (Nwehe iparaagarafu 12-13)
12. Kontha isiyani nihaana noopelaka mwaha wiivaherera ni upattisiya ukati wonsomiha ntthu Ibiiblya?
12 Khula ukati, munhimyere wiira ntthu haana avahereraka ukumyaawe wa Yehova ni upattisiya. Itthu impheeleehu ukati wonsomiha Ibiiblya uyo ntthuuyo, ukhanle unkavihera unswalela Yehova ni upattisiya. Phimaana, caviraka myeeri vakaani ninsomihaka Ibiiblya woohihiyerera, ni venci-venci wakhalaka wiira uyo hancera uwa umikutthaanoni, uyo haana acuwelaka wiira hiiva ninonsomiha Ibiiblya kontha nimpheela unkavihera ukhala Saahiti a Yehova.
13. Citthuni cinlamuliyaawe upanka ntthu nonsomiheehu Ibiiblya wiira apattisiye?
13 Cihaavo citthu cinci cinlamuliyaawe upanka ntthu nonsomiheehu Ibiiblya wiira apattisiye. Yoopacera, uyo haana uncuwela, unfenta ni umwaamini Yehova. (Joau 3:16; 17:3) Vano, uyo haana anceraka umpatthanana Yehova ni ciicammo mayamunneehu ni asirokorihu o wanlokoni. (Mabere. 10:24, 25; Tiya. 4:8) Uyo haana unriipa nrima venci nlattu wo citthu cootakhala caapankaawe ni haana alakelaka uhiya upanka nnyo citthunnyo. (Mite. 3:19) Uyo ukatyuuyo, waamini wawe unaahala umwiiriha waahimyera akhwaawe citthu cineetthucaawe. (2 Akor. 4:13) Vano, uyo naavaherera ukumyaawe wa Yehova ni naapattisiya wiira athoonyere waatthuni wiivaherera wawe. (1 Pet. 3:21; 4:2) Nno ninkhala nihuku atthu otheene nintteeliyaaya nrima! Namasoma Ibiiblya eekurumicaka upanka nnya citthunnya wiira apattisiye, munttottopele ni munkurumice wiira hihiye urwaa uhoolo.
NHIHIYE UNWEHACERA NTTHU NONSOMIHEENYU IBIIBLYA WAKHALA WIIRA RI MOORWAA UHOOLO
14. Manannani cinhaleehu unwehacera ntthu nonsomiheehu Ibiiblya wakhala wiira ri moorwaa uhoolo awula mena?
14 Wiira ninkavihere ntthu nonsomiheehu Ibiiblya uvaherera ukumyaawe wa Yehova ni upattisiya, nihaana nivilelaka. Masi, unaahala uphiya ukati unhaleehu utotha ucuwela wakhala wiira uyo khweeliini naapheela unswalela Yehova Nluku awula mena. Munnokhitiri woona citthu cimpankaawe cinthoonyera wiira uyo nawiikurumica wiiwelela malamulo a Yesu? Awula nopheela paahi wiitthuca ikhweeli co mbiiblyani?
15. Citthuni cinlamuliyeenyu wiikoha cinhala wuukaviherani ucuwela wakhala wiira ntthu nonsomiheenyu Ibiiblya ri moorwaa uhoolo awula mena?
15 Nhihiyerere unwehacera ntthu nonsomiheenyu Ibiiblya wakhala wiira ri moorwaa uhoolo awula mena. Wootakihera, uyo nawuuluma mananna cimmoonelaawe Yehova? Nanlompaka Yehova? (Isaa. 116:1, 2) Unancivela usoma Ibiiblya? (Isaa. 119:97) Naarwaaka umikutthaanoni woohilova? (Isaa. 22:22) Naapanka marukunuso muukumini wawe anthoonyera wiira naweettela citthu cineetthucaawe? (Isaa. 119:112) Hancera waahimyera asimucyaawe ni asipatthannyaawe citthu cineetthucaawe? (Isaa. 9:1) Ni itthu yuulupale cinene inlamuliyeenyu wiikoha phi ila: naapheela ukhala Saahiti a Yehova? (Isaa. 40:8) Wakhala wiira ntthu nonsomiheenyu Ibiiblya khampanka nnya citthunnya, ntothe ucuwela nlattuni, ni mmuulumane niihisima masi woohinkhuwakhuwa. *
16. Isiyani inhala unikavihera ucuwela wiira nihaana nihiyaka unsomiha ntthu Ibiiblya?
16 Nhihiye unwehacera ntthu nonsomiheenyu Ibiiblya wakhala wiira nanlelo nhaana munsomihaka awula mena. Mwiikohe co: ‘Ntthu nonsomihaaka Ibiiblya khantthenkaca khalayiiru myaha cinrwaaka unsomiha? Unannyoonya urwaa umikutthaanoni? Nanlelo naapanka citthu cootakhala? Nanlelo naweettela ittiinnyaawe?’ Mwaakhula ‘iyee’ makoho otheenne ala, niireke wanhala ureera ukhanyerera unsomiha? Ukhanyerera unsomiha ntthu hinthoonyera wiira khweeliini cinancivela citthu cineetthucaawe ni hintthuna urukunusa makhalelwaawe, waahala ulikanaca nuumananiha umwiitthuciha urampela mmaacini ntthu himpheela unaana!
17. Toko cinthoonyeraaya 1 Timotiyu 4:16, isiyani inlamuliyaaya upanka ale aneetthuciha Ibiiblya?
17 Ninaacuwela ifayita urinaaya nteko wo waapanka eetthuci, ni nimpheela waakavihera atthu anaasomiheehu Ibiiblya urwaa uhoolo ni upattisiya. Phimaana ninaavarela nteko Ibiiblya ukati woowiitthuciha ni ninaathoonyera wiira ikhweeli cinwiitthuciheehu cinaanicivela ni ninaakupali. Ninawaakurumica atthu anaasomiheehu Ibiiblya wiira yaapatthanane atthu o wanlokoni. Hiiva ninawaathoonyera wiira uvaherera ukumyaaya wa Yehova ni upattisiya ikhanle itthu yofayita ni khaninhala uhiya waaweheeha nitothaka ucuwela wakhala wiira ari moorwaa uhoolo awula mena. (Nwehe ikwaaturu “ Isiyani inlamuliyaaya upanka ale ansomiha Ibiiblya wiira yaakavihere atthu anaasomihaaya upattisiya?”) Unaanitteela nrima nlattu wookhalana iparakha yoovara ula nteko woowoopola atthuula! Nilakele upanka yotheene inhaleehu ukhitiri wiira naakavihere atthu anaasomiheehu Ibiiblya urwaa uhoolo ni upattisiya.
NCIPO 79 Mwaakavihere ukhala oolipa
^ par. 5 Nanceraka unsomiha ntthu Ibiiblya, hiiva ninaakhalana iparakha yuulupale yonkavihera uyo ntthuuyo wuupuwela ni upanka citthu ni mananna anontteeliha nrima Yehova. Ula mwahoola unaahala utaphulela isiyani ninlamuliyeehu upanka wiira niitthucihe saana.
^ par. 2 2 Timotiyu 4:1 Kinawuuruma uhoolo wa Nluku ni wa Yesu Kristu, nohala waahukhumu atthu akumi ni akhwile, wanhalaawe uwa muumweneni wawe: 2 Ulalyeere nuulumo; waakuvele upanka iyo, ukati woohirikarika ni hataa ukati woorikarika; waahukhumu, waavaanyihe, waahimyere, wooniheraka uvilela ni wiitthuciha ratta.
^ par. 4 Nwehe mwaha “3 Erros Comuns ao Dirigir Estudos Bíblicos” nhina mwaalivuru Vida e Ministério Cristãos o Setembro 2016.
^ par. 5 1 Atesalonika 2:13 Phimaana ciicammo khaninhiya unsukhurweela Nluku cinene, kontha ukati waakhenleenyu nuulumo na Nluku nuuhimyenreehuni, nyuuva khamwaakhenle muupuwelaka wiira nikhanle nuulumo naapinaatamu, masi mwaakhenle ncuwelaka wiira nikhanle nuulumo na Nluku, toko cinkupaliinyu.
^ par. 8 Nkele wantikhiye QUEM SOMOS > EXPERIÊNCIAS.
^ par. 9 Nhina jw.org, nkele wantikhiye IBIBLIYOTEKA > IVIDIYU > MIKUTTHAANO CIHU NI NTEKWEEHU WOOLALYEERA > IKARUMA CO WUULALYEERANI.
^ par. 10 1 Atesalonika 2:7 Uhiya commo, hiiva nihiiyeviha iriyariinyu, toko nthiyana nowaamwiha ni naamaaliha asaanaawe. 8 Coo, nithoonyeraka wuuwacerani, khanaalakenle wuuhimyerani ihapari comaana ca Nluku paahi, masi ciicammo naholakela uvaherera ukumiihu wotheene, kontha ninawuufentani venci.
^ par. 15 Nwehe myaha “Unfenta ni unsukhuru Yehova unansovenriha ntthu upattisiya” ni “Uheetthenkaca wiira upattisiye?” nhina irevista Ukhalenla yo Março 2020.
^ par. 80 ILATARATO: Umaliha wawe unsomiha ntthu Ibiiblya, nrokorihu naakaviheriya naarokorihu yancenre ulalyeera khalayi wiira hitepe wuuluma cinene ukati wonsomiha ntthu Ibiiblya.
^ par. 82 ILATARATO: Ukati unsomihiyaawe Ibiiblya, nthiyana nawiitthuca mananna ookhala nthiyana omaana watthokoni. Wahoolo, uyo nawaahimyera awannyawe itthu yiitthucalyaawe.
^ par. 84 ILATARATO: Nthiyana nosomihiya Ibiiblya naarwaa wamoca naawanyawe uwanuwaya asipatthannyaawe yaacuwenlyaawe Usalau yo Umwene wiira awoopane mwaha.
