Mwancuwela?
Kontha isiyani anatoropa a mwene Davidi waatakanenlyaaya naatthu olapo cikhwaawe?
ATTHU olapo cikhwaawe yaatakanenle naanatoropa a mwene Davidi, ahaavo Zelekhi, mmonita; Uria, nhitita; ni Itma, mmowabita. a (1 Ikor. 11:39, 41, 46) nhina anatoropa a Davidi yaahaavo ciicammo “a keretita, mapeletita ni mageteu.” (2 Sam. 15:18) Makeretita ni mapeletita atthunaka yaakhuma iriyari yo mafilisteu. (Ezek. 25:16) Mageteu atthunaka yaakhuma isittatti yo mafilisteya o Gate.—Jos. 13:2, 3; 1 Sam. 6:17, 18.
Masi kontha isiyani Davidi waatthunihenryaawe ayo alopwanaayo wiira apanke mphantte waanatoropaawe? Uyo ankhuluvela wiira ayo alopwanaayo yaari ookhuluvelya wamiithoni wawe, ni venci-venci wamiithoni wa Yehova. Wootakihera, disionario mmoca o Ibiibiliya heera co awaacaka makeretita ni mapeletita: “Ayo khayanhiile mwene Davidi hataa ukati womarikariko muumweneni wawe.” Manannani ayo yoonihenryaaya ukhuluvelya waya? Ukati alopwana otheene o Isarayeli waahiilyaaya untthara mwene Davidi wiira antthare nlopwana eehaniya Seba, makeretita ni mapeletita khayaahiile untthara mwene Davidi ni yahonkavihera ummalamaliha nanrokottole ahaculacilyaawe Seba. (2 Sam. 20:1, 2, 7) Ikwaha ikhwaawe, mwaana a Davidi, Adonia, waapheelaawe ukhala mwene nipuro na Salomau. Masi, makeretita ni mapeletita khayanhiile Davidi ni yahonkavihera Salomau ukhala mwene, kontha Yehova phanthanlale.—1 Mam. 1:24-27, 38, 39.
Nlopwana nkhwaawe ahaari nsarayeli ahanhiile Davidi aari Itai, ngeteu. Itai ni alopwana 600 yaaweettanaawe, yahonkavihera mwene Davidi ukati waarukunuweliyaawe ni mwanawe Absalau ni aapheela wiira asarayeli otheene anrukunuwele. Wiirapaceroni, Davidi ahomwiirela Itai wiira khaalamuliya wiikeliha ikhotto Davidi yaarinaawe nimwanawe ukhala wiira khaari nsarayeli. Masi Itai woomwaakhula enre: “Ukhale wootthuna wa Yehova, ni wootthuna winyu pwiiya, amwene, nkhale mahuku menci, hataa nkhalaka nipuroni, nwo phinhalaawe ukhala nantekweenyu, hataa nikhalaka nipuro nookhwiya awula mena!”—2 Sam. 15:6, 18-21.
Itai ahonvaresesa Davidi, mwene oothanliya ni Yehova
Hataa ukhalaka wiira makeretita, mapeletita ni mageteu khayaari asarayeli, ayo yancuwela wiira Yehova khanle Nluku eekhweeli ni Davidi aathanliye ni Yehova. Khweeliini Davidi anaasukhuru venci, nlattu wookhalana ayo alopwana ookhuluvelyaayo ni yaahaahiya ukhala mphanttyaawe!
a Toko nlamulo na Yehova nivahilyaawe nimphwanyannya nhina Deuteronomiyu 23:3-6, maamonita ni mamwaabita yaanateelihiya ukela wanlokoni naasarayeli. Masi nno nlamulonno ukhala toko nawaaca paahi ayo atthwaayo wiira khayaalamuliya ukhala asarayeli, toko uhiya nloko naya wiira akhale nsarayeli, masi khanaakhottiiha ayo atthwaayo waapatthanana apoovu a Nluku. Nwehe “Amonitas” nhina Estudo Perspicaz das Escrituras Vol. 1, ipaag. 114.
